Isaiah 34

Mien Bible (Thai Script) © Thailand Bible Society, 2007

← Chapter 33 Jump to: Chapter 35 →

1โอ หม่าน กั๊วะ เมี่ยน อ้า! ต้าย ฟัด หมวัง. โอ หม่าน เมี่ยน อ้า! อ๋อย หฒุ แปง มน่อม หมวัง. เดา-เป้ย เหธา เยียม เดา-เป้ย เญย หม่าน หมวด, ลู่ง เดี๊ย เหธา เยียม ลู่ง เดี๊ย ต้าย เญย เหยียด ฒู้ง กะน้าย อ๋อย หฒุ หมวัง.

2เหว่ย หฒุ เฒี้ยว เฉีย เจี์ย หม่าน ฝีง, นิ่น โน์ว ไห่ นิ่น บัว เญย เหยียด ฒู้ง จุน-แปง. นิ่น ฒู้ง อ๋อย เหมียด เหฑ่ง นิ่น บัว, อ๋อย จิว ปุน นิ่น บัว หฒุ ไต๋ ไต่.

3หฒุ ไต๋ ไต่ เญย เมี่ยน อ๋อย หฒุ ทอ กวั่ง. นิ่น บัว เญย เซย ฮว่วนๆ เญย เหฒวย, บง หย่า ม่าย ฑย้าม กั๊วะ ปวั๊ง เหฑ่ง.

4ลู่ง หฒั่ง เญย หม่าน หมวด อ๋อย ฮู้ หม่วน, ลู่ง หย่า หฌุ่น เจี๊ยน ฮนั้ง หฌุ่น โซว นอ. เหฮลย อ๋อย เยียม วั้ว ลู่ง ด๊อด เหฌี่ย ฮนั้ง อะหงุ่น เฮมย เญย น่อม โปย้ หย่า ฮนั้ง ง่ง หญอ เปี๊ยว เยียม วั้ว เดี๋ยง หฒัวะ, โปย้ นอ.

5เหว่ย หฒุ เยีย เญย หฑุ ด๊าว เยียม วั้ว ลู่ง ฮบ เป๊ว. หมั่ง ม่าะ! น้าย หฑุ ด๊าว เหฌี่ย ต้าย ตี่ง เอโดม เญย ฒุ์ย, ต้ง เยีย ตี่ง เหฒียง ปุน หฒุ เหมียด วั้ว เต๋ย เมี่ยน.

6เฒี้ยว เญย หฑุ ด๊าว ม่าย ฑย้าม กั๊วะ ปวั๊ง เหฑ่ง, หย่า ม่าย เฮมย กั๊วะ ปวั๊ง. ม่าย ปะกี ยู่ง ตอน เหธา ยู่ง เญย ฑย้าม, เหธา ปะกี ยู่ง โก๊ว เญย หญุด เฒ้ย เญย เฮมย. เหว่ย หฒุ เฒี้ยว เยียม โบซาลา ม่าย ฝ่ง ห่อ เหฒี่ย เญย เจ๊า, เยียม เอโดม เต่ย ม่าย ไต๋ ไต่ เญย สี่ โฮล เญย.

7เฮยี่ย ง่ง เหธา ง่ง โก๊ว ตอน, เหธา ต้ม ง่ง โก๊ว อ๋อย เหธา นิ่น บัว เหยียด เหฌี่ย คีง. นิ่น บัว เญย เต่ย-ปูง หย่า ม่าย ฑย้าม กั๊วะ ปวั๊ง, เฮมย หย่า สาม เปียะ เนีย-บูง ดอน เหฑ่ง.

8เหว่ย หฒุ เฒี้ยว ม่าย จ๊าว วิน เญย ฮนอย, เหว่ย สิโอน เญย เจ๊า ม่าย จ๊าว เซี่ยว เญย หฮญัง.

9เอโดม เญย โด๊ะ อ๋อย ทิ้ว เป๋น เดา เญย ฒูง. เนีย-บูง หย่า ทิ้ว เป๋น ฮู่ง, เฒี่ยง นอม เต่ย-ปูง ฯฒฯ เป๋น เหฒียะ เจี๊ยน เญย เดา-โย่ว.

