Isaiah 5

Mien Bible (Thai Script) © Thailand Bible Society, 2007

← Chapter 4 Jump to: Chapter 6 →

1เยีย อ๋อย ป๋าว ติ้ว ฑูง ปุน เยีย ฮนั้ม วั้ว เต้า หมวัง, ป๋าว ก๊อง เถา เยีย ฮนั้ม วั้ว เต้า เญย อะหงุ่น หฮวีง. เยีย ฮนั้ม วั้ว เต้า ม่าย นอม อะหงุ่น หฮวีง เยียม บง-ไอ๊, เดา-โท้ว หลง เญย ต๋อง.

2นิ่น เว้ด หฮวีง เฑ์า ธ้วด หละเปย๊ย, แอ๋ง หฒวัง หฒั่ง ฮ่อง เญย อะหงุ่น เฮมย. เยียม หฮวีง กะญั์ว นิ่น เหธย นอม ล่าว, หย่า เยียม หฮวีง หฒุ นอม อะหงุ่น ติ๊ว เญย ฒ่อง. นิ่น ฒั้ว เจี๊ยน เฒี่ยง อะหงุ่น เปี๊ยว หลง, มป่า ขูง เฒี่ยง ไม้ เป๋น เญย เปี๊ยว.

3“โอ เยลูซาเลม เญย แปะ ฝีง เหธา ยูดา เมี่ยน อ้า! โท้ ตุ๋น เยีย เหธา เยีย เญย อะหงุ่น หฮวีง เญย สี่.

4เยีย เหว่ย เยีย เญย อะหงุ่น หฮวีง แอ๋ง ม่าย หาย หญู่ง หอบ หฒุ โหฒว ต้ง เยีย ไม้ แก้ง โหฒว ไฟ? เยีย มี่ง ล์อ อะหงุ่น เปี๊ยว หลง เญย, เหว่ย หาย ติ่ว ขูง ธ้วด ไม้ เป๋น เญย เปี๊ยว.

5อี้ หฒั่น เยีย บั๋ว เม่ย บัว เยีย อ๋อย ฮนั้ง หาย นอ โหฒว ปุน เยีย เญย อะหงุ่น หฮวีง. เยีย อ๋อย แธะ เว่ย หฮวีง เญย ฌิ้ม-หลาด, ต้อ ฌิ้ม มี่ง ปั๊ว กวั่ง. เยีย อ๋อย เบ๊าะ บาง หลาด, ปุน หฒุ ธ้าย เหฌี่ย.

6เยีย อ๋อย ปุน หฮวีง เป๋น เดา-ฮวาง, ไม้ ต๊า เตว๊ย หย่า ไม้ เฝียว, ฌิ้ม-โธว ฌิ้ม-หม่วน อ๋อย เยียม หน่าย ธ้วด ต้าย. เยีย อ๋อย หัด บ๋วน ไม้ ปุน ตุ้ย บยู่ง เหฌี่ย หน่าย.”

7เน่น เจี๋ย เญย เฒี้ยว เญย อะหงุ่น หฮวีง เซ อิสะลาเอน เญย เฒ้ย-ฟุน. ยูดา เมี่ยน เซ นิ่น อะเฮน้ย เญย อะหงุ่น เฮมย. นิ่น ล์อ แป้ง ฟิม เญย เจ๊า มป่า ขูง ปวัด ไต๋ เมี่ยน, ฑย้าม เหลี่ยว ธ้วด เญย สี่. นิ่น ล์อ โหฒว หอบ เญย เจ๊า มป่า ขูง ไฮ์ เมี่ยน เห่ว เจี๊ยน โท้ เถง เญย เฉีย ฮนั้ง.

8เม่ย บัว เหยียด นอม เปย๊า แฑง เจี๋ย เหยียด นอม เปย๊า, เหยียด ฑง เด่ย แฑง เจี๋ย เหยียด ฑง, เถา แฑง เหฑ่ง เดา. ขูง เหฒ่ง กั้น เยียม วั้ว ฮนั้ง. น้าย หญู่ง เมี่ยน อ๋อย หฒุ โค้ว อ๊ะ.

9เยีย ไฮ์ เน่น เจี๋ย เญย เฒี้ยว ก๊อง, “ฒู้ง ม่าย เปย๊า ธั้ม เญย อ๋อย เป๋น เปย๊า-ฮวาง, เปย๊า โฮล เญย, เหฑว่ย เญย หย่า ไม้ ม่าย เมี่ยน เยียม.

