Numbers 29

Kamba (Mbivilia) 1956

← Chapter 28 Jump to: Chapter 30 →

1Na mwei wa mũonza, mũthenya wa mbee wa mwei, mũkeethĩwa na ũmbano mũtheu; mũtikatethye wĩa o na wĩva w’onthe: kwenyu nĩ mũthenya wa kũvuva masoo.

2Na mũkathembe nthembo ya kũvĩvw’a yĩthĩwe yĩ mũuke mũseo kwa Yeova: kasalũ kamwe, na ndũũme ĩmwe, na tũtũlũme mũonza twa mwaka ũmwe tũte kĩema;

3na nthembo ya mũtu ya kũthembanĩsya nasyo, mũtu mũvinyu ũvulanĩtw’e na mauta, ilungu itatũ sya ĩkũmi kwondũ wa kala kasalũ, na ilungu ilĩ sya ĩkũmi kwondũ wa ĩla ndũũme,

4na kĩlungu kĩmwe kya ĩkũmi kwondũ wa kĩla katũlũme ka tũla tũtũlũme mũonza;

5na nthenge ĩmwe yĩthĩwe nthembo kwondũ wa naĩ, ya kwĩw’anĩthw’a kwenyu;

6o vamwe na nthembo ya kũvĩvw’a ya mũtiso wa mwei, na nthembo ya mũtu ya kũthembanĩsya nayo, na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, na nthembo sya kũnyuwa sya kũthembanĩsya nasyo, kwĩanana na ũtw’ĩo wasyo syĩthĩwe mũuke mũseo, nthembo ĩvĩvĩaw’a Yeova na mwaki.

7Na mũthenya wa ĩkũmi wa mwei ũsu wa mũonza mũkeethĩwa na ũmbano mũtheu; na mwĩĩthĩn’ye ngoo syenyu: mũtikatethye wĩa o na wĩva;

8ĩndĩ mũkamũthembee Yeova nthembo ya kũvĩvw’a yĩthĩwe yĩ mũuke mũseo: kasalũ kamwe, na ndũũme ĩmwe, na tũtũlũme mũonza twa mwaka ũmwe; ikethĩwe kwenyu ite kĩema;

9na nthembo ya mũtu ya kũthembanĩsya nasyo, mũtu mũvinyu ũvulanĩtw’e na mauta, ilungu itatũ sya ĩkũmi kwondũ wa kala kasalũ, na ilungu ilĩ sya ĩkũmi kwondũ wa ĩla ndũũme,

10na kĩlungu kya ĩkũmi kwondũ wa kĩla katũlũme ka tũla tũtũlũme mũonza:

11na nthenge ĩmwe yĩthĩwe nthembo kwondũ wa naĩ; o vamwe na nthembo kwondũ wa naĩ ya kwĩw’anĩthya, na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, na nthembo sya kũnyuwa sya kũthembanĩsya nasyo.

12Na mũthenya wa ĩkũmi na ĩtano wa mwei wa mũonza mũkeethĩwa na ũmbano mũtheu; mũtikatethye wĩa o na wĩva w’onthe, na mũkeethĩwa na mboka mĩthenya mũonza kwondũ wa Yeova:

13na mũkathembe nthembo ya kũvĩvw’a, nthembo ĩvĩvaw’a na mwaki, yĩ mũuke mũseo kwa Yeova; tũsalũ ĩkũmi na tũtatũ, na ndũũme ilĩ, na tũtũlũme ĩkũmi na tũna twa mwaka ũmwe; nasyo ikethĩwe ite kĩema;

14na nthembo ya mũtu ya kũthembanĩsya nasyo, mũtu mũvinyu ũvulanĩtw’e na mauta, ilungu itatũ sya ĩkũmi kwondũ wa kĩla kasalũ ka tũla tũsalũ ĩkũmi na tũtatũ, na ilungu ilĩ sya ĩkũmi kwondũ wa kĩla ndũũme ya ila ndũũme ilĩ,

15na kĩlungu kya ĩkũmi kwondũ wa kĩla katũlũme ka tũla tũtũlũme ĩkũmi na tũna;

16na nthenge ĩmwe yĩthĩwe nthembo kwondũ wa naĩ; o vamwe na ĩla nthembo ya kũvivw’a ĩtatw’ĩkanaa, na nthembo ya mũtu ya kũthembanĩsya nayo, na nthembo ya kũnyuwa ya kũthembanĩsya nayo.

17Na mũthenya wa kelĩ mũkathembe tũsalũ ĩkũmi na twĩlĩ, na ndũũme ilĩ, na tũtũlũme ĩkũmi na tũna twa mwaka ũmwe tũte kĩema:

18na nthembo ya mũtu ya kũthembanĩsya nasyo na nthembo sya kũnyuwa sya kũthembanĩsya nasyo kwondũ wa tũsalũ tũu, na kwondũ wa ndũũme ĩsu, na kwondũ wa tũtũlũme tũu, kwĩanana na ũtalo wasyo, kũatĩĩa ũla ũtw’ĩo;

19na nthenge ĩmwe yĩthĩwe nthembo kwondũ wa naĩ; o vamwe na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, na nthembo sya kũnyuwa sya kũthembanĩsya nasyo.

