2 Samuel 23

Kamba (Mbivilia) 1956

← Chapter 22 Jump to: Chapter 24 →

1Na ĩndĩ ii nĩsyo ndeto sya mũminũkĩlyo sya Ndaviti. Ndaviti mwana wa Yese easya, Na ũ mũndũ ũla wokĩlilw’e ĩũlũ easya, Ũla mwĩtĩkĩw’a mauta wa Ngai wa Yakovo, Na mũtili wa mbathi mũseo wa Isilaeli:

2Veva wa Yeova nĩwaneenie nthĩnĩ wakwa, Na ndeto yake yaĩ ũĩmĩnĩ wakwa.

3Ngai wa Isilaeli aisye, Ũla Ĩvia wa Isilaeli aneenie nakwa atĩĩ: Ũla ũsumbĩkaa andũ na ũlũngalu, Ũla ũsumbĩkaa aimũkĩa Ngai,

4Akeethĩwa ta kyeni kya kĩoko, yĩla syũa yumĩlaa, Kĩoko kũikya, Yĩla nyeki ya vuvĩ yamea nthĩ, Kwondũ wa syũa kwaa mbua yaua.

5Nĩ w’o, nyũmba yakwa ndĩilyĩ ũu na Ngai; Ĩndĩ nũtianĩĩte ũtianĩo nakwa wa tene na tene, Ũseũvĩtw’e maũndũnĩ onthe, na mũlũmu: Nũndũ nĩw’o ũtangĩĩo wakwa w’onthe, na kwenda kwakwa kw’onthe, O na ethĩwa ndeũwĩan’ya mũno.

6Ĩndĩ onthe ala matakĩaa Ngai makeethĩwa ta mĩw’a ya kũlutĩlĩĩlwa kũasa, Nĩkwĩthĩwa matikwatĩka na kwoko;

7Ĩndĩ mũndũ ũla ũmakiitaa Mũvaka eyũmbĩĩe mĩio ya kaũ ya iaa na mũtĩ wa ĩtumo: Na makavĩvw’a vyũ na mwaki me vandũ voo.

8Aa nĩo masyĩtwa ma ngũmbaũ ila Ndaviti waĩ nasyo: Yosevi‐mbasevethi Mũtakemoni, mũnene wa makavuteni; ũsu nĩwe Atino Mwesini, ũla wokitie na maana nyanya ala mooaiwe ĩvinda yĩmwe.

9Na ĩtĩna wake kwaĩ Eleasali mwana wa Ndotai mwana wa Mũaoi, ũmwe wa ila ngũmbaũ itatũ syĩ na Ndaviti, yĩla syamavũthisye Avilisiti ala moombanĩw’e kw’o mokite, na andũ ma Isilaeli maĩ manaenda.

10Ookĩla na akũna Avilisiti mũvaka kw’oko kwake kwanoa, na kw’oko kwake kwalũmana na ũvyũ; na Yeova akĩlya ũkĩlyo mũnene mũthenya ũsu; na andũ masyoka ĩtina wake o mose mũtavo.

11Na ĩtina wake kwaĩ Samama mwana wa Akee Mũalali. Na Avilisiti moombana nguthu, vala vaĩ mũũnda wusũĩte ndengũ; na andũ makũka makĩa Avilisti.

12Ĩndĩ aũngama mũũndanĩ katĩ, na oosesea, na amoaa Avilisiti: na Yeova akĩlya ũkĩlyo mũnene.

13Na atatũ ma ala andũ anene mĩongo ĩtatũ matheea, mavika vala ve Ndaviti ngunganĩ ya Atulamu ĩvinda ya ngetha; na nguthu ya Avilisiti yaĩ ĩnamba maeema mwandanĩ wa Alevai.

14Na ĩvinda yĩu Ndaviti aĩ ngomenĩ yĩ vinya; na asikalĩ ma Avilisiti ĩvinda yĩu maĩ Mbethi‐leemu.

15Na Ndaviti akwatwa nĩ mũng’atũko, na asya, Ame! Kethĩwa mũndũ ũmwe akanenga manzĩ ma ũnyw’a ma kĩthima kya Mbethi‐leemu, kĩla kĩ vakuvĩ na mbingĩlo!

