Isaiah 30

Mien Bible (Thai Script) © Thailand Bible Society, 2007

← Chapter 29 Jump to: Chapter 31 →

1เฒี้ยว ฮนั้ง น้าย ก๊อง, “เฮญี้ยว แหง่ง เญย น่าม โญ์ว อ๋อย หฒุ โค้ว อ๊ะ. นิ่น บัว ต๊า หฒะเอ๋ย, มป่า ไม้ เฒ์ย เยีย เญย. นิ่น บัว เหธา เมี่ยน เหลียบ แหง่ง หว่า หย่า ไม้ เฒ์ย เอย เยีย เญย สีง ลี่ง, ฒุ์ย ฯฒฯ จา ฒุ์ย.

2นิ่น บัว มี่ง อียิบ เต่ย-ปูง, หย่า ไม้ เหธา เยีย ธ่าง ล่าง. นิ่น บัว อ๋อย เขา ฟาโล ฮู่ง เถง เปว เจี๊ยน นิ่น บัว, อ๋อย ปั่ง อียิบ โหฒว ด้าว เขา เญย ต๋อง.

3มป่า เขา ฟาโล เปว เม่ย บัว อ๋อย ปุน เม่ย บัว หฒุ ไญ้. ปั่ง อียิบ โหฒว ด้าว เขา เญย ต๋อง อ๋อย ปุน เม่ย บัว หฒุ ป่าย เฮมียน.

4ไม้ กุ๊น นิ่น เญย เจียน เยียม โสอัน, นิ่น เญย กง-โฒ่ หย่า เถา ฮาเน้ด,

5นิ่น บัว เต้าๆ อ๋อย หฒุ ไญ้, หลาย เหยียด ฝีง เมี่ยน เถง ไม้ ตุ๊ นิ่น บัว. วั้ว ฝีง ไม้ ลั่ม หล่ง, เถง ไม้ ตุ๊ หาย หญู่ง. ขูง ปุน หฒุ ไญ้, หฒุ ป่าย เฮมียน.”

6น้าย เต๋ย หว่า ก๊อง เถา เยียม เนเกบ เญย เฮยี่ย ฒ่อย. นิ่น บัว เฒาะ ฒิ่น ฒ่อย อัน เจี๊ยน ล่อ เญย ติ ต์าน, เฒาะ จ๋าย เญย กะน้าย อัน เจี๊ยน ล่อ ท่อ เญย ปวัง, ทอ เจี๊ยน กัน นอม อะ เญย, โค้ว เญย เต่ย-ปูง มี่ง, เซ ม่าย เซี่ยน โก๊ว เซี่ยน เญ์ย, ม่าย นาง-โตะ เหธา นาง-ได๋, ฯฒฯ มี่ง เถา เหยียด ฝีง ไม้ ไฮ่ เถง ไม้ ตุ๊ นิ่น บัว เญย เมี่ยน.

7อียิบ เถง เญย เจ๊า เหยียด อ๋า หย่า ไม้ ลั่ม หล่ง. เหว่ย น้าย เยีย ธ้วด บั๋ว เห่ว, เฒว์ย เจี๊ยน ไม้ ต์ง เญย ลาหับ.

8อี้ หฒั่น มี่ง อ๊ะ. เฒาะ น้าย เต๋ย หว่า ดี้ง เจี๊ยน หละเปย๊ย-เป๊น, หย่า เฟี้ย เจี๊ยน โซว-หฌุ่น เหว่ย ฆะฮ้า ฮี้ง, เหยียด ลิ์ว โหฒว ฒอง-เหฒง.

9น้าย เซ เฮญี้ยว แหง่ง เญย แปะ ฝีง, ก๊อง-แปะ เญย น่าม โญ์ว, ไม้ คั้ง หมวัง เฒี้ยว หฌาว เญย น่าม โญ์ว.

