Numbers 5

Kamba (Mbivilia) 1956

← Chapter 4 Jump to: Chapter 6 →

1Na Yeova aneena na Mose, akĩmwĩa,

2Meaĩe ana ma Isilaeli, mavete mwakonĩ wa maeema kĩla mũndũ ũwaĩte mangũ, na kĩla mũndũ ũwaĩte mũluo, na o ũla ũvukĩtwe nĩ kimba:

3aũme o na aka mũkamaumaalye, na mũkamaie ũtee wa mwako wa maeema; matikavukye mwako wa maeema woo, ũla nĩkalaa nthĩnĩ waw’o.

4Na ana ma Isilaeli mekaa ũu, na mamaumaalasya ũtee wa mwako wa maeema; o tondũ Yeova wamũtavisye Mose, nĩw’o ana ma Isilaeli mekaa.

5Na Yeova aneena na Mose, akĩmwĩa,

6Matavye ana ma Isilaeli atĩĩ, Yĩla mũndũ mũũme kana mũndũ mũka meĩka naĩ o na yĩva yĩkawa nĩ andũ, na kũmũvĩtanĩsya Yeova, na mũndũ ũsu akethĩwa e mũvĩtan’ya;

7nĩvo ĩndĩ wĩumbũlaa naĩ yake ĩla wĩkĩte: na akaĩva vyũ kwondũ wa ũvĩtan’yo wake, na kwongeleela kĩlungu kya katano na kũmũnenga ũla wamũvĩtanĩsye.

8Ĩndĩ ethĩwa mũndũ ũsu nde na mũndũ wa mũvĩa wake ũla ũtonya kũĩvĩwa ũvĩtan’yo ũsu, kĩla kĩkũĩvĩwa ĩvĩtyo yake kwa Yeova kĩkeethĩwa kya mũthembi; eka ndũũme ya wĩw’anĩthyo, ĩla wĩw’anĩthw’a kwondũ wayo.

9Na kĩla nthembo ya kũkĩlw’a ya syĩndũ syonthe ntheu sya ana ma Isilaeli, ĩla memũtwaĩa mũthembi, ĩkeethĩwa yake.

10Na syĩndũ ivathĩtwe nĩ mũndũ syĩthĩwe ntheu ikeethĩwa sya mũthembi: o kĩla mũndũ o na wĩva ũnengae mũthembi kĩkeethĩwa kyake.

11Na Yeova aneena na Mose, akĩmwĩa,

12Neena na ana ma Isilaeli, ũmatavye, Ethĩwa mũka wa mũndũ o na wiva nũnũũtambũka na kũmũvĩtanĩsya mũũme,

13na mũndũ akĩkoma nake na kũlaalaa, na ũndũ ũsu ũivĩthwa mũũme ndakone, na kũvithwa ki, nake nĩwĩvukitye, na vati ngũsĩ yĩsĩ, na ndaaoneka akĩka ũu,

14na mũũme aikwatwa nĩ nzika ngoonĩ yake, na kwĩw’a nzika ũndũ wa mũka wake, nake nĩwĩvukĩtye: kana ethĩwa akakwatwa nĩ nzika ngoonĩ, na kwĩw’a nzika ũndũ wa mũka, nake ndevukitye:

15nĩvo ĩndĩ ũla mũndũ wĩtwaa mũka wake vala ve mũthembi, na aitwaa nthembo ũndũ wake, kĩlungu kya ĩkũmi kya eva ya mũtu wa mbaale; ndakekĩe mauta ĩũlũ waw’o, kana kwĩkĩa ũvumba ĩũlũ waw’o; nũndũ nĩ nthembo ya mũtu kwondũ wa nzika, nthembo ya mũtu ya ũlilikan’yo, ya kũlilikan’ya ũthũku.

16Na mũthembi akamũthengeesye na kũmwĩkalya mbee wa Yeova:

17na mũthembi akekĩe manzĩ matheu ĩsaaninĩ ya yũmba; na akyosa kĩtoo kĩla kĩ vo nthĩ wĩkalonĩ, na kũkĩkĩa manzĩnĩ.

