1 Samuel 1

Kamba (Mbivilia) 1956

Jump to: Chapter 2 →

1Na kwaĩ mũndũ ũmwe wa Lamathaimu‐nzovimu, wa nthĩ yĩ iĩma ya Evalaimu, na syĩtwa yake eetawa Elikana, mwana wa Yeloamu, mwana wa Eliu, mwana wa Tou, mwana wa Nzuve, Mũevalaimu:

2na aĩ na iveti ilĩ; syĩtwa ya kĩmwe kyeetawa Aana, na syĩtwa ya kĩla kĩngĩ Venina: na Venina aĩ na syana, ĩndĩ Aana ndaĩ syana.

3Na mũndũ ũsu ambataa o kĩla mwaka kuma ndũanĩ yoo akathaithe na kũthembea Yeova wa nguthu ku Silo. Na ana elĩ ma Eli, Ovini na Vineasi, athembi ma Yeova, maĩ kw’o.

4Na yĩla mũthenya wavikaa wa Elikana kũthemba, amanengae Venina mũka wake, na ana make na eĩtu make onthe, ilungu:

5ĩndĩ anengae Aana kĩlungu kĩanĩe kũndũ kwĩlĩ; nũndũ nĩwamwendete Aana, ĩndĩ Yeova nĩwavingĩte ĩvu yake.

6Na nthũ yake yamũthatasya mũno, ĩtumae eew’a woo, nĩkwĩthĩwa Yeova nĩwavingĩte ĩvu yake.

7Na o akĩka ũu kĩla mwaka, yĩla wambataa nyũmbanĩ ya Yeova, now’o yamũthatasya; kwondũ wa ũu aĩa na ndaaya.

8Na Elikana mũũme wake amwĩa, Aana, nĩkĩ ũkũĩa? Na nĩkĩ ũteũya? Na nĩkĩ ngoo yaku yĩ na woo? Nyie ndi mũseo kwaku kũvĩtũka ana ĩkũmi?

9Kwondũ wa ũu ĩtina wa mamina kũya, na mamina kũnyw’a me ku Silo, Aana ookĩla. Na ĩndĩ Eli mũthembi ekalĩte kĩvĩlanĩ kyake vakuvĩ na mũtĩ wĩ ũtee wa mũomo wa ĩkalũ ya Yeova.

10Na Aana aĩ na ũũ mũnene wa ngoo, na avoya Yeova, na aĩa mũno.

11Na eevĩta wĩvĩto, na asya, Ame Yeova wa nguthu, ethĩwa w’o ũkasisya thĩna wa mũthũkũmi waku mwĩĩtu, na ũindilikana nyie, na ũilea kũlwa nĩ mũthũkũmi waku mwĩĩtu, ĩndĩ ũkanenga mũthũkũmi waku mwĩĩtu, mwana mũũme, nĩvo ĩndĩ nĩmũnengane kwa Yeova mĩthenya yonthe ya thayũ wake, na vati wenzi ũkavika mũtwe wake.

12Na kweethĩwa, o aendeee na kũvoya e mbee wa Yeova, Eli asyaĩĩsya kanyw’a wake.

13Na ĩndĩ Aana aneenaa ngoonĩ yake; no ilomo syake syanyaunyasya, ĩndĩ wasya wake ndwaaĩw’ĩka: kwondũ wa ũu Eli asũanĩa nũnyw’ĩte.

14Na Eli amwĩa, Wĩĩkala wĩ mũnywi kũvika ĩndĩĩ? Veta kũasa naku mbinyu yaku.

15Na Aana asũngĩa na amwĩa, Aiee, mwĩaĩi wakwa, nyie nĩ mũndũ mũka wĩ na veva wĩ woo: ndinyw’ĩte mbinyu kana kĩla kĩtoonasya, ĩndĩ nĩonoasya ngoo yakwa vala ve Yeova.

16Ndũkatale mũthũkũmi waku mwĩĩtu ta mũndũ mũka mũthũku; nũndũ kuma wingĩnĩ wa mũnyungunyĩsyo wakwa na kũthataw’a kwakwa nĩnĩneenete kũvika yu.

17Nĩvo ĩndĩ Eli wasũngĩie na amwĩa, Enda na mũuo; na Ngai wa Isilaeli nakũnenge ũndũ ũsu waku wamũvoya.

18Na asya, Mũthũkũmi waku mwĩĩtu nĩone ũseo methonĩ maku. Kwondũ wa ũu kĩveti kyathi, na kyaya; na ũthyũ wakyo ndwaatuka ĩngĩ.

19Na mookĩla kĩoko tene, na mathaithĩa vu mbee wa Yeova, na masyoka, mavika nyũmbanĩ yoo Lama. Na Elikana amũmanya Aana mũka wake; na Yeova amũlilikana;

20na kweethĩwa, yĩla ĩvinda yavikie, Aana aitava na asyaa mwana; na amwĩta syĩtwa yake Samueli, akyasya, Nĩkwĩthĩwa nĩnamwĩtisye kwa Yeova.

21Na mũndũ ũsu Elikana na nyũmba yake yonthe mambata kũmũthembea Yeova nthembo ya mwaka, o na ya wĩvĩto wake.

22Ĩndĩ Aana ndaambata; nũndũ amwĩie mũũme, Nyie ndiambata mũvaka mwana aaĩa; na ĩndĩ ngamũtwaa, nĩ kana aumĩle mbee wa Yeova, na akĩkalaa vau ĩndĩ yonthe.

23Na Elikana mũũme wake amwĩa, Ĩka ũndũ ũkwona wĩ ũseo; ĩkala kũvika wamũaĩsya; ĩndĩ Yeova nalũlũmĩlye ndeto yake. Kwondũ wa ũu kĩveti kyekala kĩkyongya mwana wakyo, kuvika, kyamũaĩsya.

24Na yĩla kyamũaĩisye, kyambata vamwe nake, kĩ na tũsalũ twa mũew’a tũtatũ, na eva ĩmwe ya mũtu, na kathatwa ka mbinyu na amũtwaa nyũmbanĩ ya Yeova ku Silo: na mwana aĩ mũnini.

25Na moaa kasalũ ka mũew’a, na matwaa mwana kwa Eli.

26Na kyamwĩa, We, mwĩaĩi wakwa, o tondũ kyuu kyaku kĩ thayũ, mwĩaĩi wakwa, ninyie kĩla kĩveti kyaũngamĩte vakuvĩ naku vaa, kĩimũvoya Yeova.

27Navoyaa mwana ũũ; na Yeova nũnengete kĩla namwĩtisye:

28kwondũ wa ũu o nakwa nĩnĩmũnenganĩte kwa Yeova; ĩvinda yĩla wĩĩkala thayũ we nĩ mũnengane kwa Yeova. Na amũthaithĩa Yeova vau.

Jump to: Chapter 2 →