Isaiah 38

Mien Bible (Thai Script) © Thailand Bible Society, 2007

← Chapter 37 Jump to: Chapter 39 →

1ต๋อย วั้ว เต๋ย เฒี่ยง โห่ เฮเซคียา ปุ๊ด แป่ง โค้ว, ค้า เต๋ย ไต่ หมี่ อ๊ะ. อาม้อด เญย ตอน, วั้ว เต้า โต่ว หว่า เมี่ยน, อิสะยา, มี่ง หมั่ง นิ่น แอ๋ง ก๊อง บั๋ว นิ่น, “ เฒี้ยว ฮนั้ง น้าย ก๊อง. ‘เม่ย อ๋อย หฒุ หลิ่ว เล์ย หญู่งๆ ซูง เหว่ย หฒุ เม่ย ฒู้ง อ๋อย หฒุ ไต่. เม่ย ไม้ ไฮ่ หลง.’”

2เฮเซคียา ฯฒฯ ฮวิน เฮมียน มี่ง หฌ่ง วั้ว ปูง เต๋า เก๋า ก๊อง บั๋ว เฒี้ยว,

3“โอ เฒี้ยว อ่า, โท้! เม่ย จั๋ง เจี๊ยน เยีย เยียม เม่ย เญย หฑะเฮมียน เหฒียบ ฒัวะ เญย หล่ง เหฑ่ง เฮญี้ยว กัน เม่ย, หย่า หฒิว เม่ย หมั่ง, เยีย โหฒว ตุ๊ หลง.” เฮเซคียา ฯฒฯ เญี้ยม ตุ๊ เฮญี้ยว มุน ไห่.

4อิสะยา ฒิบ เฒี้ยว เญย หว่า ก๊อง,

5“มี่ง บั๋ว เฮเซคียา, ‘ เฒี้ยว, เม่ย เญย อง-ถาย, ดาวิด, เญย ทิน-ฮู่ง, ฮนั้ง น้าย นอ ก๊อง, “เยีย ไฮ์ เม่ย เต๋า เก๋า เญย หว่า หย่า ปวัด เม่ย เญย ววม-เหมว่ย. เยีย อ๋อย หฒ่อ หลง เม่ย. เยีย อ๋อย จา ปุน เม่ย เฒี่ยง เหฒียบ ฮม์ หฮญัง.

6เยีย หย่า อ๋อย เหฌียว เม่ย เหธา น้าย นอม ฒี่ง เล่ย ดุ๊ด อัดซีเลีย ฮู่ง เญย ปั์ว-เดี๊ย. เยีย อ๋อย เปว น้าย นอม ฒี่ง.”

7“‘น้าย เซ เฒี้ยว อ๋อย ปุน เม่ย เญย จั๋ง-โห่, ปุน ธีง เฒี้ยว อ๋อย เอย เจี๊ยน นิ่น แล์ง เญย หว่า โหฒว.

8หมั่ง ม่าะ! เยีย อ๋อย ปุน หญุด เญย ต้ง ลิ่น เยียม อาหัด เญย เทย หฑวน ฆะฮ้า ฆาง เหฒียบ หว่วน เทย.’” ต้ง ลิ่น ฯฒฯ ถุย หฑวน นิ่น เจี๋ย มี่ง เญย เหฒียบ หว่วน เทย.

9น้าย เซ ยูดา เญย ฮู่ง, เฮเซคียา ปุ๊ด แป่ง หลง ต้าย เฟี้ย เญย หว่า.

10เยีย ฮนั้ม ต้าย, “เยีย เญย แหม่ง เถา ด๊าม-เสย เยีย อ๋อย หฒุ เปียะ เยี่ยม เกน เญย แก้ง, เหฒ่ง เหฌี่ย เญย หฮญัง ไม้ ตุ๊ เฒี่ยง อ๊ะ.”

11เยีย ก๊อง, “เยีย ไม้ ตุ๊ ปวัด เฒี้ยว, เยีย เยียม ย่าง เกน ไม้ ตุ๊ แอ๋ง ปวัด เฒี้ยว. เยียม น้าย นอม ลู่ง เดี๊ย เยีย ไม้ ตุ๊ แอ๋ง ปวัด หาย เต้า เมี่ยน.

