Isaiah 28

Mien Bible (Thai Script) © Thailand Bible Society, 2007

← Chapter 27 Jump to: Chapter 29 →

1เอฟาอิม อ๋อย หฒุ โค้ว อ๊ะ. นิ่น เญย ฌัง-หล่าง อ๋อย เหฒี่ย เหฑ่ง, ฮนั้ง นิ่น ติ๊ว ฆวิน เญย เปย๊ย เฒ้ย ด๋ง ธิ ต้าย เญย เปี้ยง นี้ง, วั้ว เต๋ย ฌัง-หล่าง เญย เปี้ยง เหฒี่ย เหฑ่ง, เซ เยียม หญั่น เป๊ว ฮบ หฒูง วั้ว เต๋ย ฆวิน มี่ง เญย เมี่ยน เญย มฆ้อง.

2หมั่ง ม่าะ! เฒี้ยว ม่าย เต้า ม่าย ชะ เฮ้น ไห่ เญย เมี่ยน ฮนั้ง กอง ต้ม เปาะ เหธา ต้ม หฑยาว-เจี๊ยะ, หย่า ฮนั้ง เสย ไห่ เญย บยู่ง เหฌี่ย ต้าย เหยียม. นิ่น อ๋อย หล่ง ชะ ฒอย เหฌี่ย เถา เดา.

3เอฟาอิม เญย ติ๊ว ฆวิน เมี่ยน เธง-โฮล วั้ว นอม เปี้ยง นี้ง, อ๋อย หฒุ ธ้าย เหฌี่ย เหฒา-เดี๊ย.

4น้าย ฌัง-หล่าง เญย เปี้ยง อ๋อย เหฒี่ย เหฑ่ง, ต้ง เยียม เดา-จุ่น เญย ฮ์อง-ต้าว กู้ หงว่าย. เซ ฮนั้ง หฒัวะ ด่าง ธุน-เกน ฮนอย เญย ง่ง หญอ เปี๊ยว. เมี่ยน เยี้ยด ปวัด ฯฒฯ แก๊ะ ต้าย หญั่น หมี่ อ๊ะ.

5เถา วั้ว ฮนอย เน่น เจี๋ย เญย เฒี้ยว ฯฒฯ ฮนั้ง นอม ฌัง-หล่าง นี้ง, ฮนั้ง เหฑว่ย ไห่ เญย นี้ง ปุน นิ่น เหฒ่ง เหฌี่ย เญย แปะ ฝีง ด๋ง เจี๊ยน.

6นิ่น อ๋อย ปุน เซี้ยม ฒุ์ย เจียน ม่าย แป้ง ฟิม เญย เฮญี้ยว, อ๋อย ปุน เยียม ฒี่ง แก้ง วั้ว เต๋ย ม่าย ชะ แหง่ง ตุ๊ ฮี่ง ต้าย เบ๊าะ จ๋า เญย เมี่ยน.

7น้าย เต๋ย เมี่ยน หลาย อะหงุ่น ติ๊ว ลู่งๆ ไล่ๆ เญย, หย่า หลาย ติ๊ว-คู้ ลี่งๆ คีงๆ. ไซ เมี่ยน เหธา โต่ว หว่า เมี่ยน หลาย ติ๊ว-คู้ ลู่งๆ ไล่ๆ เญย, หย่า หลาย อะหงุ่น ติ๊ว นิ่น บัว ม่งๆ ล่งๆ. นิ่น บัว หลาย ติ๊ว-คู้ ลี่งๆ ไล่ๆ เญย. ปวัด หิ่น ย่าง เญย สี่ นิ่น บัว เปียะ เฮญี้ยว ต่อง. เซี้ยม ฒุ์ย เญย เฒี่ยง โห่ นิ่น บัว เซี้ยม ไม้ หอบ.

8นอมๆ เตี้ย กู้ หงว่าย ม่าย โล้ เญย กะน้าย กั๊วะ ปวั๊ง, ไม้ ม่าย เหยียด นอม ต๋อง ไม้ ไล่ ฮลบ.

9“นิ่น อ๋อย หฌาว ปุน หาย เต้า ฮิ้ว? นิ่น พ้อ เม่ง นิ่น ฒุ่น เญย หว่า ปุน หาย เต้า? ปุน โธะ โหะ กวั่ง หญอ เญย ฝุเจว๊ย, ปุน จังๆ เล่ย หญอ เญย กู้งว์า ไฟ?

