2 Samuel 14

Kamba (Mbivilia) 1956

← Chapter 13 Jump to: Chapter 15 →

1Na Yoavu mwana wa Nzeluia oona atĩ ngoo ya mũsumbĩ yelekele Avisalomu.

2Na Yoavu atũmana Tekoa, na aete kuma kw’o mũndũ mũka mũĩ, na amwĩa, Nĩngũkwĩsũva, wĩtw’ĩkĩthye ta wĩ mũndũ ũnũũmeta, na ũkĩkĩa ngũa ila syĩkĩawa nĩ ũla ũnũũmeta, nĩngũkwĩsũva, na ndũkevake mauta, ĩndĩ ĩthĩwa ta mũndũ mũka ũla ũmetee mũndũ mũkw’ũ ĩvinda ĩasa:

3na lika vala ve mũsumbĩ, noineena nake ta ũũ. Na ĩndĩ Yoavu eekĩa ndeto kanyw’anĩ wake.

4Na yĩla ũla mũndũ mũka wa Tekoa waneenie na mũsumbĩ, avalũka nthĩ na ũthyũ wake, na eekunamya vyũ, na amwĩa, Ndethya, ame mũsumbĩ.

5Na mũsumbĩ amũkũlya, Wĩ na ũndũ mwaũ? Nake asũngĩa, Nĩ ndiwa w’o, na mũemewa nĩ mũkw’ũ.

6Na mũthũkũmi waku mwĩĩtu, aĩ na ana elĩ, na asu elĩ mokita ene kwa ene kĩsesinĩ, na vatyaĩ mũndũ wa kũmatan’ya, ĩndĩ ũmwe akũna ũla ũngĩ, na amũaa.

7Na, sisya, mũvĩa w’onthe nũmũkĩlĩle mũthũkũmi waku mwĩĩtu, na measya, Nengane ũla wakũnie mwana‐a‐inyia, nĩ kana tũmũae vandũ va thayũ wa mwana‐a‐inyia ũla woaie, na ĩndĩ twanange mũtiĩwa nake. O ta ũu makavosya ĩkaa yakwa yĩla yĩtiele, na matikatiĩa mũemewa syĩtwa kana ũtialo ĩũlũ wa nthĩ.

8Na mũsumbĩ amwĩa ũ mũndũ mũka, Enda nyũmbanĩ kwaku, na ngeeaa ũndũ waku.

9Na ũla mũndũ mũka wa Tekoa amwĩa mũsumbĩ, Mwĩaĩi wakwa, ame mũsumbĩ, ũthũku ũsu wĩthĩwe ĩũlũ wakwa, na ĩũlũ wa nyũmba ya nau; na mũsumbĩ ethĩwe ate na ĩvĩtyo, o na kĩvĩla kyake kya ũsumbĩ.

10Na mũsumbĩ amwĩa, O ũla ũkaneena naku, ũkamũete kwakwa, na ndakakũkiita ĩngĩ.

11Nĩvo ĩndĩ waisye, Nĩngũkwĩsũva, mũsumbĩ nalilikane Yeova Ngai waku, nĩ kana mũĩvanĩsya wa nthakame ndakanange ĩngĩ, matikese kwananga mwana wakwa. Na asya, O tondũ Yeova wĩ thayũ, ũsw’ĩĩ ũmwe wa mwana waku ndũkavalũka nthĩ.

12Nĩvo ĩndĩ ũ mũndũ mũka waisye, Nĩngũkwĩsũva, mũthũkũmi waku mwĩĩtu naneene ndeto na mwĩaĩi wakwa mũsumbĩ. Na amwĩa, Neenanga.

13Na mũndũ mũka akũlya, Nũndũ wa kĩ ĩndĩ ũmasũanĩĩe andũ ma Ngai ũndũ ta ũsu? Nũndũ akĩneena ndeto ĩsu mũsumbĩ ailyĩ ta ũmwe mũvĩtan’ya, nũndũ mũsumbĩ ndaatũnga ũla wake walũngilw’e

14Nũndũ mũvaka tũkw’e, na tũilyĩ manzĩ metĩku nthĩ, ala matatonya kũkolanw’a ĩngĩ; o na Ngai ndavetaa thayũ, ĩndĩ nũsũanĩaa maũndũ, nĩ kana ũla walũngilw’e ndakethĩwe mũlũngw’a kwake.

15Yu ĩndĩ nũndũ nĩnũkie kũneena ndeto ĩno na mwĩaĩĩ wakwa mũsumbĩ, nĩ kwa kwĩthĩwa andũ nĩmatumie nĩkĩa: na mũthũkũmi waku mwĩĩtu aisye, Yu nganeena na mũsumbĩ; nokwĩthĩwa mũsumbĩ akeanĩsya ũndũ mũthũkũmi wake ũnũũmũkũlya.

16Nũndũ mũsumbĩ akeew’a, avonokye mũthũkũmi wake kuma kw’okonĩ kwa mũndũ ũla ũnũkwenda kũmbananga nyie na mwana wakwa vamwe tume ũtiĩwanĩ wa Ngai.

17Nĩvo ĩndĩ mũthũkũmi waku mwĩĩtu waisye, Nĩngũkwĩsũva, ndeto ya mwĩaĩi wakwa mũsumbĩ nĩĩthĩwe ya kũkiakisya; nũndũ ta mũlaĩka wa Ngai, now’o ũilyĩ mwĩaĩi wakwa mũsumbĩ kũvathũkan’ya ũseo na ũthũku: na Yeova Ngai waku nĩethĩwe naku.