16Na ngũmbaũ isu itatũ syavithũkĩa syavũthũĩla nguthunĩ ya Avilisiti, na syatava manzĩ kĩthimanĩ kya Mbethi‐leemu, kĩla kyaĩ vakuvĩ na mbingĩlo, na syakua, na syamũtwaĩa Ndaviti: ĩndĩ ndaaĩtĩkĩla kũmanyw’a, ĩndĩ etĩa Yeova nthĩ.

17Na asya, Nĩkwĩthĩwe kũasa nakwa, ame Yeova, nĩke ũndũ ũilyĩ ũu: nĩnyw’a nthakame ya andũ ala malekilye mathayũ moo mũisyonĩ? Kwondũ wa ũu ndaaĩthĩkĩla kũmanyw’a. Maũndũ asu nĩmeekiwe nĩ ila ngũmbaũ ĩtatũ.

18Na Avisai, mwana‐a‐inyia wa Yoavu, mwana wa Nzeluia, nĩwe waĩ mũnene katĩ wa asu atatũ. Na nĩwokĩlĩlye andũ maana atatũ ĩtumo na amoaa, na aĩ na syĩtwa katĩ wa asu atatũ.

19Tiwe wataĩawa mũno wa asu atatũ? Kwondũ wa ũu atw’ĩkĩthw’a kavuteni woo: ĩndĩ ala atatũ ma mbee ndaaĩanana nao.

20Na Mbenaia mwana wa Yeoiata, mwana wa mũndũ wĩ ũkũmbaũ wa Kaviseeli, ũla wekĩte meko manene, ooaa ana elĩ ma Alieli wa Moavi: o na atheea na ooaa mũnyambũ wĩ nthĩnĩ wa ĩima ĩvinda kwĩ ĩa.

21Na ooaa Mũmisili, mũndũ mũmbe nesa: na ũ Mũmisili aĩ na ĩtumo kw’okonĩ kwake; ĩndĩ amũtheeea na ndata, na amũvena Mũmisili ĩtumo kw’okonĩ kwake, na amũaa na ĩtumo yake mwene.

22Mbenaia mwana wa Yeoiata nĩwekie maũndũ, asu, na aĩ na syĩtwa katĩ wa ngũmbaũ isu itatũ.

23Ataĩawa mũno kwĩ ala mĩongo ĩtatũ, ĩndĩ ndaaĩanana na ala atatũ ma mbee. Na Ndaviti amwia ethĩwe mũnene wa nguthu ya asũvĩi make.

24Asaeli mwana‐a‐inyia wa Yoavu aĩ ũmwe wa ala mĩongo ĩtatũ; Elianani mwana wa Ndoto wa Mbethi‐leemu,

25na Samama Mũalote, na Elika Mũalote,

26na Elesu Mũvaliti, na Ila mwana wa Ikesi Mũtekoa,

27na Avieseli Mũanathothi, na Mevunai Mũusathi,

28na Nzalimoni Mũaoi, na na Maalai Mũnetovathi,

29na Eelevu mwana wa Mbaana Mũnetovathi, na Itai mwana wa Livae wa ku Ngivea wa ana ma Mbenyamini,

30na Mbenaia Mũvilathoni, na Ititai wa tũlũsĩ twa Ngaasi,

31na Avi‐alivoni Mũalivathi, na Asimavethi Mũmbalumi,

32na Eliava Mũsaalivoni, na ana ma Yaseni, Yonathani,

33na Samama Mũalali, na Aiamu mwana wa Salali Mũalali,

34na Eliveleti mwana wa Aasivai, mwana wa Mũmaaka, na Eliamu mwana wa Aithoveli Mũngilo,

35na Esolo Mũkalimeli, na Vaalai Mũalivi,

36na Ikali mwana wa Nathani wa Sova, na Mbani Mũngati,

37na Nzeleki Mũamimoni, na Naalai Mũmbeelothi, ala makuĩaa Yoavu mwana wa Nzeluia mĩio ya kaũ,

38na Ila Mũithili, na Ngalevu Mũithili,

39na Ulia Mũititi: onthe nĩ mĩongo ĩtatũ na mũonza.

← Chapter 22 Jump to: Chapter 24 →