Deuteronomy 3

Kamba (MBIVILIA ŨVOO MŨSEO)

← Chapter 2 Jump to: Chapter 4 →

1“Ĩtina wa ũu nĩtwavĩndũkie twathi ngalĩko ya ĩũlũ twelekele kĩsio kya Mbasani. Oku mũsumbĩ wa Mbasani nĩwookie e na asikalĩ make onthe kũkitĩa naitũ vakuvĩ na ndũa ya Etilei.

2Ĩndĩ Mwĩai Ngai nĩwambĩie atĩĩ, ‘Ndũkakĩe Mũsumbĩ Oku. Nĩngũũnenga ũtonyi wa kũmũsinda vamwe na asikalĩ make, na nthĩ yake yonthe. Mwĩke ũndũ weekanie na Sioni mũsumbĩ wa Aamoli, ũla wasumbĩkaa e Esivoni.’

3“Kwoou Mwĩai Ngai, Ngai waitũ nĩwatũnengie ũtonyi wa kũsinda Mũsumbĩ Oku na asikalĩ make onthe, naitũ twamoaa twalea kũtia o na ũmwe woo e thayũ.

4Ĩvindanĩ yĩu nĩtwakwatie ndũa syake syonthe; vai ĩmwe ya ndũa syake tũtaakwata. Ndũa syonthe ila twakwatie syaĩ mĩongo thanthatũ kĩsionĩ kya Alikovu, kĩla kyasumbĩkĩtwe nĩ Mũsumbĩ Oku ũla wasumbĩkaa e Mbasani.

5Ndũa isu syonthe syaĩ mbiĩĩe na ngũta ndũlu na ikekĩwa mĩvĩa na syũma sya kũvinga mĩvĩa ĩsu. O ta ũu vaĩ motũi angĩ maingĩ mataĩ maiĩĩe.

6Nĩtwaanangie ndũa syonthe na twooaa aũme onthe, aka, na syana o tondũ tweekie ndũanĩ ila syaĩ sya Mũsumbĩ Sioni wa Esivoni.

7Ĩndĩ nĩtwoosie indo na syĩndũ syonthe ila syaĩ ndũanĩ isu syatw'ĩka sitũ.

8“Kwoou ĩvindanĩ yĩu nĩtwoosie kuma kwa asumbĩ asu elĩ ma Aamoli kĩsio kya nthĩ kĩla kĩ ngalĩko ya wumĩlonĩ wa syũa ya Ũsĩ wa Yolotani. Kĩsio kĩu nĩ kuma Ũsĩnĩ wa Alinoni kũthi kũvika Kĩĩmanĩ kya Elimoni.

9(Kĩĩma kĩu kya Elimoni kĩtawa Silioni nĩ Asitoni, namo Aamoli makĩtaa Senili.)

10Nĩtwoosie ndũa syonthe ila syasumbĩkĩtwe nĩ Oku Mũsumbĩ wa Mbasani. Ndũa isu nĩ ila syaĩ ũiĩnĩ, kĩsionĩ kya nthĩ ya Ngileati na Mbasani, kũthi ngalĩko ya wumĩlonĩ wa syũa kũvika ndũanĩ sya Saleka na Etilei.”

11(Mũsumbĩ Oku nĩwe waĩ wa mũthya katĩ wa asumbĩ ma Alevai. Ĩsandũkũ yĩla weekĩiwe akw'a yaseũvĩtw'e na ĩvia, na yaĩ na ũasa wa mita inya na ũthanthau wa ta mita ilĩ, kwĩanana na kĩthimo kĩla kyatũmĩawa ĩvindanĩ yĩu. Ĩsandũkũ yĩu yĩtonya kwoneka ndũanĩ ya Aamimoni ĩla yĩtawa Lava.)

12“Yĩla twaminie kwosa nthĩ ĩsu nĩnanengie andũ ma mbaĩ ya Lũveni na ya Ngandi kĩsio kya nthĩ kĩla kĩ ngalĩko ya ĩũlũ ya ndũa ya Aloeli, vakuvĩ na Ũsĩ wa Alinoni, na nyusu ya kĩsio kya nthĩ yĩ iĩma ya Ngileati, vamwe na ndũa syayo.

13O ta ũu nĩnanengie nyusu ya mbaĩ ya Manase kĩsio kĩla kĩngĩ kya nthĩ ya Ngileati na nthĩ yonthe ya Mbasani, ĩla Oku wasumbĩkĩte, kĩla nĩkyo kyeetawa Alikovu.” Kĩsio kyonthe kya nthĩ ya Mbasani kyeetawa kwa ĩsyĩtwa yĩngĩ nthĩ ya Alevai.

14Yaili, ũmwe wa nzyawa ya Manase nĩwoosie kĩsio kyonthe kya nthĩ ya Alikovu kĩla nĩkyo Mbasani, kũthi kũvika mũvakanĩ wa nthĩ ya Angesuli na ya Amaaka. Nĩwanengie motũi ala maĩ kĩsionĩ kĩu ĩsyĩtwa yĩla we mwene weetawa, na kũvika ũmũnthĩ motũi asu metawa motũi ma Yaili.

