1 Samuel 4

Kamba (Mbivilia) 1956

← Chapter 3 Jump to: Chapter 5 →

1Na ndeto ya Samueli yũkĩa Isilaeli onthe. Na ĩndĩ Isilaeli maenda kũkita na Avilisiti, na mamba maeema ũtee wa Eveni‐eseli: na Avilisiti mamba maeema ku Aveki.

2Na Avilisiti meetaũsya mokite na Isilaeli: na yĩla makwatisye kaũ, Isilaeli makũnwa nĩ Avilisiti; na mooaĩa andũ ta ngili inya ma nguthu ya kaũ weũnĩ.

3Na yĩla andũ mookie mwakonĩ wa maeema, atumĩa ma Isilaeli makũlya, Kĩla kĩtumie Yeova atũkũnĩthya Avilisiti ũmũnthĩ nĩ kyaũ? Tũlatyei yĩla ĩsandũkũ ya ũtianĩo ya Yeova kuma Silo tũete kũũ tũĩ, nĩ kana yũke katĩ waitũ, na kũtũtangĩĩa kuma mokonĩ ma amaitha maitũ.

4Kwondũ wa ũu andũ matũmana Silo, na maete kuma kw’o yĩla ĩsandũkũ ya ũtianĩo ya Yeova wa nguthu, ũla wĩkalaa ĩũlũ wa akeluvi: na ana elĩ ma Eli, Ovini na Vineasi, maĩ vo vamwe na ĩsandũkũ ya ũtianĩo ya Ngai.

5Na yĩla ĩsandũkũ ya ũtianĩo ya Yeova yookie mwakonĩ wa maeema, Isilaeli onthe mausya ngemi na wasya mũtũlu, mũvaka nthĩ yeetĩkĩanĩsya ĩngĩ.

6Na yĩla Avilisiti meewie wasya wa ngemi ĩsu nene, masya, Wasya ũsu wa ngemi nene wĩ mwakonĩ wa maeema wa Aevelania nĩ wa kĩ? Na mamanya kana ĩsandũkũ ya Yeova nĩyooka mwakonĩ wa maeema.

7Na Avilisiti meew’a w’ĩa, nũndũ maisye, Ngai nĩwoka mwakonĩ wa maeema. Na masya, Woo nĩ witũ! Nũndũ kũtyaamba kwĩthĩwa ũndũ ta ũũ kũvika yu.

8Woo nĩ witũ! Nũũ ũla wĩtũvonokya kuma kw’okonĩ kwa ngai ii syĩ vinya mũnene? Ii nĩ ngai ila syakũnĩe Amisili weũnĩ na mĩthemba yonthe ya mothĩn’yo.

9Ĩthĩwai na vinya, na ĩthĩwai aũme, inyw’ĩ Avilisiti, nĩ kana mũikethĩwe athũkũmi ma Aevelania, o tondũ methĩĩtwe kwenyu: ĩthĩwai aũme, na mũkyũkita.

10Na Avilisiti mokita, na Isilaeli makũnwa, na makũka kĩla mũndũ athi ĩeemanĩ yake: na vaĩ kũawa kũnene mũno; nũndũ kwavalũkilw’e andũ ma Isilaeli ala maendaa na maũũ ngili mĩongo ĩtatũ.

11Na ĩsandũkũ ya Ngai yooswa; na ana elĩ ma Eli, Ovini na Vineasi, mooawa.

12Na kwasemba mũndũ wa Mbenyamini kuma nguthunĩ ya kaũ, na avika Silo mũthenya o ũsu, ngũa syake syĩ ndembũange, na mũthanga ĩũlũ wa mũtwe wake.

13Na yĩla wavikie, sisya, Eli ekalĩte kĩvĩlanĩ kyake ũtee wa nzĩa asyaĩĩsye; nũndũ ngoo yake nĩyatelemangaa nũndũ wa ĩsandũkũ ya Ngai. Na yĩla ũ mũndũ wavikie ndũanĩ, na atavan’ya ũu, ndũa yonthe yaĩa na wasya.

14Na yĩla Eli wewie wasya wa kĩĩo, akũlya, Wasya ũũ wa kĩĩo nĩ wa kĩ? Na ũ mũndũ eekalaata, na ooka amũtavya Eli.

15Na ĩndĩ Eli aĩ wa myaka mĩongo kenda na nyanya; na metho make nĩmaĩte mbindu, ũndũ ũtatonya kwona.

16Na ũ mũndũ amwĩa Eli, Ninyie we ũla wauma nguthunĩ ya kaũ, na nĩkĩie ũmũnthĩ kuma nguthunĩ ya kaũ. Nake akũlya, Ũvoo ũendie ata, mwana wakwa?

17Na ũla waetie ũvoo asũngĩa na asya, Isilaeli nĩmakĩie Avilisiti, o na ĩngĩ kwĩthĩĩtwe kũawa kũnene andũnĩ, na ana maku elĩ namo, Ovini na Vineasi, nĩ akw’ũ, na ĩsandũkũ ya Ngai nĩ yose.

18Na kweethĩwa, yĩla wawetie ĩsandũkũ ya Ngai, Eli avalũka kuma kĩvĩlanĩ kyake na ngala ũtee wa mbingĩlo; na ngingo yake yatũlĩka, na akw’a: nũndũ aĩ mũndũ mũkũu, na mũito. Na nĩwasilanĩtye Isilaeli myaka mĩongo ĩna.

19Na mũka‐a‐mwana, kĩveti kya Vineasi, kyaĩ kĩito, vakuvĩ kũsyaa: na yĩla kyeewie ũvoo kana ĩsandũkũ ya Ngai nĩyosetwe, na kana ĩthe wa mũũme na mũũme nĩmakwie, kyakunama na kyasyaa; nũndũ woo wakyo nĩwakĩkwatie.

20Na ta ĩvinda ya kũkw’a kwakyo iveti ila syakĩũngamĩe syakĩtavya, Ndũkakĩe; nũndũ nĩwasyaa mwana. Ĩndĩ kĩtyaasũngĩa, o na kĩtyaaona ta ũndũ.

21Na kyeeta kana Ikavotu, kĩkyasya, Ũsũng’wa nĩwumĩte kwa Isilaeli; nũndũ ĩsandũkũ ya Ngai nĩyosetwe, na nũndũ wa ĩthe wa mũũme na mũũme.

22Na kyasya, Ũsũng’wa nĩwumĩte kwa Isilaeli; nũndũ ĩsandũkũ ya Ngai nĩ yose.

← Chapter 3 Jump to: Chapter 5 →