Numbers 10

Kamba (Mbivilia) 1956

← Chapter 9 Jump to: Chapter 11 →

1Na Yeova aneena na Mose, akĩmwĩa,

2Ĩseũvĩsye masoo elĩ ma vetha; ũkamaseũvye na kũtua: na makeethĩwa ma kũmban’ya ũmbano, na ma syalo sya myako ya maeema.

3Na yĩla mevuva, ũmbano w’onthe ũkoombana vala ũĩ mũomonĩ wa ĩeema ya kũmbanĩa.

4Na ethĩwa mavuva o ũmwe, nĩvo ĩndĩ anene, atongoi ma ngili sya Isilaeli, makoombana vala ũĩ.

5Na yĩla mwĩvuva soo wĩ wasya wa kũtĩsya, myako ya maeema ya ngalĩ ya wumĩlonĩ wa syũa ĩkathi kyalo.

6Na yĩla mwĩvuva soo wĩ wasya ũsu ĩvinda ya kelĩ, myako ya maeema ya ngalĩ ya ĩtheo ĩkathi kyalo: makavuve soo wĩ wasya wa ũtĩsya kwondũ wa syalo syoo.

7Ĩndĩ yĩla ũmbano ũkũmbanw’a, mũkavuve, ĩndĩ mũtikavuve na wasya wa kũtĩsya.

8Na ana ma Aluni, ala athembi, nĩo mevuva masoo; na ũndũ ũsu ũkeethĩwa mwamũlo kwenyu mosyaanĩonĩ menyu tene na tene.

9Na yĩla mũkakwatya kaũ na mũmaitha ũla ũnũũmũnyamasya nthĩ yenyu, mũkavuve masoo asu me wasya wa kũtĩsya; na mũkalilikanwa nĩ Yeova Ngai wenyu, na mũkatangĩĩwa kuma amaithanĩ menyu.

10Na ĩngĩ mũthenya wa ũtanu wenyu, na mavinda ma mboka syenyu itw’ĩtwe, na myambĩlĩlyo ya myei yenyu, mũkavuve masoo ĩũlũ wa nthembo syenyu sya kũvĩvw’a, na ĩũlũ wa nthembo sya nthembo syenyu sya mũuo; na ikeethĩwa kwenyu ũlilikan’yo vala ve Ngai wenyu: ninyie Yeova Ngai wenyu.

11Na kweethĩwa mwaka wa kelĩ, mwei wa kelĩ, mũthenya wa mĩongo ĩlĩ wa mwei, mũumbĩ wookĩlw’a kuma ĩũlũ wa wĩkalo wa ũkũsĩ.

12Na ana ma Isilaeli makũsya makĩthi o ũndũ maendaa syalo kuma weũnĩ wa Sinai; na ũla mũumbĩ waũngama weũnĩ wa Valani.

13Na mamba kũthi kyalo o tondũ Yeova wamwĩaĩe Mose.

14Na kya mbee kya kũkũsya kyaĩ kĩvevelo kya mwako wa maeema wa ana ma Yuta kwĩanana na nguthu syoo: na mũnene wa nguthu yake aĩ Nasoni mwana wa Aminatavu.

15Na mũnene wa nguthu ya mbaĩ ya ana ma Isakali aĩ Nethaneli mwana wa Nzuali.

16Na mũnene wa nguthu ya mbai ya ana ma Nzevuluni aĩ Eliavu mwana wa Eeloni.

17Na wĩkalo wathaw’a; na ana ma Ngelisoni na ana ma Melali, ala makuaa wĩkalo, makũsya.

18Na kĩvevelo kya mwako wa maeema wa Leuveni kyakũsya kwĩanana na nguthu syoo: na mũnene wa nguthu yake aĩ Elisuli mwana wa Seteuli.

19Na mũnene wa nguthu ya mbaĩ ya ana ma Simeoni aĩ Selumieli mwana wa Nzuli‐satai.

20Na mũnene wa nguthu ya mbaĩ ya ana ma Ngati aĩ Eliasavu mwana wa Ndeueli.

21Na Akoathi makũsya makuĩte vala vandũ vatheu: na asu angĩ maĩ manaũngamya wĩkalo Akoathi matanavika.

22Na kĩvevelo kya mwako wa maeema wa Evalaimu kyakũsya kwĩanana na nguthu syoo: na mũnene wa nguthu yake aĩ Elisama mwana wa Amiuti.

23Na mũnene wa nguthu ya mbaĩ ya ana ma Manase aĩ Ngamalieli mwana wa Vetasuli.

24Na mũnene wa nguthu ya mbaĩ ya ana ma Mbenyamini aĩ Avitani mwana wa Kiteoni.

25Na kĩvevelo kya mwako wa maeema wa ana ma Ndani, ũla waĩ ĩtina wa myako ya maeema yonthe, kyakũsya kwĩanana na nguthu syoo: na mũnene wa nguthu yake aĩ Aieseli mwana wa Amisatai.

26Na mũnene wa nguthu ya mbaĩ ya ana ma Aseli aĩ Vakieli mwana wa Okalanĩ.

27Na mũnene wa nguthu ya mbaĩ ya ana ma Navitali aĩ Aila mwana wa Enani.

28Ũu nĩw’o ana ma Isilaeli maendaa syalo kwĩanana na nguthu syoo; na makũsya.

29Na Mose amwĩa Ovavu, mwana wa Leueli Mũmitiani, mũthoni wa Mose, atĩĩ, Nĩtũendete kyalo vandũ vala Yeova waisye ũndũ wa vo, Ngamũnenga inyw’ĩ: ũka ũendan’ye naitũ, na tũkakwĩka nesa; nũndũ Yeova nĩwaĩtye kana akeeka Isilaeli nesa.

30Na amwĩa, Ndithi; ĩndĩ nĩngũthi nthĩ yakwa, na kwa ũko wakwa.

31Nake asya, Ndũkatũtie, nĩngũkwĩsũva; nĩkwĩthĩwa nĩwĩsĩ ũndũ twĩambaa maeema maitũ weũnĩ, naku ũkeethĩwa kwitũ vandũ va metho.

32Na kũkeethĩwa, wathi naitũ, ĩĩ, kũkeethĩwa kana ũseo o na wĩva ũla Yeova ũkatwĩka, o ũsu tũkakwĩka we.

33Na makũsya kuma kũmanĩ kya Yeova kyalo kya mĩthenya ĩtatũ; na ĩsandũkũ ya ũtianĩo ya Yeova yaenda mbee wamo kyalo kya mĩthenya ĩtatũ, kũmamanthĩa vandũ va ũthũmũo.

34Na mũumbĩ wa Yeova waĩ ĩũlũ woo mũthenya, yĩla makũasya makyuma mwakonĩ wa maeema.

35Na kweethĩwa yĩla ĩsandũkũ yakũisye, Mose asya, Ũkĩla, ame Yeova, na amaitha maku nĩmanyaĩĩkw’e; na ala makũmenaa nĩmakũke makũkĩe.

36Nayo yaũngama, asya, Ame Yeova, syokea ngili ĩkũmi sya ngili sya Isilaeli.

← Chapter 9 Jump to: Chapter 11 →