10เหว่ย หฒุ นิ่น ก๊อง, หลี่ง จา หลี่ง, หลี่ง จา หลี่ง, เล์ย-หลัด จา เล์ย-หลัด, เล์ย-หลัด จา เล์ย-หลัด, เยียม น้าย ติ๊ เตียน, เยียม วั้ว ติ๊ เตียน.”

11สี ก๊อง เม่ย บัว ไม้ หมวัง เยีย, ทิน-ฮู่ง อ๋อย หล่ง กั้น ฝีง เมี่ยน เหธา กั้น หญู่ง หว่า เหธา เม่ย บัว ก๊อง.

12นิ่น อ๋อย ก๊อง ปุน หมวัง เญย เมี่ยน ฮนั้ง ฒิ่น ด่าง นิ่น ก๊อง, “น้าย เซ ฮิด เญย ต๋อง, อ๋อย ปุน โค้ว เญย เมี่ยน ตุ๊ ฮิด,” หย่า ก๊อง, “น้าย เซ ฮิด ขวน เญย ต๋อง,” มป่า นิ่น บัว ไม้ คั้ง หมวัง.

13เหว่ย น้าย เฒี้ยว เญย หว่า ฯฒฯ ฮนั้ง น้าย เหว่ย นิ่น บัว. หลี่ง จา หลี่ง, หลี่ง จา หลี่ง, เล์ย-หลัด จา เล์ย-หลัด, เล์ย-หลัด จา เล์ย-หลัด. เยียม น้าย ติ๊ เตียน, เยียม วั้ว ติ๊ เตียน. นิ่น บัว ฯฒฯ มี่ง หย่า ตะหฑยาว ดอบ, หฒุ มุน, หฒุ ฮลบ เจี๊ยน หย่า หฒุ เฒาะ.

14เหว่ย น้าย เม่ย บัว ฮว้วด เมี่ยน เญย เมี่ยน อ้า! ต้ง เยียม เยลูซาเลม ฒี่ง กุ๊น น้าย เต๋ย แปะ ฝีง เญย เมี่ยน, หมวัง เฒี้ยว เญย หว่า ม่าะ!

15เม่ย บัว ก๊อง, “เยีย บัว เหธา หฒุ ไต่ เญย ชะ เหลียบ เจี์ย แหง่ง หว่า. เยีย บัว เหธา เยี่ยม เกน ก๊อง หอบ. ไม้ กุ๊น ม่าย ต้ม! เหฒะ หน่าน ฮนั้ง ววม เหยียม ต้าย, ไม้ ไฮ่ หฒุ เยีย บัว. เหว่ย หฒุ เยีย บัว หล่ง ก๊อง-แปะ เญย หว่า โหฒว เยีย บัว ด้าว เขา เญย ต๋อง, หย่า หล่ง จ๊า เญย หว่า โหฒว ต๋อง ปี๋ง.”

16เหว่ย น้าย เฒี้ยว ทิน-ฮู่ง ฮนั้ง น้าย นอ ก๊อง, “หมั่ง ม่าะ! เยีย เยียม สิโอน เหลียบ นอม หละเปย๊ย โหฒว กอน-โด๊ะ, เซ เสย เจี๋ย เญย หละเปย๊ย. เป๋น เปย๊า-เก๊าะ จ๋าย ไห่ เญย หละเปย๊ย เหว่ย เหลียบ ว้วน เญย กอน-โด๊ะ. ‘หาย เต้า เสียน เขา ฯฒฯ ไม้ หฒุ ฮวาง.’

17เยีย อ๋อย ปุน แป้ง ฟิม เญย เจ๊า โหฒว ฮลาง เดาะ, หย่า ปุน โหฒว หอบ เญย เจ๊า โหฒว ตี่ง หฒะ เญย ฮลาง. เปาะ อ๋อย กว๊าด เม่ย บัว ด้าว เขา เญย ต๋อง, วั้ว เต๋ย ก๊อง-แปะ เญย หว่า. ววม อ๋อย เหยียม เม่ย บัว ปี๋ง เญย ต๋อง.

18เม่ย บัว เหธา หฒุ ไต่ เญย ชะ เหลียบ เญย แหง่ง หว่า ฯฒฯ ป่าย หมี่ อ๊ะ. เหธา เยี่ยม เกน ก๊อง หอบ เญย หว่า หย่า เหลียบ ไม้ ว้วน. ม่าย ต้ม เหฒะ หน่าน ฮนั้ง ววม เหยียม ต้าย, เม่ย บัว ฯฒฯ หฒุ ธ้าย เหฌี่ย เหฑ่ง.

