1 Samuel 22

Kamba (Mbivilia) 1956

← Chapter 21 Jump to: Chapter 23 →

1Kwondũ wa ũu Ndaviti auma kw’o, na aindũkĩĩa ngunganĩ ya Atulamu: na yĩla ana‐a‐ĩthe na nyũmba yonthe ya ĩthe meewie ũu, matheea ku ũĩ.

2Na kĩla ũmwe ũla waĩ thĩnanĩ, na kĩla ũmwe waĩ na thiĩ, na kĩla ũmwe waĩ na ũũ ngoonĩ, moombanĩa vala ũĩ; nake atw’ĩka kavuteni woo: na vamwe nake vaĩ andũ ta maana ana.

3Na Ndaviti auma vu athi Misiva yĩ Moavi: na, amwĩa mũsumbĩ wa Moavi, Nĩngũkwĩsũva, ũeke asa na mwaitũ moke, mekale vamwe naku, kũvika namanya ũndũ Ngai wĩmbĩka.

4Na amaete kũla kwĩ mũsumbĩ wa Moavi: namo matũaa vamwe nake ĩvinda yonthe yĩla Ndaviti waĩ ngomenĩ yĩ vinya.

5Na mwathani Ngati amwĩa Ndaviti, Ndũkekale ĩla ngomenĩ yĩ vinya; uma, na ũkĩenda nthĩ ya Yuta. Na ĩndĩ Ndaviti athi, na avota mũtitũnĩ wa Elethi.

6Na Saulo eew’a kana Ndaviti nĩwumbũkĩte, na andũ ala maĩ vamwe nake: na ĩndĩ Saulo ekalĩte ku Ngivea, ĩtina wa mũtĩ wa mweseli ku Lama, e na ĩtumo yake kw’okonĩ kwake, na athũkũmi make make onthe maũngamĩte mamũthyũlũlũkĩte.

7Na Saulo amea athũkũmi make ala maũngamĩte mamũthyũlũlũkĩte, Ĩw’ai yu, inyw’ĩ Ambenyamini; mwana wa Yese akamũnenga kĩla ũmwe wenyu isesi na mĩũnda ya mĩsavivũ, akamũtw’a inyw’onthe makavuteni ma ngili ngili na makavuteni ma maana,

8ũndũ inyw’onthe mũnzamĩĩte, na vati ũmwe ũla waamanyĩthya yĩla mwana wakwa ũnũkũseũvya wĩw’ano na mwana wa Yese, na vati ũmwe wenyu ũla ũmbĩw’ĩaa tei, kana kũmanyĩthya kana mwana wakwa nũmbulũanĩtye na mũthũkũmi wakwa, amboveesye, o tondũ ũilyĩ ũmũnthĩ?

9Nĩvo ĩndĩ Ndoeki Mũetomu, ũla waũngamĩte na athũkũmi ma Saulo, wasũngĩie, na amwĩa, Nĩnamwonie mwana wa Yese okĩte ku Novu, kwa Aimeleki mwana wa Aituvu.

10Nake nĩwamũkũlilye Yeova nũndũ wake, na amũnenga lĩu, na amũnenga ũvyũ wa Ngoliathu Mũvilisiti.

11Na ĩndĩ mũsumbĩ atũmana mũthembi Aimeleki, mwana wa Aituvu, etwe, na nyũmba yonthe ya ĩthe, athembi ala maĩ Novu: namo mooka onthe kwa mũsumbĩ.

12Na Saulo amwĩa, Ĩw’a yu, we mwana wa Aituvu. Nake asũngĩa, Ninyioo, mwĩaĩi wakwa.

13Na Saulo amũkũlya, Nĩkĩ mũnzamĩĩte, we na mwana wa Yese, ũndũ wamũnengie imũtũ, o na ũvyũ, na wakũlilye Ngai nũndũ wake, nĩ kana ambũkĩlĩle, na kũmboveesya, o tondũ ũilyĩ ũmũnthĩ?

14Nĩvo ĩndĩ Aimeleki wamũsũngĩie mũsumbĩ, na amũkũlya, Nũũ ĩndĩ katĩ wa athũkũmi maku onthe ũla mũĩkĩĩwa ta Ndaviti, ũla mũthoni wa mũsumbĩ, na nũlikĩtw’e nzamanĩ yaku, na nũtaĩawa nyũmbanĩ yaku?

15Nyie nĩnambĩlĩlye ũmũnthĩ kũkũlya Ngai kwondũ wake? Ũu wĩthĩwe kũasa nakwa: mũsumbĩ ndakatalĩthye ũndũ o na wĩva kwa mũthũkũmi wake, kana kwa nyũmba yonthe ya asa wakwa; nũndũ mũthũkũmi waku ndesĩ ũndũ o na wĩva wa ũu w’onthe, ũnini kana ũnene.

16Na mũsumbĩ asya, Vate ndĩi nũũkw’a, Aimeleki, we, na nyũmba ya au yonthe.

17Na mũsumbĩ amea asũvĩi ala mamũũngamĩe, Ĩthyũũei, na ũaai athembi ma Yeova; nĩkwĩthĩwa kw’oko kwoo nakw’o kwĩ vamwe na Ndaviti, na nĩkwĩthĩwa mo nĩmamanyie kana nĩwakĩĩte, na matyaamanyĩthya ũndũ ũsu. Ĩndĩ athũkũmi ma mũsumbĩ matyaaĩtĩkĩla kũtambũũkya kw’oko kwoo kũvalũkĩle athembi ma Yeova.

18Na mũsumbĩ amwĩa Ndoeki, Ĩthyũũe we, na ũimathũũmũkĩa athembi. Na Ndoeki Mũetomu eethyũũa, na athũũmũkĩa athembi, na ooaa mũthenya ũsu andũ mĩongo nyanya na atano ala meekĩaa evoti ya katane.

19Na akũna Novu, ndũa ya athembi, kwa kũtemanga na ũvyũ, aũme o na aka, twana na tũla tũkwongw’a, na ng’ombe na mang’oi na malondu, o kwa kũtemanga na ũvyũ.

20Na ũmwe wa ana ma Aimeleki, mwana wa Aituvu, wetawa Aviathali, avuthũka, na akĩa aatĩĩe Ndaviti.

21Na Aviathali atavya Ndaviti kana Saulo nũmoaĩte athembi ma Yeova.

22Na Ndaviti amwĩa Aviathali, Nĩnamanyie mũthenya ũsu, yĩla Ndoeki Mũetomu waĩ vau, kana vate ndĩi akamũtavya Saulo: ninyie kĩtumi kya andũ onthe ma nyũmba ya au kũkw’a.

23Ĩkala vamwe nakwa, ndũkakĩe; nũndũ we ũla ũmanthaa thayũ wakwa emantha thayũ waku: nũndũ wĩ vamwe nakwa ũkeethĩwa ũsũvĩonĩ mũlũmu.

← Chapter 21 Jump to: Chapter 23 →