Numbers 28

Kamba (Mbivilia) 1956

← Chapter 27 Jump to: Chapter 29 →

1Na Yeova aneena na Mose, akĩmwĩa,

2Ĩaĩe ana ma Isilaeli, ũmatavye, Nthembo yakwa, lĩu wakwa wa nthembo syakwa ila ivĩvaw’a na mwaki, ila syĩ mũuke mũseo kwakwa, mũkasũvĩe kũnthembea ĩvinda yĩla yasyo.

3Na ũkamea, Ĩno nĩyo nthembo ĩvĩvaw’a na mwaki ĩla mũkamũthembeaa Yeova: tutũlũme twa mwaka ũmwe tũte kĩema, twilĩ kĩla mũthenya, twĩthĩwe nthembo ya kũvĩvw’a ĩtatw’ĩkanaa.

4Katũlũme kamwe ũkathembe kĩoko, na katũlũme kangĩ ũkathembe wĩoo;

5vamwe na kĩlungu kya ĩkũmi kya eva ya mũtu mũvinyu wĩthĩwe nthembo ya mũtu, ũvulanĩtw’e na kĩlungu kya kana kya ini ya mauta makime.

6Nĩ nthembo ya kũvĩvw’a ĩtatw’ĩkanaa, ĩla yatw’ĩĩwe kĩĩmanĩ kya Sinai yĩthĩwe yĩ mũuke mũseo, nthembo ĩla ĩvĩvĩaw’a Yeova na mwaki.

7Na nthembo ya kũnyuwa ya kũthembanĩsya nayo ĩkeethĩwa kĩlungu kya kana kya ini kwondũ wa katũlũme kamwe: nthĩnĩ wa vala vandũ vatheu ũkamwĩtĩe Yeova nthembo ya kũnyuwa ya mbinyu mbĩu.

8Na katũlũme kala kangĩ ũkathembe wĩoo: o tondũ nthembo ya mũtu ya kĩoko, na nthembo ya kũnyuwa ya kũthembanĩsya nayo syathembiwe, ũkakathembe o ta ũu, nthembo ĩvĩvaw’a na mwaki, yĩ mũuke mũseo kwa Yeova.

9Na mũthenya wa savato ũkathembe tũtũlũme twĩlĩ twa mwaka ũmwe tũte kĩema, vamwe na ilungu ilĩ sya eva ya mũtu mũvinyu ũvulanĩtw’e na mauta, wĩthĩwe nthembo ya mũtu, na nthembo ya kũnyuwa ya kũthembanĩsya nayo:

10ĩsu nĩyo nthembo ya kũvĩvw’a ya kĩla savato, o vamwe na nthembo ya kũvĩvw’a ĩtatw’ĩkanaa, na nthembo ya kũnyuwa ya kũthembanĩsya nayo.

11Na myambĩlĩlyo ya myei yenyu mũkathembee Yeova nthembo ya kũvĩvw’a: tũsalũ twĩlĩ, na ndũũme ĩmwe, na tũtũlũme mũonza twa mwaka ũmwe tũte kĩema;

12na ilungu itatũ sya ĩkũmi sya eva ya mũtu mũvinyu ũvulanĩtw’e na mauta, wĩthĩwe nthembo ya mũtu kwondũ wa kĩla kasalũ; na ilungu ilĩ sya mũtu mũvinyu ũvulanĩtw’e na mauta, wĩthĩwe nthembo ya mũtu kwondũ wa ĩla ndũũme;

13na kĩlungu kya ĩkũmi kya mũtu mũvinyu ũvulanĩtw’e na mauta, wĩthĩwe nthembo ya mũtu kwondũ wa kĩla katũlũme; syĩthĩwe nthembo ya kũvĩvw’a yĩ mũuke mũseo, nthembo ĩvĩvĩaw’a Yeova na mwaki.

14Na nthembo sya kũnyuwa sya kũthembanĩsya nasyo ikeethĩwa nyunzu ya ini ya mbinyu kwondũ wa kĩla kasalũ, na kĩlungu kya katatũ kya ini kwondũ wa ĩla ndũũme, na kĩlungu kya kana kya ini kwondũ wa kĩla katũlũme: ĩsu nĩyo nthembo ya kũvĩvw’a ya kĩla mwei, myei yonthe ya mwaka.

