Isaiah 49

Mien Bible (Thai Script) © Thailand Bible Society, 2007

← Chapter 48 Jump to: Chapter 50 →

1โอ ค้อย-โฑว เญย เมี่ยน อ้า! หมวัง เยีย ม่าะ! เยียม โก เญย หฒวัง ฝีง, อ๋อย หฒุ หมวัง หลง. เยีย ไม้ แก้ง ธ้วด เสย, เฒี้ยว เห่ว เยีย. เยีย เยียม มา เญย กะเซีย วั้ว หฒั่น, นิ่น เถง เยีย ธ้วด บั๋ว.

2นิ่น ปุน เยีย เญย ฑุ่ย ฮนั้ง หฑุ ด๊าว ไหล่, เฒาะ เยีย ปี๋ง เจี๊ยน นิ่น เญย ปั์ว เญย ต้ง ลิ่น กะเดี๊ย. นิ่น ปุน เยีย ฮนั้ง ฑ้าด ต้าย โหย่ว! โหย่ว เญย ฟอง, เฒาะ เยีย ปี๋ง เจี๊ยน นิ่น เญย ฟอง-ด้ง กะญั์ว.

3นิ่น ก๊อง บั๋ว เยีย, “เม่ย โหฒว เยีย เญย โปว, อิสะลาเอน. เยีย เหว่ย เม่ย ฒู้ง อ๋อย ตุ๊ เมี่ยน ท่าย.”

4มป่า เยีย ก๊อง, “เยีย ล่าว หลุ่ย หย่า โหฒว ไม้ ธ้วด หาย หญู่ง. เยีย แปะๆ ด๊อด ชะ หย่า ไม้ ลั่ม หล่ง. มป่า เยีย หอบ หฒุ ตุ๊ เญย ป่วน เยียม เฒี้ยว วั้ว. เยีย เญย ฒี่ง เหญ่ย หย่า เหธา เยีย เญย ทิน-ฮู่ง เยียม.”

5เฒี้ยว ก๊อง, เยีย ไม้ แก้ง ธ้วด เสย วั้ว หฒั่น เฒี้ยว พ้าย เยีย โหฒว นิ่น เญย โปว, เหว่ย ต้อ ยาโค้บ หฑวน ต้าย ล์อ นิ่น, ปุน อิสะลาเอน ต้าย กั๊บ ฒุ้น นิ่น วั้ว. เหว่ย หฒุ หฒิว เฒี้ยว หมั่ง นิ่น ท่าย เยีย. เยีย เญย ทิน-ฮู่ง เป๋น เยีย เญย ชะ.

6นิ่น ก๊อง, “เม่ย โหฒว เยีย เญย โปว เหว่ย ต้อ ยาโค้บ เญย ฝีงๆ เมี่ยน หฑวน ฮนั้ง โล์ วั้ว นอ, เหว่ย ต้อ เหฒ่ง เหฌี่ย เญย อิสะลาเอน เมี่ยน หฑวน ต้าย, น้าย ปวัด เป๋น ไฝ-ฟิ้ว สี่. เยีย หย่า อ๋อย ปุน เม่ย โหฒว ฌัง หฒิว หม่าน กั๊วะ เมี่ยน, เหว่ย ปุน เม่ย เญย เหฌียว เอน มี่ง จ่ม ลู่ง เดี๊ย.”

7เฒี้ยว, ต้ง หฒัวะ อิสะลาเอน เมี่ยน หย่า เป๋น นิ่น บัว เญย ธีง-เหฑ่ง ทิน-ฮู่ง วั้ว เต้า, ฮนั้ง น้าย นอ ก๊อง บั๋ว หฒุ เมี่ยน หมั่ง เผีย, หฒุ ป๊วน-กั๊วะ เมี่ยน โหยว, หย่า เถง โหฒว โฮล เญย เมี่ยน เญย โปว วั้ว เต้า. “ฮู่ง เตี๋ย ตุ๊ ปวัด เม่ย ฯฒฯ โซ้ว เจี์ย ต้าย. โหฒว โฮล เญย เมี่ยน ปวัด ฯฒฯ ป๋าย, เหว่ย เหฒียบ ฒัวะ เญย เฒี้ยว, อิสะลาเอน เญย ธีง-เหฑ่ง ทิน-ฮู่ง, ต้ง กิ๊น เม่ย ต้าย วั้ว เต้า.”

