2 Samuel 3

Kamba (Mbivilia) 1956

← Chapter 2 Jump to: Chapter 4 →

1Na kwaĩ kaũ ĩvinda ĩasa wa nyũmba ya Saulo na nyũmba ya Ndaviti: na Ndaviti aendeea kũneneva mũno, ĩndĩ nyũmba ya Saulo yaendeea na kwaa vinya mũno.

2Na Ndaviti asyaĩa ana ku Eviloni: ĩkithathi yake nĩ Aminoni, wa Ainoamu Mũyesileeli;

3na mwana wake wa kelĩ nĩ Kileavu, wa Avikaili ũla waĩ kĩveti kya Navali Mũkalimeli; na wa katatũ nĩ Avisalomu mwana wa Maaka mwĩĩtu wa Talimai mũsumbĩ wa Ngesuli;

4na wa kana nĩ Atoniya mwana wa Akithi; na wa katano nĩ Sevatia mwana wa Avitali;

5na wa thanthatũ nĩ Ithileamu wa Ekila, kĩvetĩ kya Ndaviti. Asu Ndaviti amasyaĩe ku Eviloni.

6Na kweethĩwa, yĩla kwaĩ kaũ wa nyũmba ya Saulo na nyũmba ya Ndaviti, Avineli eeyongeleela vinya nyũmbanĩ ya Saulo.

7Na Saulo aĩ na mũka ngombo, ũla syĩtwa yake eetawa Lisiva, mwĩĩtu wa Aia: na Isi‐vosethi akũlya Avineli, Nũndũ wa kĩ ũlikĩte kwa mũka ngombo wa ĩthe wakwa?

8Nĩvo ĩndĩ Avineli wathilĩkile mũno nũndũ wa ndeto sya Isi‐vosethi, na akũlya, Nyie nĩ mũtwe wa ngitĩ ĩsu Yuta? Ũmũnthĩ nĩnĩkaa nyũmba ya Saulo ĩthe waku nesa, na ana‐a‐ĩthe make, na anyanyae make, na ndyaakũnengane kw’okonĩ kwa Ndaviti; ĩndĩ ũmũnthĩ nũũmbilĩĩla ĩvĩtyo ũndũ wa mũndũ mũka ũsu.

9Ngai namwĩke Avineli ũu, o na mbee, ethĩwa ndimwĩka Ndaviti o w’o, o tondũ Yeova wamwĩvĩtĩe Ndaviti;

10aumye ũsumbĩ nyũmbanĩ ya Saulo, na kũũngamya kĩvĩla kya ũsumbĩ kya Ndaviti asumbĩke Isilaeli na Yuta, kuma Ndani o na kũvika Mbeeli‐sieva.

11Na ndaatonya kũsũngĩa Avineli ndeto ĩngĩ, nũndũ nĩwamũkĩie.

12Na Avineli atũma atũmwa kwa Ndaviti ngalĩ ĩ yake, akĩmũkũlya, Nthĩ nĩ vau? Na ĩngĩ akĩmwĩa, Seũvya wĩw’ano waku nakwa, na, sisya, kw’oko kwakwa kũkeethĩwa vamwe naku, nĩalyũle Isilaeli onthe methĩwe ngalĩ yaku.

13Na asũngĩa. Nĩ ũseo; ngaseũvya wĩw’ano naku; ĩndĩ ũndũ ũmwe ngũandũa kwaku: nĩ atĩĩ, ndũkona ũthyũ wakwa, ũtaetete Mikali, mwĩĩtu wa Saulo, yĩla wĩũka kwona ũthyũ wakwa.

14Na Ndaviti atũma atũmwa kwa Isi‐vosethi, mwana wa Saulo, akĩmwĩa, Nenga mũka wakwa Mikali, ũla neeasĩsye na ikonde sya mbinũ ĩana sya Avilisiti.

15Na Isi‐vosethi atũmana, na amumya kwa mũũme, o kuma kwa Valitieli mwana wa Laisa.

16Na mũũme aendan’ya nake, akĩĩa aendete, na amũatĩĩa kũvika Mbaulimu. Nĩvo ĩndĩ Avineli wamwĩie, Enda, ũsyoke: na asyoka.

17Na Avineli aneena na atumĩa ma Isilaeli, Mavinda ala mavitu nĩmwamanthie Ndaviti ethĩwe mũsumbĩ wenyu:

18na yu ĩndĩ ĩkai ũu; nũndũ Yeova nũneenete ũndũ wa Ndaviti, akyasya, Ngatangĩĩa andũ makwa Isilaeli na kw’oko kwa mũthũkũmi wakwa Ndaviti kũmaumya kw’okonĩ kwa Avilisiti, na kuma kw’okonĩ kwa amaitha moo onthe.

19O na Avineli aneena matũnĩ ma Mbenyamini: na ĩngĩ Avineli athi aneene matũnĩ ma Ndaviti ku Eviloni ũvoo w’onthe ũla Isilaeli moonie wĩ ũseo, o na nyũmba yonthe ya Mbenyamini.

20Na ĩndĩ Avineli ooka vala ve Ndaviti Eviloni, e na andũ mĩongo ĩlĩ. Na Ndaviti amavokea Avineli na andũ ala maĩ nake mboka.

