Judges 17

Luganda (BIBU1) (BIBULIYA ENTUKUVU)

← Chapter 16 Jump to: Chapter 18 →

1Mu nsozi za Efurayimu waaliyo omusajja erinnya lye Mika.

2Olumu yagamba nnyina nti: “Sekeli za ffeeza olukumi mu ekikumi ezaakuggyibwako, olumu ne mpulira ng'okolima olw'okubeera zo, nze nazitwala era nzirina kaakati.” Nnyina n'amwanukula nti: “Mwana wange, Katonda akuwe omukisa.”

3N'aziddiza nnyina; nnyina n'agamba nti: “Ffeeza wange nali ndayidde okumusingira Omukama, mutabani wange n'amunzigya mu ngalo zange amukolemu ekifaananyi kya lubaale ekyole n'ekifaananyi ekisaanuuse. Kale nno kati mmukuwadde.”

4Mika n'addiza nnyina sekeli za ffeeza lukumi mu kikumi; nnyina n'atoolako sekeli ebikumi bibiri, n'azitwalira omufukusi wa zaabu, n'akolamu ekifaananyi kya lubaale ekyole n'ekifaananyi kya lubaale ekisaanuuse. Ne babiteeka mu nnyumba ya Mika.

5Omusajja ono Mika yalina essabo; yakola efodi ne bulubaale obw'awaka, omu ku batabani be n'amufuula kabona we.

6Mu nnaku ezo mu Yisirayeli temwali kabaka, wabula buli omu kye yatwalanga okuba ekituufu nga ky'akola.

7Waaliyo omuvubuka Omuleevi eyava e Beteleemu ekya Yuda, ng'abeera mu kika kya Yuda ng'omusenze.

8Yava e Beteleemu, n'agenda ng'anoonya ow'okubeera. Ng'atambula atyo n'ajja ku nnyumba ya Mika mu nsozi za Efurayimu.

9Mika n'amubuuza nti: “Ova wa?” Ye n'ayanukula nti: “Ndi Muleevi; nva Beteleemu ekya Yuda; nnoonya kifo wa kubeera.”

10Mika n'amugamba nti: “Sigala nange obeere kitange era kabona wange; buli mwaka nzija kukuwanga sekeli za ffeeza kkumi, n'ebyambalo, n'ebyokulya.”

11Omuleevi n'akkiriza, n'asigala ew'omuntu oyo, n'amuyisiza ddala ng'omu ku batabani be.

12Mika n'afuula Omuleevi kabona, n'asulanga mu nnyumba ye.

13Mika n'agamba nti: “Omukama anampisa bulungi, Omuleevi amaze n'afuuka kabona wange.”

← Chapter 16 Jump to: Chapter 18 →