8เฒี้ยว ฮนั้ง น้าย นอ ก๊อง, “เยีย เหธย เอน เญย เฒี่ยง โห่ เยีย เตา เม่ย. เยียม ตุ๊ เหฌียว เญย ฮนอย เยีย เถง เม่ย. เยีย อ๋อย โก๋ว เม่ย หย่า หล่ง เม่ย เหธา หม่าน ฝีง เหลียบ แหง่ง หว่า. เหว่ย ปุน เต่ย-ปูง หฑวน ต้าย ฮนั้ง โล์ วั้ว นอ, แอ๋ง พ้าย ปุน เมี่ยน หฑิบ กวั่ง ฮวาง เญย เดา.

9เยีย อ๋อย บั๋ว หฒุ หววน เญย เมี่ยน, ‘ธ้วด ต้าย ม่าะ!’ แอ๋ง ก๊อง บั๋ว เยียม หฮมวัง เญย เมี่ยน, ‘ธ้วด ต้าย เยียม ฌัง ม่าะ!’ “นิ่น บัว เยียม เจ๊า หฒั่ง ตุ๊ หญั่น, ตุ๊ ฮบ. เหยียด ฒู้ง ฌัง เญย บง-ฮลัง อ๋อย เป๋น นิ่น บัว ล์อ หญั่น เญย ต๋อง.

10นิ่น บัว ไม้ หง่อ หย่า ไม้ ฆ้าด, หฑยาว-จอม เหธา หญุด โตะ ไม้ ห่อย นิ่น บัว, เหว่ย หฒุ ค้อ-เลี่ยน นิ่น บัว วั้ว เต้า อ๋อย ต้อ นิ่น บัว, เยี์ยน นิ่น บัว กัน ม่าย ววม-ฒี้ง เญย ต๋อง.

11เยีย อ๋อย ปุน เยีย เญย หฒวัง บง เป๋น เจ๊า, เยีย เญย ต้ม เจ๊า หย่า อ๋อย เหลียบ เจี์ย.

12หมั่ง ม่าะ! เยีย เญย แปะ ฝีง อ๋อย เยียม โก เญย เต่ย-ปูง ต้าย. ม่าย เต๋ย อ๋อย เยียม ป๊ะ ปูง เหธา ไฟ ปูง ต้าย. ม่าย เต๋ย อ๋อย เยียม ซีนิม เต่ย-ปูง ต้าย.”

13โอ ลู่ง อ่า, เฌียน-โย่ว เญย ป๋าว ฑูง. โอ เดา อ่า, อ๋อย หฒุ ออน-เหลาะ. โอ หฒวัง บง อ่า, เฌียน-โย่ว เญย ป๋าว ฑูง ม่าะ! เหว่ย หฒุ เฒี้ยว ออน นิ่น เญย แปะ ฝีง เญย เฮญี้ยว, หย่า ค้อ-เลี่ยน นิ่น เญย หฒุ โค้ว เญย เมี่ยน.

14มป่า สิโอน เมี่ยน ก๊อง, “ เฒี้ยว กวั่ง เยีย บัว หมี่ อ๊ะ. เยีย บัว เญย เฒี้ยว หละคุ เยีย บัว.”

15“มา ไฮ่ หละคุ ฮบ นิ่น เญย หญอ เญย กู้งว์า ไฟ ไม้ ค้อ-เลี่ยน นิ่น กั้น ยู์ง เญย ฝุเจว๊ย ไฟ? ไม้ กุ๊น นิ่น ไฮ่ หละคุ, เยีย ไม้ หละคุ เม่ย.

16หมั่ง ม่าะ! เยีย เฒาะ เม่ย เญย บั๋ว เฟี้ย เจี๊ยน เยีย เญย ปั์ว-ฒ้าง-ออ. เม่ย เญย ฒี่ง หลาด หฒั่นๆ เยียม เยีย เญย หฑะเฮมียน.

17เหธย เม่ย วั้ว เต๋ย ฮี่ง เจี๋ย อ๋อย เหมียด เม่ย วั้ว เต๋ย. ป่าย หว่าย เม่ย วั้ว เต๋ย อ๋อย เล่ย ฆอย เม่ย.

18เธา เฮมียน หมั่ง ฮวีง หฑวน เญย ต๋อง, นิ่น บัว เหยียด ฒู้ง กั๊บ ฒุ้น ต้าย ล์อ เม่ย.” เฒี้ยว ก๊อง, “เยีย เฒี้ยง เจี๊ยน เยีย กั้น เญย แหม่ง แล์ง หว่า ก๊อง, เม่ย อ๋อย ตุ๊ เม่ย เญย แปะ ฝีง เป๋น เม่ย เญย ฌัง-หล่าง, ฮนั้ง เซียง-บวั์ง อะเฮน้ย ฒอง นิ่น เญย เซียว-เซ้ด.

