2 Samuel 6

Kamba (Mbivilia) 1956

← Chapter 5 Jump to: Chapter 7 →

1Na Ndaviti oomban’ya ĩngĩ andũ onthe anyuve ma Isilaeli, ngili mĩongo ĩtatũ.

2Na Ndaviti ookĩla, na aenda na andũ onthe ala maĩ nake, kuma Mbaaleyuta, makaete kuma kw’o ĩsandũkũ ya Ngai, yĩla yĩtanĩaw’a na yĩla Syĩtwa, nayo nĩ syĩtwa ya Yeova wa nguthu ũla wĩkalaa ĩũlũ wa akeluvi.

3Na mailĩĩla ĩsandũkũ ya Ngai ĩkasyanĩ yeũ, na mayumya nyũmbanĩ ya Avinatavu ĩla yaĩ kĩĩmanĩ: na Usa na Aio, ana ma Avinatavu mainga yĩla ĩkasya yeũ.

4Na mayumya nyũmbanĩ ya Avinatavu, ĩla yaĩ kĩĩmanĩ, vamwe na ĩsandũkũ ya Ngai: na Aio atongoesya yĩla ĩsandũkũ.

5Na Ndaviti na nyũmba yonthe ya Isilaeli mainga me mbee wa Yeova mĩthemba yonthe ya syĩndũ sya kũinga iseũvĩtw’e na mĩtĩ ya mĩsonovali, na mbeve, na inanda, na tũthembe, na tũmĩtĩ twa ũkunangan’ya, na tũmasaya.

6Na yĩla mavikie kĩvũĩonĩ kya Nakoni Usa atambũũkya kw’oko kwake vala ve ĩsandũkũ ya Ngai, na ayĩtw’ĩĩka; nũndũ ng’ombe mĩsyatiũũkie.

7Na ũthatu wa Yeova wakanĩa Usa; na Ngai amũkũnĩa vo nũndũ wa ĩvĩtyo yake; na akw’ĩa vo vakuvĩ na ĩsandũkũ ya Ngai.

8Na Ndaviti eew’a woo, nũndũ Yeova nĩwakũna Usa; na eeta vandũ vau Velesi‐ũsa, kũvika ũmũnthĩ.

9Na Ndaviti akĩa Ngai mũthenya ũsu; na asya, Ĩsandũkũ ya Yeova yĩkaetwe kwakwa ata?

10Kwondũ wa ũu Ndaviti ndaaĩtĩkĩla kũthamĩsya ĩsandũkũ ya Yeova kwake ndũanĩ ya Ndaviti; ĩndĩ Ndaviti ayelelũkĩĩlya nyũmbanĩ ya Oveti‐etomu Mũngiti.

11Na ĩsandũkũ ya Yeova yekala nyũmbanĩ ya Oveti‐etomu Mũngiti myei ĩtatũ: na Yeova aathima Oveti‐etomu, na nyũmba yake yonthe.

12Na mũsumbĩ Ndaviti wataviw’e, kũkyaw’a, Yeova nũathimĩte nyũmba ya Oveti‐etomu, na syĩndũ syake syonthe, nũndũ wa ĩsandũkũ ya Ngai. Na Ndaviti aenda na aete ĩsandũkũ ya Ngai ndũanĩ ya Ndaviti kuma nyũmbanĩ ya Oveti‐etomu ayĩlikya ndũanĩ ya Ndaviti e na ũtanu.

13Na kweethĩwa, yĩla ala makuĩte ĩsandũkũ ya Yeova maĩ manaenda matambya thanthatũ, athemba ng’ombe na kĩla kĩnou.

14Na Ndaviti asũnga e mbee wa Yeova na vinya wake w’onthe; na Ndaviti evotoete evoti ya katane.

15Uu nĩw’o Ndaviti na nyũmba yonthe ya Isilaeli maetie ĩsandũkũ ya Yeova makyũkĩlya mawasya manene, na wasya wa soo.

16Na kweethĩwa, yĩla ĩsandũkũ ya Yeova yalikile ndũanĩ ya Ndaviti, Mĩkalĩ mwĩĩtu wa Saulo asyaĩlya mbũthinĩ, na oona mũsumbĩ Ndaviti akĩtũlĩlanga na kũsũnga e mbee wa Yeova; na amũvũthya ngoonĩ yake.

17Na maete ĩsandũkũ ya Yeova nthĩnĩ, na mayia vandũ vayo, ĩeemanĩ nthĩnĩ yĩla Ndaviti wambĩte kwondũ wayo; na Ndaviti amũthembea Yeova nthembo sya kũvĩvw’a na nthembo sya mũuo.

18Na yĩla Ndaviti waminie kũthemba nthembo ya kũvĩvw’a na nthembo sya mũuo, aathima andũ syĩtwanĩ ya Yeova wa nguthu.

19Na amaaĩa andũ onthe, o ĩkomano yonthe ya Isilaeli, aũme o na aka, kĩla ũmwe kĩlungu kya kĩmũtũ, na kĩlungu kya nyama, na kakũmbwa ka nzavivũ mbovu. Na ĩndĩ andũ onthe maenda kĩla ũmwe nyũmbanĩ kwake.

20Na ĩndĩ Ndaviti asyoka aathime andũ ma nyũmba yake. Na Mikali mwĩĩtu, wa Saulo aumaala amũthaũe Ndaviti, na asya, A! Kaĩ, mũsumbĩ wa Isilaeli nĩwĩnenevisye ũmũnthĩ, ũla wĩvũie ũmũnthĩ athũkũmi eĩtu ma athũkũmi make mamwene, o tondũ ũmwe wa ala mate kĩĩĩ wĩvuaa vate nthoni!

21Na Ndaviti amwĩa Mikali, Ũu wĩĩ mbee wa Yeova, ũla wanyuvie kũte au, na kũte nyũmba yake yonthe, kũmbia nĩthĩwe mũnene wĩ mbee ũsumbĩnĩ andũnĩ ma Yeova, o Isilaeli; kwondũ wa ũu ngasũnga Yeova ene.

22O na ngeethĩwa nĩ mũthũku kũvĩta ũu, na ngeethĩwa nĩ ĩtheo methonĩ makwa mwene: ĩndĩ ngataĩwa nĩ athũkũmi eĩtu, asu ala waweta.

23Na Mikali mwĩĩtu wa Saulo ndaaĩthĩwa na kana kũvika mũthenya wa kĩkw’ũ kyake.

← Chapter 5 Jump to: Chapter 7 →