Judges 20

Luganda (BIBU1) (BIBULIYA ENTUKUVU)

← Chapter 19 Jump to: Chapter 21 →

1Abayisirayeli bonna, okuva e Daani okutuuka e Beeriseba ko ne mu Gileyaadi, ne bavaayo kyenkana ng'omuntu omu, ne beekuŋŋaanya mu maaso g'Omukama e Mizupa.

2Abakulembeze b'ebika byonna eby'abantu bonna aba Yisirayeli ne beetaba mu lukuŋŋaana lw'abantu ba Katonda; baali obusiriivu buna obw'abatabaazi ab'ebigere abakwasi b'ebitala.

3Ababenyamiini ne bawulira nti Abayisirayeli bambuse e Mizupa. Bo Abayisirayeli ne babuuza nti: “Ekibi kino kyakolebwa kitya?”

4Omusajja Omuleevi, bba w'omukazi eyatemulibwa, n'ayanukula nti: “Najja mu Gibewa ekya Benyamiini nga ndi n'omuzaana wange nsule eyo.

5Abasajja ab'omu kibuga ne bannumba, ekiro ne beebungulula ennyumba mwe nali nga baagala okunzita, era n'omuzaana wange ne bamugwagwawaza, oluvannyuma n'afa.

6Nakwata omuzaana wange ne mmusalaasalamu ebitundu, ne mbiweereza wonna mu busika bwa Yisirayeli, kubanga baakola ekibi kino, ekikolwa eky'obugwagwa, mu Yisirayeli.

7Kati mwenna Abayisirayeli, muwe ebirowoozo byammwe n'ennamula yammwe.”

8Abantu bonna ne bayimirira ng'omuntu omu ne bagamba nti: “Tetujja kudda mu weema zaffe, tetujja kudda mu nnyumba zaffe, mpaawo n'omu mu ffe,

9wabula kino kye tujja okukola Gibewa: tujja kumulumba nga twesigama ku kalulu:

10Tujja kulonda abasajja kkumi mu buli kikumi mu buli kika kya Yisirayeli, ate mu buli lukumi kikumi, ne mu buli mutwalo lukumi; bano baleetere eggye emmere nga lituuse e Gibewa mu Benyamiini lisobole okuwoolera eggwanga olw'okubeera eby'obugwagwa byonna bye baakola mu Yisirayeli.”

11Abasajja bonna mu Yisirayeli ne bakuŋŋaana ng'omuntu omu okulumba ekibuga.

12Ebika bya Yisirayeli ne bituma ababaka wonna mu kika kya Benyamiini, ne bababuuza nti: “Kibi ki kino ekyakolebwa mu mmwe?

13Muleete abantu abo abagwagwa ab'omu Gibewa tubatte, Yisirayeli tuginaazeeko ekibi kino.” Naye Ababenyamiini tebaawuliriza baganda baabwe Abayisirayeli.

14Olwo Ababenyamiini ne bava mu bibuga byonna ne bakuŋŋaanira e Gibewa okulwanyisa Abayisirayeli.

15Ku olwo Ababenyamiini ne bakunga mu bibuga abasajja emitwalo ebiri mu kakaaga abakwasi b'ebitala, nga tobaze olusanvu abalondobe mu batuuze b'omu Gibewa.

16Mu bantu abo bonna mwalimu abasajja lusanvu abalondobe, ab'enkonokono, nga bwe baweereza oluviiri envuumuulo y'ejjinja, terubalema kuteeba.

17Ne Yisirayeli, ng'oggyeeko Ababenyamiini, yakunga emitwalo amakumi ana abakwata ebitala, bonna nga basajja batabaazi.

18Abayisirayeli bajja mu Beteli ne beebuuza ku Katonda, ne bagamba nti: “Ani mu ffe anaasooka okwambuka okulwanyisa Ababenyamiini?” Omukama n'abaanukula nti: “Yuda y'anaasooka okwambuka.”

19Ku makya Abayisirayeli ne basiisira emitala wa Gibewa.

20Ne bagenda okulumba Ababenyamiini; abasajja ba Yisirayeli ne bataza eggye okulumba Gibewa.

21Ku olwo Ababenyamiini ne bava mu Gibewa, ne batta mu ddwaniro abasajja emitwalo ebiri mu enkumi bbiri mu Bayisirayeli.

22Naye Abayisirayeli ne baguma, ne baddamu okutaza eggye mu bifo byabwe bye baalimu ku lukulembedde.

23Abayisirayeli ne bambuka ne bakaabira mu maaso g'Omukama okutuusa akawungeezi; ne bamwebuuzaako, ne bamugamba nti: “Tuddemu okulumba Ababenyamiini baganda baffe?” Omukama n'abaanukula nti: “Mubalumbe.”

24Enkeera Abayisirayeli ne basemberera Ababenyamiini.

25Ababenyamiini ne bava mu Gibewa okubasisinkana, ne batta mu Bayisirayeli abasajja omutwalo gumu mu kanaana; bonna baali batabaazi abakwasi b'ebitala.

