Isaiah 8

Mien Bible (Thai Script) © Thailand Bible Society, 2007

← Chapter 7 Jump to: Chapter 9 →

1เฒี้ยว ก๊อง บั๋ว เยีย, “เฒาะ คว้าย กะน้าย โฮล เญย ต้าย เฟี้ย โพว-ทง เญย หฑั่ง ก๊อง, ‘มาเฮซาลานหัดบัด’.

2เยีย หย่า เห่ว อี เต้า เขา ตุ๊ ว้วน เญย เมี่ยน เถง เยีย โหฒว ฒอง-เหฒง, เซ อุลียา ไซ เมี่ยน เหธา เยเบเลคียา เญย ตอน, เสคาลิยา.”

3เยีย ฯฒฯ มี่ง เยีย เญย เอ๊า วั้ว, นิ่น ฯฒฯ ม่าย เจี๊ยน ซิน, ยู์ง ตุ๊ เต้า ตอน. เฒี้ยว ก๊อง บั๋ว เยีย, “อ๋อย หฒุ เถง นิ่น ธ้วด บั๋ว เห่ว มาเฮซาลานหัดบัด.

4น้าย เต้า ตอน ไม้ แก้ง ไฮ่ เห่ว ‘อา แต, อา มา’ เญย เฒี่ยง โห่, ดามัดกัด เญย ฒิ่น ฒ่อย เหธา เยียม สะมาเลีย ลู้ ต้าย เญย กะน้าย ฯฒฯ หฒุ อัดซีเลีย เญย ฮู่ง ธ้าง มี่ง เหฑ่ง.”

5เฒี้ยว แอ๋ง ก๊อง บั๋ว เยีย,

6“เหว่ย หฒุ เยีย เญย แปะ ฝีง เฆ่ม ซีโลอา เหลี่ยว เญย ววม-เสี่ยน, หย่า อะเฮน้ย เลซิน เหธา เลมาลิยา เญย ตอน.

7เหว่ย น้าย, เยีย, เฒี้ยว, อ๋อย ปุน ยูเฟติด ด้าย เฮ้น ไห่ เญย ววม เหยียม, เซ อัดซีเลีย ฮู่ง เหธา นิ่น เญย เหยียด ฒู้ง ฌัง-หล่าง. ววม ฯฒฯ เมี์ยน ธ้วด เหลี่ยว เหฌี่ย ด้าย เญย ติ้วๆ โด๊ะ, เหธา อี ปูง ขัม,

8แอ๋ง กว๊าด เปียะ ยูดา, เหยียม เหฑ่ง หญู่งๆ แอ๋ง เจี๋ย มี่ง ฒู้ง ฝาว เถา จาง. นิ่น อ๋อย ยัง ด๊าด ปวั๊ง เม่ย เญย เต่ย-ปูง กู้ หงว่าย, โอ อีมานูเอน.”

9หม่าน กั๊วะ เมี่ยน อ้า! หลิ่ว เล์ย เบ๊าะ จ๋า, เม่ย บัว ฯฒฯ หฒุ เบ๊าะ ฮู้ หย่า กั้ม เหฑีย. เยียม โก เญย เหยียด ฒู้ง กั๊วะ เญย เมี่ยน อ้า! อ๋อย หฒุ แปง มน่อม หมวัง. หลิ่ว เล์ย เบ๊าะ จ๋า เม่ย บัว ฯฒฯ หฒุ เบ๊าะ ฮู้ หย่า กั้ม เหฑีย. หลิ่ว เล์ย เบ๊าะ จ๋า, เม่ย บัว ฯฒฯ หฒุ เบ๊าะ ฮู้ หย่า กั้ม เหฑีย.

10เม่ย บัว กุ๊น ต๊า หฒะเอ๋ย, มป่า ไม้ ไฮ่ โหฒว ไม้ ธ้วด, กุ๊น ธ่าง ล่าง, มป่า โหฒว ไม้ ธ้วด, เหว่ย หฒุ ทิน-ฮู่ง เหธา บัว เยียม.

11เฒี้ยว หล่ง นิ่น เฮ้น ไห่ เญย ชะ เหธา เยีย ก๊อง. นิ่น ขวิน เยีย ไม้ ตู๋ง กัน น้าย เต๋ย แปะ ฝีง เญย เจ๊า. นิ่น ฮนั้ง น้าย ก๊อง,

12“น้าย เต๋ย เมี่ยน ก๊อง เป๋น เป่ย เดี๊ย ต๊า เญย หฒะเอ๋ย, เม่ย ไม้ ตู๋ง ก๊อง หญู่งๆ เป๋น เป่ย เดี๊ย ต๊า เญย หฒะเอ๋ย. นิ่น บัว กั้ม เหฑีย เญย เม่ย ไม้ ตู๋ง กั้ม เหฑีย, หย่า ไม้ ตู๋ง ปุน แฮะ หฒุ กั้น.

