Isaiah 51

Mien Bible (Thai Script) © Thailand Bible Society, 2007

← Chapter 50 Jump to: Chapter 52 →

1เฒี้ยว ก๊อง, “เม่ย บัว กัน แป้ง ฟิม เญย เจ๊า ยั่ง หย่า ต้าย ล์อ เฒี้ยว เญย เมี่ยน, หมวัง เยีย ม่าะ! อ๋อย หฒุ ฮนั้ม เถา เม่ย บัว เยียม หฒุ ดี้ง ธ้วด ต้าย วั้ว นอม หละเปย๊ย, หย่า ฮนั้ม หมั่ง เม่ย หฒุ เว้ด ธ้วด ต้าย วั้ว นอม หละเปย๊ย-ค้วด.

2อ๋อย หฒุ ฮนั้ม ก๋า เม่ย บัว เญย อง-ถาย, อับลาฮัม, หย่า ฮนั้ม หมั่ง ก๋า ซาลา, ต้ง ยู์ง เม่ย ต้าย วั้ว เต้า. เหว่ย หฒุ อับลาฮัม ดุ ล่าน เมี่ยน เยียม เญย เฒี่ยง โห่ เยีย เห่ว นิ่น. เยีย หย่า เหธย ฟุ ปุน นิ่น, ปุน นิ่น เญย เมี่ยน โสว ธั้ม.

3เหว่ย หฒุ เยีย, เฒี้ยว, ฒู้ง อ๋อย ออน สิโอน, หย่า อ๋อย ค้อ-เลี่ยน สิโอน เญย เหยียด ฒู้ง บาง หว่าย เญย ต๋อง. เยีย อ๋อย ปุน นิ่น เญย เต่ย-ปูง-ฮวาง ฮนั้ง เอเดน หฮวีง, กวั่ง ฮวาง เญย ต๋อง หย่า ฮนั้ง เยีย, เฒี้ยว, เญย หฮวีง. เยียม สิโอน กะญั์ว ฯฒฯ ม่าย เฌียน-โย่ว ออน-เหลาะ, ม่าย แล์ง ฒี่ง เหธา ป๋าว ฑูง เญย เฉีย.

4“โอ เยีย เญย แปะ ฝีง อ่า, หมวัง เยีย ม่าะ! โอ เยีย เญย กั๊วะ เญย เมี่ยน อ้า! แปง มน่อม หมวัง เยีย. เยีย อ๋อย เฒาะ เยีย เญย เล์ย-หลัด จิว ปุน หม่าน ฝีง. เยีย แป้ง ฟิม เญย เล์ย อ๋อย โหฒว ฌัง หฒิว นิ่น บัว.

5เยีย แป้ง ฟิม เญย เจ๊า เถา ฟัด, เยีย เญย เหฌียว เอน หย่า ธ้วด มี่ง, เยีย กั้น อ๋อย กุ๊น หม่าน กั๊วะ. ค้อย-โฑว ฒั้ว เจี๊ยน เยีย, ฒั้ว เจี๊ยน ม่าย ลั่ม ฮนั้ม เยีย อ๋อย เหฌียว นิ่น บัว.

6เม่ย บัว เธา เฮมียน หมั่ง ลู่ง, หย่า หมั่ง กะเดี๊ย เดา, เหว่ย หฒุ ลู่ง อ๋อย หมิด เหฑ่ง ฮนั้ง โต์ว-เสียว, เดา หย่า อ๋อย ฮนั้ง ลุย-โหว นอ, ฮู้ เหฑ่ง. เยียม หน่าย เญย เมี่ยน หย่า ฮนั้ง วั้ว นอ ไต่ เหฑ่ง. มป่า เยีย เญย เหฌียว เอน เหยียด ลิ์ว เยียม, เยีย เญย กง-ฟิม เหยียด ลิ์ว ไม้ ไฮ่ จ่ม.