10นิ่น บัว บั๋ว ก๊อง ฒิ่น โฮ์ เญย เมี่ยน, “ไม้ ตู๋ง หมั่ง หิ่น ย่าง เญย สี่ อ๊ะ.” หย่า ก๊อง บั๋ว โต่ว หว่า เมี่ยน, “ไม้ ตู๋ง โต่ว หอบ เญย เจ๊า ปุน เยีย บัว หมวัง. ก๊อง คู่ หมวัง เญย สี่ บั๋ว เยีย บัว, หย่า โต่ว เยีย บัว อะเฮน้ย หมวัง เญย หว่า ฮนั้ง.

11กวั่ง ฆอย น้าย ติ้ว เจ๊า, เล่ย ฆอย น้าย ติ้ว เจ๊า-โหล่ว. ไม้ ตู๋ง หฒั่นๆ เยียม เยีย บัว เญย หฑะเฮมียน, หฑั่ม อิสะลาเอน เญย ธีง-เหฑ่ง ทิน-ฮู่ง.”

12เหว่ย น้าย อิสะลาเอน เญย ธีง-เหฑ่ง ทิน-ฮู่ง ฮนั้ง น้าย นอ ก๊อง, “เหว่ย หฒุ เม่ย บัว เฆ่ม น้าย เต๋ย หว่า, ปั่ง เหฒย เมี่ยน เญย สี่, หย่า เขา ดั๊ว เมี่ยน เญย เจ๊า,

13น้าย หญู่ง ฒุ์ย ฯฒฯ ฮนั้ง ฒี่ง หลาด ฮลัง เญย, บ๋าย มี่ง, ฒัว ธ้วด ต้าย, เลี่ยม เฒ่ย, ดุ ตั้ง ฮนั้ง บาง หมี่ อ๊ะ.

14ฒี่ง หลาด ฯฒฯ ฮู้ ฮนั้ง นั้น เนีย หฒั่ง เญย เนีย-มอ ฮู้, หฒะเก้ง ฮู้ หม่วน เหฑ่ง, ล์อ ไม้ ตุ๊ เหยียด เหฮลง หล่ง เธ้น โต์ว ธ้วด โต์ว-เหฑ่า, ไฟ ดั๊ม ววม ธ้วด เซียว ววม เญย ค้วด.”

15เฒี้ยว ทิน-ฮู่ง, เซ อิสะลาเอน เญย ธีง-เหฑ่ง ทิน-ฮู่ง, ฮนั้ง น้าย นอ ก๊อง, “หฑวน ต้าย ฮิด ขวน เม่ย บัว ฯฒฯ ตุ๊ เหฌียว. เม่ย บัว เซ้ก เหฑียะ หย่า เขา เยีย, เม่ย บัว ฯฒฯ ตุ๊ ชะ. มป่า เม่ย บัว ไม้ คั้ง ฮนั้ง น้าย นอ โหฒว.

16เม่ย บัว ก๊อง, ‘ไม้ เฒ์ย. เยีย บัว อ๋อย เก้ ม์า เปย๋า.’ เหว่ย น้าย เม่ย บัว อ๋อย หฒุ เปย๋า. เม่ย บัว ก๊อง, ‘เยีย บัว อ๋อย เก้ ม์า-เซี้ยบ มี่ง.’ เหว่ย น้าย หฒุ่น เม่ย บัว วั้ว เต๋ย หย่า อ๋อย เซี้ยบ.

17เหยียด เต้า เมี่ยน ก๊อง แฮะ, ฯฒฯ ม่าย เหยียด ธิน เต้า เปย๋า. ปยา เต้า เมี่ยน ก๊อง แฮะ, เม่ย บัว เหยียด ฒู้ง ฯฒฯ เปย๋า, เถา เหฒ่ง เหฌี่ย เญย เมี่ยน ฮนั้ง เก้ เญย ต่ง เยียม บง-นี้ง, หย่า ฮนั้ง นอม จั๋ง-โห่ เยียม บง-ไอ๊ กู้ หงว่าย.”

