Deuteronomy 4 — Kamba (MBIVILIA ŨVOO MŨSEO)

1Nĩvo ĩndĩ Mwose waneenie na andũ ma Ĩsilaeli amea atĩĩ, “Ĩanĩsyai motw'ĩo na myamũlo yonthe ĩla ngũmũmanyĩsya, na mũkaendeea kwĩkala thayũ nĩ kana mũlike na kwĩkala nthĩ ĩla Mwĩai Ngai, Ngai wa aaĩthe menyu ũkũmũnenga.

5“Nĩmũmanyĩĩtye motw'ĩo na myamũlo yonthe kwĩanana na ũndũ Mwĩai Ngai wambĩaĩe nĩke, nĩ kana mũmĩatĩĩae mwalika nthĩ ĩla mũũlika yĩthĩwe ng'ũndũ yenyu.

6Ĩanĩsyai motw'ĩo na myamũlo ĩsu mwĩyumĩtye vyũ, nĩkwĩthĩwa mweeka ũu andũ ala angĩ mate ma Ĩsilaeli makamanya kana mwĩ na ũĩ na ũmanyi. Yĩla andũ asu meĩw'a motw'ĩo asu makasya atĩĩ, ‘Kwa w'o mbaĩ ĩno nene nĩ ya andũ me na ũĩ na ũmanyi!’

7“Vai mbaĩ ĩngĩ ya andũ o na ethĩwa ĩnenevete ata, yĩna ngai yĩ vakuvĩ namo yĩla mekwenda ĩmatetheesye ta ũndũ Mwĩai Ngai, Ngai waitũ wĩ vakuvĩ naitũ. Nũtũsũngĩaa ĩvinda yonthe yĩla twamwĩkaĩla atũtetheesye.

8O ta ũu vai mbaĩ ĩngĩ ya andũ o na ethĩwa ĩnenevete ata yĩ motw'ĩo na myamũlo myaĩlu ta ĩla ngũmũmanyĩsya ũmũnthĩ.

9Ĩsũvĩei mũno mũikolwe nĩ maũndũ onthe ala mwonete na metho menyu, kana kũmaeka maume ngoonĩ syenyu ĩvinda o na yĩmwe ya thayũ wenyu. Manyĩasyai syana, na nzũkũlũ syenyu maũndũ asu.

10Lilikanai mũthenya ũla mwaũngamie mbee wa Mwĩai Ngai Kĩĩmanĩ kya Sinaĩ, yĩla wambĩie atĩĩ, ‘Ũmbany'a andũ onthe ma Ĩsilaeli mbee wakwa nĩ kana methukĩĩsye ũndũ ngũmatavya, na mayĩmanyĩsya kũnenga ndaĩa ĩvindanĩ yonthe yĩla me thayũ, na o ta ũu maimanyĩsya syana syoo syĩkae o ũu.’

11“Nĩmwathengeeie na mwaũngama nguumo wa kĩĩma kĩu yĩla kyakanĩte mwaki mũnene wavikĩte matunĩ, na kĩkavw'ĩkwa nĩ mũumbĩ mũkamu na syũki yingĩ.

12Nĩvo ĩndĩ Mwĩai Ngai waneenie nenyu kuma mwakinĩ ũsu. Nĩmweewie ndeto syake, ĩndĩ mũyaaona wũmbo wake; no wasya w'oka mweewie.

13Nĩwamũtavisye ũtianĩo wake nenyu, ũla wamwĩaĩe mwĩanĩsye, naw'o nĩ mĩao ĩkũmi, na amĩandĩka masengeanĩ elĩ ma mavia.

14Mwĩai Ngai nĩwambĩie nĩmũmanyĩsye motw'ĩo na myamũlo ĩla mwaĩlĩte kũatĩĩaa mwĩ nthĩ ĩla mũkilĩlye kũlika mũtũe.

15“Yĩla Mwĩai Ngai waneenie nenyu kuma mwakinĩ mwĩ Kĩĩmanĩ kya Sinaĩ, mũyaaona wũmbo wake. Kwoou ĩsũvĩei

16mũikeke naĩ kwa kwĩseũvĩsya ngai sya mũthemba o na wĩva; ngai syĩ na mũvw'ano wa mũndũ-ũme kana mũndũ mũka,

17mũvw'ano wa nyamũ o na yĩva, kana wa nyũnyi o na yĩva,

18mũvw'ano wa kasamũ o na keva kala ke ĩũlũ wa nthĩ, kana mũvw'ano wa ĩkũyũ o na yĩva.

