1 Samuel 5

Kamba (Mbivilia) 1956

← Chapter 4 Jump to: Chapter 6 →

1Na ĩndĩ Avilisiti nĩmoosete ĩsandũkũ ya Ngai, na mayĩtwaa kuma Eveni‐eseli kũvika Asitoti.

2Na Avilisiti moosa ĩsandũkũ ya Ngai, na mayĩlikya nyũmbanĩ ya Ndakoni, na mayia vakuvĩ na Ndakoni.

3Na yĩla ala ma Asitoti mookĩlile ũnĩ ũsu kĩoko tene, sisya, Ndakoni nĩwavalũkĩte na ũthyũ wake nthĩ mbee wa ĩsandũkũ ya Yeova. Na moosa Ndakoni, na mamũũngamya ĩngĩ vandũ vake.

4Na yĩla mookĩlile ũnĩ ũsu ũngĩ kĩoko tene, sisya, Ndakoni aĩ o mũvalũku na ũthyũ wake nthĩ mbee wa ĩsandũkũ ya Yeova; na mũtwe wa Ndakoni na itaa syelĩ sya moko make itilĩkĩle mwalyonĩ; no kĩthũmba kya Ndakoni kyatialĩte.

5Kwondũ wa ũu o na athembi ma Ndakoni, kana o ũla ũkũlika nyũmbanĩ ya Ndakoni, ndakinyaa mwalyo kwa Ndakoni ku Asitoti, kũvika mũthenya ũũ.

6Ĩndĩ kw’oko kwa Yeova kwaĩ kũito ĩũlũ wa asu ma Asitoti, na amananga, na amakũna na mĩimũ, ku Asitoti na mĩvakanĩ yayo.

7Na yĩla andũ ma Asitoti moonie kana kwailyĩ ũu, masya, Ĩsandũkũ ya Ngai wa Isilaeli yĩtiĩkala naitũ; nũndũ kw’oko kwake nĩ kũthũku ĩũlũ waitũ, na ĩũlũ wa Ndakoni ngai yaitũ.

8Kwondũ wa ũu matũmana na moomban’ya eaĩi onthe ma Avilisiti kwoo, na mamea, Twĩĩka ata na ĩsandũkũ ya Ngai wa Isilaeli? Na masũngĩa, Ĩsandũkũ ya Ngai wa Isilaeli yĩtwawe Ngathi. Na matwaa ĩsandũkũ ya Ngai wa Isilaeli kw’o.

9Na kweethĩwa, yĩla maminie kũyĩtwaa, kw’oko kwa Yeova kweethĩwa ĩũlũ wa ndũa na kũthokoan’ya kũnene mũno: na amakũna andũ ma ĩ ndũa, anini o na anene; na maimba mĩimũ.

10Kwondũ wa ũu matwaa ĩsandũkũ ya Ngai Ekiloni. Na kweethĩwa, yĩla ĩsandũkũ ya Ngai yavikie Ekiloni, Aekiloni maua mbu, makyasya, Maete ĩsandũkũ ya Ngai wa Isilaeli kwitũ, matũaĩthye ithyĩ na andũ maitũ.

11Kwondũ wa ũu matũmana na moomban’ya vamwe eaĩi onthe ma Avilisiti, na masya, Twaĩthyai ĩsandũkũ ya Ngai wa Isilaeli, na ekai yĩsyoke vandũ a vayo ĩngĩ, nĩ kana yĩikatũaĩthye ithyĩ, na andũ maitũ. Nũndũ kwaĩ kũthokoanw’a kwĩ kĩkw’ũ ndũanĩ yonthe vyũ; kw’oko kwa Ngai kwaĩ kũito mũno vo.

12Na andũ ala mataakw’a makũniwe nĩ ĩla mĩimũ; na kĩĩo kya ndũa kyambatie kũvika ĩtunĩ.

← Chapter 4 Jump to: Chapter 6 →