18Na mũthembi akamwĩkalye ũla mũndũ mũka mbee wa Yeova, na kwithalĩkya nzw’ĩĩ sya mũtwe wa mũndũ mũka, na kwĩkĩa nthembo ya mũtu ya ũlilikan’yo mokonĩ make, nayo nĩ nthembo ya mũtu kwondũ wa nzika: na mũthembi akethĩwe na manzĩ asu me ũũ kw’okonĩ kwake ala maetae kĩumo.

19Na mũthembi akamũavĩthye, na kwĩa ũla mũndũ mũka, Ethĩwa mũndũ mũũme ndaakoma naku, na ethĩwa ndwaalika wathavunĩ, wĩ mwĩaonĩ wa mũemeu, manzĩ aa me ũũ ala maetae kĩumo maikakũkwate.

20Ĩndĩ ethĩwa nũlikĩte wathavunĩ, wĩ mwĩaonĩ wa mũemeu, na ethĩwa nĩwĩvukĩtye, na mũndũ nũkomete naku ũte mũemeu:

21nĩvo ĩndĩ mũthembi wĩmũavĩthya ũla mũndũ mũka na wĩvĩto wa kwĩvĩta, na mũthembi akee mũndũ mũka ũsu, Yeova akũtw’ĩkĩthye kĩumo na wĩvĩto andũnĩ maku, yĩla Yeova ũkakwonzethya ĩtako yaku, na kwimbĩthya ĩvu yaku;

22na manzĩ aa ala maetae kĩumo makalika nda yaku, na kwimbĩthya ĩvu yaku, na kwonzethya ĩtako yaku. Na mũndũ mũka ũsu akasye, Ameni, Ameni.

23Na mũthembi akaandĩke iumo isu ĩvukunĩ, na akaithambĩsya nthĩnĩ wa ala manzĩ me ũũ:

24na akamũkundye ũla mũndũ mũka manzĩ asu me ũũ ala maetae kĩumo; na manzĩ ala maetae kĩumo makalika nthĩnĩ wake nao makeethĩwa me ũũ.

25Mũthembi akaumye ĩla nthembo ya mũtu kwondũ wa nzika kw’okonĩ kwa mũndũ mũka, na akavyũlangya nthembo ya mũtu mbee wa Yeova, na kũmĩtwaa kĩthembeoni:

26na mũthembi akaute ũvĩ wa nthembo ya mũtu, wĩthĩwe ũlilikan’yo wayo, na kũvĩvĩsya kĩthembeonĩ, na ĩtina akamũkundye ũ mũndũ mũka manzĩ asu.

27Na amina kũmũkundya ala manzĩ, nĩvo ĩndĩ kwĩthĩwa, ethĩwa nĩwĩvukĩtye, na kũmũvĩtanĩsya mũũme, manzĩ ala maetae kĩumo makalika nthĩnĩ wake na makeethĩwa me ũũ, na ĩvu yake yĩkaimba, na ĩtako yake yĩkonza: na ũ mũndũ mũka akeethĩwa e kĩumo andũnĩ make.

28Na ethĩwa mũndũ mũka ndevukĩtye, ĩndĩ nĩ mũtheu; nĩvo ĩndĩ wĩthĩwa ate na ũndũ, nake akaitava.

29Ũsu nĩw’o mwĩao wa nzika, yĩla mũndũ mũka, e mwĩaonĩ wa mũũme, wĩlika wathavunĩ na kwĩvukya;

30kana yĩla nzika syĩmũkwata mũndũ mũũme ngoonĩ, na ailikwa nĩ nzika ũndũ wa mũka; nĩvo ĩndĩ wĩmwĩkalya mũka mbee wa Yeova, na mũthembi akamwĩka maũndũ onthe ma mwĩao ũsu.

31Na mũndũ mũũme ũsu akeethĩwa ate na ũthũku, na mũndũ mũka ũsu akakua ũthũku wake.

← Chapter 4 Jump to: Chapter 6 →