Numbers 18

Kamba (Mbivilia) 1956

← Chapter 17 Jump to: Chapter 19 →

1Na Yeova amwĩa Aluni, We na ana maku na nyũmba ya aaĩthe maku vamwe naku mũkakua ũthũku wa vala vandũ vatheu; na we na ana maku vamwe naku mũkakua ũthũku wa ũthembi wenyu.

2Na ana‐a‐ĩthe maku nao, mbaĩ ya Livai, mbaĩ ya ĩthe waku, mathengeesye methĩwe vakuvĩ naku, makwatanw’e vamwe naku, na ũkũthũkũmaa: ĩndĩ we na ana maku vamwe naku mũkeethĩawa vu mbee wa ĩeema ya ũkũsĩ.

3Namo makasũvĩaa wĩaĩo waku, na wĩaĩo wa Ĩeema yonthe: no matikathengeee mĩio ya vala vandũ vatheu o na kĩthembeo, matikakw’e, mo, o nenyu.

4Na makakwatanw’a naku, na kũsũvĩaa wĩaĩo wa ĩeema ya kũmbanĩa, kwondũ wa ũthũkũmi w’onthe wa Ĩeema: na mũeni ndakamũthengeee inyw’ĩ.

5Na mũkasũvĩaa wĩaĩo wa vala vandũ vatheu, na wĩaĩo wa kĩthembeo; kũikethĩwe ĩngĩ ũthilĩku ĩũlũ wa ana ma Isilaeli

6Na nyie, sisya, nĩnoosie ana‐a‐ĩthe menyu Alivai kũmaumya nthĩnĩ wa ana ma Isilaeli: kwenyu andũ asu nĩ mũthĩnzĩo wanengĩwe Yeova, mathũkũmae wĩa wa ĩeema ya kũmbanĩa.

7Na we na ana maku vamwe naku makasũvĩaa ũthembi wenyu kwondũ wa kĩla ũndũnĩ wa kĩthembeo, na kwondũ wa kĩla kĩ nthĩnĩ wa tũtũ; na mũkathũkũmaa: nĩngũmũnenga ũthembi wĩthĩwe ũthũkũmi wa mũthĩnzĩo; na mũeni ũla wĩthengeea mũvaka oawe.

8Na Yeova amwĩa Aluni, Nyie, sisya, nĩkũnengete wĩaĩo wa kũsũvĩaa nthembo syakwa sya kũkĩlw’a, o syĩndũ syonthe ivathĩtwe sya ana ma Isilaeli; nĩkũnengete we na ana maku kwondũ wa kwĩtĩkĩw’a mauta, mwĩao wa tene na tene.

9Syĩndũ ii nĩsyo ikeethĩwa syaku nthĩnĩ wa syĩndũ ntheu mũno mbee, ila itialĩtw’e itavĩvĩtw’e na mwaki: kĩla kĩthembeawa nĩo, o kĩla nthembo yoo ya mũtu, na kĩla nthembo yoo kwondũ wa naĩ, na kĩla nthembo yoo kwondũ wa ĩvĩtyo, ila makanthembea, ikeethĩwa syĩ ntheu mũno kwondũ waku we na kwondũ wa ana maku.

10Ũkaya syĩndũ ntheu mũno mbee; kĩla mũndũ mũũme akaiya: ikeethĩwa syĩ ntheu kwaku.

11Na kĩĩ nĩ kyaku: nthembo ya kũkĩlw’a ya mũthĩnzĩo woo, o nthembo syonthe sya kũvyũlw’a sya ana ma Isilaeli; ii nĩnĩkũnengete we, na ana maku na eĩtu maku vamwe naku, kĩlungu kya tene na tene; kĩla mũndũ mũtheu nyũmbanĩ yaku akaiya.

12Mauta onthe ala maseo mbee, na ngetha yonthe ya nzavivũ ĩla nzeo mbee, na ya lĩu wa mbaa ngetha, ũsyao wa mbee wa syĩndũ ila mamũnengae Yeova, isu nĩkũnengete we.

13Mosyao ma mbee meũ ma kĩla kĩndũ kĩ nthĩ yoo, ala mamũeteae Yeova, makeethĩwa me maku; kĩla mũndũ mũtheu nyũmbanĩ yaku, akamaya.

14Kĩla kĩndũ kĩvathĩtwe kĩthĩwe kĩtheu nthĩnĩ wa Isilaeli kĩkeethĩwa kyaku.

15Kyonthe kĩla kyambaa kuma ĩvunĩ ya nyinyia kya mĩĩ yonthe, kĩla memũnenga Yeova, mũndũ o na nyamũ kĩkeethĩwa kyaku: ĩndĩ ĩkithathi ya mũndũ mũvaka wovosye, na ĩkithathi ya nyamũ ĩte ntheu ũkayovosye.

16Na ala ma kwovow’a katĩ woo ala mavikĩtye mwei ũmwe na mbee ũkovosye, kwĩanana na ũndũ wĩmatalĩla wovosyo, na mbesa sya sekeli itano, kwĩanana na sekeli ya vala vandũ vatheu (nayo nĩ ngela mĩongo ĩlĩ).