10โต์ว เฒี่ยง ฮนอย เฒี่ยง ม์วน ฒู้ง ไม้ ไต่, โต์ว-เสียว เหยียด ลิ์ว ฝาว. ต่อย เจี๋ย ต่อย ฯฒฯ กวั่ง เจี๊ยน ฮวางๆ วั้ว. เหยียด ลิ์ว ไม้ ม่าย เมี่ยน เจี๋ย.

11มป่า เหนาะ กู๊ ลง เหธา เหนาะ มล่ม มิว อ๋อย ตุ๊ เป๋น นิ่น บัว เญย ป่วน. ต้ม จ๊าง เหธา เหนาะ อา หย่า อ๋อย เยียม หน่าย. ทิน-ฮู่ง อ๋อย แปง ฮลาง เจี๋ย กู้ หงว่าย เดาะ ปุน วั้ว เต๋ย ต๋อง หลุ่น. นิ่น อ๋อย หล่ง ตี่ง หฒะ เญย ฮลาง ปุน วั้ว เต๋ย ต๋อง เป๋น กวั่ง ฮวาง เญย ต๋อง.

12เยียม หน่าย โหฒว โฮล เญย เมี่ยน อ๋อย ธ้วด บั๋ว เห่ว วั้ว เต๋ย เดา, “ไม้ ม่าย กั๊วะ เยียม หน่าย.” นิ่น เญย เหยียด ฒู้ง เจียน ไม้ เป๋น หาย หญู่ง เมี่ยน.

13ฌิ้ม อ๋อย บย์อง เปียะ นิ่น เญย ฮู่ง ติ่น, ฌิ้ม-โธว ฌิ้ม-หม่วน อ๋อย บย์อง นิ่น เว่ย ว้วน เญย ต๋อง. น้าย นอม ต๋อง อ๋อย เป๋น เฮยี่ย จู๊ เยียม เญย ต๋อง, เป๋น เหนาะ กู๊ ลง เญย เปย๊า.

14เต่ย-ปูง-ฮวาง เญย เฮยี่ย ฒ่อย อ๋อย ปวั้ง เฮยี่ย จู๊-เปน, เฮยี่ย ยู่ง หย่า อ๋อย เห่ว ต่อย. ลู่ง ม์วน หฒั่น เญย เฮยี่ย กะน้าย ตี้ง วั้ว, แอ๋ง เหว่ย กั้น ล์อ ต๋อง ฮิด.

15เหนาะ กู๊ ลง อ๋อย เยียม วั้ว โหฒว เล์า เด่า เจ๋า, ปั่ว เจ๋า หฒุน ตอน-หลุน, หย่า ปุน ตอน เยียม ฒุ้น นิ่น เญย ด๊าด-เดี๊ย. ต้ม จ๊าง เหยียด ต๋อย เหยียด ต๋อย เญย กั๊บ ฒุ้น เยียม วั้ว.

16เม่ย บัว อ๋อย หฒุ เบี๊ยน ล์อ เฒี้ยว เญย โซว โตะ น้าย เต๋ย หว่า. น้าย เต๋ย กะน้าย ไม้ ธา เหยียด เต้า ไฟ เหยียด นอม. ไม้ ม่าย เหยียด หญู่ง ไม้ ม่าย นิ่น เญย ต๋อย. เหว่ย หฒุ เฒี้ยว เญย ฑุ่ย ฮนั้ง น้าย หัด, นิ่น เญย สีง ลี่ง หย่า อ๋อย ต้อ นิ่น บัว ต้าย ฒุ้น.

17นิ่น พ้าย ปุน นิ่น บัว เญย ป่วน. นิ่น กั้น เญย ปั์ว หล่ง ฮลาง เดาะ ปุน ฆอย. นิ่น บัว เหยียด ลิ์ว ตุ๊ หฑิบ เป๋น นิ่น บัว เญย ป่วน. ต่อย เจี๋ย ต่อย หย่า ตุ๊ เยียม หน่าย.

← Chapter 33 Jump to: Chapter 35 →