1 Samuel 6

Kamba (Mbivilia) 1956

← Chapter 5 Jump to: Chapter 7 →

1Na ĩsandũkũ ya Yeova yaĩ nthĩ ya Avilisiti myei mũonza.

2Na Avilisiti mameta athembi na ala maaũasya, makĩkũlya, Twĩĩka ata na ĩsandũkũ ya Yeova? Twon’yei ithyĩ ũndũ twĩyĩtwaa vandũ vayo.

3Namo masũngĩa, Ethĩwa nĩmũtwaa ĩsandũkũ ya Ngai wa Isilaeli, mũikayĩtwae yĩ ĩthei; ĩndĩ mũitĩa kũmũtũnganĩĩsya na nthembo kwondũ wa ĩvityo: na ĩndĩ mũkavow’a, na mũkamanya kĩtumi kya kw’oko kwake kũlea kuma kwenyu.

4Nĩvo ĩndĩ makũlilye, Nĩ kyaũ kĩĩthĩwa nthembo kwondũ wa ĩvĩtyo kĩla twĩmũtũnganĩĩsya? Na masũngĩa, Mĩimũ ĩtano ya thaavu, na mbĩa itano sya thaavu, kwĩanana na ũtalo wa eaĩi ma Avilisiti; nũndũ ũthĩn’yo ũmwe ũnaĩ ĩũlũ wenyu inyw’onthe, na ĩũlũ wa eaĩi menyu.

5Kwondũ wa ũu mũkaseũvye mĩvw’anano ĩilyĩ ta mĩimũ yenyu, na mĩvw’anano ĩilyĩ ta mbĩa syenyu ila ithũkasya nthĩ; na mũkamũnenge Ngai wa Isilaeli ndaĩa: nokwĩthĩwa aleelya kw’oko kwake vala mũĩ, na vala ve ngai syenyu, na nthĩ yenyu.

6Mwĩtuma ĩndĩ kũmya ngoo syenyu nĩkĩ, tondũ Amisili na Valao moomisye ngoo syoo? Yĩla wekie moseng’yo katĩ wamo, matyaaeka andũ maende, na mathi?

7Na yu ĩndĩ osai mũyĩseũvĩsye ĩkasya yeũ, na osai ng’ombe ilĩ ikwongya, ila itaailĩĩlwa ĩsoki; na mũkyova ng’ombe ĩkasyanĩ, na mũkĩnũkya tũsaũ twasyo tume vala iĩ;

8na mũkyosa ĩsandũkũ ya Yeova na mũyilĩĩla ĩkasyanĩ; na mũkĩkĩa mĩio ya wanake ya thaavu, ĩla mũũmũtũnganĩĩsya yĩthĩwe nthembo kwondũ wa ĩvĩtyo, nthĩnĩ wa kasandũkũ ke ũtee wayo; na mũiyĩeka yĩkũsye, nĩ kana yĩtonye kũthi.

9Na syaĩĩsyai; ethĩwa yĩkambata Mbethi‐semesi na nzĩa ya mũvaka o wayo, nĩvo ĩndĩ nĩwe ũtwĩkĩte ũthũku ũũ mũnene: ĩndĩ ethĩwa ti w’o, nĩvo twĩmanya kana ti kw’oko kwake kũtũkũnie; no ũndũ wĩkĩkĩte ũtũvikĩĩte.

10Na andũ meeka ũu, na moosa ng’ombe ilĩ ikwongya, na masyova ĩkasyanĩ, na mavingĩa tũsaũ twasyo mũsyĩ;

11na mailĩĩla ĩsandũkũ ya Yeova ĩkasyanĩ ĩũlũ, na kasandũkũ ke na mbĩa sya thaavu na mĩvw’anano ya mĩimũ yoo.

12Na ila ng’ombe nga syakwata nzĩa ndũngalu ĩelete Mbethi‐semesi; syaenda na lelũ, ikyan’ya o iendete, na ityaaĩthyũũa ũtee ngalĩko ya kw’oko kwa aũme kana kwa aka; na eaĩi ma Avilisiti maiatĩĩa kũvika mũvakanĩ wa Mbethi‐semesi.

13Na ala ma Mbethi‐semesi nĩmakethaa ngetha yoo ya nganũ mwandanĩ; na mookĩlya metho moo, na moona yĩla ĩsandũkũ, na matana ũndũ wa kũyona.

14Na ĩkasya yooka mũũndanĩ wa Yosua Mũmbethi‐semesi, na yaũngama vo, vala vaĩ ĩvia ĩnene: na maatũanga mbwaũ sya ĩkasya, na mathembea Yeova ila ng’ombe nga nthembo ya kũvĩvw’a.

15Na Alivai maumya ĩsandũkũ ya Yeova, na kasandũkũ kala kaĩ vamwe nayo, vala mĩio ya wanake ya thaavu yaĩ, na mamilĩĩla ĩũlũ wa yĩla ĩvia ĩnene: na andũ ma Mbethi‐semesi mathembea Yeova nthembo sya kũvĩvw’a na mathemba nthembo sya kũtonywa mũthenya ũsu.

16Na yĩla ala eaĩi atano ma Avilisiti moonie ũu, masyoka Ekiloni mũthenya ũsu.

17Na ĩno nĩyo mĩimũ ya thaavu ila Avilisiti matwaĩe Yeova ĩthĩwe nthembo kwondũ wa ĩvĩtyo: ũmwe nũndũ wa Asitoti, na ũmwe nũndũ wa Ngasa, na ũmwe nũndũ wa Asikeloni, na ũmwe nũndũ wa Ngathi, na ũmwe nũndũ wa Ekiloni;

18na mbĩa sya thaavu, kwĩanana na ũtalo wa ndũa syonthe sya Avilisiti ila syaĩ sya eaĩi asu atano, ndũa mbiie o na mĩsyĩ yĩ ndee, o kũvika yĩla ĩvia ĩnene, vala maiie ĩsandũkũ ya Yeova, o yĩ ĩvia yĩ vo kũvika mũthenya ũũ mũũndanĩ wa Yosua Mũmbethi‐semesi.

19Na amakũna andũ amwe ma Mbethi‐semesi, nĩkwĩthĩwa nĩmasyaisye nthĩnĩ wa ĩsandũkũ ya Yeova, amakũna andũ mĩongo mũonza, na andũ angĩ ngili mĩongo ĩtano; na andũ maĩa, nĩkwĩthĩwa Yeova nĩwamakũnie andũ na kũawa kũnene.

20Na andũ ma Mbethi‐semesi makũlya, Nũũ ũla ũtonya kũũngama mbee wa Yeova, Ngai ũũ mũtheu? Na akambata kwaũ aume kwitũ?

21Na matũma atũmwa kwa ala matwĩe Kiliathi‐yealimu, makyasya, Avilisiti nĩmatũngĩte ĩsandũkũ ya Yeova; theeai, na mũkĩyambatya kwenyu.

← Chapter 5 Jump to: Chapter 7 →