Numbers 31

Kamba (Mbivilia) 1956

← Chapter 30 Jump to: Chapter 32 →

1Na Yeova aneena na Mose, akĩmwĩa,

2Ĩvanĩsya ana ma Isilaeli kwa Amitiani: ĩtina ũkoombanw’a vamwe na andũ maku.

3Na Mose aneena na andũ, akĩmea, Mekĩei andũ ala mwĩumya katĩ wenyu mĩio ya kaũ, nĩ kana mathi kũkita na Amitiani, meanĩsye ũĩvanĩsyo wa Yeova ĩũlũ wa Mitiani.

4Mũkatwae kaũnĩ andũ ngili ya kĩla mbaĩ, nthĩnĩ wa mbaĩ syonthe sya Isilaeli.

5Kwondũ wa ũu nĩkwaumw’a nthĩnĩ wa ngili sya Isilaeli, ngili ĩmwe ya kĩla mbaĩ, andũ ngili ĩkũmi na ilĩ ila syĩkĩĩtwe mĩio ya kaũ.

6Na Mose amatũma, ngili ĩmwe ya kĩla mbaĩ, mo na Vineasi mwana wa mũthembi Eleasali, maende kaũnĩ, e na mĩio ya vala vandũ vatheu na masoo me wasya wa kũtĩsya kw’okonĩ kwake.

7Na mokita na Mitiani, o tondũ Yeova wamwĩaĩe Mose; na mooaa aũme onthe.

8Na mooaa asumbi ma Mitiani vamwe na ala angĩ oae: nao nĩ Evi, na Lekemu, na Nzuli, na Uulu, na Leva, asumbĩ atano ma Mitiani: o na Mbalaamu mwana wa Mbeoli mamũaa na ũvyũ.

9Na ana ma Isilaeli matava aka ma Mitiani na syana syoo nini; na ng’ombe syoo syonthe, na ndĩthya syoo syonthe sya mbũi na malondu, na syĩndũ syoo syonthe, matava mũtavo.

10Na ndũa syoo syonthe kũndũ kũla matũaa, na myako yoo yonthe ya maeema, mavĩvya na mwaki.

11Nao mamakũũta syĩndũ syonthe, na matava mũtavo, wa mũndũ na wa nyamũ.

12Na maete andũ ala atave, na syĩndũ ila makũũtanĩte, na syĩndũ ila matavĩte, vala ve Mose, na vala ve mũthembi Eleasali, na vala ve ũmbano wa ana ma Isilaeli, mwakonĩ wa maeema ndiĩnĩ sya Moavi ila syĩ vakuvĩ na Yolotani ku Yeliko.

13Na Mose, na mũthembi Eleasali, na anene onthe ma ũmbano, maumaala mamathaũe ũtee wa mwako wa maeema.

14Na Mose amathilĩkĩa anene ma ĩla nguthu, o makavuteni ma ngili ngili na makavuteni ma maana, ala maumie wĩanĩ wa kaũ.

15Na Mose amakũlya, Nĩmwavonokisye aka onthe, mũkĩmaeka me thayũ?

16Sisyai, asu nĩo mavĩtĩthisye ana ma Isilaeli, nũndũ wa ũtao wa Mbalaamu, mamũvĩtanĩsye Yeova ũvoonĩ wa Veoli, na kwondũ wa ũu mũimũ waĩ ũmbanonĩ wa Yeova.

17Yu ĩndĩno ũaai kĩla kana ka kavĩsĩ, na ũaai kĩla mũndũ mũka ũla wamanyie mũndũ mũũme ũndũ wa ũkoma nake.

18Ĩndĩ twana tw’onthe twa twĩlĩtu, tũla tũtaamanya mũndũ mũũme ũndũ wa ũkoma nake, tũekei twĩ thayũ twĩthĩwe twenyu.

19Na ĩkalai ũtee wa mwako wa maeema mĩthenya mũonza: o ũla ũaĩte mũndũ o na wĩva, na o ũla ũkiitĩte mũndũ o na wĩva ũla ũaĩtwe, ĩthesyei mũthenya wa katatũ na mũthenya wa mũonza, inyw’ĩ na ala mũtavĩte.

20Na ũndũ wa kĩla ngũa, na kyonthe kĩla kĩtumĩtwe kya mbũa, na kyonthe kĩla kĩtumĩtwe kya w’ĩa wa mbũi, na syĩndũ syonthe iseũvĩtw’e sya mĩtĩ, mũkaithesye inyw’ĩ.

21Na mũthembi Eleasali amea andũ ma kaũ ala maendie kũkita, Ũu nĩw’o mwamũlo wa mwĩao ũla Yeova wamwĩaĩte Mose:

22ĩndĩ thaavu, na vetha, na ũthuku, na kĩaa, na kĩaa kya ivava, na ĩvulũ,

23kĩla kĩndũ kĩtonya kũmĩĩsya mwaki, mũkakĩvĩtĩlye mwakinĩ, na kĩkeethĩwa kĩ kĩtheu; ĩndĩ kĩkathew’a nĩ manzĩ ala ma ũthesya ũvuku: na kyonthe kĩla kĩtatonya kũmĩĩsya mwaki mũkakĩvĩtĩlye manzĩnĩ.

24Na mũkathambye ngũa syenyu mũthenya wa mũonza, na mũkeethĩwa mwĩ atheu; na ĩtina mũkasyoka mwakonĩ wa maeema.

25Na Yeova aneena na Mose, akĩmwĩa,

26Tala ũtalo wa mũtavo ũla wataviwe, wa andũ na wa nyamũ, we, na mũthembi Eleasali, na atongoi ma nyũmba sya aaĩthe ma ũmbano;

27na aan’ya mũtavo ilungu ilĩ: katĩ wa andũ ala oĩ kaũnĩ ala maendie kũkita, na ũmbano w’onthe.

