Deuteronomy 34

Kamba (MBIVILIA ŨVOO MŨSEO)

← Chapter 33 Jump to:

1Nĩvo ĩndĩ Mwose waumie ũiĩnĩ wa Moavi athi Kĩĩmanĩ kya Nevo, ambata mũthyanĩ wa Kĩĩma kya Visika kĩla kĩ ngalĩko ya wumĩlonĩ wa syũa wa Yeliko. E vau Mwĩai Ngai nĩwamwonisye nthĩ yonthe: Kĩsio kya nthĩ ya Ngileati kũthi kũvika ngalĩko ya ĩũlũ ndũanĩ ya Ndani,

2kĩsio kyonthe kya nthĩ ya Navutalĩ, isio sya nthĩ ya Evalaimu na Manase. O ta ũu nĩwamwonisye kĩsio kya nthĩ ya Yuta kũthi kũvika ũkanganĩ wa Menditelenia ũla wĩ ngalĩko ya ũthũĩlonĩ wa syũa,

3ngalĩko ya ĩtheo ĩla yĩtawa Nengevu, na ũiĩ ũla ũendete kuma Nzoali kũthi Yeliko ndũa ya mĩkĩndũ.

4Nĩvo ĩndĩ Mwĩai Ngai weeie Mwose atĩĩ, “Ĩno nĩ nthĩ ĩla nathie Avalaamu, Isaka na Yakovo kana nganenga nzyawa syoo. Nĩnakũnenga mwanya wa kũmyona, ĩndĩ ndikũnenga mwanya wa kũthi vo.”

5Kwoou Mwose, mũthũkũmi wa Mwĩai Ngai nĩwakw'ĩĩie vau nthĩ ya Moavi o tondũ Mwĩai Ngai wamwĩĩte.

6Mwĩai Ngai nĩwamũthikie mwandanĩ wa Moavi ngalĩkonĩ ĩla ĩngĩ ya ndũa ya Mbethi-veoli, ĩndĩ kũvika o na ũmũnthĩ vai mũndũ wĩsĩ vala ve mbũa yake.

7Mwose akwie e na ũkũũ wa myaka ĩana na mĩongo ĩlĩ. Aĩ na vinya o ta tene, na o ta ũu nĩwoonaa nthĩ nesa.

8Andũ ma Ĩsilaeli me ũiĩnĩ wa Moavi nĩmeethĩiwe na ĩvinda ya kyeva nũndũ wa kĩkw'ũ kya Mwose vandũ va mĩthenya mĩongo ĩtatũ.

9Yosua mwana wa Nuni ausũĩtwe nĩ veva wa ũĩ nũndũ Mwose nĩwamwilĩĩile moko ethĩwe mũtongoi vandũ vake. Kwoou andũ ma Ĩsilaeli nĩmamwĩw'aa na kwĩka maũndũ onthe ala Mwĩai Ngai weeaĩie Mwose.

10Kuma ĩvinda yĩu, vai mwathani ũngĩ waaĩthĩwa katĩ wa andũ ma Ĩsilaeli ũilyĩ ta Mwose, ũla waneenaa na Mwĩai Ngai metho kwa metho.

11O ta ũu vai mwathani ũngĩ waaĩka syama na moseng'yo ta ala Mwĩai Ngai watũmie Mwose akeke kũla kwĩ mũsumbĩ wa Misili, anini make na nthĩ ĩsu yonthe.

12Vai mwathani ũngĩ waaĩthĩwa atonya kwĩka maũndũ manene na maũseng'ya ta ala Mwose weekie andũ onthe ma Ĩsilaeli masyaĩĩsye.

← Chapter 33 Jump to: