Numbers 15

Kamba (Mbivilia) 1956

← Chapter 14 Jump to: Chapter 16 →

1Na Yeova aneena na Mose, akĩmwĩa,

2Neena na ana ma Isilaeli, na ũmatavye, Yĩla mwĩlika nthĩ ĩla mwĩtũa, ĩla nĩmũnenga,

3na mũkenda kũmũthembea Yeova nthembo ĩvĩvaw’a na mwaki, nthembo ya kũvĩvw’a, kana nthembo ya kwĩanĩsya wĩvĩto, kana nthembo ya kumya na ngoo ya kwenda, kana mbokanĩ syenyu ila itw’ĩtwe sya kũmumĩsya Yeova nthembo yĩ mũuke mũseo, ya ndĩthya ya ng’ombe, kana ya mbũi na malondu;

4nĩvo ĩndĩ ũla ũetae nthembo yake ũkamũthembea Yeova nthembo ya mũtu ya kĩlungu kya ĩkũmi kya eva ya mũtu mũvinyu ũvulanĩtw’e na kĩlungu kya kana kya ini ya mauta:

5na kwondũ wa kĩla katena ka ĩlondu ũkaseũvye mbinyu yĩthĩwe nthembo ya kũnyuwa, kĩlungu kya kana kya ini, vamwe na nthembo ya kũvĩvw’a, kana nthembo ya kũtonywa.

6Kana kwondũ wa ndũũme, ũkaseũvye nthembo ya mũtu ya ilungu ilĩ sya ĩkũmi sya eva ya mũtu mũvinyu ũvulanĩtw’e na kĩlungu kya katatũ kya ini ya mauta:

7na ũndũ wa nthembo ya kũnyuwa ũkathembe kĩlungu kya katatũ kya ini ya mbinyu, yĩthĩwe mũuke mũseo kwa Yeova.

8Na yĩla wĩseũvya kasalũ ka mũew’a kethĩwe nthembo ya kũvĩvw’a, kana kethĩwe nthembo ya kũtonywa, ya kwĩanĩsya wĩvĩto, kana kethĩwe nthembo sya mũuo kwa Yeova;

9nĩvo ĩndĩ wĩthembanĩsya na kala kasalũ nthembo ya mũtu ya ilungu itatũ sya ĩkũmi sya eva ya mũtu mũvinyu ũvulanĩtw’e na nyunzu ya ini ya mauta:

10na ũkathembe ũndũ wa nthembo ya kũnyuwa nyunzu ya ini ya mbinyu, yĩthĩwe nthembo ĩvĩvaw’a na mwaki, yĩ mũuke mũseo kwa Yeova.

11Ũu nĩw’o wĩĩkwa kwondũ wa kĩla kasalũ ka mũew’a, kana kĩla ndũũme, kana kĩla katũlũme, kana kĩla katena ka mbũi.

12Kwĩanana na ũndũ syĩana ila mũkaseũvya, ũu nĩw’o mwĩĩka kĩla imwe kwĩanana na ũndũ syĩana.

13Onthe ala masyaawa kwenyu makeke maũndũ asu kwĩanana na ũu, makĩthemba nthembo ĩvĩvaw’a na mwaki, yĩ mũuke mũseo kwa Yeova.

14Na ethĩwa mũeni ekalaa ũeni kwenyu, kana mũndũ o na wĩva ũla ũkethĩwa e kwenyu mosyaanĩonĩ menyu, nake enda kũthemba nthembo ĩvĩvaw’a na mwaki, yĩ mũuke mũseo kwa Yeova; o tondũ inyw’ĩ mwĩkaa, nake now’o wĩĩka.

15Nthĩnĩ wa ũmbano kũkeethĩwa mwamũlo ũmwe kwondũ wenyu, na kwondũ wa mũeni ũla wĩkalaa ũeni kwenyu, mwamũlo wa tene na tene mosyaanĩonĩ menyu: o tondũ mũilyĩ, ũu nĩw’o mũeni wĩĩthĩwa ailyĩ vala ve Yeova.

16Kũkeethĩwa mwĩao ũmwe na ũtw’ĩo umwe kwondũ wenyu na kwondũ wa mũeni ũla wĩkalaa ũeni kwenyu.

17Na Yeova aneena na Mose, akĩmwĩa,

18Neena na ana ma Isilaeli, na ũmatavye, Yĩla mwĩlika nthĩ ĩla nĩmũtwaĩte,

19nĩvo ĩndĩ kwĩĩthĩwa, atĩ, yĩla mwĩya lĩu wa nthĩ ĩsu, mũkamũthembee Yeova nthembo ya kũkĩlw’a.

20Mũkathembe kamũtũ kamwe kethĩwe nthembo ya kũkĩlw’a kuma mũtunĩ wenyu wa mbee; o tondũ mwĩkaa na nthembo ya kũkĩlw’a ya kĩvũĩonĩ, mũkamyũkĩlye o ta ũu.

21Mũkanenge Yeova nthembo ya kukĩlw’a ya mũtu wenyu wa mbee mosyaanĩonĩ menyu onthe.

