Judges 14

Luganda (BIBU1) (BIBULIYA ENTUKUVU)

← Chapter 13 Jump to: Chapter 15 →

1Samusoni n'akkirira e Timuna, n'alabayo omukazi mu bawala b'Abafilisitiini.

2Bwe yadda eka n'abuulira kitaawe ne nnyina nti: “E Timuna nalabyeyo omukazi mu bawala b'Abafilisitiini; kati mumumpasize.”

3Kitaawe ne nnyina ne bamugamba nti: “Kyova oyagala okuwasa omukazi mu Bafilisitiini abatali batayirire, mu ŋŋanda zo ne mu ggwanga lyo lyonna temuli mukazi?” Naye Samusoni n'agamba kitaawe nti: “Mumunfunire, kubanga ansanyusa.”

4Kitaawe ne nnyina baali tebamanyi nti ekyo kivudde wa Katonda, ng'anoonya kakisa akole ku Bafilisitiini, kubanga mu budde obwo Abafilisitiini be baali bafuga Yisirayeli.

5Samusoni n'agenda ne kitaawe ne nnyina e Timuna. Bwe baatuuka ku nnimiro z'emizabbibu ez'e Timuna, omwana gw'empologoma ne gumulumba nga bwe guwuluguma.

6Omwoyo gw'Omukama ne gumujjako, n'abaka empologoma n'engalo ensa, n'agiryebulamu ng'alyebulamu akabuzi akato. Naye kye yakola teyakibuulira ku kitaawe na nnyina.

7N'aserengeta n'anyumya n'omukazi. Samusoni n'amusiima.

8Nga wayise ennaku, Samusoni bwe yali addayo okumuwasa, n'akyama, alabe omulambo gw'empologoma. Ekyamuzimuukiriza nga mu mpologoma mulimu enjuki, n'omubisi gwazo.

9N'agusokoolamu n'engalo n'agenda ng'alya. Bwe yatuuka eri kitaawe ne nnyina, n'abawaako, nabo ne balya; kyokka teyababuulira nti omubisi agusokodde mu mulambo gwa mpologoma.

10Kitaawe n'agenda omukazi gye yali, Samusoni n'akolerayo embaga, nga bwe yali empisa abavubuka okukola batyo.

11Abantu bwe baamulaba, ne bamuleetera banne amakumi asatu babeere naye.

12Samusoni n'abagamba nti: “Ka mbaweeyo ekikoco. Bwe munaakitta mu nnaku zino omusanvu ez'embaga, nzija kubawa ekkanzu amakumi asatu, n'emiteeko gy'engoye amakumi asatu.

13Naye bwe kinaabalema okutta, mujja kumpa engoye empeweevu amakumi asatu n'emiteeko gy'ebyambalo amakumi asatu.” Ne bamugamba nti: “Kale yogera ekikoco kyo tukiwulire.”

14N'abagamba nti: “Mu mulyi, mwavaamu ekyokulya; Mu wa maanyi, mwavaamu ekiwoomerera.” Ne batasobola kukitta mu nnaku ssatu.

15Ku lunaku olwokuna ne bagamba muka Samusoni nti: “Musendesende akubuulire amakulu g'ekikoco, oba si ekyo tujja kukwokya wamu n'ennyumba ya kitaawo. Mwatuyise ku mbaga kutwaya bwaya?”

16Muka Samusoni n'amukaabirira nga bw'agamba nti: “Onkyaye, tonjagala; kale wawadde abantu bange ekikoco, naye nze ogaanye okukimbuulira.” Ye n'ayanukula nti: “Kitange ne mmange we sibabuuliridde, ggwe gwe nnaakibuulira?”

17Ennaku zonna omusanvu ez'embaga n'azimala ng'akaaba. Kyaddaaki, ku lunaku olwomusanvu n'amubuulira, kubanga yali amwetayiridde. Amangu ago omukazi n'abuulira abantu be.

18Ku lunaku olwomusanvu, enjuba nga tennagwa abantu b'omu kibuga, ne bamugamba nti: “Kiki ekisinga omubisi gw'enjuki okuwoomerera? Ate kiki ekisinga empologoma amaanyi?” N'abagamba nti: “Singa temwalimisizza nnyana yange, temwandisse kikoco kyange.”

19Omwoyo gw'Omukama ne gumujjako, n'aseerengeta e Asukeloni, n'attayo abasajja amakumi asatu, n'abambulamu ebyambalo amakumi asatu n'abiwa abasse ekikoco; n'addayo ewa kitaawe ng'obusungu bwe bwesera.

20Mukazi wa Samusoni ne bamufumbiza mukwano gwe eyali omubugiriza ku embaga ye.

← Chapter 13 Jump to: Chapter 15 →