Isaiah 52

Mien Bible (Thai Script) © Thailand Bible Society, 2007

← Chapter 51 Jump to: Chapter 53 →

1สิโอน อ่า, เญีย ต้าย, เญีย ต้าย, แอ๋ง เฮ้น เจี์ย ต้าย ม่าะ! โอ ธีง-เหฑ่ง เญย ฒี่ง, เยลูซาเลม อ้า! ฒุ เจี๊ยน เม่ย เหฑว่ย ไห่ เญย ลุย-โหว. เหว่ย หฒุ เยียม น้าย มี่ง ไม้ เจี๋ย ก๊าด เญย เล์ย เหธา ม่าย หวุย เญย เมี่ยน ไม้ ตุ๊ แอ๋ง เปียะ เม่ย.

2โอ เยลูซาเลม อ้า! อ๋อย หฒุ โซว ฆอย เนีย-บูง เจี์ย ซิน ต้าย เฒว์ย เจี๊ยน เหว่ย. โอ หฒุ ธ้าง เญย สิโอน อ่า, ไจ๊ ฆอย โด้ เม่ย เญย จาง เญย หลิ่ม.

3เหว่ย หฒุ เฒี้ยว ฮนั้ง น้าย นอ ก๊อง, “เม่ย บัว หฒุ หม่าย ไม้ ม่าย จ๋า. เม่ย บัว ตุ๊ หฒัวะ หฑวน หย่า ไม้ หฒุ หล่ง ญ่าน.”

4เหว่ย หฒุ เฒี้ยว ทิน-ฮู่ง ฮนั้ง น้าย นอ ก๊อง, “ต้าว ตั้ง เยีย เญย แปะ ฝีง มี่ง อียิบ เต่ย-ปูง เหว่ย เยียม หน่าย. ฆะฮ้า อัดซีเลีย เมี่ยน เหฒย นิ่น บัว หย่า ไม้ ม่าย หาย หญู่ง กอน-แป๋ง.”

5เฒี้ยว ก๊อง, “อี้ หฒั่น เยียม น้าย เยีย ม่าย หาย หญู่ง? “เยีย เญย แปะ ฝีง หฒุ แปะๆ กว๊าด มี่ง.” เฒี้ยว ก๊อง, “กุ๊น นิ่น บัว วั้ว เต๋ย เห่ว หย่า เฒี่ยง ฮนอย ไม้ ตี้ง เลี่ยว เญย คี เยีย เญย เม่ง.

6ฮนั้ง น้าย เยีย เญย แปะ ฝีง ฯฒฯ ฮิ้ว ตุ๊ เยีย เญย บั๋ว. เหว่ย น้าย เถา วั้ว ฮนอย นิ่น บัว ฒู้ง ฮิ้ว ตุ๊ เซ เยีย จา-ด่าง ก๊อง. เฒ์ย เญย, เซ ต้ง เยีย.”

7ยั่ง บง ยั่ง ฒอง ต้าย บั๋ว คู้ เฝียน เญย เมี่ยน เญย เหฒา เหฑว่ย ไห่. นิ่น ฒุ่น แป้ง ออน เญย เจ๊า, ก๊อง คู้ เฝียน, ฒุ่น เหฌียว เอน เญย เฝียน ก๊อง บั๋ว สิโอน, “เม่ย เญย ทิน-ฮู่ง โหฒว ฮู่ง หมี่ อ๊ะ.”

8หมวัง ม่าะ! เม่ย เญย เซี้ยว แกง เมี่ยน เห่ว บุย, ล่ม ฑ่อย เฌียน-โย่ว เญย ป๋าว ฑูง. เฒี้ยว หฑวน สิโอน วั้ว หฒั่น, นิ่น บัว กั้น เญย มฒีง ฒู้ง ตุ๊ ปวัด.

9เยลูซาเลม เญย เดา-ฮวาง อ่า, ล่ม ฑ่อย ธ้วด เฉีย ป๋าว ฑูง. เหว่ย หฒุ เฒี้ยว เถง นิ่น เญย แปะ ฝีง ไจ๊ เฑ่า, นิ่น หย่า หฒัวะ เยลูซาเลม.

10เฒี้ยว อ๋อย เยียม หม่าน กั๊วะ เมี่ยน เญย หฑะเฮมียน หล่ง นิ่น ม่าย ชะ เญย ธีง-เหฑ่ง ปั์ว. เยียม จ่ม ลู่ง เดี๊ย เญย เมี่ยน ฯฒฯ ปวัด บัว เญย ทิน-ฮู่ง เญย เหฌียว เอน.

11มี่ง อ๊ะ. มี่ง อ๊ะ. เล่ย บาบีโลน ธ้วด มี่ง ม่าะ! ไม้ ตู๋ง มัวะ หฒุ ม่าย หวุย เญย กะน้าย. เยียม หน่าย กะญั์ว ธ้วด มี่ง. เม่ย บัว แกง เฒี้ยว เญย จา-ต๋อง เญย เมี่ยน อ๋อย หฒุ สา กั้น ธีง-เหฑ่ง.

12เม่ย บัว ไม้ หฒุ ฮวางๆ ฒางๆ เญย ธ้วด, หย่า ไม้ หฒุ เปย๋า แหม่ง, เหว่ย หฒุ เฒี้ยว อ๋อย เยียม เม่ย บัว เญย วั้ว ด่าง มี่ง, อิสะลาเอน เญย ทิน-ฮู่ง อ๋อย เยียม เม่ย บัว เญย ฆะฮ้า ฆาง เปว เจี๊ยน เม่ย บัว.

13หมั่ง ม่าะ! เยีย เญย โปว อ๋อย หล่ง ธง-เม่ง โหฒว หญู่งๆ. นิ่น อ๋อย ตุ๊ เมี่ยน ท่าย, ตุ๊ เมี่ยน เธง, ท่าย ฝาว ฮลัง.

14เมี่ยน ธั้ม ปวัด นิ่น ฯฒฯ แฮะ นิ่น บัว กั้ม เหฑีย เหว่ย หฒุ นิ่น เญย เฮมียน-เหมว่ย หว่าย, ปวัด ไม้ ฮนั้ง เมี่ยน. นิ่น เญย ฝัง เฒ้ย หย่า หว่าย เหฑ่ง, ไม้ ฮนั้ง เมี่ยน เญย ฝัง.

15นิ่น ฯฒฯ แฮะ เหฒีย กั๊วะ เมี่ยน กั้ม เหฑีย. ฮู่ง เตี๋ย อ๋อย เหว่ย นิ่น หฆับ เจี๊ยน ฑุ่ย, เหว่ย หฒุ ไม้ ม่าย เมี่ยน บั๋ว เจี๋ย เญย, นิ่น บัว ตุ๊ ปวัด. นิ่น บัว ไม้ ไฮ์ เจี๋ย เญย, นิ่น บัว หย่า ไฮ่ เปียะ เฮญี้ยว.

← Chapter 51 Jump to: Chapter 53 →