22Na yĩla mũkavĩtya, na kũlea kũkwata mĩao ĩsu yonthe ĩla Yeova wamũtavisye Mose,

23o maũndũ onthe ala Yeova wamwĩaĩe na kanyw’a wa Mose, kuma mũthenya ũla Yeova weaie, o na ĩtina wa ũu mosyaanĩonĩ menyu onthe;

24nĩvo ĩndĩ kũkethĩwa, ethĩwa kweekiwe kwa kũlea kũmanya, ũmbano ũtesĩ, kana ũmbano w’onthe ũkathembanĩsya kasalũ kamwe kethĩwe nthembo ya kũvĩvw’a, yĩ mũuke mũseo kwa Yeova, na nthembo ya mũtu ya kũthembanĩsya nako, na nthembo ya kũnyuwa ya kũthembanĩsya nako, kwĩanana na ũtw’ĩo, na nthenge ĩmwe yĩthĩwe nthembo kwondũ wa naĩ.

25Na mũthembi akathemba nthembo ya wĩw’anĩthyo kwondũ wa ũmbano w’onthe wa ana ma Isilaeli, na makaekewa; nĩkwĩthĩwa kweekiwe kwa kũlea kũmanya, namo maetie nthembo yoo, o nthembo ya kũmũvĩvĩsya Yeova na mwaki, na nthembo yoo kwondũ wa naĩ kwa Yeova kwondũ wa kũlea kũmanya kwoo:

26na ũmbano w’onthe wa ana ma Isilaeli ũkaekewa, na mũeni ũla wĩkalaa ũeni katĩ woo: nũndũ kwa andũ asu onthe ũndũ ũsu weekiwe kwa kũlea kũmanya.

27Na ethĩwa mũndũ ũmwe akavĩtya ateũmanya, nĩvo ĩndĩ wĩthemba mbaika ya mwaka ũmwe yĩthĩwe nthembo kwondũ wa naĩ.

28Na mũthembi akathemba nthembo ya wĩw’anĩthyo kwondũ wa mũndũ ũla ũnũũvĩtya, yĩla wĩmũvĩtanĩsya Yeova ateũmanya, amwĩw’anĩthye; na akaekewa.

29Mũkeethĩwa na mwĩao ũmwe ũndũ wa ũla wĩkaa ũndũ o na wĩva ateũmanya, ũndũ wa ũla wasyaĩwe nthĩ yenyu ananĩ ma Isilaeli, na ũndũ wa mũeni ũla wĩkalaa ũeni kwoo.

30Ĩndĩ mũndũ ũla wĩkaa ũndũ na ngũlũ, ethĩwa nĩ mũndũ ũla wasyaĩwe nthĩ yenyu kana mwĩkali wa ũeninĩ, ũsu aumĩte Yeova; na mũndũ ũsu akavetwa andũnĩ make.

31Nĩkwĩthĩwa nũvũthĩtye ndeto ya Yeova, na kũtũla mwĩao wake, mũndũ ũsu akavetwa vyũ; ũthũku wake ũkeethĩwa ĩũlũ wake.

32Na yĩla ana ma Isilaeli maĩ weũnĩ, moona mũndũ aikolan’ya ngũ mũthenya wa savato.

33Na ala mamwonie aikolan’ya ngũ mamũtwaa vala ve Mose na Aluni, na ũmbano w’onthe.

34Na mamwĩkĩa ũsũvĩonĩ, nĩkwĩthĩwa kũtyaĩ kũnamba ũneenw’a ũndũ wĩĩkwa.

35Na Yeova amwĩa Mose, Mũndũ, ũsu ndatĩa kũawa: ũmbano w’onthe ũkamũkimangĩe na mavia ũtee wa mwako wa maeema.

36Na ũmbano w’onthe wamũtwaa ũtee wa mwako wa maeema, na wamũkimanga na mavia akw’a; o tondũ Yeova weaĩe Mose.

37Na Yeova aneena na Mose, akĩmwĩa,

38Neena na ana ma Isilaeli, na matavye meseũvĩsye manyenze motiivonĩ ma ngũa syoo mosyaanĩonĩ moo onthe, na mekĩe manyenzenĩ ma kĩla ũtiivo ũlii wa vuluu:

39naw’o ũkeethĩwa kwenyu manyenze, nĩ kana mũtonye kũmasiasya, na kũlilikanaa mĩao yonthe ya Yeova, na kũmĩkaa: na nĩ kana mũtikaatĩĩe ngoo syenyu ene na metho menyu ene, ala mwamaatĩĩaa na kwĩkaa ũmalwaya namo;

40nĩ kana mũlilikanae na kwĩkaa mĩao yakwa yonthe, na mwĩthĩwe atheu kwa Ngai wenyu.

41Ninyie Yeova Ngai wenyu, ũla wamumisye nthĩ ya Misili, nĩthĩwe Ngai wenyu: ninyie Yeova Ngai wenyu.

← Chapter 14 Jump to: Chapter 16 →