Isaiah 33

Mien Bible (Thai Script) © Thailand Bible Society, 2007

← Chapter 32 Jump to: Chapter 34 →

1เม่ย โหฒว เหมียด เญย เมี่ยน อ้า! เซ กั้น ไม้ แก้ง หฒุ เหมียด เญย เมี่ยน, เม่ย อ๋อย หฒุ โค้ว อ๊ะ. โหฒว กู๊ ไกว๋ สี่ เญย เมี่ยน, เซ กั้น ไม้ แก้ง หฒุ เมี่ยน โหฒว กู๊ ไกว๋ เญย สี่ ปุน เญย เมี่ยน, เม่ย อ๋อย หฒุ โค้ว อ๊ะ. เม่ย ตี้ง เหฌี่ย ไม้ โหฒว เหมียด เญย เฒี่ยง โห่, เม่ย กั้น อ๋อย หฒุ เหมียด. เม่ย ตี้ง เหฌี่ย ไม้ โหฒว กู๊ ไกว๋ เญย สี่ วั้ว หฒั่น, เมี่ยน ฯฒฯ โหฒว กู๊ ไกว๋ เญย สี่ ปุน เม่ย.

2โอ เฒี้ยว อ่า, โท้ ค้อ-เลี่ยน เยีย บัว. เยีย บัว ฒั้ว เจี๊ยน เม่ย. โท้ ดอมๆ โหฒว เยีย บัว เญย ชะ. เยีย บัว หฒุ โค้ว เญย เฒี่ยง โห่, โท้ โหฒว เยีย บัว เญย เหฌียว เอน.

3ไฮ์ ฌุ่นๆ เญย เฉีย บุย, หม่าน ฝีง เมี่ยน ฯฒฯ เปย๋า. เม่ย เจี์ย ต้าย วั้ว หฒั่น, หม่าน กั๊วะ เมี่ยน หฑาน เหฑ่ง.

4นิ่น บัว เญย กะน้าย หฒุ เมี่ยน ธ้าง มี่ง, ฮนั้ง จ๊บ-เหญ่ย หลุน หญั่น เหฑ่ง, เมี่ยน ดุดๆ เญย เฒาะ ฮนั้ง กวั้น จ๊บ-เหญ่ย หฑบ ปวั๊ง นอ.

5เฒี้ยว ตุ๊ เมี่ยน ท่าย เหว่ย หฒุ นิ่น เยียม ฮลัง เญย ต๋อง, นิ่น ปุน แป้ง ฟิม เหธา โหฒว หอบ เญย เจ๊า ปวั๊ง สิโอน.

6เยียม เม่ย เญย เสย เฒ้ย นิ่น อ๋อย เหลียบ กอน-โด๊ะ ว้วน, ม่าย ปู๋ง-หฒัวะ เญย เหฌียว เอน เหธา ธง-เม่ง เหธา ว่วน ฒาง. นิ่น ท่าย เฒี้ยว เป๋น นิ่น จ๋าย ไห่ เญย ฒิ่น ฒ่อย.

7หมั่ง ม่าะ! นิ่น บัว เฮ้น ไห่ เญย แปง เยียม จาย-ห่อง ชะ เญี้ยม บุย เญย. เหลียบ ถาย-แป้ง เญย กง-โฒ่ เญี้ยม ตุ๊ เฮญี้ยว มุน เญย.

8ต้ม เจ๊า ฮวางๆ วั้ว, เจี๋ย มี่ง เจี๋ย ต้าย เญย เมี่ยน ไม้ ยั่ง. เหลียบ เจี์ย เญย แหง่ง หว่า ด๊อด หมี่ อ๊ะ, เมี่ยน หมั่ง เผีย ฒอง-เหฒง เมี่ยน, หย่า ไม้ ท่าย หาย เต้า.

9เดา ฮวางๆ เฑ่าๆ วั้ว, เลบานอน หฒุ ไญ้ หย่า โคว ฆาย, ซาโลน ฮนั้ง เต่ย-ปูง-ฮวาง. บาซาน เหธา คานเมน เญย เดี๋ยง-น่อม โปย้ เหฑ่ง.

10เฒี้ยว ก๊อง, “อี้ หฒั่น เยีย อ๋อย เจี์ย ต้าย. อี้ หฒั่น เยีย อ๋อย ตุ๊ เมี่ยน ท่าย. อี้ หฒั่น เยีย อ๋อย ตุ๊ เมี่ยน เธง.

11เม่ย บัว ต๊า เญย หฒะเอ๋ย เซ ฮนั้ง เบี๊ยะ, เม่ย บัว โหฒว เญย เจ๊า ฮนั้ง เบย้า ฆ้าว. เม่ย บัว เท้า เญย เฉีย เซ ฮนั้ง โต์ว ปั๊ว ชุย เม่ย บัว กั้น.

12หม่าน ฝีง อ๋อย หฒุ ปั๊ว ชุย ฮนั้ง ฮวุย นอ, ฮนั้ง ฌิ้ม หฒุ ฮงะ ต้าย ปั๊ว โต์ว.”

13เม่ย บัว เยียม โก เญย เมี่ยน อ้า! หมวัง ไฮ์ เยีย โหฒว เญย สี่. เม่ย บัว เยียม ฟัด เญย เมี่ยน อ้า! อ๋อย หฒุ เหญี่ยม เยีย ม่าย ชะ.