15Na nthenge ĩmwe ĩkathembewe. Yeova yĩthĩwe nthembo kwondũ wa naĩ; nayo ĩkathembwa vamwe na nthembo ya kũvĩvw’a ĩtatw’ĩkanaa, na nthembo ya kũnyuwa ya kũthembanĩsya nayo.

16Na mwei wa mbee, mũthenya wa ĩkũmi na ĩna wa mwei, nĩ vasaka wa Yeova.

17Na mũthenya wa ĩkũmi na ĩtano wa mwei ũsu ũkeethĩwa wa mboka: kĩmũtũ kĩte ĩlawa kĩkaĩwe mĩthenya mũonza.

18Mũthenya wa mbee kũkeethĩwa ũmbano mũtheu: mũikatethye wĩa o na wĩva w’onthe;

19ĩndĩ mũkathembe nthembo ĩvĩvaw’a na mwaki, nthembo ya kũvĩvĩw’a Yeova: tũsalũ twĩlĩ, na ndũũme ĩmwe, na tũtũlũme mũonza twa mwaka ũmwe; ikethĩwe ite kĩema kwenyu;

20na nthembo ya mũtu ya kũthembanĩsya nasyo, mũtu mũvinyu ũvulanĩtw’e na mauta: ilungu itatũ sya ĩkũmi mũkathembe kwondũ wa kĩla kasalũ, na ilungu ĩli sya ĩkũmi kwondũ wa ĩla ndũũme;

21kĩlungu kya ĩkũmi ũkathembe kwondũ wa kĩla katũlũme ka tũla tũtũlũme mũonza;

22na nthenge ĩmwe yĩthĩwe nthembo kwondũ wa naĩ, ya kwĩw’anĩthw’a kwenyu.

23Mũkathembe isu o vamwe na nthembo ya kũvĩvw’a ya kĩoko, nayo nĩ nthembo ya kũvĩvw’a ĩtatw’ĩkanaa.

24Ũu nĩw’o mwĩthemba kĩla mũthenya, ĩvinda ya mĩthenya mũonza, lĩu wa nthembo ĩvĩvaw’a na mwaki, yĩ mũuke mũseo kwa Yeova: ĩkathembwa vamwe na nthembo ya kũvĩvw’a ĩtatw’ikanaa, na nthembo ya kũnyuwa ya kũthembanĩsya nayo.

25Na mũthenya wa mũonza mũkeethĩwa na ũmbano mũtheu; mũtikatethye wĩa o na wĩva w’onthe.

26Na ĩngĩ mũthenya wa mosyao ma mbee, yĩla mwĩmũthembea Yeova nthembo ya mũtu mweũ mbokanĩ yenyu ya syumwa, mũkeethĩwa na ũmbano mũtheu; mũtikatethye wĩa o na wĩva w’onthe;

27ĩndĩ mũkathembe nthembo ya kũvĩvw’a yĩthĩwe yĩ mũuke mũseo kwa Yeova: tũsalũ twĩlĩ, na ndũũme ĩmwe, na tũtũlũme mũonza twa mwaka ũmwe;

28na nthembo ya mũtu ya kũthembanĩsya nasyo, mũtu mũvinyu ũvulanĩtw’e na mauta, ilungu itatũ sya ĩkũmi kwondũ wa kĩla kasalũ, na ilungu ilĩ sya ĩkũmi kwondũ wa ĩla ndũũme ĩmwe,

29na kĩlungu kya ĩkũmi kwondũ wa kĩla katũlũme ka tũla tũtũlũme mũonza;

30na nthenge ĩmwe yĩthĩwe nthembo ya kwĩw’anĩthw’a kwenyu.

31O vamwe na nthembo ya kũvĩvw’a ĩtatw’ĩkanaa, na nthembo ya mũtu ya kũthembanĩsya nayo, mũkaithembe na nthembo sya kũnyuwa sya kũthembanĩsya nasyo (ikethĩwe ite kĩema kwenyu).

← Chapter 27 Jump to: Chapter 29 →