Numbers 4

Kamba (Mbivilia) 1956

← Chapter 3 Jump to: Chapter 5 →

1Na Yeova aneena na Mose na Aluni, akĩmea,

2Vetai ũtalo wa ana ma Koathi vala ve ana ma Livai, kũatĩĩa mĩvĩa yoo, kũatĩĩa nyũmba sya aaĩthe moo,

3ala mavikĩtye myaka mĩongo ĩtatũ na mbee o kũvika myaka mĩongo ĩtano, onthe ala malikaa ũthũkũminĩ, matethye wĩa ĩeemanĩ ya kũmbanĩa.

4Ũũ nĩw’o ũthũkũmi wa ana ma Koathi ĩeemanĩ ya kũmbanĩa, syĩndũnĩ ila ntheu mbee:

5yĩla maeema meambũawa mathi, Aluni na ana make makalike na kumya ula tũtũ wa kũtilan’ya, na kũvw’ĩka ĩsandũkũ ya ũkũsĩ naw’o,

6na makavw’ĩke ĩũlũ wayo ũa wa vomboo, na makalan’ye ĩũlũ waw’o ngũa ya vuluu mũthei, na makĩkĩa mĩtĩ yayo ya ũyĩkua.

7Na mesanĩ ya imũtũ ila siĩawa Yeova makalan’ye ngũa ya vuluu, na kwia masaani ĩũlũ wayo, na syĩko, na mbakũli na ikombe sya kwĩtĩkĩasya; na imutu ila itatw’ĩkanaa ikeethĩwa ĩũlũ wayo:

8na makalan’ye ĩũlũ wasyo ngũa ndune mũno, na kũvw’ĩka ngũa ĩsu na ũa wa vomboo, na makekĩe mĩtĩ yayo.

9Na makose ngũa ya vuluu na kũvw’ĩka kĩla kĩndũ kĩkĩawa mataa ala mamulĩkaa, na mataa makyo, na mĩkasĩ yakyo, na masaani makyo ma makaa, na mĩio yonthe ya mauta makyo, ĩla matethasya wĩa wakyo nayo:

10na makakĩkĩe vamwe na mĩio yonthe yakyo nthĩnĩ wa ũa wa vomboo, na makia ĩũlũ wa mĩtĩ ya ũkua nayo.

11Na ĩũlũ wa kĩthembeo kya thaavu makalan’ye ngũa ya vuluu, na maimĩvw’ĩka ũa wa vomboo, na kwĩkĩa ĩla mĩtĩ yakyo:

12na makose mĩio yonthe ya ũthũkũmi ĩla mathũkũmaa nayo nthĩnĩ wa vala vandũ vatheu, na kũmĩkĩa ngũanĩ ya vuluu, na kũmĩvw’ĩka ũa wa vomboo, na kũmia ĩũlũ wa mĩtĩ ya kũkua nayo.

13Na makooke mũu kĩthembeonĩ, na kwalan’ya ngũa ĩtilyĩ ta ndune ĩũlũ wakyo:

14nao makaie ĩũlũ wayo mĩio yonthe yayo, ĩla mathũkũmaa nayo, tũvũngũlyũ twa ũkua makaa, na itonyi sya nyama, na mĩko, na masaani manene, mĩio yonthe ya kĩla kĩthembeo; na makalan’ye ĩũlũ wayo ũa wa vomboo, na kwĩkĩa mĩtĩ yakyo.

15Na yĩla Aluni na ana make memina kũvw’ĩka vala vandũ vatheu, na mĩio yonthe ya vala vandũ vatheu, o yĩla meambũa maeema mathi; ĩtina wa ũu, ana ma Koathi makooka kũkua: ĩndĩ matikakiite vala vandũ vatheu, matikakw’e. Syĩndũ isu nĩ mĩio ya ana ma Koathi ĩeemanĩ ya kũmbanĩa.

