1 Samuel 14 — Kamba (Mbivilia) 1956

1Na yu kweethĩwa mũthenya ũmwe, Yonathani mwana wa Saulo amwĩa mwanake ũla wamũkuĩaa mĩio yake ya kaũ, Ũka, tũinge kũla kwĩ asikalĩ ma ngome ya Avilisiti, ala me mũingo ũya. Ĩndĩ ndaamũtavya ĩthe wake.

2Na Saulo ekalĩte ngalĩ ya mũminũkĩlyo ya Ngivea, ĩtina wa mũkũngũmanga ũla wĩ Mikiloni: na andũ ala maĩ vamwe nake maĩ ta andũ maana thanthatũ;

3na Aiya, mwana wa Aituvu, mwana‐a‐inyia wa Ikavotu, mwana wa Vineasi, mwana wa Eli, mũthembi wa Yeova wa ku Silo, ekĩĩte evoti. Na andũ matyaamanya kana Yonathani nũendete.

4Na katĩ wa myanya, ĩla Yonathani wamanthaa kũvĩtĩla kũvikĩa asikalĩ ma ngome ya Avilisiti, ngalĩko ĩmwe kwaĩ ĩvia yũĩ, na ngalĩko ĩla ĩngĩ ĩvia yũĩ: na syĩtwa ya yĩmwe yeetawa Mbosesi, na syĩtwa ya yĩla yĩngĩ Sene.

5Ĩvia yĩmwe yũĩ yaũngamĩte ngalĩ ya ĩũlũ mbee wa Mikimasi, na yĩla yĩngĩ ngalĩ ya ĩtheo mbee wa Ngeva.

6Na Yonathani amwĩa mwanake ũla wakuaa mĩio yake ya kaũ, Ũka, tũinge kũla kwĩ asikalĩ ma ngome ya aa mate aĩke: nokwĩthĩwa Yeova etethya wĩa nũndũ witũ; nũndũ vati kĩsiĩĩi kwa Yeova kũtangĩĩa na aingĩ kana na avũthũ.

7Na mũkui wa mĩio yake ya kaũ amwĩa, Ĩka w’onthe ũla wĩ ngoonĩ yaku: elelũka, sisya, nyie nĩ vamwe naku kwĩanana na ngoo yaku.

8Nĩvo ĩndĩ Yonathani waisye, Sisya, nĩtũkũvĩta mũingo ku kwĩ andũ, na tũkeeyumbũa kwamo.

9Ethĩwa makatwĩa atĩĩ, Ĩkalai mũvaka tũke kũu mũĩ; ithyĩ ĩndĩ tũkaũngama vandũ vaitũ, na tũtiambata kũla maĩ.

10Ĩndĩ ethĩwa makasya atĩĩ, Ambatai kũũ tũĩ; tũkambata ĩndĩ, nũndũ Yeova nũmanenganĩte mokonĩ maitũ: na ũu nĩw’o wĩĩthĩwa wonan’yo kwitũ.

11Namo elĩ meeyumbũa kwa asikalĩ ma ngome ya Avilisiti: na Avilisiti masya, Sisyai, Aevelania nĩmekuma maimanĩ kũla meevithĩte.

12Na andũ ma ngomenĩ masũngĩa Yonathani na mũkui wa mĩio yake ya kaũ, na mamea, Ambatai kũũ tũĩ, na nĩtũũmwon’ya ũndũ. Na Yonathani amwĩa mũkui wa mĩio yake ya kaũ, Ambata ũngatĩĩe; nũndũ Yeova nũmanenganĩte mokonĩ ma Isilaeli.

13Na Yonathani alĩsa na moko na maũũ, na mũkui wa mĩio yake ya kaũ e ĩtina wake: na mavalũkangw’a nĩ Yonathani; na mũkui wa mĩio yake ya kaũ amoaĩĩa e ĩtina wake.

14Na yũaa yĩu ya mbee, yĩla yeekiwe nĩ Yonathani na mũkui wa mĩio yake ya kaũ, yaĩ ta andũ mĩongo ĩlĩ, na kĩlungunĩ kya nthĩ kya nyunzu ya matambya mĩongo mũonza kĩla kĩtonya kwĩnzwa nĩ kyove kya ng’ombe.

15Na kwaĩ kĩtetemo mwakonĩ wa maeema, na kĩsesinĩ, na katĩ wa andũ onthe; asikalĩ ma ngomenĩ, na anangi, o namo nĩmatetemie; o na nthĩ yatetema: o ta ũu kwaĩ kĩtetemo kĩnene mũno.

16Na asyaĩĩsya ma Saulo ku Ngivea ya Mbenyamini masisya; na, sisya, ĩla nguthu nĩnĩũnyaĩĩka, nayo yaenda kũũ na kũũ.

