Isaiah 41

Mien Bible (Thai Script) © Thailand Bible Society, 2007

← Chapter 40 Jump to: Chapter 42 →

1ทิน-ฮู่ง ก๊อง, “ค้อย-โฑว อ่า, อ๋อย หฒุ เยียม เยีย เญย หฑะเฮมียน เซ้ก เหฑียะ, อ๋อย หฒุ ปุน หม่าน ฝีง ตุ๊ เซียง-ชะ เฮ้น เจี์ย ต้าย. ปุน นิ่น บัว ต้าย ฟัด หย่า ปุน นิ่น บัว ก๊อง, ปุน บัว ต้าย ฒุ้น ล่ม ฑ่อย หฒุ เซี้ยม ตี่ง.

2“หาย เต้า หยัวะ เต้า เมี่ยน เยียม ตง ปูง ต้าย? ตะฟ่าน นิ่น เญย เหฒา ธ้าย เญย ต๋อง นิ่น ตุ๊ ฮี่ง เหฑ่ง. เฒี้ยว เฒาะ เหฒีย กั๊วะ จิว ปุน นิ่น, ปุน นิ่น กุ๊น เหฒีย เต้า ฮู่ง เตี๋ย. นิ่น หล่ง นิ่น เญย หฑุ ด๊าว ไต๋ นิ่น บัว, ปุน นิ่น บัว เป๋น เนีย-บูง, หย่า หล่ง นิ่น เญย จวัง-หฒิน ปุน นิ่น บัว ฮนั้ง หฒุ หฑยาว ป่วน เญย เบย้า ฆ้าว.

3นิ่น หฒุ่น นิ่น บัว มี่ง หย่า แป้ง ออน เญย เจี๋ย นิ่น บัว, ยั่ง นิ่น เญย เหฒา ไม้ ธ้าย เจี๋ย เญย เจ๊า.

4หาย เต้า โหฒว น้าย เต๋ย สี่ หย่า โหฒว ตุ๊ ธ้วด, เยียม ต้ง ธอ เห่ว ต่อย เจี๋ย ต่อย ธ้วด ต้าย? เยีย, เฒี้ยว, เยียม กอน, เถา เซ้ด เมว์ย เยีย หย่า เยียม เญย. เยีย เซ ต้ง วั้ว เต้า อ๊ะ.”

5ค้อย-โฑว เญย เมี่ยน ตุ๊ ปวัด ฯฒฯ กั้ม เหฑีย, จ่ม ลู่ง เดี๊ย เญย เมี่ยน ซิน หฒิน. นิ่น บัว เปียะ ต้าย ฟัด,

6เก๊าะ-เมี่ยน เถง เก๊าะ-เมี่ยน เญย จวั่ง ล์าง เมี่ยน หย่า ก๊อง บั๋ว นิ่น เญย ก๋อ-โย์ว, “อ๋อย หฒุ หฒูง ต๊าม.”

7เดี๋ยง-หฒั่ง ขวิน เจียม-หฒั่ง. หล่ง เฒว่ย ต๊า ย่วน เญย เมี่ยน เธง ห่อน เญย เมี่ยน. ก๊อง, “ห่อน ตุ๊ หย่าว ไห่.” นิ่น แอ๋ง หล่ง ตีง ตีง เจี๊ยน ปุน หมิ่ว-ฝัง ไม้ ไฮ่ คีง.

8“มป่า เม่ย, อิสะลาเอน, เซ เยีย เญย โปว, ยาโค้บ, ต้ง เยีย กิ๊น ต้าย วั้ว เต้า, เยีย เญย โล์-แกง ต่อย, อับลาฮัม เญย เฒ้ย-ฟุน,

9เยีย เยียม ลู่ง กอน เฒาะ เม่ย, หย่า เยียม เดา-เป้ย โก เจี๋ย เญย ต๋อง เห่ว เม่ย ต้าย. เยีย ก๊อง, ‘เม่ย โหฒว เยีย เญย โปว.’ เยีย กิ๊น เม่ย ต้าย หย่า ไม้ กวั่ง เม่ย.

10ไม้ ตู๋ง กั้ม เหฑีย. เยีย เหธา เม่ย เยียม. ไม้ ตู๋ง เฮญี้ยว หนัม เหว่ย หฒุ เยีย โหฒว เม่ย เญย ทิน-ฮู่ง. เยีย อ๋อย ปุน เม่ย เฮ้น หย่า อ๋อย เถง เม่ย. เยีย อ๋อย หล่ง เยีย แป้ง ฟิม เญย บย่าว เจี๊ยะ ปั์ว ป๊า เจี๊ยน เม่ย.