26Olwo Abayisirayeli n'abantu bonna ne bajja e Beteli, ne bakaabira mu maaso g'Omukama. Ne basiiba olunaku lwonna okutuusa akawungeezi, ne baweereza Omukama ebitambiro ebyokye n'ebitambiro eby'okussa ekimu.

27Abayisirayeli ne beebuuza ku Mukama. Mu budde obwo Ssanduuku y'Endagaano y'Omukama yali ebeera eyo;

28Finekasi mutabani wa Eleyazari mutabani wa Aroni ye yaweerezanga mu maaso gaayo. Ne beebuuza nti: “Tuddemu okulumba Ababenyamiini baganda baffe?” Omukama n'abagamba nti: “Mulumbe, kubanga enkya nzija kubabawa mu mikono gyammwe.”

29Abayisirayeli ne bazingiza ekibuga Gibewa okukyetooloola.

30Ku lunaku olwokusatu ne balumba Ababenyamiini, ne bataza eggye okulumba Gibewa mu bifo bye baalimu ku mirundi egyasooka.

31N'Ababenyamiini ne bavaayo okubasisinkana, ne batwalirizibwa okuleka ekibuga emabega; ne basooka okutta mu Bayisirayeli nga bwe baakola ku mirundi egyasooka; abantu bangi abaafiira ku makubo, eriraga e Beteli n'eriraga e Gibewa, n'abandi ku ttale; baawera abasajja amakumi asatu okuva mu Yisirayeli.

32Ababenyamiini baali balowooza nti: “Tubagobye nga bwe gwali mu kusooka,” nga n'Abayisirayeli bagamba nti: “Mugire tukube akaddannyuma tubaggye mu kibuga bajje eno mu nguudo.”

33Bonna abasajja ba Yisirayeli ne basituka mu bifo byabwe ne bagenda balindira e Baali-Tamari. Awo Abayisirayeli abaali beekwese ne bafubutukayo mu bifo byabwe, ne balumba ebugwanjuba wa Gibewa.

34Abasajja mutwalo mulamba abalondobe mu Yisirayeli yenna ne bajja balumba Gibewa, olutalo ne lunyiinyittira. Ababenyamiini tebaamanya kabi kabatuukiridde.

35Omukama n'abatta mu maaso g'Abayisirayeli. Ku olwo Yisirayeli n'atta emitwalo ebiri mu enkumi ttaano mu kikumi mu Benyamiini, abaali abasajja abambalira ebitala.

36Ababenyamiini ne balaba nga bagobeddwa. Abayisirayeli baasooka kudduka Benyamiini, kubanga baali beesiga bali be baali balese beekwekeredde Gibewa.

37Abaali beekwese baafubutuka ne bayingira Gibewa, ne basaasaana wonna mu kibuga, kyonna ne bakitta n'ekitala.

38Abasajja ba Yisirayeli baali bagambye abaakola ogw'okwekwekerera nti bwe banaanyoosa omukka okuva mu kibuga,

39olwo abasajja ba Yisirayeli nga bakomawo mu ddwaniro. Ababenyamiini baali basoose okukuba Abayisirayeli, nga basse ng'amakumi asatu, ne balowooza nti: “Tubagobye nga bwe gwali mu lutalo olwasooka.”

40Naye omukka mu kibuga bwe gwasooka okunyooka, Ababenyamiini ne bakebuka, ne balaba ng'ekibuga kittunka, omukka nga gwambuka ku ggulu.

41Abayisirayeli ne babakyukira; Ababenyamiini ne batengera, kubanga baalaba ng'akabi kabatuukiridde.

42Ababenyamiini ne badduka abasajja ba Yisirayeli nga badda mu ddungu, naye era olutalo ne lubagobererayo, anti Abayisirayeli abaava mu bibuga baabasangayo ne babakubirayo.

43Baazingiza Ababenyamiini ne babamerako obutabaweeza, ne babalinnyirira okutuusiza ddala kumpi ne Gibewa ebuvanjuba.

44Mu Benyamiini ne muttibwamu abasajja omutwalo gumu mu kanaana, bonna baali basajja abeesobola.

45Abaasigalawo bwe baali badduka nga badda mu ddungu okulaga ku lwazi lw'e Rimmoni, Abayisirayeli ne babattiramu eyo ku makubo enkumi ttaano. Ne bongera okubagoba obutabaweeza okutuukira ddala e Gidomu, ne babattamu abalala enkumi bbiri.

46Bonna abaafa ku olwo mu Benyamiini baawera emitwalo ebiri mu enkumi ttaano, abasajja abambalira ebitala, bonna abaali abasajja abeesobola.

47Naye abasajja lukaaga ne baddukira mu ddungu ku lwazi lw'e Rimmoni, ne babeera eyo okumala emyezi ena.

48Abayisirayeli ne bakyukira Ababenyamiini, ne batta n'ekitala abasajja bonna mu bibuga, n'ebisolo, na buli kintu kye baasangirizanga; buli kibuga kye baatuukangako nga bakiteekera omuliro.

← Chapter 19 Jump to: Chapter 21 →