14เยียม สิโอน เญย ฒุ์ย-เมี่ยน กั้ม เหฑีย ไห่. ไม้ กัน ทิน-ฮู่ง เญย เมี่ยน ซิน หฒิน เจี๊ยน. “เยียม เยีย บัว บุด๋ง, หาย เต้า ไฮ่ เหธา ปั๊ว ชุย เญย โต์ว เยียม? เยียม เยีย บัว บุด๋ง, หาย เต้า ไฮ่ เหธา เหยียด ลิ์ว เหฒียะ เญย โต์ว เยียม?”

15เซ ต้ง กัน โหฒว หอบ เญย เจ๊า, หย่า ก๊อง เฒียน หว่า วั้ว เต้า. นิ่น เฆ่ม เหฒย เมี่ยน เหว่ย ตุ๊ ญ่าน เญย สี่, หย่า เฝง ปั์ว ไม้ ฒิบ ญ่าน หฮมวัง. นิ่น ฒด เจี๊ยน มน่อม ไม้ หมวัง ไต๋ เมี่ยน ปุน ฑย้าม เหลี่ยว ธ้วด เญย หว่า, หย่า ฌิบ เจี๊ยน มฒีง ไม้ หมั่ง เอ๊าะ สี่.

16นิ่น ฒู้ง อ๋อย เยียม ฮลัง เญย ต๋อง. นิ่น ด้าว เขา เญย ต๋อง เซ ว้วน ไห่ เญย หละเปย๊ย. นิ่น ฒู้ง ตุ๊ ล่าง หฒิ หญั่น. นิ่น ฮบ เญย ววม หย่า ไม้ ตั๋ง.

17เม่ย บัว เญย มฒีง ฒู้ง ตุ๊ ปวัด ม่าย ฌัง-หล่าง เญย ฮู่ง, หย่า ตุ๊ ปวัด จั๊ง ไห่ เญย เต่ย-ปูง.

18เม่ย บัว เญย เฮญี้ยว ฯฒฯ เฟย-ฟั้ง ฒิ่น ด่าง ธ้วด ต้าย กั้ม เหฑีย ไห่ เญย สี่. กั้น ฯฒฯ หน่าย กั้น, “เถง ซ้าว วั้ว เต้า เยียม หาย? เฑียง โฑว-ฒิ่น วั้ว เต้า เยียม หาย? ซ้าว ล่าว วั้ว เต้า เยียม หาย?”

19เม่ย บัว ไม้ ตุ๊ แอ๋ง ปวัด วั้ว ฝีง เธี้ยว เญย เมี่ยน, เซ ก๊อง โด เญย, อะ ตุ๊ เปียะ เฮญี้ยว เญย หว่า, เซ กั้น ฝีง ก๊อง กั้น หญู่ง, ต้ง เม่ย บัว ไม้ ฮิ้ว เญย หว่า.

20หมั่ง สิโอน ฒี่ง ม่าะ! เซ เยีย บัว ตี่ง ต้าย เจี๋ย ฒิบ เญย ฒี่ง. เม่ย บัว เญย มฒีง อ๋อย ตุ๊ ปวัด เยลูซาเลม, เซ แป้ง ออน เยียม เญย ต๋อง, ไม้ หฒุ ซุ้ย เญย ด๊บ-ลิ่ว. ธอง ด๊บ-ลิ่ว เญย ต่ง เหยียด ลิ์ว ไม้ แปง ธ้วด, นิ่น เญย เหยียด ติ้ว ฮลาง หย่า ไม้ ตั๋ง.

21เยียม วั้ว เฒี้ยว อ๋อย เหว่ย เยีย บัว หิ่น นิ่น เญย ฌัง-หล่าง, เยียม วั้ว ม่าย โด๊ะ ม่าย ด้าย จั๊ง เญย ต๋อง. หล่ง เฒ่ย แฑง เญย ฑั้ง ไม้ กัน วั้ว เต๋ย ววม, หย่า ไม้ ม่าย เหฑว่ย เญย ต้ม ฑั้ง เจี๋ย.

22เหว่ย หฒุ เฒี้ยว โหฒว เยีย บัว เญย เซี้ยม ฒุ์ย เจียน. เฒี้ยว เซ จิว เล์ย-หลัด ปุน เยีย บัว วั้ว เต้า. เฒี้ยว ต้ง เยีย บัว เญย ฮู่ง. นิ่น อ๋อย เหฌียว เยีย บัว.

23เม่ย บัว ธอง เญย ฮลาง ดั้น หมี่ อ๊ะ. ธอง ฮลาง เญย เดี้ยว ฯฒฯ ไม้ ไฮ่ ว้วน. เดีย-บวั้ง หย่า ธอง ไม้ ตุ๊ จั๊ง. วั้ว หฒั่น นิ่น บัว ฯฒฯ ปุน ฆอย ธ้าง ต้าย เญย กะน้าย ธั้ม เญย. เลี่ยม เหฒา ไบ เญย เมี่ยน หย่า ตุ๊ ธ้าง ต้าย เญย กะน้าย.

24เยียม สิโอน ฒี่ง เญย เมี่ยน ไม้ ม่าย หาย เต้า ก๊อง, “เยีย ปุ๊ด แป่ง.” เยียม วั้ว เญย แปะ ฝีง เญย ฒุ์ย หย่า ตุ๊ กวั่ง ลิ์ว อ๊ะ.

← Chapter 32 Jump to: Chapter 34 →