17Nĩvo ĩndĩ Saulo wameie andũ ala maĩ vamwe nake, Talai yu, mwone ũla wumie vala tũĩ. Na yĩla matalile, sisya, Yonathani na mũkui wa mĩio yake ya kaũ matyaĩ vo.

18Na Saulo amwĩa Aiya, Ete ĩsandũkũ ya Ngai vaa. Nũndũ ĩsandũkũ ya Ngai yaĩ vo ĩvinda yĩu vamwe na ana ma Isilaeli.

19Na kweethĩwa, yĩla Saulo waneenaa na mũthembi, kĩtuu kĩla kyaĩ mwakonĩ wa maeema wa Avilisiti kyaendeea na kwingĩva: na Saulo amwĩa mũthembi, Tũnga kw’oko kwaku.

20Na Saulo na andũ onthe ala maĩ nake nĩmoombanĩte vamwe, na mavika kaũnĩ: sisya, ũvyũ wa kĩla mũndũ waĩ ĩũlũ wa mũtindan’ya wake, na kwaĩ kũthokoanw’a kũnene mũno.

21Na ĩndĩ Aevelania ala maĩ na Avilisiti tene, ala mambatanisye namo kũvika mwakonĩ wa maeema, kuma nthĩ ĩla ĩthyũlũlũkĩte, o namo maalyũka methĩwe vamwe na Aisilaeli ala maĩ na Saulo na Yonathani.

22O ta ũu andũ onthe ma Isilaeli ala meevithĩte nthĩ yĩ iĩma ya Evalaimu, yĩla meewie kana Avilisiti nĩmakĩie, o namo mamavikĩla mamaatĩĩe mũno mokite.

23Ũu nĩw’o Yeova watangĩĩe Isilaeli mũthenya ũsu: na kaũ waendeea wavĩtĩla Mbethi‐aveni.

24Na andũ ma Isilaeli mathĩna mũno mũthenya ũsu; nũndũ Saulo aĩ anamaavĩthya andũ na kĩavo, akyasya, Naumanĩwe mũndũ ũla wĩya kya ũya o na kĩva kũvika wĩoo, na kũvika neeĩvanĩsya kwa amaitha makwa. Kwondũ wa ũu vati ũmwe waasama lĩu.

25Na andũ onthe malika mũtitũnĩ; na vau vaĩ ũkĩ wa nzũkĩ ĩũlũ wa nthĩ.

26Na yĩla andũ malikile mũtitũnĩ, sisya, ũkĩ nĩwavolotangaa: ĩndĩ vati mũndũ waaĩkĩa kw’oko kanyw’anĩ kwake; nũndũ andũ nĩmakĩaa wĩvĩto.

27Ĩndĩ Yonathani ndaaĩw’a yĩla ĩthe weaĩe andũ na wĩvĩto: kwondũ wa ũu atwaa mũthya wa ndata ĩla yaĩ kw’okonĩ kwake, na amĩlikya ĩwanĩ, na aete kw’oko kwake kanyw’a; na metho make masalukya.

28Ĩndĩ ũmwe wa andũ asũngĩa, na amwĩa, Ĩthe waku nũmeaĩe andũ na wĩvĩto ki, akyasya, Naumanĩwe mũndũ ũla wĩya kya ũya ũmũnthĩ. Na andũ maĩ anyalu.

29Nĩvo ĩndĩ Yonathani waisye, Asa wakwa nũmĩthĩnĩtye nthĩ: sisya, nĩngũmwĩsũva, ũndũ metho makwa masalukya nĩkwĩthĩwa nĩnasama kanini ka ũkĩ wa nzũkĩ ũũ.

30Nĩ mbee veana ata, kethĩwa andũ nĩmaĩe ũndũ mekwenda ũmũnthĩ sya mũtavo wa amaitha moo ila monie? Nũndũ yu vainethĩwa kũawa kũnene kwa Avilisiti.

31Na mamakũna Avilisiti mũthenya ũsu kuma Mikimasi kũvika Aiyaloni. Na andũ maĩ anyalu mũno;

32na andũ mathanyũkĩa mũtavo, na moosa malondu, na ng’ombe, na tũsaũ, na masyũaĩa mũthanganĩ; na andũ maiĩsanĩsya na nthakame.

33Nĩvo ĩndĩ mamũtavisye Saulo, makyasya, Sisya, andũ nĩmamũvĩtanĩsya Yeova, nũndũ nĩmekũĩsanĩsya nyama na nthakame. Nake asya, Inyw’ĩ nĩmũvĩtĩtye mĩao: vingilityai ĩvia ĩnene yũke vaa nĩĩ mũthenya ũũ.

34Na Saulo asya, Nyaĩĩkaĩ andũnĩ, na mũkĩmea, Ndeteei vaa kĩla mũndũ ng’ombe yake, na kĩla mũndũ ĩlondu yake, na syũaĩe vaa, na mũkĩya; na mũikavĩtanĩsye Yeova nũndũ wa kũĩsanĩsya na nthakame. Na andũ onthe maete kĩla mũndũ ng’ombe yake ũtukũ ũsũ, na masyũaĩa vo.