19Mũikaaĩtĩkĩle kũtatwa mũthaithe na kũthũkũma syĩndũ ila mwonaa yayayanĩ: Syũa, mwei na ndata. Mwĩai Ngai, Ngai wenyu nũnengete andũ ma mbaĩ ila ingĩ syĩ ĩũlũ wa nthĩ syĩndũ isu maithaithae.

20Ĩndĩ inyw'ĩ Mwĩai Ngai nĩwamumisye nthĩ ya Misili, vala mwathĩnĩie mũno ta mwaĩ ĩikonĩ ĩnene ya kũtwekethya syũma. Amumisye nthĩ ĩsu nĩ kana amũtw'ĩkĩthye andũ make, o tondũ mwĩ make ũmũnthĩ.

21Mwĩai Ngai nĩwanthatĩie nũndũ wenyu, na eevĩta kana ndikainga Ũsĩ wa Yolotani na kũlika nthĩ nzeo ĩla Mwĩai Ngai, Ngai wenyu ũmũnengete yĩthĩwe ng'ũndũ yenyu.

22Ngakw'ĩĩa nthĩ ĩno na ndikainga Ũsĩ wa Yolotani, ĩndĩ inyw'ĩ mũkilĩlye kũinga ũsĩ ũsu na kũlika mũtũe nthĩ ĩsu nou.

23Ĩsũvĩei mũikolwe nĩ ũtianĩo ũla Mwĩai Ngai, Ngai wenyu waseũvisye nenyu. Ĩanĩsyai mwĩao wake wa kũlea kwĩseũvĩsya mũthemba o na wĩva wa mũvw'anano,

24nũndũ Mwĩai Ngai, Ngai wenyu nĩ ta mwaki ũla ũvĩvasya vyũ, na ndetĩkĩla kũthaithanĩw'a na ngai ingĩ.

25“Ĩtina wa mwekala nthĩ ĩsu vandũ va ĩvinda ĩasa na kũkwata syana na nzũkũlũ, mũikeke naĩ kwa kwĩseũvĩsya ngai sya mĩvw'anano sya mũthemba o na wĩva. Ũsu nĩ ũndũ mũthũku mbee wa Mwĩai Ngai na mũkatuma athata.

26Ũmũnthĩ nĩngwĩta ĩtu na nthĩ syĩthĩwe ngũsĩ sya ũkany'o ũla ngũmũnenga, kana mwalea kũmbĩw'a mũkakw'a mĩtũkĩ mume nthĩ ĩla mũkũinga Ũsĩ wa Yolotani mũkatũe. Mũikatũa vo ĩvinda ĩasa, ĩndĩ vate nzika mũkaminwa vyũ.

27Mwĩai Ngai akamũnyaĩĩkĩsya andũnĩ ma mbaĩ ingĩ, na no andũ anini katĩ wenyu makaendeea kwĩkala thayũ mwĩ katĩ woo.

28Mwĩ kũu mũkathaitha ngai iseũvĩtw'e nĩ andũ sya mũtĩ na sya ĩvia ila itatonya kwona, kwĩw'a, kũya kana kũnyungĩa.

29Ĩndĩ ethĩwa mwĩ kũu mũkamũmantha Mwĩai Ngai, Ngai wenyu mũkamwona, mwamũmantha na ngoo na thayũ wenyu w'onthe.

30Yĩla mwĩ thĩnanĩ na maũndũ asu onthe maimũkwata, nĩvo mwĩmũsyokea Mwĩai Ngai, Ngai wenyu na kũmwĩw'a.

31Mwĩai Ngai, Ngai wenyu nĩ Ngai wĩ tei. Ndakamũtia kana kũmũmina, o na ndakolwa nĩ ũtianĩo ũla we mwene waseũvisye na aaũmae menyu, na aũĩkĩĩthya kwa kwĩvĩta.

32“Kũlany'ai yu ĩũlũ wa mĩthenya ĩla mĩvĩtũku, ĩvinda ĩasa mbee wa mũtanamba kũsyawa, kuma mũthenya ũla Ngai woombie mũndũ amwia ĩũlũ wa nthĩ. Kũlyai ĩũlũ wa nthĩ yonthe kana ũndũ ũnenevete ta ũũ waaĩkĩka, kana ũkew'ĩka.

33Nĩmũkũlya, ve andũ angĩ maaĩkala thayũ ĩtina wa kwĩw'a Ngai aineena kuma mwakinĩ tenyu?

34Ve ngai ĩngĩ yaatata kwĩyosea andũ ma mbaĩ ĩmwe kuma andũnĩ ma mbaĩ ĩngĩ kwĩsĩla matatwanĩ, kwa nzĩa ya syama, mawonany'o na moseng'yo, kwa nzĩa ya kaũ, na kwa nzĩa ya ũtonyi, na vinya mũnene, kana kwa nzĩa ya maũndũ manene na angĩ ma kũtelemya, ta maũndũ ala Mwĩai Ngai, Ngai wenyu weekie nthĩ ya Misili mwene na metho menyu?