19“ไม้ กุ๊น เม่ย หฒุ กวั่ง ฮวาง, เป๋น ป่าย หว่าย, หฒุ เหมียด เญย ต๋อง, อี้ หฒั่น เม่ย เหบ ไห่, ไม้ เก๋า เม่ย เญย แปะ ฝีง เยียม. นะ เม่ย วั้ว เต๋ย ฒู้ง อ๋อย เล่ย เม่ย โก.

20เยียม เม่ย เฑ่า เญี้ยม เญย เฒี่ยง โห่ ธ้วด เสย เญย น่าม โญ์ว, อ๋อย ก๊อง ปุน เม่ย ไฮ์, ‘น้าย นอม ต๋อง เหว่ย เยีย บัว เหบ ไห่. โท้ ปุน ต๋อง เก้า จั๊ง เต๋ย เยีย บัว เยียม.’

21วั้ว หฒั่น เม่ย อ๋อย เยียม เฮญี้ยว ก๊อง, ‘หาย เต้า เถง เยีย ยู์ง น้าย เต๋ย เมี่ยน? เยีย หฒุ กวั่ง เยีย เญย ฝุเจว๊ย หย่า ไม้ ม่าย แซง-ยู์ง, เยีย หฒุ กว๊าด มี่ง หย่า หฒุ หฒุ่น. หาย เต้า ต้อ น้าย เต๋ย เมี่ยน โฮล ต้าย? หมั่ง ม่าะ! เยีย หฒุ กวั่ง ปุน เยีย กั้น เยียม ฮนั้ง, มป่า น้าย เต๋ย เมี่ยน เยียม หาย ต้าย?’”

22เฒี้ยว ทิน-ฮู่ง ฮนั้ง น้าย นอ ก๊อง, “หมั่ง ม่าะ! เยีย อ๋อย ย้าบ ปั์ว เห่ว หม่าน กั๊วะ เมี่ยน, หย่า เธีย เก้ เห่ว หม่าน ฝีง, นิ่น บัว ฯฒฯ ฮล้อบ เจี๊ยน เม่ย เญย ตอน บัว, หย่า เหญีย เจี๊ยน เม่ย เญย เซียะ หฑวน.

23หฒวัง ฮู่ง เตี๋ย อ๋อย ฮนั้ง เป๋น เม่ย เญย เตีย. นิ่น บัว เญย ฮู่ง หม่า อ๋อย ฮนั้ง เม่ย เญย มา หญอ. นิ่น บัว อ๋อย เยียม เม่ย เญย หฑะเฮมียน เกว่ย เหฌี่ย เฮมียน เถา เดา, เบี่ย เม่ย เญย เหฒา เญย เนีย-บูง. เม่ย ฯฒฯ ฮิ้ว ตุ๊ เยีย เซ เฒี้ยว, ฒั้ว เจี๊ยน เยีย วั้ว เต๋ย ไม้ หฒุ ป่าย เฮมียน.”

24เมี่ยน เฮ้น เมี่ยน ธ้าง ต้าย เญย กะน้าย, หาย เต้า ไฮ่ เฒาะ หฑวน. หฒุ กว๊าด มี่ง เญย เมี่ยน, หาย เต้า ไฮ่ เหฌียว เล่ย ดุ๊ด เอ๊าะ เมี่ยน เญย ปั์ว-เดี๊ย?

25มป่า เฒี้ยว ฮนั้ง น้าย นอ ก๊อง, “ไม้ กุ๊น เมี่ยน เฮ้น เมี่ยน ธ้าง ต้าย เญย กะน้าย ตุ๊ ธ้าง หฑวน, เอ๊าะ เมี่ยน กว๊าด มี่ง เญย เมี่ยน หย่า ตุ๊ เหฌียว, หาย เต้า เหธา เม่ย ต๋อย-เตก, เยีย ฯฒฯ เหธา วั้ว เต้า ต๋อย-เตก. เยีย หย่า อ๋อย เหฌียว เม่ย เญย น่าม โญ์ว.

26เยีย อ๋อย ปุน เหฒย เม่ย บัว วั้ว เต๋ย หญั่น นิ่น บัว กั้น เญย อ๊อ. นิ่น บัว หย่า อ๋อย หฒุ ฮบ กั้น เญย ฑย้าม ฆวิน มี่ง ฮนั้ง ฮบ ติ๊ว นอ. วั้ว หฒั่น หม่าน เมี่ยน ฯฒฯ ฮิ้ว ตุ๊, เยีย เซ เฒี้ยว, เม่ย บัว เญย เหฌียว เฒี้ยว, หฒัวะ เม่ย วั้ว เต้า, เซ ยาโค้บ เฮ้น ไห่ เญย ทิน-ฮู่ง.”

← Chapter 48 Jump to: Chapter 50 →