11“ตะฟ่าน โน์ว เม่ย วั้ว เต๋ย เมี่ยน ฒู้ง อ๋อย หฒุ ไญ้, หฒุ ป่าย เฮมียน. แหง่ง เม่ย วั้ว เต๋ย, อ๋อย หฒุ ป่าย, หฒุ เหมียด.

12ไม้ กุ๊น เม่ย ล์อ เหธา เม่ย ต๋อย-เตก เญย เมี่ยน, เม่ย ล์อ หย่า ล์อ ไม้ ปวัด. เหธา เม่ย เบ๊าะ จ๋า วั้ว เต๋ย อ๋อย เจี๋ย เหฑ่ง, หฒุ ป่าย หมี่ อ๊ะ.

13เหว่ย หฒุ เยีย, เฒี้ยว, เม่ย เญย ทิน-ฮู่ง, นั้น เม่ย เญย บย่าว เจี๊ยะ ปั์ว. เซ ต้ง เยีย ก๊อง บั๋ว เม่ย, ไม้ ตู๋ง กั้ม เหฑีย, เยีย อ๋อย เถง เม่ย.

14โอ ยาโค้บ อ่า, เม่ย ฮนั้ง แกง-เมา ไม้ เฮ้น, ไม้ ตู๋ง กั้ม เหฑีย. โอ อิสะลาเอน อ่า, เม่ย ไฝ. เยีย กั้น อ๋อย เถง เม่ย.” น้าย เซ เฒี้ยว ก๊อง, ต้ง หฒัวะ เม่ย วั้ว เต้า, เซ อิสะลาเอน เญย ธีง-เหฑ่ง ทิน-ฮู่ง.

15“หมั่ง ม่าะ! เยีย อ๋อย ปุน เม่ย เป๋น เบ๊าะ เบย้า เญย จา-สี่, เซียง เญย, ไหล่ เญย, ม่าย ญ่า เญย. เม่ย อ๋อย เบ๊าะ บง บาง หม่วน เหฑ่ง, หย่า โหฒว ปุน บง-ไอ๊ ฮนั้ง เบี๊ยะ นอ.

16เม่ย อ๋อย หญม นิ่น บัว. หฑยาว ฯฒฯ ป่วน นิ่น บัว มี่ง. หฑยาว-หฒุ่น อ๋อย ป่วน นิ่น บัว ฟ้าด หฑาน. มป่า เม่ย อ๋อย เขา เฒี้ยว ตุ๊ เฌียน-โย่ว. เม่ย อ๋อย เธง อิสะลาเอน เญย ธีง-เหฑ่ง ทิน-ฮู่ง.

17“เมี่ยน จ่ม เมี่ยน เหธา ตั๋ง-ต๋น เญย เมี่ยน ล์อ ววม, หย่า ไม้ ม่าย. นิ่น บัว จาง ฆ้าด, เบียด บ๋อง ฆาย, มป่า เยีย, เฒี้ยว, อ๋อย เตา นิ่น บัว. เยีย, อิสะลาเอน เญย ทิน-ฮู่ง, ไม้ กวั่ง นิ่น บัว.

18เยีย อ๋อย เยียม เดา-ฮลัง ฌัง เญย ต๋อง ปุน ด้าย ธ้วด, ปุน เยียม ฮ์อง กะญั์ว ม่าย ววม-ฒี้ง. เยีย อ๋อย ปุน เต่ย-ปูง-ฮ์าน เป๋น ววม-ฌ่าง, ปุน เดา-ฆาย เป๋น ววม-ฒี้ง.

19เยีย อ๋อย เยียม เต่ย-ปูง-ฮวาง หฒวัง สีดา ฒ่ง เดี๋ยง, ตะซุ เดี๋ยง, ฟาน หฒิ เลี่ยว เดี๋ยง เหธา กะลั้น เดี๋ยง. เยีย อ๋อย เยียม เต่ย-ปูง-ฮ์าน หฒวัง ปัว คว้าย น่อม เญย ฒ่ง, แอ๋ง เหธา อี หญู่ง ฒ่ง เดี๋ยง,

20เหว่ย ปุน เมี่ยน ปวัด ฯฒฯ ฮิ้ว, เซ ปุน นิ่น บัว ฮนั้ม หลง หย่า เม่ง แปะ, เซ เฒี้ยว เญย ปั์ว ฮนั้ง น้าย นอ โหฒว, เซ อิสะลาเอน เญย ธีง-เหฑ่ง ทิน-ฮู่ง เหฒย ธ้วด ต้าย.”