7“เม่ย บัว ฮิ้ว ตุ๊ หาย หญู่ง หอบ เญย เมี่ยน, เซ ม่าย เยีย เญย เล์ย-หลัด เยียม เม่ย เญย เฮญี้ยว เญย เมี่ยน อ้า! หมวัง เยีย ม่าะ! เมี่ยน ต้าน เม่ย บัว, ไม้ ตู๋ง กั้ม เหฑีย. เมี่ยน ฮว้วด เม่ย บัว หย่า ไม้ ตู๋ง เฮญี้ยว หนัม.

8เหว่ย หฒุ แกง อ๋อย หงาด นิ่น บัว ฮนั้ง หงาด ลุย-โหว, แกง-เมา อ๋อย หงาด ฮนั้ง หงาด ปะกี ยู่ง เปยย. มป่า เยีย เญย กง-ฟิม อ๋อย เหยียด ลิ์ว เยียม, เยีย เญย เหฌียว เอน เถา หม่าน โก๊ว หม่าน ต่อย.”

9เฒี้ยว อ่า, เญีย ต้าย, เญีย ต้าย ม่าะ! หล่ง เม่ย เญย ชะ เหฌียว เยีย บัว ม่าะ! เญีย ต้าย ฮนั้ง โล์-ฮนอย วั้ว เต๋ย ต่อย เจี๋ย ต่อย เญย เฒี่ยง โห่. เซ เม่ย ฮงะ ลาหับ เป๋น เหยียด หฆัน เหยียด หฆัน, หย่า ฑบ ทง จูง-ฮู่ง ไม้ เฒ์ย?

10เซ เม่ย ปุน ค้อย ฆาย มี่ง, ปุน โด เญย ววม ฆาย, โหฒว ปุน ค้อย โด เญย ต๋อง เป๋น เจ๊า, ปุน หฒัวะ หฑวน เญย เมี่ยน เจี๋ย ไม้ เฒ์ย?

11เฒี้ยว หฒัวะ หฑวน เญย เมี่ยน ฯฒฯ หฑวน, ป๋าว เจี๊ยน ฑูง ต้าย เถา สิโอน. นิ่น บัว ฒู้ง อ๋อย ม่าย เหยียด ลิ์ว เญย เฌียน-โย่ว. นิ่น บัว อ๋อย ตุ๊ เฌียน-โย่ว ออน-เหลาะ. โยว-เฑ่า เหธา เท้า เฉีย-โดะ เญย เจ๊า อ๋อย เจี๋ย หมี่ อ๊ะ.

12“เยีย, เซ เยีย กั้น, ออน เม่ย บัว เญย เฮญี้ยว. เม่ย บัว เป๋น หาย เต้า หธีง กั้ม เหฑีย ไฮ่ ไต่ เญย เมี่ยน? เซ กั้ม เหฑีย ป้าม เมี่ยน, นิ่น บัว ขูง ฮนั้ง เมี้ย นอ.

13เม่ย บัว หย่า หละคุ เหฒย เม่ย บัว ต้าย วั้ว เต้า เซ หละคุ ธอง ลู่ง แอ๋ง เหลียบ เดา เญย กอน-โด๊ะ วั้ว เต้า เฒี้ยว. เหว่ย น้าย เม่ย บัว หธีง ต้าย เฒี่ยง ฮนอย กั้ม เหฑีย ไห่ อ๋อย เหฒย เม่ย บัว วั้ว เต๋ย เฉีย เจี์ย, โน์ว เญย สี่. นิ่น บัว เหลียบ เฮญี้ยว อ๋อย เหมียด เม่ย บัว, มป่า นิ่น บัว เฉีย เจี์ย, โน์ว เม่ย บัว เญย สี่ เจี๋ย หาย หมี่ อ๊ะ?

14หฒุ หววน โล่ เญย เมี่ยน อ๋อย เซี้ยบๆ เญย ตุ๊ ปู๋ง ฆอย. นิ่น ไม้ ไต่, ไม้ หฒุ เหฌี่ย เยี่ยม เกน. นิ่น เญย หญั่น ฮบ หย่า ไม้ ตั๋ง.

15เยีย เซ เฒี้ยว, เม่ย เญย ทิน-ฮู่ง. เยีย โช้ว ค้อย ปุน ววม-หล่าง บุย ฌุ่นๆ เญย. เยีย เญย บั๋ว เซ เน่น เจี๋ย เญย เฒี้ยว.

