Judges 21

Luganda (BIBU1) (BIBULIYA ENTUKUVU)

← Chapter 20 Jump to:

1Abayisirayeli baali balayidde e Mizupa nti: “Mu ffe tewaba awa Mubenyamiini muwala we abeere mukazi we.”

2Abantu ne bajja e Beteli ne batuula mu maaso ga Katonda okutuusa akawungeezi; ne basitula amaloboozi gaabwe ne bakaaba nnyo nga bagamba nti:

3“Ayi Mukama Katonda wa Yisirayeli, lwaki kino kiguddewo mu bantu bo olwa leero, ekika ekimu mu Yisirayeli ne kisalibwako?”

4Enkeera, mu matulutulu ne bazimba omwaliiro ne baweererezaako ebitambiro ebyokye n'eby'okussa ekimu.

5Abayisirayeli ne bagamba nti: “Ani mu bika bya Yisirayeli byonna atazze mu lukuŋŋaana wa Mukama?” Baali balayidde nti: “Buli yenna atajje mu lukuŋŋaana wa Mukama mu Mizupa wa kuttibwa.”

6Abayisirayeli ne banyolwa olwa baganda baabwe ab'omu Benyamiini, ne bagamba nti: “Olwa leero ekika kimu kisaliddwako ku Yisirayeli.

7Tukole tutya abasigaddewo okubafunira abakazi, anti twalayira dda ffenna ew'Omukama nti tetugenda kubafumbiza bawala baffe.”

8Awo ne bagamba nti: “Mu bika byonna ebya Yisirayeli, ani atazze mu lukuŋŋaana wa Mukama mu Mizupa?” Ne bazuula nga mu lusiisira tewaali n'omu yali azze mu lukuŋŋaana okuva mu Yabesi-Gileyaadi,

9kubanga bwe baabala abantu, tebaasangamu n'omu yali avudde Yabesi-Gileyaadi.

10Ekibiina ne kituma abasajja abeesobola omutwalo gumu mu enkumi bbiri, ne babalagira nti: “Mugende mutte n'ekitala abatuuze b'omu Yabesi-Gileyaadi, n'abakazi n'abaana.

11Kino kye muba mukola: Mutte kiisi musajja na buli mukazi atakyali mbeerera.”

12Basanga mu batuuze b'omu Yabesi-Gileyaadi abawala embeerera ebikumi bina, abaali bateebakanga na musajja, ne babaleeta mu lusiisira e Silo mu Kanaani.

13Ekibiina kyonna ne kituma ababaka, ne boogera eri Ababenyamiini abaali ku lwazi lw'e Rimmoni, ne babatuusaako obubaka obw'okutabagana.

14Ababenyamiini ne bajja mu budde obwo, ne baweebwa bawala b'e Yabesi-Gileyaadi abaali bataliziddwawo; naye baali tebabamala bonna.

15Abantu ne banyolwa olwa Benyamiini, kubanga Omukama yali ayawudde mu bika bya Yisirayeli.

16Abakadde b'ekibiina ne bagamba nti: “Abakazi bonna mu Benyamiini bamaze ne battibwa, tuggye wa abakazi okuwa abasajja abasigaddewo?”

17Ne bagamba nti: “Abaawonawo mu Benyamiini balina okufuna abasika, ekika ekimu kireme kusaanawo mu Yisirayeli.

18Bawala baffe tetuyinza kubabawa olw'ekirayiro kye twakola nti: ‘Avumirirwe oyo aliwa Benyamiini omukazi.’ ”

19Ne bagamba nti: “Laba, mu Silo eriyo olunaku olukulu olw'Omukama olwa buli mwaka; Silo ekiri mu mambuka ga Beteli mu buvanjuba bw'oluguudo oluva e Beteli okulaga e Sekemu mu maserengeta g'ekibuga Lebona.”

20Awo ne balagira Ababenyamiini nti: “Mugende mwekweke mu mizabbibu.

21Mutunule; bawala b'e Silo bwe bavaayo okwetaba mu mazina, nga mufubutuka mu mizabbibu, buli omu nga yeenyagiramu omukazi mu bawala ba Silo, nga muddayo mu nsi ya Benyamiini.

22Bakitaabwe ne bannyinaabwe bwe banajja gye tuli okutuyombesa, tunaabagamba nti: ‘Mutusaasire, nabo mumale gabasonyiwa, kubanga tetwabafunira bakazi mu lutalo, nammwe temwazza musango kubanga bawala bammwe temubabawadde buwi.’ ”

23Ababenyamiini ne bakola kye baabalagira; buli omu mu Babenyamiini n'agenda ne yeenyagirayo omukazi mu bawala abaali bazina. Ne badda ku busika bwabwe, ne bazimba ebibuga, ne babisengamu.

24N'Abayisirayeli ne bava eyo mu budde obwo, ne baddayo buli omu mu kika kye ne mu ssiga lye ne ku busika bwe.

25Mu nnaku ezo mu Yisirayeli temwali kabaka, wabula buli omu kye yatwalanga okuba ekituufu nga ky'akola.

← Chapter 20 Jump to: