Isaiah 65

Mien Bible (Thai Script) © Thailand Bible Society, 2007

← Chapter 64 Jump to: Chapter 66 →

1เฒี้ยว, ก๊อง, “เยีย หลิ่ว เล์ย เหฒียง ปุน ไม้ หน่าย เถา เยีย วั้ว เต๋ย, ฮิ้ว ตุ๊ เยีย, หย่า หลิ่ว เล์ย เหฒียง ปุน ไม้ ล์อ เยีย วั้ว เต๋ย, ตุ๊ ล์อ ปวัด เยีย. เยีย ก๊อง, ‘เยีย เยียม น้าย. เยีย เยียม น้าย,’ บั๋ว ไม้ เต๋า เก๋า โจ้ว เยีย เญย เม่ง เญย เหยียด กั๊วะ เมี่ยน.’

2เยีย เฒี่ยง ฮนอย ซูง เจี๊ยน เยีย เญย ปั์ว ปุน เหยียด ฝีง เฮญี้ยว แหง่ง เญย เมี่ยน. นิ่น บัว เซว่ย นิ่น บัว กั้น เญย เฮญี้ยว ฮนั้ม ธ้วด เญย สี่, ยั่ง ไม้ หอบ เญย เจ๊า.

3น้าย เต๋ย แปะ ฝีง ตอง เจี๊ยน เยีย หฒั่นๆ ธัวะ เยีย. นิ่น บัว เยียม หฮวีง เฒาะ กะน้าย ฝ่ง ห่อ เหฒี่ย, หย่า เยียม ฮวุย-ฒุน ดุย กู้ หงว่าย ปั๊ว ฮูง.

4นิ่น บัว มี่ง เฒว์ย เจี๊ยน โฒ้ว บุด๋ง, เยียม วั้ว โฒ้ว กะญั์ว เจี๋ย ม์วน. นิ่น บัว หญั่น ตู์ง-อ๊อ. นิ่น บัว เญย แธง-เยี้ยน กะญั์ว ม่าย กั้ม เฑี้ย ไห่ เญย อ๊อ-ทอง.

5นิ่น บัว ก๊อง, ‘ซิ้ม ฆอย, ไม้ ตู๋ง ต้าย ฟัด อ๊ะ, เหว่ย หฒุ เยีย เก้า ธีง-เหฑ่ง เม่ย.’ น้าย เต๋ย เมี่ยน เป๋น เยียม เยีย เญย บะฒอง เญย เสียว, เป๋น เฒี่ยง ฮนอย เหฒียะ เจี๊ยน เญย โต์ว.

6“หมั่ง ม่าะ! ม่าย หว่า เฟี้ย เจี๊ยน เยีย เญย หฑะเฮมียน ก๊อง, เยีย ไม้ เซ้ก. เยีย อ๋อย วิ่น เหฑ่ง ปุน นิ่น บัว, เยีย ฒู้ง อ๋อย วิ่น หฑวน ปุน นิ่น บัว,

7เลี่ยม นิ่น บัว เญย ฒุ์ย เหธา นิ่น บัว เญย อง-ถาย เญย ฒุ์ย. เหว่ย หฒุ นิ่น บัว เยียม บง กู้ หงว่าย ปั๊ว ฮูง, หย่า เยียม บง-ไอ๊ ก๊อง โตะ คี เยีย. เยีย ฯฒฯ หฒิว นิ่น บัว โหฒว เจี๋ย ต้าย เญย สี่ ฮลาว หฑวน ปุน นิ่น บัว.” น้าย เซ เฒี้ยว ก๊อง เญย หว่า.

8เฒี้ยว ฮนั้ง น้าย นอ ก๊อง, “อะหงุ่น ติ๊ว เยียม อะหงุ่น เปี๊ยว-จ้อย ธ้วด หย่า ม่าย เมี่ยน ก๊อง, ‘ไม้ ตู๋ง โหฒว หว่าย. หธ่อ ม่าย ลั่ม หล่ง เญย.’ เยีย ฯฒฯ เหว่ย เยีย เญย โปว ฮนั้ง น้าย นอ โหฒว. เยีย ไม้ เหมียด นิ่น บัว เหยียด ฒู้ง.

9เยีย อ๋อย ปุน ยาโค้บ ม่าย โฮ์ ต่อย เฒ้ย-ฟุน, หย่า ปุน เยียม ยูดา ธ้วด เญย เมี่ยน ตุ๊ หฑิบ เยีย เญย หฒวัง บง. เยีย กิ๊น ต้าย เญย เมี่ยน หย่า ตุ๊ หฑิบ. เยีย เญย หฒวัง โปว หย่า ตุ๊ เยียม หน่าย.

10ซาโลน เดา-แป้ง อ๋อย เป๋น ปะกี ยู่ง เหธา ยู่ง กวั้น เญย เมี้ย-เธี้ยง, อาโค ฮ์อง อ๋อย เป๋น ง่ง กวั้น เปว๋ย เญย ต๋อง เหว่ย เยีย เญย แปะ ฝีง, ต้ง ล์อ เยีย วั้ว เต๋ย.

11“มป่า เม่ย บัว กวั่ง เฒี้ยว เญย เมี่ยน, เซ เม่ย บัว หละคุ เยีย เญย ธีง-เหฑ่ง บง หย่า เบ่น เตี้ย เหว่ย กาด เฒี่ยน, หล่ง หฑ่อม เผว เหฒีย หญู่ง ติ๊ว เธี้ย เหฒี่ย ปุน เมนี เฒี่ยน.

12เยีย ฯฒฯ ตี่ง ปุน เม่ย บัว เญย โฮ์ ฆาง หฒุ หฑุ ด๊าว, เม่ย บัว เหยียด ฒู้ง อ๋อย หฒุ บ๊าบ เหฌี่ย หฒุ ไต๋. เหว่ย หฒุ เยีย เห่ว เม่ย บัว มป่า เม่ย บัว ไม้ เตา, เยีย ก๊อง มป่า เม่ย บัว ไม้ หมวัง. ต๋าว หฑวน เม่ย บัว เยียม เยีย เญย หฑะเฮมียน โหฒว เอ๊าะ สี่, หย่า กิ๊น ต้ง เยีย ไม้ อะเฮน้ย เญย สี่.”

13เหว่ย น้าย เฒี้ยว ทิน-ฮู่ง ฮนั้ง น้าย นอ ก๊อง, “หมั่ง ม่าะ! เยีย เญย หฒวัง โปว ฒู้ง ตุ๊ หญั่น, มป่า เม่ย บัว อ๋อย หฒุ เฮญี้ยว เซีย. เยีย เญย หฒวัง โปว ตุ๊ ฮบ, มป่า เม่ย บัว อ๋อย หฒุ จาง ฆ้าด. เยีย เญย หฒวัง โปว อ๋อย ตุ๊ เฌียน-โย่ว, มป่า เม่ย บัว อ๋อย หฒุ ไญ้.

14เยีย เญย หฒวัง โปว อ๋อย ป๋าว ฑูง เหว่ย เฮญี้ยว กะญั์ว เฌียน-โย่ว, มป่า เม่ย บัว อ๋อย เห่ว ธ้วด เหว่ย เม่ย บัว เฮญี้ยว ปะหละ เฑ่า. เม่ย บัว อ๋อย เญี้ยม โค้ว เหว่ย เฮญี้ยว มุน ตุ๊ เซียง.

15เม่ย บัว หฒุ กวั่ง เม่ย บัว กั้น เญย บั๋ว, ปุน เยีย กิ๊น ต้าย เญย เมี่ยน หล่ง เป๋น เหฒียว เญย หว่า. เฒี้ยว ทิน-ฮู่ง อ๋อย ปุน เม่ย บัว หฒุ ไต๋, มป่า นิ่น อ๋อย เฒาะ กั้น นอม บั๋ว ปุน นิ่น เญย โปว บัว.

16ฮนั้ง หน่าย, หาย เต้า เยียม เต่ย-ปูง เหว่ย กั้น โท้ ฟุ, ฯฒฯ หล่ง เฒียน เล์ย เญย ทิน-ฮู่ง เญย บั๋ว โท้. หาย เต้า เยียม เต่ย-ปูง โฮ้ว หว่า, ฯฒฯ เฒี้ยง เจี๊ยน เฒียน เล์ย เญย ทิน-ฮู่ง เญย บั๋ว โฮ้ว. เหว่ย หฒุ ฒิ่น ด่าง หฒุ เญย เหฒะ หน่าน ฒู้ง หละคุ หมี่ อ๊ะ, เยีย เญย มฒีง หย่า ไม้ ปวัด หมี่ อ๊ะ.