18มป่า เฒี้ยว ฒั้ว เจี๊ยน อ๋อย เหธย เอน ปุน เม่ย บัว. นิ่น เจี์ย ต้าย อ๋อย ค้อ-เลี่ยน เม่ย บัว, เหว่ย หฒุ เฒี้ยว เซ แป้ง ฟิม เญย ทิน-ฮู่ง, ตะฟ่าน ฒั้ว นิ่น เญย เมี่ยน ฯฒฯ ม่าย ออน-เหลาะ.

19โอ สิโอน เมี่ยน, เซ เยียม เยลูซาเลม เญย เมี่ยน อ้า! เยียม น้าย มี่ง เม่ย บัว ไม้ หฒุ เญี้ยม อ๊ะ. เฒี้ยว ไฮ์ เม่ย บัว เห่ว เจี๊ยน โท้ เญย เฉีย, นิ่น อ๋อย เหธย เอน ปุน เม่ย บัว. นิ่น เยี้ยด ไฮ์, นิ่น ฯฒฯ เตา เม่ย บัว.

20ไม้ กุ๊น เฒี้ยว ปุน เม่ย บัว หฒุ ขวน น่าน ต๋อง ฌั้ว, หย่า ปุน โค้ว หน่าน ต๋อง ววม, เยียม น้าย มี่ง เม่ย บัว เญย ฟิน-แซง ไม้ แอ๋ง ปี๋ง. เม่ย บัว กั้น เญย มฒีง ฒู้ง ตุ๊ ปวัด นิ่น.

21ไม้ กุ๊น เม่ย บัว หูง เจี๊ยน หฒาย ไฟ บย่าว มี่ง, เม่ย บัว ฯฒฯ ไฮ์ ฆะฮ้า แหมง ม่าย เฉีย ก๊อง, “เซ ต้ง น้าย ติ้ว เจ๊า. กุ๊น ยั่ง น้าย มี่ง.”

22เม่ย บัว อ๋อย ปุน หฒุ ต้าย ปวัง เจี๊ยน ญ่าน เญย หมิ่ว-ฝัง เหธา โต๋ ต้าย ปวัง เจี๊ยน เจียม เญย หมิ่ว-ฝัง ม่าย หวุย. เม่ย บัว อ๋อย ฒอย กวั่ง ฮนั้ง กวั่ง ไล่ ฮลบ เญย กะน้าย, หย่า บั๋ว หมิ่ว-ฝัง, “มี่ง อ๊ะ.”

23เฒี้ยว อ๋อย ปุน บยู่ง เหฌี่ย ต้าย ยู์ง เม่ย บัว หฒวัง เหฌี่ย เดา เญย ญิม. เยียม เดา ธ้วด เญย ล่าง หฒิ หย่า อ๋อย หลง, ปู๋ง-หฒัวะ. เถา วั้ว ฮนอย เม่ย บัว เญย ง่ง กวั้น อ๋อย เยียม จั๊ง เญย เมี้ย-เธี้ยง หญั่น เมี้ย.

24ไล่ เดา เญย ง่ง เหธา ล่อ หย่า ตุ๊ หญั่น จา เจี๊ยน เฑ้า เญย เมี้ย เหธา หล่ง ต้ม ปะเกน-ญ้าบ เหธา กะน้าย-เธ้น ทิว ต้าย เญย เบย้า ฆ้าว.

25เถา วิน-วั้ง หฒุ ไต๋ ไต่ เญย ต้ม ฮนอย, นอมๆ ล่าว อ๋อย บาง เหฌี่ย เหฑ่ง. นอมๆ ต้ม บง ฟิ้ว-บง อ๋อย ม่าย โด๊ะ, ม่าย ววม เหลี่ยว.