10เหฒียบ ต๋อย ง่ง ไล่ ตุ๊ เหยียด ฮนอย เญย เดา, ขูง ไฮ่ ตุ๊ เหยียด ท้ง อะหงุ่น ติ๊ว ฮนั้ง. เหฒียบ เยี้ยด ท้ง เบย้า ญิม เซียว ตุ๊ เหยียด ท้ง.”

11ลู่ง ดอม เฑี้ยว เจี์ย ซิน ต้าย หฒุ่น ติ๊ว ฮบ, ฮบ เจี๊ยน เถา ด๊าม ม์วน เปี๋ยน เสย, ฮบ เถา ฆวิน มี่ง. น้าย หญู่ง เมี่ยน อ๋อย หฒุ โค้ว อ๊ะ.

12นิ่น บัว เญย ยิ่น หวุ่ย ม่าย ต้ม ต้าน ป้า, ฟิ้ว-ต้าน ป้า, ม่าย โฑ์, ม่าย เฮล้า-ด้ง หนู, ม่าย อะหงุ่น ติ๊ว, มป่า ไม้ จั๋ง หฒุ เฒี้ยว โหฒว เญย สี่, หย่า ไม้ ฮนั้ม เถา นิ่น เญย ปั์ว โหฒว เญย กง.

13เหว่ย น้าย เยีย เญย แปะ ฝีง หฒุ กว๊าด มี่ง, หลาย นิ่น บัว ไม้ เปียะ เฮญี้ยว. นิ่น บัว โหฒว โฮล เญย เมี่ยน ฒู้ง หฒุ หง่อ ไต่, นิ่น บัว เมี่ยน ม่าน หย่า จาง ฆ้าด ไต่.

14เยี่ยม เกน ฯฒฯ แบ จาง, หมอง ฆอย ต้ม ฑุ่ย, นะ เหฑ่ง เยียม เยลูซาเลม โหฒว โฮล เญย เมี่ยน เหธา เมี่ยน ม่าน, เลี่ยม โหฒว เฌียน-โย่ว เหน่า หญิด เญย เมี่ยน.

15หฒั่ง ตั๊ง เหธา ห่า ตั๊ง เมี่ยน ฒู้ง หฒุ ฒัด เหฌี่ย. มฒีง ฮลัง เญย เมี่ยน หย่า หฒุ ฒัด เหฌี่ย ไอ๊.

16มป่า เน่น เจี๋ย เญย เฒี้ยว เหว่ย แป้ง ฟิม เญย เจ๊า ตุ๊ เมี่ยน ท่าย. ธีง-เหฑ่ง เญย ทิน-ฮู่ง เหว่ย โหฒว หอบ เญย เจ๊า ปิ๋ว เม่ง นิ่น ธีง-เหฑ่ง.

17วั้ว หฒั่น ปะกี ยู่ง ตอน อ๋อย เยียม วั้ว หญั่น เมี้ย ฮนั้ง เยียม กั้น เญย เมี้ย-เธี้ยง. แซง-คู้ จุ่น เหธา ยู่ง ตอน หย่า เยียม ปุ๊ด-ฒ่อย เมี่ยน เญย เดา-ฮวาง.

18หล่ง จ๊า เญย สี่ โหฒว ฮลาง ทอ ฒุ์ย กัน เจี๊ยน มี่ง, หย่า ทอ เอ๊าะ สี่ ฮนั้ง หล่ง ฮลาง ทอ เธีย วั้ว เต๋ย, อ๋อย หฒุ โค้ว อ๊ะ.

19เม่ย บัว ก๊อง, “โท้ เฒี้ยว เซี้ยบๆ เญย โหฒว, โท้ นิ่น ก๊าน โหฒว เหฒียง, เหว่ย ปุน เยีย บัว ตุ๊ ปวัด. โท้ ปุน อิสะลาเอน เญย ธีง-เหฑ่ง ทิน-ฮู่ง เญย หฒะเอ๋ย เถา ฟัด. โท้ ปุน ต้าย, เหว่ย ปุน เยีย บัว ไฮ่ ฮิ้ว.

20ก๊อง เอ๊าะ สี่ เป๋น คู้ สี่, คู้ สี่ เป๋น เอ๊าะ สี่ วั้ว เต๋ย, เหธา ปุน หฮมวัง เป๋น ฌัง, ฌัง เป๋น หฮมวัง, อิม เป๋น กาม, กาม เป๋น อิม วั้ว เต๋ย อ๋อย หฒุ โค้ว อ๊ะ.

21หฒิว กั้น เญย มฒีง หมั่ง, ฝุน กั้น ม่าย ธง-เม่ง, หย่า หฒิว กั้น หมั่ง, ฮนั้ม ต้าย กั้น ไกว วั้ว เต๋ย, อ๋อย หฒุ โค้ว อ๊ะ.