17“หมั่ง ม่าะ! เยีย อ๋อย เหฒย เซียง-ลู่ง เซียง-เดา. ฒิ่น ด่าง เญย สี่ ฒู้ง ไม้ จั๋ง, เลี่ยม ไม้ ฮนั้ม เถา.

18มป่า อ๋อย หฒุ อะเฮน้ย, ออน-เหลาะ เหว่ย เยีย เหฒย ต้าย เญย กะน้าย. เหว่ย หฒุ เยีย อ๋อย เหฒย เยลูซาเลม เป๋น เมี่ยน อะเฮน้ย เญย ต๋อง. ฒี่ง กะญั์ว เญย แปะ ฝีง หย่า อ๋อย ออน-เหลาะ.

19เยีย ฯฒฯ เหว่ย เยลูซาเลม เฌียน-โย่ว, หย่า เหว่ย เยีย เญย แปะ ฝีง ออน-เหลาะ. เยียม ฒี่ง กะญั์ว ไม้ ม่าย หาย เต้า แอ๋ง ไฮ์ เญี้ยม เญย เฉีย ไฟ เห่ว ตุ๊ เฑ่า เญย เฉีย.

20“เยียม หน่าย กะญั์ว เหยียด ลิ์ว ไม้ แอ๋ง ม่าย กู้งว์า เฒี่ยง อี เหฒีย ฮนอย ฮนั้ง, ไฟ ม่าย เมี่ยน โก๋ เมี่ยน ไม้ เฒี่ยง ปวั๊ง โสว โหม่ว. ตุ๊ เหยียด แป๊ะ หฮญัง ไต่ เญย เมี่ยน ฝุน เป๋น เมี่ยน หลุน เมี่ยน, เฒี่ยง ไม้ เถา เหยียด แป๊ะ หฮญัง ไต่ วั้ว เต๋ย, ฝุน เป๋น หฒุ เหฒียว เญย เมี่ยน.

21นิ่น บัว อ๋อย โหฒว เปย๊า เหว่ย กั้น เปียะ มี่ง เยียม. นิ่น บัว อ๋อย โหฒว หฮวีง หฒวัง อะหงุ่น เปี๊ยว หย่า หญั่น หฮวีง เญย เปี๊ยว.

22นิ่น บัว ไม้ โหฒว เปย๊า ปุน กั้น เต้า เยียม. นิ่น บัว ไม้ โหฒว หฮวีง หฒวัง อะหงุ่น เปี๊ยว ปุน กั้น เต้า หญั่น. เหว่ย หฒุ เยีย เญย แปะ ฝีง เฒี่ยง เญย ฮนอย ฒู้ง ฮนั้ง เดี๋ยง เฒี่ยง เญย ฮนอย-เหญียะ. เยีย กิ๊น ต้าย เญย เมี่ยน ฯฒฯ อะเฮน้ย นิ่น บัว เญย ปั์ว โหฒว เญย กง เล่า เญย.

23นิ่น บัว โหฒว เญย กง นิ่น บัว ไม้ แปะๆ โหฒว, นิ่น บัว ยู์ง เญย กู้งว์า หย่า ไม้ หฒุ เหฒะ หน่าน, เหว่ย หฒุ นิ่น บัว ตุ๊ โหฒว เฒี้ยว เหธย ฟุ เญย เมี่ยน, เลี่ยม นิ่น บัว กั้น เหธา นิ่น บัว เญย โฮ์ ต่อย เฒ้ย-ฟุน.

24นิ่น บัว ไม้ แก้ง โท้, เยีย ฯฒฯ เตา. นิ่น บัว หธ่อ ก๊อง เจี๊ยน หว่า เญย เฒี่ยง โห่ เยีย ฯฒฯ ไฮ์.

25เฮยี่ย จู๊ เหธา ปะกี ยู่ง ตอน อ๋อย จวั่ง เจี๊ยน หญั่น. เซี่ยน อ๋อย หญั่น เบย้า ฆ้าว ฮนั้ง ง่ง. เนีย-บูง เป๋น นาง เญย หญั่น ฮบ. ตะฟ่าน เยียม เยีย เญย ธีง-เหฑ่ง บง เญย ต๋อง, นิ่น บัว เหยียด ฒู้ง ไม้ ห่อย, ไม้ โหฒว เหมียด.” เฒี้ยว ฮนั้ง น้าย ก๊อง.

← Chapter 64 Jump to: Chapter 66 →