28Na mumĩsye Yeova mũvothi wa andũ ma kaũ ala maendie kũkita: thayũ ũmwe nthĩnĩ wa mathayũ maana atano, nthĩnĩ wa andũ, o na nthĩnĩ wa ng’ombe, na nthĩnĩ wa mang’oi, na nthĩnĩ wa ndĩthya sya mbũi na malondu:

29osa nthĩnĩ wa nyunzu yoo na mũnenge mũthembi Eleasali, wĩthĩwe nthembo ya kũkĩlĩlw’a Yeova.

30Na nthĩnĩ wa nyunzu ya ana ma Isilaeli, osa ũmwe nthĩnĩ wa kĩla mĩongo ĩtano, nthĩnĩ wa andũ, na nthĩnĩ wa ng’ombe, na nthĩnĩ wa mang’oi, na nthĩnĩ wa ndĩthya sya mbũi na malondu, o nthĩnĩ wa indo syonthe, na ũimanenga Alivai, ala masũvĩaa wĩaĩo wa wĩkalo wa Yeova.

31Na Mose na mũthembi Eleasali meeka o tondũ Yeova wamwĩaĩe Mose.

32Na ĩndĩ matialyo ala matialile, mũtavo wavetwa ũla wosiwe nĩ andũ ma kaũ, maĩ malondu ngili maana thanthatũ na mĩongo mũonza na atano,

33na ng’ombe ngili mĩongo mũonza na ilĩ,

34na mang’oi ngili mĩongo thanthatũ na ĩmwe,

35na aka ngili mĩongo ĩtatũ na ilĩ ala mataamanya mũndũ mũũme ũndũ wa ũkoma nake.

36Na nyunzu, ĩla yaĩ ya ala maendie kaũnĩ, ĩkĩtalwa yaĩ malondu ngili maana atatũ na mĩongo ĩtatũ na mũonza na maana atano:

37na mũvothi wa Yeova wa malondu waĩ maana thanthatũ na mĩongo mũonza na atano.

38Na ng’ombe syaĩ ngili mĩongo ĩtatũ na thanthatũ; na mũvothi wa Yeova wa isu waĩ mĩongo mũonza na ilĩ.

39Na mang’oi maĩ ngili mĩongo ĩtatũ na maana atano; na mũvothi wa Yeova wamo waĩ mĩongo thanthatũ na yĩmwe.

40Na andũ maĩ ngili ĩkũmi na thanthatũ; na mũvothi wa Yeova wa asu waĩ andũ mĩongo ĩtatũ na elĩ.

41Na Mose anenga mũthembi Eleasali ũla mũvothi, ũla waĩ nthembo ya kũkĩlĩlw’a Yeova, o tondũ Yeova wamwĩaĩe Mose.

42Na nthĩnĩ wa nyunzu ĩla yaĩ ya ana ma Isilaeli, ĩla Mose wavathanisye kumya andũnĩ ala maĩ kaũnĩ

43(na ĩndĩ nyunzu ĩla yaĩ ya ũmbano yaĩ malondu ngili maana atatũ na mĩongo ĩtatũ na mũonza na maana atano,

44na ng’ombe ngili mĩongo ĩtatũ na thanthatũ

45na mang’oi ngili mĩongo ĩtatũ na maana atano,

46na andũ ngili ĩkũmi na thanthatũ),

47o nthĩnĩ wa nyunzu ĩsu ĩla yaĩ ya ana ma Isilaeli, Mose oosa ũmwe nthĩnĩ wa kĩla mĩongo ĩtano, wa andũ na wa nyamũ, na amanenga Alivai ala masũvĩaa wĩaĩo wa wĩkalo wa Yeova, o tondũ Yeova wamwĩaĩe Mose.

48Na anene ma ngili sya ĩ nguthu, o makavuteni ma ngili ngili, na makavuteni ma maana, mamũthengeea Mose;

49na mamwĩa Mose, Ithyĩ athũkũmi maku, nĩtũtalĩte andũ ma kaũ ala me ĩtheo waitũ, na vati mũndũ o na ũmwe waitũ ũte vaa.

50Na nĩtwaete ũelo wa kũmũthembea Yeova, o syĩndũ ila kĩla mũndũ wonete, mĩio ya wanake ya thaavu, mĩnyoo ya maũũ, na itang’a, na ngome sya ũvana ũsiĩlo na ngome sya matũ, na mĩnyoo ya ngingo, syĩthĩwe sya kũtwĩw’anĩthya mathayũ maitũ na Yeova.

51Na Mose na mũthembi Eleasali moosa thaavu woo, o mĩio yonthe ya wanake ya thaavu ĩla ĩseũvĩtwe nesa

52Na thaavu w’onthe wa nthembo ya kũkĩlw’a ũla mamũthembee Yeova, ũla wa makavuteni ma ngili ngili na wa makavuteni ma maana, waĩ sekeli ngili ĩkũmi na thanthatũ na maana mũonza na mĩongo ĩtano.

53(Nũndũ andũ ma kaũ maĩ manoosa mũtavo, kĩla mũndũ wake mwene.)

54Na Mose na mũthembi Eleasali moosa thaavu wa makavuteni ma ngili ngili na ma maana, na mootwaa nthĩnĩ wa ĩeema ya kũmbanĩa, wĩthĩwe ũlilikan’yo kwondũ wa ana ma Isilaeli vu mbee wa Yeova.

← Chapter 30 Jump to: Chapter 32 →