16เยีย เฒาะ เยีย เญย หว่า หฌาว เม่ย, หย่า หล่ง เยีย เญย ปั์ว เปว เจี๊ยน เม่ย. เยีย ธอง ลู่ง แอ๋ง เหลียบ เดา เญย กอน-โด๊ะ, หย่า ก๊อง บั๋ว สิโอน เมี่ยน, ‘เม่ย โหฒว เยีย เญย แปะ ฝีง.’”

17เยลูซาเลม อ้า! เจี์ย ต้าย, เจี์ย ต้าย, โซ้ว เจี์ย ต้าย ม่าะ! เฒี้ยว เฉีย เจี์ย, โน์ว เม่ย ฯฒฯ ธุ้น ปุน เม่ย ฮบ เญย ฒ้าน เม่ย ตุ๊ ฮบ ลิ์ว อ๊ะ, ฒู้ง ฮบ เถา ขูง เหฒ่ง ติ๊ว-ฒา ฮนั้ง ฯฒฯ ปุน เม่ย ลู่งๆ ไล่ๆ เญย.

18เม่ย ยู์ง เญย หฒวัง น่าม โญ์ว ไม้ ม่าย หาย เต้า เยี์ยน เยลูซาเลม. เม่ย ต้อ โฮล เญย เหยียด ฒู้ง ฝุเจว๊ย, ไม้ ม่าย เหยียด เต้า เคน เม่ย.

19เม่ย หฒุ น้าย เต๋ย อี หญู่ง เหฒะ หน่าน, ม่าย หาย เต้า ไฮ่ เถง เม่ย เฑ่า เญี้ยม? เม่ย หฒุ ป่าย, หฒุ เหมียด, เม่ย เญย เมี่ยน หฒุ หง่อ, หฒุ หฑุ ด๊าว ไต๋. หาย เต้า อ๋อย ออน เม่ย เญย เฮญี้ยว?

20เม่ย เญย เมี่ยน เม่ย มี่ง, เปว๋ย เจี๊ยน เยียม ติ้วๆ เจ๊า-คู้ ฮนั้ง จูง หฒุ เมี่ยน แฒง มู์ง ฮลบ เจี๊ยน. นิ่น บัว หฒุ เฒี้ยว โน์ว เถา ต้าว, หย่า หฒุ เม่ย เญย ทิน-ฮู่ง เหม.

21เหว่ย น้าย เม่ย หฒุ เสี่ยว โค้ว เญย เมี่ยน อ้า! เม่ย ฆวิน หย่า ไม้ เฒ์ย หลาย ติ๊ว ฆวิน.

22เม่ย เญย เฒี้ยว, เซ เฒี้ยว, เม่ย เญย ทิน-ฮู่ง, ต้ง อ๋อย เหว่ย นิ่น เญย แปะ ฝีง แหธง สี่, ฮนั้ง น้าย ก๊อง, “หมั่ง ม่าะ! เยีย เฒาะ ฆอย เยียม เม่ย บัว เญย ปั์ว ปุน เมี่ยน ลู่งๆ ไล่ๆ เญย ฒ้าน, เซ เยีย เฉีย เจี์ย เญย เฒี่ยง โห่ ปุน เม่ย ฮบ เญย ฒ้าน, เยียม น้าย มี่ง เม่ย บัว ไม้ หฒุ ฮบ.

23เยีย อ๋อย เฒาะ วั้ว นอม ฒ้าน อัน เจี๊ยน เหฒย เม่ย วั้ว เต๋ย เมี่ยน เญย ปั์ว. นิ่น บัว ต๋อย เม่ย ก๊อง, ‘บ๊าบ เหฌี่ย ปุน เยีย บัว ธ้าย เจี๊ยน เม่ย เจี๋ย ม่าะ!’ เม่ย ฯฒฯ ปุน เม่ย เญย ติ ต์าน ฮนั้ง เดา, หย่า ฮนั้ง เฮย-ห่อง เญย เจ๊า เซว่ย นิ่น บัว เจี๋ย.”

← Chapter 50 Jump to: Chapter 52 →