16Na wĩaĩo wa Eleasali mwana wa mũthembi Aluni ũkethĩwe wa kũsũvĩaa mauta ma kwakan’ya taa, na ũvani ũla ũnyungaa nesa, na nthembo ya mũtu ĩtatw’ĩkanaa, na mauta ma kwĩtĩkĩsya, o wĩaĩo wa wĩkalo w’onthe, na wa mĩio yonthe ĩla yĩ nthĩnĩ waw’o, vala vandũ vatheu, na mĩio ya vo.

17Na Yeova aneena na Mose na Aluni, akĩmea,

18Mũikavete mbaĩ ya mĩvĩa ya Akoathi kuma katĩ wa Alivai:

19ĩndĩ mekaei ũndũ ũũ, nĩ kana mekalae thayũ, maikakw’e, yĩla meũthengeea syĩndũ ntheu mbee; Aluni na ana make makalike nthĩnĩ na kũmwiĩa kĩla mũndũ ũthũkũmi wake na mũio wake;

20ĩndĩ asu matikalike kũsisya vala vandũ vatheu o na kavinda kanini, matikakw’e.

21Na Yeova aneena na Mose, akĩmwĩa,

22Tala ana ma Ngelisoni, kũatĩĩa nyũmba sya aaĩthe moo, kũatĩĩa mĩvĩa yoo;

23ala mavikĩtye myaka mĩongo ĩtatũ na mbee kũvika myaka mĩongo ĩtano ũkamatale; onthe ala malikaa kũthũkũma, matethye wĩa ĩeemanĩ ya kũmbanĩa.

24Ũũ nĩw’o ũthũkũmi wa mĩvĩa ya Angelisoni wa kũthũkũma na kũkua mĩio:

25makakuae masuka ma wĩkalo, na ĩeema ya kũmbanĩa, na kĩndũ kya kũyĩvw’ĩka, na kĩngĩ kya kũvw’ĩka kya ũa wa vomboo kĩ ĩũlũ wayo, na tama wa mũomonĩ wa ĩeema ya kũmbanĩa;

26na ngũa sya kũniinw’a sya nza, na tama wa mũomonĩ wa mbingĩlo ya nza, ũla wĩ vakuvĩ na wĩkalo na vakuvĩ na kĩthembeo kũkĩthyũlũlũka ngalĩ syonthe, na makanda masyo, na mĩio yonthe ya ũthũkũmi wasyo, na w’onthe o na wĩva ũla ũkekwa nasyo: makathũkũmae wĩanĩ ũsu.

27Ũthũkũmi w’onthe wa ana ma Angelisoni, ũndũ wa mĩio yoo yonthe, na ũndũ wa ũthũkũmi woo w’onthe, ũkeethĩwa ũkĩaĩwa nĩ Aluni na ana make; nenyu mũkamaiĩe mĩio yoo yonthe mamĩsũvĩae.

28Ũsu nĩw’o ũthũkũmi wa mĩvĩa ya ana ma Ngelisoni ĩeemanĩ ya kũmbanĩa: kwĩaĩwa kwoo kũkethĩwe kw’okonĩ kwa Ithamali mwana wa mũthembi Aluni.

29Ũndũ wa ana ma Melali, ũkamatale kũatĩĩa mĩvĩa yoo, kũatĩĩa nyũmba sya aaĩthe moo;

30ala mavikĩtye myaka mĩongo ĩtatũ na mbee o kũvika myaka mĩongo ĩtano ũkamatale, kĩla ũmwe ũlikaa ũthũkũminĩ ũsu, kũtethya wĩa wa ĩeema ya kũmbanĩa.

31Kwĩaĩwa kwoo kwondũ wa mĩio yoo, kwĩanana na ũthũkũmi woo w’onthe ĩeemanĩ ya kũmbanĩa nĩkw’o kũũ: mbwaũ sya wĩkalo, na mĩamba yaw’o, na ituĩ syaw’o, na iĩndĩ syaw’o;

32na ituĩ sya nza sya kũthyũlũlũka ngalĩ syonthe, na iĩndĩ syasyo, na syambo syasyo, na makanda masyo, vamwe na mĩio yasyo yonthe, na vamwe na ũthũkũmi wasyo w’onthe: ũkamũwetee kĩla mũndũ mĩio yake na masyĩtwa mayo ĩla weaĩwe asũvĩae.