21เฒี้ยว ก๊อง, “ต้อ เม่ย บัว โก๋ เญย สี่ ต้าย ก๊อง ม่าะ!” ยาโค้บ เญย ฮู่ง เตี๋ย ก๊อง, “ เม่ย บัว อ๋อย แฑง ฮี่ง เญย เล์ย กุ๊น ต้าย ก๊อง อ๊ะ.

22กุ๊น ต้อ ต้าย บั๋ว เยีย บัว อ๋อย ม่าย หาย หญู่ง สี่ ธ้วด. เจี๋ย ต้าย เญย สี่ อ๋อย หฒุ บั๋ว เยีย บัว เหว่ย ปุน เยีย บัว ฒ่า หมั่ง ฯฒฯ ฮิ้ว ตุ๊ น้าย เต๋ย สี่ เญย เซ้ด เมว์ย อ๋อย ฮนั้ง หาย นอ.

23ก๊อง ปุน เยีย บัว หมวัง เหว่ย ปุน เยีย บัว ฮิ้ว ตุ๊ โฮ์ ฆาง อ๋อย ม่าย หาย หญู่ง สี่ ธ้วด. เยีย บัว ฯฒฯ ไฮ่ ฮิ้ว ตุ๊ เม่ย บัว เซ เฒี่ยน. โหฒว คู้ สี่ ไฟ โหฒว เอ๊าะ สี่ เหว่ย ปุน เยีย บัว เฑ่า หย่า กั้ม เหฑีย.

24หมั่ง ม่าะ! เม่ย บัว เซ หฒะเก้ง ไม้ ลั่ม หล่ง. เม่ย บัว เญย กง หย่า โหฒว ไม้ ธ้วด หาย หญู่ง. กิ๊น เม่ย บัว วั้ว เต้า เซ กั้ม เฑี้ย ไห่.

25“เยีย เยียม ป๊ะ ปูง กิ๊น เต้า เมี่ยน ต้าย, นิ่น เยียม บะฮนอย ธ้วด ปูง เห่ว เยีย เญย บั๋ว. นิ่น อ๋อย ธ้าย เจี๊ยน กุ๊น เญย เมี่ยน ฮนั้ง นิ่น บัว โหฒว ววม-ปั่ม, ฮนั้ง นั้น เนีย-มอ เญย เมี่ยน ธ้าย ปะไน่ เนีย.

26หาย เต้า เยียม กอน ก๊อง น้าย เต๋ย สี่, เหว่ย ปุน เยีย บัว ฮิ้ว, ไฟ จา-ด่าง บั๋ว, เยีย บัว หธีง ต้าย ไฮ่ ก๊อง, ‘ก๊อง ตุ๊ หฒุ เญย’? ไม้ ม่าย หาย เต้า บั๋ว เยีย บัว ฮิ้ว ตุ๊ น้าย เต๋ย สี่, ไม้ ม่าย หาย เต้า จา-ด่าง ก๊อง. ไม้ ม่าย หาย เต้า ไฮ์ เม่ย บัว ก๊อง หาย หญู่ง.

27เยีย โหฒว ต้าว เต้า ก๊อง บั๋ว สิโอน, ‘หมั่ง ม่าะ! นิ่น บัว เยียม น้าย.’ เยีย พ้าย เต้า โต่ว คู้ เฝียน เญย เมี่ยน มี่ง เยลูซาเลม.

28เยีย หมั่ง เญย เฒี่ยง โห่ ไม้ ม่าย เมี่ยน. เยีย หมั่ง มป่า เยียม นิ่น บัว บุด๋ง ไม้ ม่าย ธ่าง ล่าง เญย เมี่ยน. เยีย หน่าย หย่า ไม้ ม่าย หาย เต้า เตา.

29หมั่ง ม่าะ! นิ่น บัว เหยียด ฒู้ง ไม้ ลั่ม หล่ง. นิ่น บัว โหฒว เญย เจ๊า หย่า ไม้ ลั่ม หล่ง. นิ่น บัว โต๋ ต้าย เญย หมิ่ว-ฝัง ฮนั้ง ขูง-หฑยาว นอ.”

← Chapter 40 Jump to: Chapter 42 →