17Ĩndĩ ĩkithathi ya ng’ombe, kana ya ĩlondu, kana ya mbũi, ndũkovosye; nĩ ĩtheu: ũkaminzangĩsye nthakame yayo kĩthembeonĩ na kũvĩvya mathunya mayo methĩwe nthembo ĩvĩvaw’a na mwaki, yĩ mũuke mũseo kwa Yeova.

18Na nyama syayo ikeethĩwa syaku, o ta kĩng’eng’eto kya kũvyũlw’a, na ta kũũ kwa ngalĩ ya kw’oko kwa aũme, ikeethĩwa syaku.

19Nthembo syonthe sya kũkĩlw’a sya syĩndũ ntheu, ila ana ma Isilaeli mamũthembeaa Yeova, nĩngũnengete, na ana maku na eĩtu maku vamwe naku, kĩlungu kya tene na tene: nĩ ũtianĩo wa mũnyũ wa tene na tene vala ve Yeova kwondũ waku na kwondũ wa ũsyao waku vamwe naku.

20Na Yeova amwĩa Aluni, Ndũkethĩwa na ũtiĩwa nthĩ yoo, o na ndũkethĩwa na kĩanda o na kĩva katĩ woo: ninyie kĩanda kyaku na ũtiĩwa waku katĩ wa ana ma Isilaeli.

21Na, sisya, nao ana ma Livai nĩnĩmanengete kĩlungu kya ĩkũmi kyonthe kya Isilaeli kĩthĩwe ũtiĩwa woo, ũndũ wa ũthũkũmi woo ũla mathũkũmaa, naw’o nĩ ũthũkũmi wa ĩeema ya kũmbanĩa.

22Na kuma yu ana ma Isilaeli matikathengeee ĩeema ya kũmbanĩa, maikevĩtĩthye, na kũkw’a.

23Ĩndĩ Alivai makathũkũmaa wĩa wa ĩeema ya kũmbanĩa, na makakua naĩ syoo ene: ũu ũkeethĩwa mwamũlo wa tene na tene mosyaanĩonĩ maku onthe; na katĩ wa ana ma Isilaeli matikethĩwa na ũtiĩwa.

24Nũndũ kĩlungu kya ĩkũmi kya ana ma Isilaeli, kĩla manenganae kĩthĩwe nthembo ya kũkĩlĩlw’a Yeova, nĩnĩmanengete Alivai kĩthĩwe ũtiĩwa woo: kwondũ wa ũu nĩmatavĩtye, Katĩ wa ana ma Isilaeli matikethĩwa na ũtiĩwa o na wĩva.

25Na Yeova aneena na Mose, akĩmwĩa,

26Na ĩngĩ ũkaneene na Alivai, na kũmea, Yĩla inyw’ĩ mũkosa kwa ana ma Isilaeli kĩlungu kya ĩkũmi kĩla nĩmũnengete kuma kwoo kĩthĩwe ũtiĩwa wenyu, nĩvo ĩndĩ mũkathemba nthembo ya kũkĩlw’a yakyo yĩthĩwe ya Yeova, kĩlungu kya ĩkũmi kya kĩlungu kyu kya ikũmi.

27Na nthembo yenyu ya kũkilw’a ĩkatalwa kwenyu ta yĩthĩwa nĩyo lĩu wa mbaa ngetha wa kĩvũĩonĩ, na ta kusũa kwa mbinyu kĩangĩonĩ kya nzavivũ.

28Ũu nĩw’o mũkamũthembea Yeova nthembo ya kũlĩlw’a ya ilungu syenyu syonthe sya ĩkũmi, ila mwosaa kuma kwa ana ma Isilaeli; na nthĩnĩ wasyo mũkamũnenge mũthembi Aluni nthembo ya kũkĩlĩlw’a Yeova.

29Kuma mĩthĩnzĩonĩ yenyu yonthe mũkanengane kĩla nthembo ya kũkĩlĩlw’a Yeova, kya kĩla kiseo kyonthe kyayo, o kĩlungu kĩvathitwe kĩthĩwe kĩtheu kyayo.

30Kwondũ wa ũu ũkamea, Yĩla mũkokĩlya kyu kĩseo mbee kyayo, nĩvo ĩndĩ kĩkatalĩlwa kwa Alivai ta wingĩvo wa kĩvũio, na ta wingĩvo wa kĩangĩo kya nzavivũ.

31Na mũkamĩya kĩla vandũ, inyw’ĩ na andũ ma nyũmba syenyu: nũndũ nĩ ĩtuvi yenyu ũndũ wa ũthũkũmi wenyu ĩeemanĩ ya kũmbanĩa.

32Na mũtikakua naĩ kwondũ wayo, yĩla mwamina kũkĩlya kĩla kĩseo mbee kyayo; na mũtikavukye syĩndũ ntheu sya ana ma Isilaeli, mũtikakw’e.

← Chapter 17 Jump to: Chapter 19 →