Numbers 6

Kamba (Mbivilia) 1956

← Chapter 5 Jump to: Chapter 7 →

1Na Yeova aneena na Mose, akĩmwĩa,

2Neena na ana ma Isilaeli, ũmatavye, Yĩla mũndũ mũũme kana mũndũ mũka ũkevĩta wĩvĩto, wĩvĩto wa Mũnasali, nĩ kana evathe ethĩwe wa Yeova,

3akevathane na mbinyu na kĩla kĩtoonasya; ndakanyw’e siki wa mbinyu, kana siki wa kĩla kĩtoonasya, o na ndakanyw’e ngoyoo o na yĩva ya nzavivũ, kana kũya nzavivũ mbĩu kana mbovu.

4Mĩthenya yonthe ya kwĩvatha kwake ndakaye kĩndũ kĩseũvĩtw’e kya mũsavivũ, kuma mbĩndĩ o na kũvika makonde.

5Mĩthenya yonthe ya wĩvĩto wake wa kwĩvathan’ya, wenzi ndũkaavike mũtwe wake: kũvika yĩla mĩthenya yĩĩanĩa, ĩla wevathanisye ethĩwe wa Yeova, akeethĩwa e mũtheu; akaeke nzw’ĩĩ sya mũtwe wake iasave.

6Mĩthenya yonthe ĩla wevathanisye ethĩwe wa Yeova ndakathengeee kimba.

7Ndakevukye kwondũ wa ĩthe, kana kwondũ wa nyinyia, kana kwondũ wa mwana‐a‐inyia, kana kwondũ wa mwĩĩtũa‐inyia, yĩla makw’a; nũndũ kwĩvatha kwake ethĩwe wa Ngai kwĩ mũtwenĩ wake.

8Mĩthenya yonthe ya kwĩvathan’ya kwake nĩ mũtheu kwa Yeova.

9Na ethĩwa mũndũ o na wĩva akatũmũkĩa vakuvĩ nake, na akavukya mũtwe wa kwĩvatha kwake; nĩvo ĩndĩ wĩenza mũtwe wake mũthenya wa kwĩthesya kwake, mũthenya wa mũonza akawenze.

10Na mũthenya wa nyanya akamũtwaĩe mũthembi ndumbũ ilĩ, kana maswii elĩ ma ĩvũĩ mũomonĩ wa ĩeema ya kũmbanĩa:

11na mũthembi akathembe ĩmwe yĩthĩwe nthembo kwondũ wa naĩ, na ĩla ĩngĩ yĩthĩwe nthembo ya kũvĩvw’a, amwĩw’anĩthye, nũndũ nĩwavĩtisye nũndũ wa kimba, na akavathan’ye mũtwe wake mũthenya o ũsu.

12Nake akamũvathĩa Yeova mĩthenya ya kwĩvatha kwake, na akaete katũlũme ka mwaka ũmwe kethĩwe nthembo kwondũ wa ĩvĩtyo: ĩndĩ mĩthenya ĩla mĩvĩtu ndĩkatalwa, nĩkwĩthĩwa kwĩvatha kwake nĩ kũvukye.

13Na ũũ nĩw’o mwĩao wa Mũnasali, yĩla mĩthenya ya kwĩvatha kwake yeanĩa: akaetwe mũomonĩ wa ĩeema ya kũmbanĩa:

14na akamũthembee Yeova nthembo yake, katũlũme kamwe kate kĩema ka mwaka ũmwe kethĩwe nthembo ya kũvĩvw’a, na kamwatĩ kamwe ka mwaka ũmwe kate kĩema kethĩwe nthembo kwondũ wa naĩ, na ndũũme ĩmwe ĩte kĩema yĩthĩwe nthembo ya mũuo,

15na kĩkavũ kya kĩmũtũ kĩte ĩlawa, na tũmũtũ twa mũtu mũvinyu ũvulanĩtw’e na mauta, na tũmĩkate tũvũthũ tũte ĩlawa tũvakĩtwe mauta, na nthembo ya mũtu ya kũthembanĩsya nasyo, na nthembo sya kũnyuwa sya kũthembanĩsya nasyo.

16Na mũthembi akaitwaĩe Yeova, na akathembe nthembo yake kwondũ wa naĩ, na nthembo yake ya kũvĩvw’a:

17na akathembee Yeova ĩla ndũũme yĩthĩwe yĩ nthembo ya nthembo sya mũuo, vamwe na kĩkavũ kya kĩmũtũ kĩte ĩlawa: na ĩngĩ mũthembi akathembe nthembo ya mũtu ya kũthembanĩsya nayo, na nthembo ya kũnyuwa ya kũthembanĩsya nayo.

18Na Mũnasali akenzee mũtwe wa kwĩvathan’ya kwake mũomonĩ wa ĩeema ya kũmbanĩa, na akose nzw’ĩĩ sya mũtwe wa kwĩvathan’ya kwake, na kwĩkĩa mwakinĩ ũla wĩ ungu wa nthembo ya nthembo sya mũuo.

19Na mũthembi akose kw’oko kũue kwa ndũũme, na kamũtũ kamwe kate ĩlawa kĩkavũnĩ, na kamũkate kamwe kavũthũ kate ĩlawa, na kwĩkĩa mokonĩ ma Mũnasali, amina kwenza mũtwe wa kwĩvathan’ya kwake;

20na mũthembi akaivyũlangye syĩthĩwe nthembo ya kũvyũlw’a mbee wa Yeova; kyu nĩ kĩndũ kĩtheu kwondũ wa mũthembi, vamwe na kĩng’eng’eto kya kũvyũlw’a na kũũ kwa kũkĩlw’a: na ĩtina wa ũu ũla Mũnasali nũtonya kũnyw’a mbinyu.

21Ũsu nĩw’o mwĩao wa Mũnasali ũla ũnũkwĩvĩta, na wa nthembo yake kwondũ wa Yeova ũndũ wa kwĩvathan’ya kwake, o vamwe na syĩndũ ila ũtonya kwosa: kwĩanana na wĩvĩto wake ũndũ wĩvĩtĩte, mũvaka eke ũu aiatĩĩa mwĩao wa kwĩvathan’ya kwake.

22Na Yeova aneena na Mose, akĩmwĩa,

23Neena na Aluni na ana make, ũkĩmea, Ũũ nĩw’o mũkaathima ana ma Isilaeli: mũkamee atĩĩ,

24Yeova nakũathime, na ukũsũvĩa:

25Yeova nakũtisĩasye ũthyũ wake, na ũkwĩka nesa:

26Yeova akũkĩlĩlye ũthyũ wake, na ũkũnenga mũuo.

27Ũu nĩw’o makaia syĩtwa yakwa ananĩ ma Isilaeli; nakwa ngamaathima.

← Chapter 5 Jump to: Chapter 7 →