Numbers 19

Kamba (Mbivilia) 1956

← Chapter 18 Jump to: Chapter 20 →

1Na Yeova aneena na Mose na Aluni, akĩmea,

2Ũũ nĩw’o mwamũlo wa mĩao ĩla Yeova weaie, akyasya, Neena na ana ma Isilaeli, makũetee moi ndune ĩte ĩlanga, na ĩte kĩema, na ĩla ĩtaaĩkĩwa ĩsoki.

3Na mũkamĩnenge mũthembi Eleasali, nake akamĩtwae ũtee wa mwako wa maeema, na mũndũ ũmwe akamyũaĩa vu mbee wa ũthyũ wake:

4na mũthembi Eleasali akose nthakame yayo na kyaa kyake, na kũminzangĩsya nthakame ĩsu kwelekela ngalĩ ya mbee ya ĩeema ya kũmbanĩa maminzangĩsya mũonza.

5Na mũndũ ũmwe akavĩvye moi ĩsu Eleasali asyaĩtye; kĩthuma kyayo, na nyama syayo, na nthakame yayo, vamwe na mũyoo wayo, akavĩvye:

6na mũthembi akose mũtĩ wa mũkũũ, na wa ĩsovo, na langi mũtune mũno, na kwĩkya mwakinĩ ũla ũũvĩvya ĩla moi.

7Nĩvo ĩndĩ mũthembi wĩthambya ngũa syake, na kũthamba mwĩĩ wake manzĩnĩ, na ĩtina wa ũu akalika mwakonĩ wa maeema, na mũthembi akeethĩwa e mũvuku kũvika wĩoo.

8Na ũla wĩmĩvĩvya akathambye ngũa syake manzĩnĩ, na kũthamba mwĩĩ wake manzĩnĩ, na akeethĩwa e mũvuku kũvika wĩoo.

9Na mũndũ ũla mũtheu akoke mũu wa ila moi, na kũwia ũtee wa mwako wa maeema vandũ vatheu; na ũkasũvĩwe kwondũ wa ũmbano wa ana ma Isilaeli wĩthĩwe wa kũseũvasya manzĩ ma kũthesya ũvuku: nĩ nthembo kwondũ wa naĩ.

10Na ũla wĩoka mũu wa moi ĩsu akathambye ngũa syake, na kwĩthĩwa e mũvuku kũvika wĩoo; na ũu ũkethĩwa mwamũlo wa tene na tena kwa ana ma Isilaeli, na kwa mũeni ũla wĩkalaa ũeni kwoo.

11Ũla ũkakiita kimba kya mũndũ o na wĩva akeethĩwa e mũvuku matukũ mũonza:

12ũsu akethesya namo mũthenya wa katatũ, na mũthenya wa mũonza akeethĩwa e mũtheu: ĩndĩ ethĩwa ndeĩthesya mũthenya wa katatũ, ĩndĩ mũthenya wa mũonza ndakethĩwa e mũtheu.

13O ũla ũkakiita kimba, o mwĩĩ wa mũndũ ũla ũkw’ĩte, nake ndeĩthesya mwene, nũvukasya wĩkalo wa Yeova; na mũndũ ũsu akavetwa kuma nthĩnĩ wa Isilaeli: nũndũ manzĩ asu ma kũthesya ũvuku matyaaminzangĩw’a ĩũlũ wake, akeethĩwa e mũvuku; ũvuku wake ũkeethĩwa o ĩũlũ wake.

14Ũũ nĩw’o mwĩao yĩla mũndũ ũkakw’ĩa ĩeemanĩ: kĩla mũndũ ũla wĩlika ĩeemanĩ, na kĩla mũndũ ũla wĩ nthĩnĩ wa ĩeema, akeethĩwa e mũvuku matukũ mũonza.

15Na kĩla kĩndũ kĩkunũe, kĩla kĩte kĩkunĩke na ngunĩko, nĩ kĩvuku.

16Na mũndũ o na wĩva ũla wĩ weũnĩ ũla ũkakiita ũla woaiwe na ũvyũ, kana kimba, kana ĩvĩndĩ ya mũndũ, kana mbũa, ũsu akeethĩwa e mũvuku matukũ mũonza.

17Na kwondũ wa ũla wĩ mũvuku makose mũu ũsu wa kũvĩvw’a kwa ĩla nthembo kwondũ wa naĩ; na manzĩ ala mavĩtĩte makavulanw’a naw’o ĩsaaninĩ:

18na mũndũ ũte mũvuku akose mũtĩ wa ĩsovo, na kũvotya manzĩnĩ asu, na kũmaminzangĩsya ĩũlũ wa ĩeema, na mĩionĩ yonthe, na andũnĩ ala me vo, na mũndũnĩ ũla ũnakiitie yĩla ĩvĩndĩ, kana ũsu woaiwe, kana ũsu mũkw’ũ, kana mbũa:

19na mũndũ mũtheu akamũminzangĩĩsye ũsu mũvuku mũthenya wa katatũ, na mũthenya wa mũonza: na mũthenya wa mũonza akamũthesya; nake akathambya ngũa syake, ina kũthamba manzĩnĩ, na akeethĩwa e mũtheu wĩoo.

20Ĩndĩ mũndũ ũla ũkethĩwa e mũvuku na akalea kwĩthesya, mũndũ ũsu akavetwa kuma ũmbanonĩ, nĩkwĩthĩwa nũvukĩtye vala vandũ vatheu va Yeova: manzĩ ma kũthesya ũvuku mainaminzangĩw’a ĩũlũ wake; nake nĩ mũvuku.

21Naw’o ũkeethĩwa mwamũlo wa tene na tene kwoo: na ũla ũkaminzanĩsya manzĩ ma kũthesya ũvuku akathambye ngũa syake; na ũla ũkakiita manzĩ ma kũthesya ũvuku akeethĩwa e mũvuku kũvika wĩoo.

22Na kĩndũ o na kĩva kĩla mũndũ ũla wĩ mũvuku ũkakiita kĩkeethĩwa kĩvuku; na mũndũ ũla ũkakĩtiita akeethĩwa e mũvuku kũvika wĩoo.

← Chapter 18 Jump to: Chapter 20 →