Isaiah 9

Mien Bible (Thai Script) © Thailand Bible Society, 2007

← Chapter 8 Jump to: Chapter 10 →

1มป่า ยั่ง น้าย เจี๋ย, หฒุ โค้ว วั้ว เต๋ย ไม้ หฒุ แอ๋ง เยียม หฮมวัง กะญั์ว. ฒิ่น ด่าง ทิน-ฮู่ง ปุน เสบูลุน เต่ย เหธา นับทาลี เต่ย หฒุ หมั่ง เผีย, มป่า ฆะฮ้า นิ่น อ๋อย ท่าย กัน มี่ง ค้อย-เฮลน เญย เจ๊า, เซ เจี๋ย วั้ว หง่าน หฒิ จอแดน ด้าย, ฝีงๆ เมี่ยน เญย กาลิลี เต่ย.

2ยั่ง หฮมวัง กะญั์ว เญย แปะ ฝีง, ฒู้ง ตุ๊ ปวัด ต้ม ฌัง. เยียม หฒุ ไต่ เญย ต้ง ลิ่น กะญั์ว วั้ว เต๋ย, ตุ๊ ฌัง หฒิว เจี๊ยน นิ่น บัว.

3เม่ย ปุน วั้ว นอม กั๊วะ เญย เมี่ยน หฮยาง ธั้ม, แอ๋ง จา ทิบ ออน-เหลาะ ปุน นิ่น บัว. นิ่น บัว เยียม เม่ย เญย หฑะเฮมียน เฌียน-โย่ว, ฮนั้ง เมี่ยน เซียว แกง-หฒวัง เฌียน-โย่ว, หย่า ฮนั้ง เมี่ยน ปุน ฆอย ธ้าง ต้าย เญย กะน้าย ออน-เหลาะ นอ.

4เหว่ย หฒุ เม่ย ว้วด เน้า นิ่น บัว ก์า เญย เดี๋ยง-ก์า, หย่า ว้วด เน้า เบ๊าะ นิ่น บัว เญย บะเต้า เญย เดี๋ยง-ด๋น, เหธา เหฒย นิ่น บัว เญย ปย๊า-ปิน, ฮนั้ง เม่ย เบ๊าะ ป่าย มีเดียน เมี่ยน วั้ว ฮนอย.

5เบ๊าะ จ๋า แปง เญย แหล่งๆ เฮ่ เหธา กั๊วะ เจี๊ยน ฑย้าม เญย เต๋ยๆ ลุย ฒู้ง หฒุ ปั๊ว, เซ ต๋อง ฒ่าง ปั๊ว โต์ว.

6เหว่ย หฒุ ม่าย เต้า กู้งว์า เหว่ย เยีย บัว ธ้วด เสย. ม่าย เต้า ตอน เหธย ปุน เยีย บัว. นิ่น ตุ๊ ฮู่ง หลี่ง กุ๊น เยีย บัว นิ่น หย่า ตุ๊ บั๋ว เห่ว บัวะ ฮ่อง เญย ธ่าง ล่าง เมี่ยน, เฮ้น ไห่ เญย ทิน-ฮู่ง, เหยียด ลิ์ว เยียม เญย เตีย, แป้ง ออน เญย ฮู่ง ตอน.

7นิ่น เญย ฮู่ง หลี่ง อ๋อย จา ธั้ม, แป้ง ออน เญย เจ๊า เหยียด ลิ์ว ไม้ จ่ม. นิ่น ฒู้ง อ๋อย เฒว์ย ดาวิด เญย ฮู่ง เหว่ย กุ๊น นิ่น เญย กั๊วะ. นิ่น อ๋อย หล่ง แป้ง ฟิม เหธา โหฒว หอบ เญย เจ๊า เหลียบ เจี์ย, เหธย ว้วน, เยียม น้าย มี่ง เถา เหยียด ลิ์ว. เน่น เจี๋ย เญย เฒี้ยว อ๋อย จอม เฮญี้ยว ฮนั้ง น้าย นอ โหฒว.

8เฒี้ยว ปุน หว่า มี่ง ก๊อง ยาโค้บ, หย่า ด๊อด หฒุ อิสะลาเอน.

9หฒวัง แปะ ฝีง, เซ เอฟาอิม เมี่ยน, เหธา สะมาเลีย เมี่ยน ฯฒฯ ฮิ้ว อ๊ะ. นิ่น บัว เธง กั้น โฮล, ปู๋ง หว่า-เหมา ก๊อง,

10“ฮวุย-ฒุน บาง หมี่ อ๊ะ, มป่า เยีย บัว อ๋อย หล่ง หฒุ ต้าย เญย หละเปย๊ย เหธย เจี์ย. ง่ง หญอ เดี๋ยง หฒุ ก๋อย หมี่ อ๊ะ, มป่า เยีย บัว อ๋อย หฒวัง สีดา ฒ่ง เดี๋ยง ตี๊.”