12เยีย เยียม เญย ต๋อง หฒุ แธะ มี่ง เล่ย ฆอย เยีย ฮนั้ง แธะ ปู๋ง ยู่ง เมี่ยน เญย ด๊บ-ลิ่ว นอ. เยีย หฌุ่น เยีย เญย แหม่ง ฮนั้ง ดั๊ด เดีย เญย เมี่ยน หฌุ่น เดีย นอ. ทิน-ฮู่ง เฒาะ เยีย จั๊บ ดุ๊ด ฮนั้ง เดีย เยียม ดั๊ด เดีย เญย จา-สี่ จั๊บ ดุ๊ด นอ. ลู่ง ฮนอย ลู่ง ม์วน เม่ย อ๋อย ปุน เยีย เญย แหม่ง เถา เซ้ด เมว์ย.

13เยีย หล่ง หน่อย ฒั้ว เถา ลู่ง ฌัง, มป่า นิ่น ฮนั้ง เซี่ยน นอ, ปุน เยีย เญย เหยียด ฒู้ง บู๊ง เน้า. ลู่ง ฮนอย ลู่ง ม์วน เม่ย อ๋อย ปุน เยีย เญย แหม่ง เถา เซ้ด เมว์ย.

14เยีย เห่ว ฮนั้ง เหนาะ บะหิน เหธา เหนาะ อ๊าบ, เยีย เห่ว ฮนั้ง แปะ ก๊บ. เยีย หมั่ง เกา กู้ หงว่าย, มฒีง ฒู้ง โค้ว เหฑ่ง. โอ เฒี้ยว อ่า, เยีย หฒุ เหฒย. โท้ ต้าย เปว เจี๊ยน เยีย.”

15มป่า เยีย ไฮ่ ก๊อง หาย หญู่ง ไฟ? เหว่ย หฒุ นิ่น เหธา เยีย ก๊อง, นิ่น กั้น หย่า ฮนั้ง น้าย นอ โหฒว. เหว่ย หฒุ เยีย เญย เฮญี้ยว โค้ว, เยียม เยีย เหยียด เสย เญย หฮญัง-ต้าว เยีย อ๋อย เซว่ย เจี๊ยน ยั่ง อ๊ะ.

16เฒี้ยว อ่า, เมี่ยน ตุ๊ เฒี่ยง เจี๊ยน เซ เหว่ย น้าย เต๋ย สี่. เยีย เญย แหม่ง หย่า เขา น้าย เต๋ย สี่ ตุ๊ เฒี่ยง เจี๊ยน. โท้ เม่ย หฒ่อ เยีย หลง ต้าย, ปุน เยีย ม่าย แหม่ง เฒี่ยง เจี๊ยน.

17เยีย หฒุ ด่ง น้าย โค้ว มต้าย เหว่ย เถง เยีย ตุ๊ หลง. เม่ย ฮนั้ม เยีย ฯฒฯ เหฌียว เยีย เล่ย ดุ๊ด หฒุ เหมียด เญย ค้วด, เหว่ย หฒุ เม่ย เฒาะ เยีย เญย เหยียด ฒู้ง ฒุ์ย ฒอย เม่ย เญย ฆะฮ้า ฆาง.

18เยียม เยี่ยม เกน เญย เมี่ยน ไม้ ม่าย หาย เต้า ไฮ่ เธง เม่ย. ไต่ มี่ง เญย เมี่ยน ไม้ ไฮ่ เธง เม่ย. เหฌี่ย วั้ว นอม ค้วด เญย เมี่ยน ไม้ ลั่ม ฮนั้ม เม่ย เหฒียบ ฒัวะ เญย เจ๊า.

19ขูง ม่าย เฒี่ยง เจี๊ยน เญย เมี่ยน, เซ เฒี่ยง เจี๊ยน เญย เมี่ยน ไฮ่ เธง เม่ย, ฮนั้ง เยีย อี้ ฮนอย เธง เม่ย นอ. เตีย อ๋อย บั๋ว นิ่น เญย น่าม โญ์ว เม่ย ด่ง หาย เหฒียบ ฒัวะ.

20เฒี้ยว อ๋อย เหฌียว เยีย. เยีย บัว เหยียด เสย ฯฒฯ เยียม เฒี้ยว เญย สีง ติ่น พัด ต้าน ป้า ป๋าว เยีย เญย ฑูง.

21อิสะยา ก๊อง, “เฒาะ ดุ้น ง่ง หญอ เปี๊ยว-ฆาย ต้าย อ๊บ เฮเซคียา เญย เฒว่ย. นิ่น ฯฒฯ หลง หมี่ อ๊ะ.”

22เฮเซคียา หน่าย, “ม่าย หาย หญู่ง จั๋ง-โห่ ปุน ธีง เยีย แอ๋ง ตุ๊ มี่ง หฒั่ง เฒี้ยว เญย เปย๊า?”

← Chapter 37 Jump to: Chapter 39 →