35Mwĩai Ngai nũmwonetye maũndũ asu nĩ kana amũĩkĩĩthye kana we e weka nĩwe Ngai, na vai ũngĩ take.

36Nĩwamũnengie mwanya wa kwĩw'a wasya wake kuma ĩtunĩ nĩ kana amũmanyĩsye kũmwĩw'aa, na kũũ ĩũlũ wa nthĩ amũnenga mwanya wa kwona mwaki wake mũnene, na aneena nenyu kuma mwakinĩ ũsu.

37Nũndũ wa kwĩthĩwa nĩwendete aaũmae menyu, nĩwamũnyuvie, na kwa ũtonyi wake mũnene nĩwamumisye nthĩ ya Misili.

38Nĩwalũngilye andũ ma mbaĩ nene na me vinya kwĩ inyw'ĩ kuma mbee wenyu, nĩ kana amũtwae mũlike na kũmũnenga nthĩ yoo yĩthĩwe ng'ũndũ yenyu o tondũ ĩilyĩ kũvika ũmũnthĩ.

39Kwoou lilikanai ũmũnthĩ, na mũikaaũlwe kana Mwĩai Ngai nĩwe Ngai ĩtunĩ na kũũ nthĩ. Kũi ũngĩ take.

40Ĩanĩasyai motw'ĩo na mĩao yake ĩla ngũmwĩaĩa ũmũnthĩ, nĩ kana maũndũ menyu na ma nzyawa syenyu methĩawe me maseo. Mũkekala thayũ ĩvinda ĩasa mwĩ nthĩ ĩla Mwĩai Ngai, Ngai wenyu ũkũmũnenga yĩthĩwe yenyu kũvika tene na tene.”

41Nĩvo ĩndĩ Mwose wavathie ndũa itatũ syĩ ngalĩko ya wumĩlonĩ wa syũa ya Ũsĩ wa Yolotani,

42ila mũndũ ũtonya kũkĩa akathi kwĩvitha na kwĩthĩwa ũsũvĩonĩ, ĩtina wa kũaa mũndũ ũngĩ kwa mbanga ataaĩthĩwa mũmaitha wake. Mũndũ ũsu wooaana akakĩaa akathi kwĩvitha nthĩnĩ wa ĩmwe ya ndũa isu na ailea kũawa.

43Ndũa isu nĩ: Mbeseli ĩla yĩ weũnĩ wĩ ũiĩnĩ kwondũ wa andũ ma mbaĩ ya Lũveni, Lamothi ĩla yĩ Ngileati kwondũ wa andũ ma mbaĩ ya Ngandi, na Ngolani ĩla yĩ Mbasani kwondũ wa andũ ma mbaĩ ya Manase.

44Mwose nĩwanengie andũ ma Ĩsilaeli mĩao ya Ngai,

45vamwe na mokũsĩ, motw'ĩo na myamũlo yĩla maumie nthĩ ya Misili.

46Amanengie me mũingo wa Ũsĩ wa Yolotani mwandanĩ ũla wĩ ngalĩko ĩla ĩngĩ ya ndũa ya Mbethi-veoli nthĩ ya Sioni mũsumbĩ wa Aamoli ĩla wasumbĩkaa e ndũanĩ ya Esivoni. Mwose na andũ ma Ĩsilaeli nĩmasindie mũsumbĩ ũsu ĩtina wa mauma nthĩ ya Misili.

47Nĩmatũie nthĩ yake, na ya Mũsumbĩ Oku ũla wasumbĩkaa e Mbasani. Asumbĩ asu elĩ ma Aamoli matwĩe ngalĩko ya wumĩlonĩ wa syũa ya Ũsĩ wa Yolotani.

48Mũvaka wa nthĩ ĩsu waendete kuma ndũanĩ ya Aloeli, ũkesĩla ũtee wa Ũsĩ wa Alinoni, na ũkambata kũthi kũvika Kĩĩmanĩ kya Silioni kĩla nĩkyo Kĩĩma kya Elimoni.

49O ta ũu nthĩ ĩsu nĩ vamwe na isio syonthe ila syĩ ngalĩko ya wumĩlonĩ wa syũa ya Ũsĩ wa Yolotani kũthi kũvika ngalĩko ya ĩtheo ya Ũkanga Mũkw'ũ na ngalĩko ya wumĩlonĩ wa syũa kũthi kũvika nguumo wa Kĩĩma kya Visika.