18Nĩvo ĩndĩ mũsumbĩ wasũngĩie na amwĩa mũndũ mũka, Nĩngũkwĩsũva, ndũkambithe ũndũ o na wĩva ũla ngũũkũlya. Na mũndũ mũka amwĩa, Mwĩaĩi wakwa mũsumbĩ naneene yu.

19Na mũsumbĩ amũkũlya, Kw’oko kwa Yoavu kwĩ naku ũndũnĩ ũũ w’onthe? Na mũndũ mũka asũngĩa na asya, O tondũ kyuu kyaku kĩ thayũ, mwĩaĩi wakwa mũsumbĩ, vati ũla ũtonya kwĩthyũũa kw’okonĩ kwa aũme kana kwa aka kũtia ũndũ o na wĩva ũla mũsumbĩ ũneenete; nũndũ mũthũkũmi waku Yoavu, we nũmbĩaĩe, na eekĩa ndeto isu syonthe kanyw’anĩ wa mũthũkũmi waku mwĩĩtu;

20mũthũkũmi waku Yoavu nĩwĩkĩte ũu nĩ kana aalyũle ũvoo ũndũ ũilyĩ: na mwĩaĩi wakwa nĩ mũĩ kwĩanana na ũĩ wa mũlaĩka wa Ngai, kũmanya maũndũ onthe ala me kũũ nthĩ.

21Na mũsumbĩ amwĩa Yoavu, Sisya yu, nĩnĩkĩte ũndũ ũsu: kwondũ wa ũu enda, ũlatye ũ mwanake Avisalomu.

22Na Yoavu avalũka nthĩ na ũthyũ wake, na eekunamya vyũ, na amũathima mũsumbĩ; na Yoavu asya, Ũmũnthĩ mũthũkũmi waku nĩwĩsĩ nĩnonete ũseo methonĩ maku, mwĩaĩi wakwa, ame mũsumbĩ, nũndũ mũsumbĩ nĩwĩanĩsye ũndũ mũthũkũmi wake ũkũlĩtye.

23Na ĩndĩ Yoavu ookĩla na athi Ngesuli, na aete Avisalomu Yelusaleme.

24Na mũsumbĩ asya, Naende nyũmba kwake, ĩndĩ ndakone ũthyũ wakwa. Na ĩndĩ Avisalomu aenda nyũmbanĩ kwake, na ndaaona ũthyũ wa mũsumbĩ.

25Na ĩndĩ kwa Isilaeli onthe kũtyaĩ ũmwe wa kũtaĩwa mũno ta Avisalomu ũndũ wa mũmbĩlwe wake: kuma ũnyaĩĩ o na kũvika lolotya vatyaĩ kĩema nthĩnĩ wake.

26Na yĩla wenzaa nzw’ĩĩ sya mũtwe wake (aitilaa mũminũkĩlyo wa kĩla mwaka; nĩkwĩthĩwa syaĩ ngito kwake, kwondũ wa ũu nĩwaitilaa); nĩwathimaa nzw’ĩĩ sya mũtwe wake sekeli maana elĩ, kwĩanana na kĩthimi kya mũsumbĩ.

27Na Avisalomu asyaa ana atatũ, na mwĩĩtu ũmwe, ũla wetawa syĩtwa yake Tamali: nake aĩ mũndũ mũka wĩ ũthyũ mũseo.

28Na Avisalomu ekala Yelusaleme myaka ĩlĩ mĩima; na ndaaona ũthyũ wa mũsumbĩ.

29Na ĩndĩ Avisalomu atũmana Yoavu, amũtũme kwa mũsumbĩ; ĩndĩ ndaaĩtĩkĩla kũka vala ũĩ: na atũmana ĩngĩ ya kelĩ, ĩndĩ ndaaĩtĩkĩla kũka.

30Kwondũ wa ũu amea athũkũmi make, Sisyai, mũũnda wa Yoavu wĩ vakuvĩ na wakwa, na e na mbaale vo; endai mũkovĩvye. Na athũkũmi ma Avisalomu mavĩvya mũũnda.

31Nĩvo ĩndĩ Yoavu wokĩlile, na athi kwa Avisalomu nyũmbanĩ kwake, na amũkũlya, Nũndũ wa kĩ athũkũmi maku mavĩvĩtye mũũnda wakwa?

32Na Avisalomu asũngĩa Yoavu, Sisya, nĩnatũmanie kwaku, ngĩkwĩa, Ũka vaa, nĩkũtũme kwa mũsumbĩ, ũkamũkũlye, Nũndũ wa kĩ nookie kuma Ngesuli? Nĩ kavaa kwakwa kwĩthĩwa kw’o kũvika yu. Yu kwondũ wa ũu ndeka ngone ũthyũ wa mũsumbĩ; na ethĩwa ve ũthũku nthĩnĩ wakwa, nambũae

33Na ĩndĩ Yoavu aenda vala ve mũsumbĩ, na amũtavya; na yĩla wamwĩtie Avisalomu, ooka vala ve mũsumbĩ, na eekũnamya nthĩ na ũthyũ wake mbee wa mũsumbĩ: na mũsumbĩ amũmunya Avisalomu.

← Chapter 13 Jump to: Chapter 15 →