Isaiah 54

Mien Bible (Thai Script) © Thailand Bible Society, 2007

← Chapter 53 Jump to: Chapter 55 →

1“โอ ไม้ ไฮ่ ม่าย แซง-ยู์ง, ไม้ ยู์ง เจี๋ย กู้งว์า เญย มเซียะ ตอน อ้า! กุ๊น ป๋าว ฑูง อ๊ะ. ไม้ มุน เจี๋ย กู้งว์า เญย มเซียะ ตอน อ้า! อ๋อย หฒุ เฌียน-โย่ว เญย ป๋าว ฑูง, เห่ว เฉีย โฮล เญย, เหว่ย หฒุ กวั่ง ฮวาง เญย เอ๊า ฒู้ง อ๋อย ม่าย ฝุเจว๊ย เก้า ธั้ม ตอง จา เญย มเซียะ ตอน.” เฒี้ยว ฮนั้ง น้าย ก๊อง.

2“อ๋อย หฒุ ธับ เม่ย ธอง ด๊บ-ลิ่ว เญย เดา, ธอง เม่ย เญย ด๊บ-ลิ่ว เญย เดีย จั๊ง, ไม้ ตู๋ง ฒั้น. อ๋อย หฒุ แปง เม่ย ธอง ด๊บ-ลิ่ว เญย ฮลาง ด๊าว, บอง เม่ย ธอง ด๊บ-ลิ่ว เญย ต่ง ว้วน.

3เหว่ย หฒุ เม่ย อ๋อย หฮยาง มี่ง หฒาย มี่ง บย่าว. เม่ย เญย เฒ้ย-ฟุน หย่า ตุ๊ หฑิบ ธั้ม-กั๊วะ, หย่า ตุ๊ เหลียบ งว์า-กอน เยียม นิ่น บัว เญย ฒี่ง ฮวาง.

4“ไม้ ตู๋ง กั้ม เหฑีย เหว่ย หฒุ เม่ย ไม้ หฒุ ไญ้. ไม้ ตู๋ง ไญ้ เหว่ย หฒุ เม่ย ไม้ หฒุ เสี่ยว หมั่ง เผีย เญย เจ๊า. เม่ย ฒู้ง อ๋อย หละคุ หลุน เญย เฒี่ยง โห่ หฒุ ไญ้ เญย สี่, หย่า ไม้ หฒุ แอ๋ง จั๋ง หลาย โหฒว เอ๊า-กว๊า หฒุ เมี่ยน ต้าน เญย เจ๊า.

5เหว่ย หฒุ เหฒย เม่ย ต้าย วั้ว เต้า เซ เม่ย เญย โหฆ. นิ่น เญย บั๋ว เซ เน่น เจี๋ย เญย เฒี้ยว. อิสะลาเอน เญย ธีง-เหฑ่ง ทิน-ฮู่ง เซ หฒัวะ เม่ย วั้ว เต้า. เมี่ยน เห่ว นิ่น เป๋น ก๋อม ลู่ง เดี๊ย เญย ทิน-ฮู่ง.

6เฒี้ยว เห่ว เม่ย ฮนั้ง หฒุ เล่ย กวั่ง, เฮญี้ยว มุน, เฮญี้ยว เฑ่า เญย เอ๊า, ฮนั้ง หฮญัง-เจ๊ย หลุน เญย เอ๊า หฒุ เล่ย กวั่ง.” น้าย เซ เม่ย เญย ทิน-ฮู่ง ก๊อง เญย หว่า.

7“เยีย กวั่ง เม่ย ตั้ง ป๊า ฮนั้ง, มป่า เยีย หฒะเก้ง อ๋อย ค้อ-เลี่ยน เม่ย, ต้อ เม่ย หฑวน.

8เยีย กะเฉีย แป๊ด ธ้วด ฯฒฯ ปี๋ง เยีย เญย เฮมียน ไม้ หมั่ง เม่ย ดุ ตั้ง ฮนั้ง, มป่า เยีย เหยียด ลิ์ว อ๋อย ฮนั้ม เม่ย, ค้อ-เลี่ยน เม่ย.” เฒี้ยว, ต้ง หฒัวะ เม่ย วั้ว เต้า, ฮนั้ง น้าย นอ ก๊อง.