26เถา เฒี้ยว เปว นิ่น เญย แปะ ฝีง หฒุ มุน เญย ต๋อง หย่า หฒ่อ ปุน นิ่น บัว หฒุ มุน เญย หนาน, หฮลา ฯฒฯ ฮนั้ง บะฮนอย นอ ฌัง. บะฮนอย เญย หญุด อ๋อย เก้า ฌัง เสี่ย โก๊ว, ฮนั้ง เสี่ย ฮนอย กั๊บ ต้าย เญย ฌัง.

27หมั่ง ม่าะ! เฒี้ยว เยียม โก เญย ต๋อง ต้าย. นิ่น เฉีย เจี์ย ฮนั้ง โต์ว นอ จอม, ม่าย เสียว โฮ์ ฝาว. นิ่น เญย ฑุ่ย ม่าย เฉีย เจี์ย เญย หว่า ปวั๊ง เหฑ่ง, แป๊ด ธ้วด ต้าย ฮนั้ง ปั๊ว ชุย เญย โต์ว.

28นิ่น เญย เฉีย ธ้วด ต้าย ฮนั้ง ววม ปวั๊ง โม่ว เหยียม เจี๊ยน ฝาว เถา จาง. นิ่น อ๋อย หล่ง หฒุ เหมียด เญย เจ๊า ล่อ หม่าน กั๊วะ, หย่า เฒาะ ฮั่น โค้ว ฟับ เมี่ยน เญย ฑุ่ย, ฯฒฯ ต้อ นิ่น บัว มี่ง ต่อง เจ๊า.

29เม่ย บัว อ๋อย ป๋าว ฑูง ฮนั้ง เม่ย บัว เจี๋ย ธีง-เหฑ่ง ฒิบ เญย ม์วน นอ. เม่ย บัว เญย เฮญี้ยว อ๋อย เฌียน-โย่ว ฮนั้ง เมี่ยน ปย๊ม เฮล้า-ด้ง หนู ฝาว เฒี้ยว เญย บง, เถา อิสะลาเอน เญย หละเปย๊ย วั้ว.

30เฒี้ยว อ๋อย ปุน เมี่ยน ตุ๊ ไฮ์ นิ่น ฮ่าง ต้าว เญย เฉีย, หย่า ปุน นิ่น บัว ปวัด นิ่น เญย ปั์ว เบ๊าะ เหฌี่ย. นิ่น หฒะเก้ง! เฉีย เจี์ย หย่า ฮนั้ง โต์ว นอ อ๋อย ปั๊ว ชุย เหฑ่ง, แอ๋ง หล่ง ต้ม บยู่ง, หฑยาว-เจี๊ยะ เหธา เปาะ.

31อัดซีเลีย เมี่ยน ไฮ์ เฒี้ยว เญย ซีง-เฉีย ฯฒฯ แฮะ นิ่น บัว หฒะเก้ง! กั้ม เหฑีย ไห่. เฒี้ยว หย่า หล่ง นิ่น เญย ฮู่ง ปย๊า เบ๊าะ นิ่น บัว.

32เฒี้ยว อ๋อย หล่ง นิ่น ตี่ง ฒุ์ย เญย ปย๊า เบ๊าะ นิ่น บัว. เบ๊าะ เหยียด ปย๊า ฯฒฯ ม่าย เบ๊าะ โฑ์, พัด ต้าน ป้า เญย เฉีย ผุย เจี๊ยน. เบ๊าะ จ๋า เญย เฒี่ยง โห่ นิ่น หล่ง นิ่น เญย ปั์ว เบ๊าะ นิ่น บัว.

33เจี๋ย ต้าย เล่า อ๊ะ, เฒี้ยว หลิ่ว เล์ย เหฒียง เหยียด นอม ต๋อง ปั๊ว ฮู่ง เตี๋ย เญย เซย. วั้ว นอม ต๋อง โหย่ว โด โหย่ว จั๊ง, โต์ว เหธา ฒ่าง หย่า ม่าย ธั้ม เญย. เฒี้ยว เญย เฉีย ฮนั้ง ฮู่ง ปั๊ว เหฒียะ ต้าย.

← Chapter 29 Jump to: Chapter 31 →