35Na Saulo amwakĩa Yeova kĩthembeo: nakyo kyaĩ kĩthembeo kya mbee kĩla wamwakĩe Yeova.

36Na Saulo asya, Nĩtũtheeei tũmaatĩĩe Avilisiti na ũtukũ, tũtave mũtavo katĩ wamo kũvika kĩoko kũikya, na tũikatialye mũndũ wamo. Nao masya, Ĩka o ũndũ ũkwona wĩ ũseo. Nĩvo ĩndĩ mũthembi waisye, Tũthengeeei vaa vakuvĩ na Ngai.

37Na Saulo akũlya Ngai ũtao, Nĩngũtheea nĩmaatĩĩe Avilisiti? Ũkamanengane mokonĩ ma Isilaeli? Ĩndĩ ndaamũsũngĩa mũthenya ũsu.

38Na Saulo asya, Thengeeai vaa vakuvĩ, inyw’ĩ anene onthe ma andũ; na mũmanye na kwona vala naĩ ĩno yĩthĩĩtwe mũthenya ũũ.

39Nũndũ, o tondũ Yeova wĩ thayũ, ũla ũtangĩĩaa Isilaeli, o na ethĩwa yĩĩthĩwa na Yonathani mwana wakwa, ndatĩa kũkw’a. Ĩndĩ vayaĩ mũndũ katĩ wa andũ onthe ũla waamũsũngĩa.

40Nĩvo ĩndĩ watavisye Isilaeli onthe, Ĩthĩwai ngalĩ ĩmwe, nakwa na Yonathani mwana wakwa tũkeethĩwa ngalĩ ĩla ĩngĩ. Na andũ onthe mamwĩa Saulo, Ĩka o ũla ũkwona wĩ ũseo.

41Kwondũ wa ũu Saulo amwĩa Yeova, Ngai wa Isilaeli, Onan’ya ũla w’o. Na Yonathani na Saulo makwatwa nĩ kula; ĩndĩ andũ mavonoka.

42Na Saulo asya, Tũlimei nyie na Yonathani mwana wakwa. Na Yonathani akwatwa.

43Nĩvo ĩndĩ Saulo wamwĩie Yonathani, Ndavya ũndũ wĩkie. Na Yonathani amũtavya, na asya, Nĩ w’o, nyie nĩnĩsamie kalũkĩ kanini ka nzũkĩ ke mũthyanĩ wa ndata ĩla yĩĩ kw’okonĩ kwakwa; na, sisya, no mũvaka nĩkw’e.

44Na Saulo asya, Ngai eke ũu o na mbee; nũndũ nũũkw’a vate ndĩi we Yonathani.

45Na andũ mamũkũlya Saulo, Yonathani nũkũkw’a, ũla wĩkie ũtangĩĩo ũũ mũnene nthĩnĩ wa Isilaeli? Ũũ wĩthĩwe kũasa: o tondũ Yeova wĩ thayũ, vati ũsw’ĩĩ ũmwe wa mũtwe wake wĩvalũka nthĩ; nũndũ nũtethisye vamwe na Ngai ũmũnthĩ. Ũu nĩw’o andũ mamũvonokisye Yonathani, ndakakw’e.

46Na ĩndĩ Saulo ambata aeka kũmaatĩĩa Avilisiti; na Avilisiti mathi kwoo.

47Na ĩndĩ yĩla Saulo wasumbĩkĩte Isilaeli, nĩwokitaa na amaitha make onthe kĩla ngalĩko, Moavi, na ana ma Amimoni, na Etomu, na asumbĩ ma Sova, na Avilisiti: na o vala wethyũũie, nĩwamakũaa.

48Nake eekie na ũkũmbaũ, na amakũna Aameleki, na avonokya Isilaeli kuma mokonĩ ma ala mamanangaa.

49Na yu ana ma Saulo maĩ Yonathani, na Isivi, na Maliki‐sua; na masyĩtwa ma eĩtu make elĩ nĩmo aa; syĩtwa ya ũla wa mbee eetawa Melavu, na syĩtwa ya ũla wa kelĩ eetawa Mikali:

50na syĩtwa ya mũka wa Saulo eetawa Ainoamu mwĩĩtu wa Aimaasi. Na syĩtwa ya kavuteni wa nguthu yake eetawa Avineli mwana wa Neli, mwendw’a‐ĩthe wa Saulo.

51Na Kisu aĩ ĩthe wa Saulo; na Neli ĩthe wa Avineli aĩ mwana wa Avieli.

52Na kwaĩ kaũ mũnene na Avilisiti mĩthenya yonthe ya Saulo: na yĩla Saulo wonie mũndũ o na wĩva wĩ vinya mũno, kana mũndũ o na wĩva ngũmbaũ, nĩwamwosaa ethĩwe nake.