Numbers 34

Kamba (Mbivilia) 1956

← Chapter 33 Jump to: Chapter 35 →

1Na Yeova aneena na Mose, akĩmwĩa,

2Ĩaĩe ana ma Isilaeli, noimea, Yĩla mũkalika nthĩ ya Kanaani (nĩyo nthĩ ĩla ĩkethĩwa yenyu ya ũtiĩwa, o nthĩ ya Kanaani kwĩanana na mĩvaka yayo),

3nĩvo ĩndĩ kĩlungu kyenyu kya ngalĩ ya ĩtheo kĩkethĩwa kuma weũ wa Nzini kũvĩtĩla ũtee wa Etomu, na mũvaka wenyu wa ngalĩ ya ĩtheo ũkeethĩwa kuma mũminĩo wa Ũkanga wa Mũnyũ kwelekela ngalĩ ya wumĩlonĩ wa syũa;

4na mũvaka wenyu ũkasyoka kwelekela ngalĩ ya ĩtheo kyambatonĩ kya Akilavimu, na kũvĩta kũvika Nzini; na umĩlĩlo waw’o ũkeethĩwa ngalĩ ya ĩtheo ya Katesi‐mbalinea; noivĩta kũvika Asali‐atali, na kũvĩta kũvika Asimoni;

5na mũvaka ũkasyoka kuma Asimoni kũvika kalũsĩ ka Misili, na ũmĩlĩlo waw’o ũkeethĩwa ũkanganĩ.

6Na mũvaka wenyu wa ngalĩ ya ũthũĩlonĩ wa syũa ũkeethĩwa nĩ ũkanga mũnene o ngũkanĩ yaw’o: ũsu ũkeethĩwa mũvaka wenyu wa ũthũĩlonĩ wa syũa.

7Na mũvaka wenyu wa ngalĩ ya ĩũlũ nĩ ũũ: kuma ũkanga mũnene mũkeekĩa mũvaka kũvika kĩĩma kya Olu;

8kuma kĩĩmanĩ kya Olu mũkeekĩa mũvaka kũvika ũlikĩlonĩ wa Amathi; na ũmĩlĩlo wa mũvaka ũkeethĩwa Nzetati;

9na mũvaka ũkavĩta na kũthi Nzĩviloni, na ũmĩlĩlo waw’o ũkeethĩwa Asali‐enani: ũu nĩw’o ũkethĩwa mũvaka wenyu wa ngalĩ ya ĩũlũ.

10Na mũkeekĩa mũvaka wenyu wa ngalĩ ya wũmĩlonĩ wa syũa kuma Asali‐enani kũvika Seviamu;

11na mũvaka ũkatheea kuma Seviamu kũvika Livila, ngalĩ ya wumĩlonĩ wa syũa ya Aini; na mũvaka ũkatheea, na kũvika ũtee wa ũkanga wa Kinelethi kwelekela ngalĩ ya wũmĩlonĩ wa syũa;

12na mũvaka ũkatheelela Yolotani, na umĩlĩlo waw’o ũkeethĩwa Ũkanganĩ wa Mũnyũ. Ĩsu ĩkeethĩwa nthĩ yenyu kwĩanana na mĩvaka yayo ngalĩ syonthe.

13Na Mose ameaĩa ana ma Isilaeli, akĩmea, Ĩno nĩyo nthĩ ĩla mũkatiĩwa kwondũ wa kũlimana, ĩla Yeova weaie ĩnengwe ila mbaĩ kenda, na nyunzu ya mbaĩ:

14nũndũ mbaĩ ya ana ma Leuveni kwĩanana na nyũmba sya aaĩthe moo, na mbaĩ ya ana ma Ngati kwĩanana na nyũmba sya aaĩthe moo, nĩsyosete, na ĩla nyunzu ya mbaĩ ya Manase nĩyosete, utiĩwa wasyo:

15mbaĩ isu syelĩ na ĩ nyunzu ya mbaĩ nĩsyosete ũtiĩwa wasyo mũingo wa Yolotani ku Yeliko ngalĩ ya wumĩlonĩ wa syũa, kwelekela vala syũa yumĩlaa.

16Na Yeova aneena na Mose, akĩmwĩa,

17Aa nĩo masyĩtwa ma andũ ala makamũaan’ya nthĩ yĩthĩwe ũtiĩwa wenyu: mũthembi Eleasali, na Yosua mwana wa Nuni.

18Na mũkose mũnene ũmwe wa kĩla mbaĩ, maaan’ye nthĩ ĩsu yĩthĩwe ũtiĩwa.

19Na aa nĩmo masyĩtwa ma andũ asu: Wa mbaĩ ya Yuta, Kalevu mwana wa Yevune.

20Na wa mbaĩ ya ana ma Simeoni, Semueli mwana wa Amiuti.

21Na wa mbaĩ ya Mbenyamini, Elitati mwana wa Kisiloni.

22Na wa mbaĩ ya ana ma Ndani, mũnene Mbuki mwana wa Yokili.

23Na wa ana ma Yosevu: wa mbaĩ ya ana ma Manase, mũnene Anieli mwana wa Evoti.

24Na wa mbaĩ ya ana ma Evalaimu, mũnene Kemueli mwana wa Sivitani.

25Na wa mbaĩ ya ana ma Nzevuloni, mũnene Elisavani mwana wa Valanaki.

26Na wa mbaĩ ya ana ma Isakali, mũnene Valitieli mwana wa Asiani.

27Na wa mbaĩ ya ana ma Aseli, mũnene Aiuti mwana wa Selomi.

28Na wa mbaĩ ya ana ma Navitali, mũnene Vetaeli mwana wa Amiuti.

29Asu nĩmo ala Yeova weaie mamaaan’ye ana ma Isilaeli ũtiĩwa nthĩ ya Kanaani.

← Chapter 33 Jump to: Chapter 35 →