John 13

Luganda (BIBU1) (BIBULIYA ENTUKUVU)

← Chapter 12 Jump to: Chapter 14 →

1Ku lukulembera embaga enkulu eya Pasika, Yezu ng'amanyi akadde ke bwe katuuse ave mu nsi muno addeyo ewa Taata, ng'ayagadde ababe abaali mu nsi, n'abaagalira ddala okukomekkereza.

2Bwe baali ku kyeggulo, Sitaani ng'amaze okusenseza mu mutima gwa Yuda Yisikariyoti mutabani wa Simoni eky'okumulyamu olukwe,

3Yezu ng'amanyi byonna Taata bwe yabimukwasa mu mikono gye, ate ng'amanyi bwe yava ewa Katonda ate bw'adda eri Katonda,

4n'ayimuka ku lujjuliro, n'ayambulamu ebyambalo bye, ne yeesiba ekiremba.

5Awo n'afuka amazzi mu kinaabiro, n'atandika okunaaza ebigere by'abayigirizwa be n'okubisiimuuza ekiremba kye yali yeesibye.

6N'atuuka ku Simoni Petero; Petero n'amugamba nti: “Mukama, ggwe onaaze nze ebigere?”

7Yezu n'addamu nti: “Kye nkola kaakano ggwe tokitegeera; olikitegeera oluvannyuma.”

8Petero n'amugamba nti: “Tolinnaaza bigere ennaku zonna.” Yezu n'amuddamu nti: “Bwe sikunaaza, mu nze tolinaamu mugabo.”

9Simoni Petero n'amuddamu nti: “Mukama, si bigere byange byokka, naye n'emikono n'omutwe.”

10Yezu n'amugamba nti: “Anaabye teyeetaaga kirala, wabula mpozzi okunaaza ebigere byokka; anti aba mulongoofu yenna. Nammwe muli balongoofu, sso si mwenna.”

11Kubanga yali amanyi ajja okumulyamu olukwe, kyeyava agamba nti: “Muli balongoofu, naye si mmwenna.”

12Bwe yamala okubanaaza ebigere n'okuddira ebyambalo bye, n'addamu okutuula, n'abagamba nti: “Kye mbakoze mukitegedde?

13Mmwe mumpita Muyigiriza, Mukama; mwogera kituufu, anti bwe ndi.

14Kale nno obanga nze Omukama, Omuyigiriza, mbanaazizza ebigere, nammwe kibagwanidde buli omu okunaaza munne ebigere;

15kubanga mbawadde kyakulabirako; nga nze bwe nkoze, nammwe bwe muba mukola.

16Mbagambira ddala mazima nti omuweereza takira mukama we, n'omutumibwa tasinga yamutuma.

17Obanga bino mubimanyi, mwesiimye mumala mubituukiriza.

18Kyokka soogera ku mmwe mwenna; nze be nalonda mbamanyi; naye Ebiwandiiko kye bigamba kituukirire nti: “ ‘Oyo eyagabana ku mugaati gwange anneefuulidde.’

19“Ekyo nkibagambye kati nga tekinnabaawo; bwe kinaagwawo mulyoke mukkirize nti nze nzuuyo.

20Mbagambira ddala mazima nti ayaniriza buli yenna gwe mba ntumye, aba ayanirizza nze; ate buli annyaniriza aba ayanirizza Oli eyantuma.”

21Yezu bwe yamala okwogera ebyo, n'atabanguka mu mwoyo, n'ayatulira ddala nti: “Mazima, mazima mbagamba nti omu ku mmwe ajja kumpaayo.”

22Abatume ne beetunulaganako nga basobeddwa ani gw'ayogerako.

23Omu ku bayigirizwa be, Yezu gwe yali ayagala, yali atudde kumpi ddala ne Yezu;

24Simoni Petero n'amusunyaako, n'amugamba nti: “Tubuulire ani oyo gw'ayogerako.”

25Ye ne yeewunzikira kumpi ddala ne Yezu, n'amugamba nti: “Mukama, ani oyo?”

26Yezu n'addamu nti: “Ye oyo gwe nnaakoleza ekitundu ky'omugaati ne nkimuwa.” Bwe yakoza ekitundu ky'omugaati, n'akiwa Yuda mutabani wa Simoni Yisikariyoti.

27Oluvannyuma lw'okulya ekitundu ky'omugaati, Sitaani n'amuyingiramu. Yezu n'amugamba nti: “Ky'okola kikole mangu.”

28Abaali ku lujjuliro tewaali yategeera nsonga yamumugambya ekyo.

29Abamu baalowooza nti nga Yuda bwe yabanga n'ensawo, Yezu yali amugamba nti: “Gula bye twetaaga ku mbaga enkulu;” oba nti abeeko ky'agabira abaavu.

30Yuda bwe yamala okulya ekitundu ky'omugaati, amangu ago n'afuluma; obudde bw'ali kiro.

31Yali ky'ajje afulume, Yezu n'agamba nti: “Kaakano Omwana w'Omuntu agulumiziddwa ne Katonda agulumiziddwa mu ye;

32ate obanga Katonda agulumiziddwa mu ye, ne Katonda alimugulumiza mu ye yennyini, ate ajja kumugulumiza mangu.

33Bwana bwange, nkyali nammwe akabanga katono. Mulinnoonya, naye nga bwe nagamba Abayudaaya nti: ‘Nze gye ŋŋenda temuyinza kutuukayo,’ era nammwe bwe mbagamba kaakano.

34Mbawa ekiragiro ekiggya, nti mwagalanenga; nga nze bwe nnabaagala, nammwe bwe muba mwagalana bwe mutyo.

35Bwe mulyagalana, olwo bonna kwe banaategeereranga nga muli bayigirizwa bange.”

36Simoni Petero n'amugamba nti: “Mukama, ogenda wa?” Yezu n'amuddamu nti: “Nze gye ŋŋenda ggwe toyinza kungoberera kaakano, naye olingoberera edda.”

37Petero n'amugamba nti: “Lwaki sisobola kukugoberera kaakano? Nzija kuwaayo obulamu bwange ku lulwo.”

38Yezu n'addamu nti: “Onoowaayo obulamu bwo okubeera nze? Nkugambira ddala mazima nti olwa leero enkoko eneeba tennakookolima, onooba onneegaanye emirundi esatu.

← Chapter 12 Jump to: Chapter 14 →