33Ũsu nĩw’o ũthũkũmi wa mĩvĩa ya ana ma Melali, kwĩanana na ũthũkũmi woo w’onthe, ĩeemanĩ ya kũmbanĩa, ũkĩsiaĩĩw’a nĩ Ithamali mwana wa mũthembi Aluni.

34Na Mose na Aluni na anene ma ũmbano matala ana ma Akoathi kũatĩĩa mĩvĩa yoo, na kũatĩĩa nyũmba sya aaĩthe moo,

35ala mavikĩtye myaka mĩongo ĩtatũ na mbee o kũvika myaka mĩongo ĩtano, kĩla mũndũ ũla walikaa ũthũkũminĩ ũsu, kwondũ wa wĩa ĩeemanĩ ya kũmbanĩa;

36na ala matalilwe moo kũatĩĩa mĩvĩa yoo maĩ ngili ilĩ na maana mũonza na mĩongo ĩtano.

37Asu nĩo ala matalilwe ma mĩvĩa ya Akoathi, onthe ala mathũkũmaa ĩeemanĩ ya kũmbanĩa, ala Mose na Aluni matalile o tondũ Yeova wamwĩaĩe Mose.

38Na ala matalilwe ma ana ma Ngelisoni, kũatĩĩa mĩvĩa yoo, na kũatĩĩa nyũmba sya aaĩthe moo,

39ala mavikĩtye myaka mĩongo ĩtatũ na mbee o kũvika myaka mĩongo ĩtano, kĩla ũmwe ũla walikaa ũthũkũminĩ ũsu wa wĩa ĩeemanĩ ya kũmbanĩa,

40o asu ala matalilwe moo, kũatĩĩa mĩvĩa yoo, kũatĩĩa nyũmba sya aaĩthe moo, maĩ ngili ili na maana thanthatũ na mĩongo ĩtatũ.

41Asu nĩo ala matalilwe ma mĩvĩa ya ana ma Ngelisoni, onthe ala mathũkũmaa ĩeemanĩ ya kũmbanĩa, ala Mose na Aluni matalile kwĩanana na mwĩao wa Yeova.

42Na ala matalilwe ma mĩvĩa ya ana ma Melali, kũatĩĩa mĩvĩa yoo, kũatĩĩa nyũmba sya aaĩthe moo,

43ala mavikĩtye myaka mĩongo ĩtatũ na mbee o kũvika myaka mĩongo ĩtano, kĩla ũmwe ũla walikaa ũthũkũminĩ ũsu wa wĩa ĩeemanĩ ya kũmbanĩa,

44o asu ala matalilwe ma mĩvĩa yoo, maĩ ngili itatũ na maana elĩ.

45Asu nĩo ala matalilwe ma mĩvĩa ya ana ma Melali, ala Mose na Aluni matalile o tondũ Yeova wamwĩaĩe Mose.

46Onthe ala matalilwe ma Alivai, ala Mose na Aluni na anene ma Isilaeli matalile, kũatĩĩa mĩvĩa yoo, na kũatĩĩa nyũmba sya aaĩthe moo,

47ala mavikĩtye mayaka mĩongo ĩtatũ na mbee o kũvika myaka mĩongo ĩtano, kĩla ũmwe ũla walikaa kũtethya wĩa wa ũthũkũmi ũsu, na wĩa wa kũkua mĩio ĩeemanĩ ya kũmbanĩa,

48o asu matalilwe moo maĩ ngili nyanya na maana atano na mĩongo nyanya.

49Matalilwe nĩ Mose kwĩanana na mwĩao wa Yeova, kĩla mũndũ o ũndũ ũthũkũmi wake ũilyĩ, na ũndũ mĩio yake ĩilyĩ: ũu nĩw’o matalilwe nĩwe, o tondũ Yeova wamwĩaĩe Mose.

← Chapter 3 Jump to: Chapter 5 →