20Na mũthenya wa katatũ mũkathembe tũsalũ ĩkũmi na kamwe, na ndũũme ilĩ, na tũtũlũme ĩkũmi na tũna twa mwaka ũmwe tũte kĩema;

21na nthembo ya mũtu na nthembo sya kũnyuwa sya kũthembanĩsya nasyo kwondũ wa tũsalũ tũu, na kwondũ wa ndũũme isu, na kwondũ wa tũtũlũme tũu, kwĩanana na ũtalo wasyo, kũatĩĩa ũla ũtw’ĩo;

22na nthenge ĩmwe yĩthĩwe nthembo kwondũ wa naĩ; o vamwe na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, na nthembo ya kũnyuwa ya kũthembanĩsya nayo.

23Na mũthenya wa kana mũkathembe tũsalũ ĩkũmi, na ndũũme ilĩ, na tũtũlũme ĩkũmi na tũna twa mwaka ũmwe tũte kĩema;

24na nthembo ya mũtu na nthembo sya kũnyuwa sya kũthembanĩsya nasyo kwondũ wa tũsalũ tũu, na kwondũ wa ndũũme isu, na kwondũ wa tũtũlũme tũu, kwĩanana na ũtalo wasyo, kũatĩĩa ũla ũtw’ĩo;

25na nthenge ĩmwe yĩthĩwe nthembo kwondũ wa naĩ; o vamwe na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, na nthembo ya kũnyuwa ya kũthembanĩsya nayo.

26Na mũthenya wa katano mũkathembe tũsalũ kenda, na ndũũme ilĩ, na tũtũlũme ĩkũmi na tũna twa mwaka ũmwe tũte kĩema;

27na nthembo ya mũtu na nthembo sya kũnyuwa sya kũthembanĩsya nasyo kwondũ wa tũsalũ tũũ, na kwondũ wa ndũũme isu, na kwondũ wa tũtũlũme tũu, kwĩanana na ũtalo wasyo, kũatĩĩa ũla ũtw’ĩo;

28na nthenge ĩmwe yĩthĩwe nthembo kwondũ wa naĩ; o vamwe na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, na nthembo ya kũnyuwa ya kũthembanĩsya nayo.

29Na mũthenya wa thanthatũ mũkathembe tũsalũ nyanya, na ndũũme ilĩ, na tũtũlũme ĩkũmi na tũna twa mwaka ũmwe tũte kĩema;

30na nthembo ya mũtu na nthembo sya kũnyuwa sya kũthembanĩsya nasyo kwondũ wa tũsalũ tũu, na kwondũ wa ndũũme isu, na kwondũ wa tũtũlũme tũu, kwĩanana na ũtalo wasyo, kũatĩĩa ũla ũtw’ĩo;

31na nthenge ĩmwe yĩthĩwe nthembo kwondũ wa naĩ; o vamwe na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, na nthembo sya kũnyuwa sya kũthembanĩsya nayo.

32Na mũthenya wa mũonza mũkathembe tũsalũ mũonza, na ndũũme ilĩ, na tũtũlũme ĩkũmi na tũna twa mwaka ũmwe tũte kĩema;

33na nthembo ya mũtu na nthembo sya kũnyuwa kwondũ wa tũsalũ tũu, na kwondũ wa ndũũme isu, na kwondũ wa tũtũlũme tũu, kwĩanana na ũtalo wasyo, kũatĩĩa ũla ũtw’ĩo;

34na nthenge ĩmwe yĩthĩwe nthembo kwondũ wa naĩ; o vamwe na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, na nthembo ya kũnyuwa ya kũthembanĩsya nayo.

35Mũthenya wa nyanya mũkeethĩwa na ũmbano ũkilĩtye: mũtikatethye wĩa o na wĩva w’onthe;

36ĩndĩ mũkathembe nthembo ya kũvĩvw’a, nthembo ĩvĩvaw’a na mwaki, yĩ mũuke mũseo kwa Yeova: kasalũ kamwe ka mũew’a, na ndũũme ĩmwe, na tũtũlũme mũonza twa mwaka ũmwe tũte kĩema;

37na nthembo ya mũtu ya kũthembanĩsya nasyo na nthembo sya kũnyuwa sya kũthembanĩsya nasyo kwondũ wa kasalũ kau, na kwondũ wa ĩla ndũũme, na kwondũ wa tũtũlũme tũu, syĩthĩwe kwĩanana na ũtalo wasyo, kũatĩĩa ũla ũtw’ĩo:

38na nthenge ĩmwe yĩthĩwe nthembo kwondũ wa naĩ; o vamwe na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, na nthembo ya kũnyuwa ya kũthembanĩsya nayo.

39Isu mũkathembee Yeova ĩvinda ya mboka syenyu ila itw’ĩtwe, o vamwe na mawĩvĩto menyu, na nthembo syenyu ila mumasya na ngoo ya kwenda, syĩthĩwe nthembo syenyu sya kũvĩvw’a, na nthembo syenyu sya mũtu, na nthembo syenyu sya kũnyuwa, na nthembo syenyu sya mũuo.

40Na Mose amatavya ana ma Isilaeli kwĩanana na w’onthe ũla Yeova wamwĩaĩe Mose.

← Chapter 28 Jump to: Chapter 30 →