19น้าย เต๋ย เหฒะ หน่าน หาย หฒั่น เจี๋ย ฯฒฯ กว๊าด เม่ย บัว มี่ง. ดอมๆ, ลู่ง ฮนอย ลู่ง ม์วน นิ่น อ๋อย กว๊าด เจี๋ย มี่ง.” สี ก๊อง เปียะ เฮญี้ยว น้าย เต๋ย หว่า ฯฒฯ ไฮ์ หฒะเก้ง! กั้ม เหฑีย ไห่.

20โหธว นั้ง ไห่, ซูง ไม้ หฒะ เหฒา, สวัง หย่า เหบ, ท้อง ไม้ เบว์ย ซิน.

21เฒี้ยว อ๋อย เจี์ย ต้าย ฮนั้ง นิ่น เยียม เปลาซิม บง วั้ว หฒั่น. นิ่น อ๋อย เฉีย เจี์ย ฮนั้ง เยียม กิเบโอน ฮ์อง, เหว่ย โหฒว นิ่น เญย กง, นิ่น เญย กั้น หญู่ง กง. นิ่น โหฒว นิ่น เญย สี่, นิ่น บัวะ ฮ่อง เญย สี่.

22ฮนั้ง หน่าย เม่ย บัว ไม้ ตู๋ง ฮว้วด. เหฑีย เม่ย บัว เญย หลิ่ม จา เหฒียด. เฒี้ยว, เน่น เจี๋ย เญย ทิน-ฮู่ง, บั๋ว เยีย, นิ่น ตี่ง เหฒียง เหมียด เหฑ่ง เฒี่ยง นอม กั๊วะ.

23อ๋อย หฒุ แปง มน่อม หมวัง เยีย เญย เฉีย, อ๋อย หฒุ หล่ง เฮญี้ยว หมวัง เยีย ก๊อง เญย หว่า.

24โหฒว เด่ย เญย เมี่ยน ไล่ เดา เหว่ย หฒวัง กะน้าย, นิ่น หฒั่นๆ ไล่ เจี๊ยน มี่ง ไฟ? นิ่น หฒั่นๆ โช้ว เนีย กว้าย ย่วน ไฟ?

25นิ่น กว้าย เดา ย่วน, ฆะฮ้า นิ่น หฒวัง ท่ง เฮา หย่า ฮ์า เยี่ยน ซี ไม้ เฒ์ย? นิ่น หฒวัง เบย้า วิด หฒิว นิ่น เญย ฮ่อง, หย่า หฒวัง เบย้า บาลี หอบ นิ่น เญย ต๋อง, แอ๋ง หฒวัง ตะธ้าน เยียม เด่ย-เฮลน ไม้ เฒ์ย?

26เหว่ย หฒุ นิ่น เญย ทิน-ฮู่ง หฌาว นิ่น, หย่า หฌาว นิ่น โหฒว ตุ๊ หอบ.

27เมี่ยน ไม้ หล่ง เฮนี้ย เญย จา-สี่ หงัน ท่ง เฮา, หย่า ไม้ หล่ง เธีย-เยี่ยน หงัน เยี่ยน ซี. อ๋อย หฒุ หล่ง เดี๋ยง-ด๋น เบ๊าะ ท่ง เฮา, หย่า หล่ง ปย๊า เบ๊าะ เยี่ยน ซี.

28โหฒว ฌั้ว เญย ล่าง หฒิ อ๋อย หฒุ หล่ง หม่อ หม่อ, เมี่ยน ไม้ เฒ์ย เหยียด ลิ์ว เบ๊าะ. ไม้ กุ๊น นิ่น หล่ง นิ่น เญย ม์า-เธีย เญย เธีย-เยี่ยน หงัน, นิ่น เญย ม์า ไม้ เฒ์ย หม่อ.

29น้าย หย่า เฒ์ย เยียม เน่น เจี๋ย เญย เฒี้ยว ต้าย. นิ่น หฌาว เญย หว่า หฒะเก้ง บัวะ ฮ่อง ไห่, นิ่น เญย ธง-เม่ง หย่า เผย ฝู่ ไห่.

← Chapter 27 Jump to: Chapter 29 →