22ตุ๊ เม่ง เต้า ฮบ อะหงุ่น ติ๊ว เฮ้น เญย เมี่ยน, เหธา ต๊าม โฮล เญย เผว เหฒีย หญู่ง ติ๊ว-คู้ วั้ว เต๋ย, อ๋อย หฒุ โค้ว อ๊ะ.

23เซ ปู๋ง โหฒว ต่อง เญย เมี่ยน เหว่ย ตุ๊ ฒิบ ญ่าน หฮมวัง, ไม้ โหฒว ต่อง เญย เมี่ยน หย่า ไม้ ตุ๊ แป้ง ฟิม เญย เจ๊า วั้ว เต๋ย เมี่ยน อ๋อย หฒุ โค้ว อ๊ะ.

24เหว่ย น้าย ฮนั้ง โต์ว-เบียด ปั๊ว ชุย เบย้า ฆ้าว, เมี้ย-ฆาย หย่า เยียม โต์ว กะญั์ว โย้บ เหฌี่ย, นิ่น บัว เญย ฑู่ง ฒู้ง ฮนั้ง ลัด เญย กะน้าย นอ, นิ่น บัว เญย เปี้ยง เหฒี่ย, หฒุ หฑยาว ป่วน ฮนั้ง เนีย-บูง, เหว่ย หฒุ นิ่น บัว แหง่ง เน่น เจี๋ย เญย เฒี้ยว เญย เล์ย-หลัด, แอ๋ง หมั่ง เผีย อิสะลาเอน เญย ธีง-เหฑ่ง ทิน-ฮู่ง เญย หว่า.

25เหว่ย น้าย เฒี้ยว เฉีย เจี์ย ไห่ นิ่น เญย แปะ ฝีง, นิ่น ซูง นิ่น เญย ปั์ว เบ๊าะ นิ่น บัว เหฌี่ย, หฒวัง บง ฯฒฯ ต์ง. นิ่น บัว เญย เซย ดุย เจี๊ยน จาย-ห่อง ฮนั้ง หละฟับ-ดุย. ไม้ กุ๊น ฮนั้ง หน่าย, นิ่น เญย กะเฉีย หธ่อ ไม้ ฟิว, นิ่น หธ่อ ซูง เจี๊ยน นิ่น เญย ปั์ว.

26นิ่น อ๋อย เหลียบ นอม จั๋ง-โห่ เหว่ย นอม โก เญย กั๊วะ, หย่า ฟิ้ว ธ้วด เฉีย เห่ว เยียม วั้ว ลู่ง กอน เญย เมี่ยน ต้าย. หมั่ง ม่าะ! นิ่น บัว เซี้ยบๆ เญย ก๊าน เจี๊ยน ต้าย.

27เยียม นิ่น บัว กะญั์ว ไม้ ม่าย หาย เต้า โค้ว ไฟ ดิ๊ หฒุ ดอบ, ไม้ ม่าย หาย เต้า มฌ่อม ตะฮงัด ไฟ เปว๋ย มฌ่อม. ไซ จ๊าย เญย ฮลาง หย่า ไม้ หลุ่น, เฮ่ ฮลาง หย่า ไม้ ตั๋ง.

28นิ่น บัว เญย ฟอง-ธัง ไหล่, เหยียด ฒู้ง จวัง-หฒิน ฮลาง หย่า แปง เจี๊ยน อ๊ะ. นิ่น บัว เญย ม์า-เต้ย ปวัด ฮนั้ง โต์ว-เลา เญย หละเปย๊ย, นิ่น บัว เญย เบ๊าะ จ๋า เธีย-เยี่ยน ฮนั้ง หฑยาว-หฒุ่น.

29นิ่น บัว เห่ว ฮนั้ง เซี่ยน เญ์ย, หย่า เห่ว ฮนั้ง เซี่ยน หลุน. นิ่น บัว ฌุ่น เจี๊ยน หงาด นิ่น บัว ธา ต้าย เญย กะน้าย ต้อ มี่ง หย่า ไม้ ม่าย หาย เต้า เหฌียว.

30เถา วั้ว ฮนอย นิ่น บัว อ๋อย ตอง เจี๊ยน อิสะลาเอน เมี่ยน เห่ว ฮนั้ง ค้อย เญย ววม เจี์ย หล่าง บุย. สี ก๊อง หาย เต้า หมั่ง วั้ว นอม กั๊วะ, ขูง ม่าย หฮมวัง เหธา เฑ่า เญย สี่. เลี่ยม ฌัง หฒุ บ๋วน ท้อง เจี๊ยน หฮมวัง มี่ง.

← Chapter 4 Jump to: Chapter 6 →