2 Samuel 21

Kamba (Mbivilia) 1956

← Chapter 20 Jump to: Chapter 22 →

1Na mĩthenya ya Ndaviti kwaĩ yũa mwaka na mwaka, myaka ĩtatũ; na Ndaviti amantha ũthyũ wa Yeova. Na Yeova asya, Nĩ ũndũ wa Saulo, na ũndũ wa nyũmba yake yĩ nthakame, nĩkwĩthĩwa nĩwoaie Angiveoni.

2Na mũsumbĩ ameta Angiveoni, na amea (Angiveoni ĩndĩ matyaĩ ma ana ma Isilaeli, ĩndĩ maĩ ma ũtialo wa Aamoli; na ana ma Isilaeli maĩ mameavie; na Saulo amantha kũmoaa nũndũ wa kĩwĩu kyake kwondũ wa ana ma Isilaeli na Yuta);

3na Ndaviti akũlya Angiveoni, Nĩmwĩka ata? Na ngeew’anĩthya na kyaũ, nĩ kana mũathime ũtiĩwa wa Yeova?

4Na Angiveoni mamwĩa, Ti ũvoo wa vetha na thaavu katĩ waitũ na Saulo, kana nyũmba yake; o na ti ũndũ witũ kũaa mũndũ o na wĩva nthĩnĩ wa Isilaeli. Nake asya, O ũndũ mwĩneena now’o ngamwĩka.

5Na mamwĩa mũsumbĩ, Mũndũ ũla watũminaa, na ũla watũsamĩaa, twanangwe tũtikekale mĩvakanĩ o na yĩva ya Isilaeli,

6aũme mũonza ananĩ make nĩmanenganwe kwitũ, na tũkamũsũĩsya Yeova ku Ngivea ya Saulo, mũnyuve wa Yeova. Na mũsumbĩ asya, Ngamanengane.

7Ĩndĩ mũsumbĩ atĩa Mevivosethi, mwana wa Yonathani mwana wa Saulo, nũndũ wa wĩvĩto wa Yeova ũla waĩ katĩ woo, katĩ wa Ndaviti na Yonathani mwana wa Saulo.

8Ĩndĩ mũsumbĩ oosa ana elĩ ma Lisiva mwĩĩtu wa Aia, ala wamũsyaĩe Saulo, nao nĩ Alimoni na Mevivosethi; na ana atano ma Mikali mwĩĩtu wa Saulo, ala wamũsyaĩe Atilieli mwana wa Mbalisilai Mũmeolathi:

9na amanengane mokonĩ ma Angiveoni, na mamasũsya kĩĩmanĩ Yeova ene, na asu onthe mũonza mavalũka vamwe. Na mooawa mĩthenya ya ngetha, o mĩthenyanĩ ya mbee, wambĩlĩlyonĩ wa kũketha mbaale.

10Na Livisa mwĩĩtu wa Aia oosa ngũa sya makunia, na eeyalanĩlya ĩũlũ wa ĩvia, kuma wambĩlĩlyo wa ngetha kũvika yĩla mbua yasyuĩe kuma ĩtunĩ; na ndaaeka nyũnyi sya yayaya sivuĩle mũthenya, kana nyamũ sya kĩtheka ũtukũ.

11Na Ndaviti atavw’a ũndũ Lisiva mwĩĩtu wa Aia, mũka ngombo wa Saulo, wĩkĩte.

12Na Ndaviti athi na oosa mavĩndĩ ma Saulo na mavĩndĩ ma Yonathani mwana wake kuma kwa andũ ma Yavesi‐ngileati ala mamoyĩe nzĩanĩ nene ya Mbethi‐sani, vala Avilisiti maisũisye mũthenya ũla Avilisiti mamũaĩe Saulo ku Ngilivoa;

13na aete kuma kw’o mavindĩ ma Saulo na mavĩndĩ ma Yonathani mwana wake: na moomban’ya mavĩndĩ ma ala masũiw’e.

14Na mathika mavĩndĩ ma Saulo na Yonathani mwana wake nthĩ ya Mbenyamini ku Nzeela, ngunganĩ ya Kisu ĩthe wake vala vathikawa akw’ũ: na meeka w’onthe ũla mũsumbĩ weaie. Na ĩtina wa ũu Ngai nĩwesũvĩkie ũndũ wa ĩ nthĩ.

15Na Avilisiti maĩ na kaũ ĩngĩ na Isilaeli; na Ndaviti atheea, e na athũkũmi make, na okita na Avilisiti. Na Ndaviti anyala;

16na Isivi‐mbenovu ũla waĩ wa ana ma yĩla ĩmũndũ, yĩla ũito wa ĩtumo yayo waĩ sekeli maana atatũ sya ũthuku kwa kũthima, eevotoete ũvyũ mweũ, asũanĩa kũaa Ndaviti.

17Ĩndĩ Avisai mwana wa Nzeluia amũtethya, na amũkũna Mũvilisiti, na amũaa. Nĩvo ĩndĩ andũ ma Ndaviti mamwĩavĩe, makyasya, Ndũkaambĩla kumaala ũende naitũ kaũnĩ, ndũkese kũvosya taa wa Isilaeli.

18Na kweethĩwa ĩtina wa ũu, kwaĩ kaũ ĩngĩ na Avilisiti ku Ngovu: na ĩndĩ Sivekai Mũusathi amũaa Savu, ũla waĩ wa ana ma yĩla ĩmũndũ.

19Na kwaĩ kaũ ĩngĩ na Avilisiti Ngovu; na Elianani mwana wa Yaale‐olekimu Mũmbethileemu amũaa Ngoliathu Mũngiti ũla mũti wa ĩtumo yake wailyĩ ta mũamba wa mũtumi wa ngũa.

20Na kwaĩ kaũ ĩngĩ Ngathi, vala vaĩ mũndũ mũasa mũno, ũla waĩ na syaa thanthatũ kĩla, kw’oko, na syaa thanthatũ kĩla kũũ, ũtalo waĩ mĩongo ĩlĩ na inya; nake asyaiwe nĩ yĩla ĩmũndũ.

21Na yĩla wavũthisye Isilaeli, Yonathani mwana wa Simei, mwana‐a‐inyia wa Ndaviti, amũaa.

22Asu me ana masyaĩwe nĩ yĩla ĩmũndũ ku Ngathi; na mavalũkw’a nĩ kw’oko kwa Ndaviti na moko ma athũkũmi make.

← Chapter 20 Jump to: Chapter 22 →