15“Nĩnanengie nzyawa sya Makili mwana wa Manase nthĩ ya Ngileati.

16O ta ũu nĩnanengie andũ ma mbaĩ ya Lũveni na ya Ngandi kĩsio kĩla kyumĩte Ngileati kũthi kũvika Ũsĩnĩ wa Alinoni. Ũsĩ wa Alinoni katĩ nĩw'o waĩ mũvaka wa ngalĩko ya ĩtheo, naw'o mũvaka wa ngalĩko ya ĩũlũ waĩ Ũsĩ wa Yavoki, ũla nĩw'o mũvaka wa nthĩ ya Aamimoni.

17Mũvaka woo wa ngalĩko ya ũthũĩlonĩ wa syũa waĩ Ũsĩ wa Yolotani kuma Ĩia ya Kalilii ngalĩkonĩ ya ĩũlũ, na kũtheea kũvika Ũkanga Mũkw'ũ ngalĩko ya ĩtheo, na kũthi kũvika nguumo wa Kĩĩma kya Visika ngalĩko ya wumĩlonĩ wa syũa.

18“Ĩvindanĩ o yĩu nĩnamwĩaĩie namwĩa atĩĩ, ‘Mwĩai Ngai, Ngai wenyu nũmũnengete nthĩ ĩno yĩ ngalĩko ya wumĩlonĩ wa syũa yĩthĩwe ng'ũndũ yenyu. Yu asikalĩ menyu ngũmbaũ nĩmose mĩio yoo ya kaũ na maithi mũingo ũla ũngĩ wa Ũsĩ wa Yolotani, me mbee wa andũ ala angĩ ma Ĩsilaeli makamatetheesye kũkwata nthĩ yoo matũe vo.

19Ĩndĩ iveti syenyu, syana syenyu na indo syenyu, nũndũ nĩnĩsĩ mwĩ indo mbingĩ, nitonya kũtiwa ndũanĩ ila nĩmũnengete,

20nginya yĩla Mwĩai Ngai wĩnenga ana-a-ĩthe menyu mũuo o tondũ ũmũnengete, mamina kwosa nthĩ ĩla Mwĩai Ngai ũmanengete mũingo wa Ũsĩ wa Yolotani. Ĩtina wa ũu kĩla ũmwe wenyu nũtonya kũsyoka kĩsionĩ kyake kya ng'ũndũ kĩla nĩmũnengete.’

21“Nĩvo ĩndĩ ĩvindanĩ o yĩu neeaĩe Yosua namwĩa atĩĩ, ‘Nĩwonete maũndũ onthe ala Mwĩai Ngai, Ngai wenyu weekie ala asumbĩ elĩ Sioni na Oku. Ũu now'o Mwĩai Ngai wĩĩka andũ ma nthĩ ila mũũthi kũkita.

22Mũikamakĩe, nĩkwĩthĩwa Mwĩai Ngai, Ngai wenyu nũkũmũkitĩa.’

23“Ĩvindanĩ yĩu nĩneesũvie Mwĩai Ngai namwĩa atĩĩ,

24‘Ame Mwĩai Ngai Mũsumbĩ, nĩnĩsĩ kana nĩwambĩĩie kũmbony'a maũndũ manene na ma kũseng'ya nyie mũthũkũmi waku. Vai ngai ĩtunĩ kana kũũ nthĩ ĩla ĩtonya kwĩka maũndũ manene ala wĩkĩte!

25Nĩkwĩsũva ũnenge mwanya wa kũinga Ũsĩ wa Yolotani, nĩ kana ngone nthĩ ĩsu nou ĩla yĩ ngalĩko ĩla ĩngĩ; nthĩ mbanake yĩ iĩma, vamwe na iĩma sya Levanoni.’

26“Ĩndĩ nũndũ wenyu Mwĩai Ngai nĩwanthatĩie na alea kũmbĩthukĩĩsya. Vandũ va ũu ambĩie, ‘Ekela vau! Ndũkandavye ũndũ ũsu ĩngĩ!

27Ambata Kĩĩmanĩ kya Visika mũthya na ũisisya ngalĩko ya ĩũlũ, ya ĩtheo, ya wumĩlonĩ wa syũa, na ya ũthũĩlonĩ wayo wone nthĩ ĩsu, nũndũ ndũkainga Ũsĩ wa Yolotani.

28Nenga Yosua motao ala maĩlĩte, na ũimwĩkĩa vinya, nũndũ nĩwe ũkũtongoesya andũ ma Ĩsilaeli makalike na kũtũa nthĩ ĩla ũkwona.’

29“Kwoou nĩtwaendeeie na kwĩkala mwandanĩ ũla wĩ ngalĩko ĩla ĩngĩ ya ndũa ya Mbethi-veoli.”

← Chapter 2 Jump to: Chapter 4 →