21Na Avineli amwĩa Ndaviti, Nĩngũkĩla nĩthi, ngamũmbanĩsye mwĩaĩi wakwa mũsumbĩ Isilaeli onthe, nĩ kana matianĩe ũtianĩo naku, na nĩ kana ũsumbĩke w’onthe ũla ngoo yaku yendete. Na Ndaviti amũeka Avineli athi; na aenda na mũuo.

22Na, sisya, athũkũmi ma Ndaviti mooka me na Yoavu maumĩte kaũnĩ, na maete mũtavo mũnene: ĩndĩ Avineli ndaĩ na Ndaviti ku Eviloni; nũndũ nĩwamũekete na akathi, na aĩ anaenda na mũuo.

23Na yĩla Yoavu na ngũthu yonthe ĩla yaĩ nake mavikie, andũ matavya Yoavu, makĩmwĩa, Avineli mwana wa Neli okie kwa mũsumbĩ, na nũmũekie athi, na nũendie na mũuo.

24Nĩvo ĩndĩ Yoavu waendie kwa mũsumbĩ, na amũkũlya, Wĩkie ata? Sisya, Avineli nĩwũkie kwaku; nũndũ wa kĩ ũmũekie athi, na nũendie vyũ?

25Nũmwĩsĩ Avineli mwana wa Neli, kana okie akũkenge, na kũthiana kumaala kwaku na kũlika kwaku, na kũmanya w’onthe ũla wĩkaa.

26Na yĩla Yoavu waumie vala ve Ndaviti, atũma atũmwa maatĩĩe Avineli, na mamũtũngĩthĩsya kĩthimanĩ kya Silaa: ĩndĩ Ndaviti ndaamanya ũu.

27Na yĩla Avineli watũngiwe Eviloni, Yoavu amũtwaa ũtee mbingĩlonĩ katĩ aneene nake mbola, na amũtonyea ĩvu vo, na akw’a, nũndũ wa nthakame ya mwana‐a‐ĩthe Asaeli.

28Na ĩtina, yĩla Ndaviti wewie ũu, asya, Nyie na ũsumbĩ wakwa tũti na ĩtĩtyo kwa Yeova tene na tene ũndũ wa nthakame ya Avineli mwana wa Neli:

29nĩyĩthĩwe ĩũlũ wa mũtwe wa Yoavu, na nyũmba ya ĩthe wake; na nyũmba ya Yoavu ndĩkaaĩthĩwe o na ĩndĩĩ ĩte na ũmwe wĩ na mũluo, kana wĩ na mangũ, kana ũla wĩlumĩlaa na ndata, kana ũla ũvalũkawa na ũvyũ, kana ũla ũte na lĩu.

30Na ĩndĩ Yoavu na Avisai mwana‐a‐inyia mooaie Avineli, nĩkwĩthĩwa nĩwoaĩe mwana‐a‐inyia woo Asaeli ku kaũnĩ Ngiveoni.

31Na Ndaviti amwĩa Yoavu, na andũ onthe ala maĩ nake, Tembũangai ngũa syenyu, na mũyĩvotoa makunia, mũmũmetee Avineli. Na mũsumbĩ Ndaviti aatĩĩa mũsekeseke.

32Na mamũthika Avineli ku Eviloni: na mũsumbĩ ookĩlya wasya wake, na aĩĩa mbũanĩ ya Avineli; na andũ onthe maĩa.

33Na mũsumbĩ amũĩĩa Avineli, na akũlya, Avineli aĩle kũkw’a tondũ ndia ĩkusaa?

34Moko maku matyĩĩ move, kana maũũ maku matyĩĩkĩwe mbĩngũ: O tondũ mũndũ ũvalũkaa mbee wa ana ma ũthũku, now’o wavalũka. Na andũ onthe mamũĩĩa ĩngĩ.

35Na andũ onthe mooka mamũingĩĩsye Ndaviti aye lĩu kwĩ mũthenya; ĩndĩ Ndaviti eevita, akyasya, Ngai nambĩke ũu, o na mbee, ethĩwa ngasama kĩmũtũ, kana kĩndũ kĩngĩ syũa yĩte ĩthũu.

36Na andũ onthe moona ũndũ ũsu, na mendeew’a; nũndũ o ũndũ mũsumbĩ wekaa andũ onthe mendeeaw’a nĩw’o.

37Kwondũ wa ũu andũ onthe ma Isilaeli onthe mamanya mũthenya ũsu kana ti ũvoo wa mũsumbĩ kũaa Avineli mwana wa Neli.

38Na mũsumbĩ akũlya athũkũmi make, Mũtyĩsĩ kana mũnene wĩ mbee ũsumbĩnĩ, mũndũ wĩ nguma, nũvalũkile ũmũnthĩ kwa Isilaeli?

39Na ũmũnthĩ nĩ mwonzu, o na kau nĩnetĩkĩw’e mauta nĩthĩwe mũsumbĩ; na andũ aa ana ma Nzeluia nĩmanemie nyie: Yeova naĩvanĩsye mwĩki wa ũthũku kwĩanana na ũthũku wake.

← Chapter 2 Jump to: Chapter 4 →