1 Samuel 27

Kamba (Mbivilia) 1956

← Chapter 26 Jump to: Chapter 28 →

1Na Ndaviti aneena ngoonĩ yake, Ngaaĩa ĩndĩ mũthenya ũmwe kw’okonĩ kwa Saulo: kũti ũndũ ũseo kwakwa kwĩ kwĩvonokesya nthĩ ya Avilisiti; na Saulo akeeyĩtũka ũndũ wakwa, kũmantha ĩngĩ mĩvakanĩ yonthe ya Isilaeli: na ĩndĩ ngavonoka kuma kw’okonĩ kwake.

2Na Ndaviti ookĩla na ainga, we na ala andũ maana thanthatũ ala maĩ vamwe nake, mathi kwa Akisi mwana wa Maoki, mũsumbĩ wa Ngathi.

3Na Ndaviti atũa na Akisi ku Ngathi, we na andũ make, kĩla mũndũ na andũ ma nyũmba yake, o Ndaviti e na aka make elĩ, Ainoamu Mũyesileeli, na Avikaili Mũkalimeli, ũla waĩ kĩveti kya Navali.

4Na kwataviw’e Saulo atĩ Ndaviti nĩwakĩie athi Ngathi: na ndaamũmantha ĩngĩ nongi.

5Na Ndaviti amwĩa Akisi, Ethĩwa yu nĩnonete ũseo kwaku, nĩmanenge vandũ ndũanĩ ĩmwe yĩ nthĩ yĩ ũtee, nĩ kana nĩtũe vo: nũndũ mũthũkũmi waku etũa naku ndũanĩ ya kĩũsumbĩ nĩkĩ?

6Nĩvo ĩndĩ Akisi wamũnengie Nzikilaki mũthenya ũsu: kwondũ wa ũu Nzikilaki nĩyĩkalaa ya asumbĩ ma Yuta kũvika ũmũnthĩ.

7Na ũtalo wa matukũ ala Ndaviti watũie nthĩ ya Avilisiti waĩ mwaka mũima na myei ĩna.

8Na Ndaviti na andũ make mambata, na mavithũkĩa Angesuli, na Angilisi, na Aamaleki; nũndũ mbaĩ isu syaĩ ĩla syatwĩe nthĩ ĩsu, ila syaĩ sya tene, ũendete Suli, o kũvika nthĩ ya Misili.

9Na Ndaviti akũna ĩ nthĩ, na ndaatialya mũndũ mũũme kana mũndũ mũka e thayũ, na atwaa malondu, na ng’ombe, na mang’oi, na ngamĩle, na ngũa; na asyoka, na avika kwa Akisi.

10Na Akisi amũkũlya, Ũvithũkie kwaaũ ũmũnthĩ? Na Ndaviti amũsũngĩa, Tũvithũkie ngalĩ ya Ĩtheo ya Yuta, na ngalĩ ya Ĩtheo ya Ayelameeli, na ngalĩ ya Ĩtheo ya Akeni.

11Na Ndaviti ndaatialya mũndũ mũũme o na mũndũ mũka e thayũ, nĩ kana amaete Ngathi, akyasya, Matikese kumbũla ũndũ witũ, makyasya, Ũu now’o Ndaviti wekaa, na now’o wailyĩ ĩvinda yonthe yĩla wekalaa nthĩ ya Avilisiti.

12Na Akisi eetĩkĩla Ndaviti, akyasya, Nũtumĩte andũ make Isilaeli mamũthĩtha mũno vyũ; kwondũ wa ũu akeethĩwa mũthũkũmi wakwa tene na tene.

← Chapter 26 Jump to: Chapter 28 →