1 Samuel 13

Kamba (Mbivilia) 1956

← Chapter 12 Jump to: Chapter 14 →

1Saulo aĩ wa myaka mĩongo ĩna yĩla wambĩlĩlye kũsumbĩka; na yĩla wasumbĩkĩte Isilaeli myaka ĩlĩ,

2Saulo eenyuvĩa andũ ngili itatũ ma Isilaeli, ala ngili ilĩ maĩ vamwe na Saulo ku Mikimasi na kĩĩmanĩ kya Mbethi‐eli, na ngili yaĩ vamwe na Yonathani ku Ngivea ya Mbenyamini: na andũ ala angĩ amenũkya kĩla mũndũ ĩeemanĩ yake.

3Na Yonathani akũna ngome ya asikalĩ ma Avilisiti ĩla yaĩ Ngeva; na Avilisiti meew’a ũu. Na Saulo avuva soo watũngana nthĩ yonthe, akyasya, Aevelania nĩmew’e.

4Na Isilaeli onthe meew’a kana Saulo nũkũnie ngome ya asikalĩ ma Avilisiti, o na kana Isilaeli matw’ĩkĩte kĩla kĩthatasya kwa Avilisiti. Na andũ moombana maatĩĩe Saulo ku Ngilikali.

5Na Avilisiti moombana mokite na Isilaeli, makasya ma kaũ ngili mĩongo ĩtatũ, na ala matũlaa mbalasi ngili thanthatũ, na andũ ta kĩthangathĩ kĩla kĩ ũtee wa ũkanga ũndũ wa kwingĩva: na mambata, na mamba maeema Mikimasi, ngalĩ ya wumĩlonĩ wa syũa ya Mbethi‐aveni.

6Yĩla andũ ma Isilaeli moonie kana maĩ avivinye (nũndũ andũ maĩ athĩnu), nĩvo ĩndĩ andũ meevithie ngunganĩ, na ikuthunĩ, na mavianĩ, na mawĩvithonĩ, na maimanĩ.

7Na ĩndĩ amwe ma Aevelania nĩmaingĩte Yolotani kũvika nthĩ ya Ngati na Ngileati; ĩndĩ ũndũ wa Saulo, we aĩ o Ngilikali, na andũ onthe mamũatĩĩa maitetema.

8Nake ekala mĩthenya mũonza, kwĩanana na ĩvinda yatw’ĩtwe yĩla Samueli waiĩte: ĩndĩ Samueli ndaaũka Ngilikali; na andũ maĩ anyaĩĩku kuma vala ũĩ.

9Na Saulo asya, Ndeteei vaa nthembo ya kũvĩvw’a, na nthembo sya mũuo. Na athemba nthembo ya kũvĩvw’a.

10Na kweethĩwa, o yĩla waminũkĩlye kũthemba nthembo ya kũvĩvw’a, sisya, Samueli ooka; na Saulo aumaala amũthaũe, nĩ kana amũkethye.

11Na Samueli amũkũlya, Weka ata? Na Saulo asũngĩa, Nĩkwĩthĩwa nĩnonie andũ nĩ anyaĩĩku kuma vaa nĩĩ, o naku ndũneũka mĩthenyanĩ ĩla mĩtw’e, na Avilisiti nĩmombanĩe ku Mikimasi;

12kwondũ wa ũu nasya, Yu Avilisiti nĩmekũntheeea kũvika Ngilikali, nakwa ndinamba kwĩsũvana kwa Yeova: kwondũ wa ũu nĩnĩingĩĩsye mwene, na nathemba nthembo ya kũvĩvw’a.

13Na Samueli amwĩa Saulo, Nĩwĩkie ũtumanu; ndũnasũvĩa mwĩao wa Yeova Ngai waku, ũla ũnakwĩaĩe: nũndũ yu Yeova ethĩwa alũlũmĩlya ũsumbĩ waku kwa Isilaeli tene na tene.

14Ĩndĩ yu ũsumbĩ waku ndũkaendeea: Yeova nĩwĩmanthĩe mũndũ wendeeasya ngoo yake mwene, na Yeova nũmwiĩte ethĩwe mũnene wĩ mbee ũsumbĩnĩ wa andũ make, nĩkwĩthĩwa ndũneesũvĩa ũla Yeova ũnakwĩaĩe.

15Na Samueli ookĩla, na ambata kuma Ngilikali kũvika Ngivea ya Mbenyamini. Na Saulo atala andũ ala maĩ vo vamwe nake, andũ ta maana thanthatũ.

16Na Saulo na Yonathani mwana wake, na andũ ala maĩ vo vamwe nao, mekala Ngivea ya Mbenyamini: ĩndĩ Avilisiti mamba maeema Mikimasi.

17Na anangi mooka kuma mwakonĩ wa maeema wa Avilisiti nguthu itatũ: nguthu ĩmwe yeelelũka na nzĩa ĩla ĩvikĩte Ovala, kũvika nthĩ ya Suali;

18na nguthu ĩngĩ yeelelũka na nzĩa ya Mbethi‐oloni; na nguthu ĩngĩ yeelelũka na nzĩa ya mũvaka ũla ũsyaĩtye ĩtheo kyandanĩ kya Nzevoimu kwelekela weũnĩ.

19Na ĩndĩ kũtyaĩ mũtwii wonekaa nthĩ yonthe ya Isilaeli; nũndũ Avilisiti maasya, Nĩ kana Aevalania matikese kwĩtuĩa mbyũ kana matumo:

20ĩndĩ Aisilaeli onthe matheeaa kwa Avilisiti, nĩ kana kĩla mũndũ atusye ĩembe yake ya ng’ombe, na mũthya wa ĩembe yake ya ng’ombe, na ĩthoka yake, na mũsuululu wake;

21ĩndĩ maĩ na tũva nũndũ wa mĩsuululu, na nũndũ wa mĩthya ya maembe ma ng’ombe, na nũndũ wa maũma ma kũĩma, na nũndũ wa mathoka, na kũseũvya mĩsenge.

22Kwondũ wa ũu kweethĩiwe mũthenya wa kaũ, kana kũtyaĩ ũvyũ kana ĩtumo yaaoneka kw’okonĩ kwa mũndũ o na wĩva wa ala maĩ vamwe na Saulo na Yonathani: ĩndĩ nĩsyoonekie na Saulo na Yonathani mwana wake.

23Na asikalĩ ma ngome ya Avilisiti maumaala mathi mwanyanĩ wa Mikimasi.

← Chapter 12 Jump to: Chapter 14 →