11มป่า เฒี้ยว โหฒว ปุน เยียม เลซิน เญย วิน-วั้ง ต้าย เบ๊าะ นิ่น บัว, หย่า โธะ หฒุ นิ่น บัว เญย วิน-จา.

12เซ เยียม ตง ปูง เญย ซีเลีย เมี่ยน, เหธา ไฟ ปูง เญย ฟีลิสะเตีย เมี่ยน, ฒู้ง หมอง ฆอย ฑุ่ย นะ อิสะลาเอน. ไม้ กุ๊น ฮนั้ง หน่าย, นิ่น เญย กะเฉีย หธ่อ ไม้ ฟิว. นิ่น หธ่อ ซูง เจี๊ยน นิ่น เญย ปั์ว.

13มป่า แปะ ฝีง ไม้ หฑวน ต้าย ล์อ เบ๊าะ นิ่น บัว วั้ว เต้า, นิ่น บัว ไม้ ล์อ เน่น เจี๋ย เญย เฒี้ยว.

14เหว่ย น้าย เฒี้ยว เยียม อิสะลาเอน เมี่ยน บุด๋ง, เหยียด ฮนอย กะญั์ว ฮงะ มฆ้อง เหธา เตว๊ย กวั่ง, เลี่ยม ตาว-น่อม เหธา หลัวะ ติ แกว๊ง.

15เมี่ยน โก๋ เหธา โหฒว โฮล เญย เมี่ยน เซ มฆ้อง, หฌาว จ๊า เญย โต่ว หว่า เมี่ยน เซ เตว๊ย.

16เหว่ย หฒุ ต้อ แปะ ฝีง วั้ว เต๋ย ต้อ นิ่น บัว ยั่ง ต่อง เจ๊า. ต้ง นิ่น บัว ต้อ เญย หฒวัง เมี่ยน หฒุ หลุ่น.

17เหว่ย น้าย เฒี้ยว ไม้ อะเฮน้ย เมี่ยน หลุน เมี่ยน, หย่า ไม้ ค้อ-เลี่ยน นิ่น บัว เญย กู้ ฮั่น ฝุเจว๊ย เหธา เอ๊า-กว๊า, เหว่ย หฒุ เต้าๆ ไม้ กัน ทิน-ฮู่ง หย่า โหฒว เอ๊าะ สี่, โม์ว เต้า เญย ฑุ่ย ก๊อง ไม้ เป๋น เญย หว่า. ไม้ กุ๊น ฮนั้ง หน่าย, นิ่น เญย กะเฉีย หธ่อ ไม้ ฟิว. นิ่น หธ่อ ซูง เจี๊ยน นิ่น เญย ปั์ว.

18เอ๊าะ สี่ ฮนั้ง โต์ว นอ ปั๊ว, ปั๊ว ชุย ฌิ้ม-โธว ฌิ้ม-หม่วน. เอ๊าะ สี่ หย่า ฮนั้ง ปั๊ว หล่ม-เดี๊ย เญย โต์ว, ธ้วด โต์ว-เสียว-ตน, ธุดๆ เญย ฝาว.

19เน่น เจี๋ย เญย เฒี้ยว เฉีย เจี์ย ฯฒฯ ฮนั้ง โต์ว นอ ปั๊ว เดา. แปะ ฝีง หย่า ฮนั้ง เป๋น ปั๊ว โต์ว เญย ฒ่าง, ไม้ ม่าย หาย เต้า เลี่ยว นิ่น เญย ก๋อ-โย์ว เญย แหม่ง.

20นิ่น บัว เยียม บย่าว แหมง ธ้าง มป่า นิ่น บัว หธ่อ เฮญี้ยว เซีย. นิ่น บัว เยียม หฒาย แหมง หญั่น, นิ่น บัว หย่า ไม้ เป๊ว. เก๊าะ-เมี่ยน ฒู้ง หญั่น เก๊าะ-เมี่ยน เญย ฝุเจว๊ย.

21มะนัดเส อ๋อย เบ๊าะ เอฟาอิม, เอฟาอิม อ๋อย เบ๊าะ มะนัดเส, นิ่น บัว หย่า ล่ม ฑ่อย เบ๊าะ ยูดา. ไม้ กุ๊น ฮนั้ง หน่าย, นิ่น เญย กะเฉีย หธ่อ ไม้ ฟิว. นิ่น หธ่อ ซูง เจี๊ยน นิ่น เญย ปั์ว.

← Chapter 8 Jump to: Chapter 10 →