9“น้าย เต๋ย สี่ เหว่ย เยีย เซ ฮนั้ง โนยา เญย ลู่ง เดี๊ย. วั้ว หฒั่น เยีย แล์ง ไม้ ปุน บยู่ง-ซุ้ย-อิ๋ม แอ๋ง เหยียม ลู่ง เดี๊ย ฮนั้ง เยียม โนยา เญย เฒี่ยง โห่ เหยียม นอ. เยีย หย่า ฮนั้ง วั้ว นอ โฮ้ว หว่า เยีย ไม้ แอ๋ง เฉีย เจี์ย เม่ย, เยีย หย่า ไม้ เหม เม่ย.

10ไม้ กุ๊น ต้ม บง หฒุ เฒาะ ฆอย, ฟิ้ว-บง หฒุ ดั่น ต์ง, เยีย อ๋อย เหยียด ลิ์ว เหฒียบ ฒัวะ เญย ฮนั้ม เม่ย, ไม้ ปู๋ง ด๊อด. เยีย แล์ง แป้ง ออน เญย แหง่ง หว่า เหยียด ลิ์ว ไม้ เล่ย ฆอย เม่ย.” น้าย เซ เฒี้ยว, ต้ง ค้อ-เลี่ยน เม่ย วั้ว เต้า, ก๊อง เญย หว่า.

11“โอ หฒุ โค้ว, หฒุ ต้ม หฑยาว ป่วน มี่ง ป่วน ต้าย หย่า ไม้ ตุ๊ ออน เฮญี้ยว เญย ฒี่ง อ้า! เยีย อ๋อย หล่ง หละเปย๊ย แมง-บั๊ว เหธย เม่ย เจี์ย, หล่ง บั๊น บั๊ว ฑัง เญย หละเปย๊ย-จ๋าย เหลียบ เม่ย เญย กอน-โด๊ะ.

12เยีย อ๋อย หล่ง หละเปย๊ย-จ๋าย ซิ เญย, ฑัง เญย, โหฒว เม่ย เญย ล่าว, หล่ง ฌัง เญย, ฑัง เญย หละเปย๊ย โหฒว เม่ย เญย ฒี่ง แก้ง, หย่า หล่ง หละเปย๊ย-จ๋าย โหฒว เม่ย เญย เหยียด ฒู้ง ฒี่ง หลาด.

13เยีย, เฒี้ยว, อ๋อย หฌาว เม่ย เญย เหยียด ฒู้ง น่าม โญ์ว. เม่ย เญย น่าม โญ์ว หย่า อ๋อย ตุ๊ แป้ง ออน ธั้ม.

14เม่ย อ๋อย เขา แป้ง ฟิม เญย เจ๊า เหลียบ ว้วน. เม่ย ตุ๊ เล่ย ฆอย หฒุ เหฒย เญย เจ๊า เหว่ย หฒุ เม่ย ไม้ หฒุ กั้ม เหฑีย. แฮะ เมี่ยน กั้ม เหฑีย เญย สี่ เล่ย เม่ย โก, เหว่ย หฒุ แฮะ เมี่ยน เญย สี่ ไม้ ต้าย นิด ฟัด เม่ย.

15สี ก๊อง หาย เต้า โธะ เมี่ยน กั๊บ ฒุ้น เบ๊าะ เม่ย เซ ไม้ เฒ์ย เยีย โหฒว. หาย เต้า ต้าย เบ๊าะ เม่ย, วั้ว เต้า ฒู้ง อ๋อย หลาย เม่ย หฒุ เซวย.

16“หมั่ง ม่าะ! เยีย เหฒย เฮลียะ-หฒั่ง. นิ่น ปย๊ม โต์ว-ถาน ธ้วด โต์ว-เบียด, หย่า โหฒว ธ้วด หวัวะ กิ่น ผุย อ๋อย หฒุ หล่ง หวัวะ กิ่น โหฒว เญย กง. เยีย หย่า เหฒย ธ้วด โหฒว เหมียด เญย เมี่ยน เหว่ย โหฒว หว่าย.

17โหฒว ธ้วด ห่อย เม่ย เญย หวัวะ กิ่น ไม้ ไฮ่ ห่อย ไม้ หฒุ. ตะฟ่าน โก๋ เม่ย เญย เมี่ยน, เม่ย ไฮ่ ปุน นิ่น บัว หฒุ ตี่ง ฒุ์ย. น้าย เซ เฒี้ยว เญย โปว หฑิบ ต้าย เญย ป่วน. เยีย หย่า ปุน นิ่น บัว ตุ๊ แป้ง ฟิม เญย เจ๊า.” น้าย เซ เฒี้ยว ก๊อง เญย หว่า.

← Chapter 53 Jump to: Chapter 55 →