13เซ เน่น เจี๋ย เญย เฒี้ยว เม่ย อ๋อย หฒุ ฝุน ธีง-เหฑ่ง. เซ ต้ง นิ่น เม่ย อ๋อย หฒุ ท่าย, หย่า ต้ง นิ่น เม่ย อ๋อย หฒุ กั้ม เหฑีย.

14นิ่น ฯฒฯ เป๋น นอม สีง ติ่น มป่า เหว่ย อิสะลาเอน เหธา ยูดา เญย อี ฝีง เมี่ยน, นิ่น เป๋น เหฑี่ยง เหฒา เญย หละเปย๊ย, หย่า เป๋น ต้ม หละเปย๊ย ปุน เมี่ยน ดิ๊ หฒุ ดอบ, เป๋น มู์ง เป๋น ฮลาง เฒาะ เยียม เยลูซาเลม เญย เมี่ยน.

15เมี่ยน ธั้ม ฒู้ง ดิ๊ หฒุ วั้ว นอม หละเปย๊ย, นิ่น บัว ฯฒฯ ดอบ ฮู้ หม่วน เหฑ่ง. นิ่น บัว หย่า หฒุ ฮลาง ฮลบ, หฒุ เฒาะ มี่ง.”

16เฒาะ โหฒว ฒอง-เหฒง เญย โซว โด้ เจี๊ยน, เฒาะ หฌาว เญย หว่า เบ๊าะ เจี๊ยน เหยียน, จิว ปุน เยีย เญย ไซ-ก๋อ.

17เยีย อ๋อย ฒั้ว เจี๊ยน เฒี้ยว. นิ่น ปวัง นิ่น เญย เฮมียน ไม้ ปุน ยาโค้บ เญย เฒ้ย-ฟุน ปวัด. เยีย หย่า อ๋อย เขา นิ่น ม่าย ลั่ม ฮนั้ม ต๋อง.

18หมั่ง ม่าะ! เยีย เหธา เฒี้ยว จิว ปุน เยีย เญย น่าม โญ์ว เยียม อิสะลาเอน เมี่ยน บุด๋ง โหฒว เยียม สิโอน บง, เน่น เจี๋ย เญย เฒี้ยว, ปุน ต้าย เญย จั๋ง-โห่ เหธา เป๊ย เญย เจ๊า.

19สี ก๊อง ม่าย เมี่ยน ก๊อง บั๋ว เม่ย บัว, “มี่ง หน่าย โบ๊ว กว๋า เมี่ยน ไฟ ก๊าน เฮย เมี่ยน, เซ ก๊อง หว่า-ซับ, ก๊อง หว่า-หฌ่ม เญย เมี่ยน,” แปะ ฝีง ไม้ เฒ์ย อ๋อย หฒุ ล์อ หน่าย นิ่น บัว เญย ทิน-ฮู่ง ไฟ? หอบ หฒุ เหว่ย เมี่ยน นั่ง เมี่ยน ล์อ ไต่ มี่ง เญย เมี่ยน ไฟ?

20อ๋อย หฒุ หมวัง ทิน-ฮู่ง หฌาว เญย หว่า เหธา ฒอง-เหฒง หว่า. สี ก๊อง ไม้ เอย น้าย เต๋ย หว่า เญย เมี่ยน ฒู้ง ไม้ ตุ๊ ปวัด ลู่ง ดอม เฑี้ยว เญย ฌัง.

21นิ่น บัว อ๋อย หฒุ ขวน น่าน, เฮญี้ยว เซีย เจี๊ยน โย่ว เต่ย-ปูง. นิ่น บัว หง่อ เญย เฒี่ยง โห่ นิ่น บัว ฯฒฯ เฉีย เจี์ย ไห่, เธา เฮมียน หมั่ง กู้ หงว่าย ลู่ง, หย่า เหฒียว นิ่น บัว เญย ฮู่ง เตี๋ย เหธา นิ่น บัว เญย ทิน-ฮู่ง.

22วั้ว หฒั่น นิ่น บัว อ๋อย หมั่ง กะเดี๊ย เดา มป่า ปวัด ม่าย เฑ่า โค้ว เหธา หฮมวัง เญย สี่ ฮนั้ง, เหธา หฮมวัง เญย โค้ว หน่าน. นิ่น บัว หย่า อ๋อย หฒุ หฒุ่น เปียะ มับ แม่ง มับ หฮมวัง เญย ต๋อง.

← Chapter 7 Jump to: Chapter 9 →