2 Kings 13

Malagasy 2004 (DIEM PROTESTANTA)

← Chapter 12 Jump to: Chapter 14 →

1Tamin’ny faha-23 taona nanjakan’i Jôasy zanakalahin’i Ahazià mpanjakan’i Joda no tonga mpanjakan’i Israely tany Samaria i Jôahaza zanakalahin’i Jehò; ary naharitra 17 taona no nanjakany.

2Nanao izay ratsy eo imason’ny TOMPO izy, satria nanahaka ny fahotana izay nitarihan’i Jerôbohama zanakalahin’i Nebata ireo Israelita.

3Koa dia tezitra tamin’ny Israelita ny TOMPO, ka natolony an’i Hazaela mpanjakan’i Siria sy an’i Beny-Hadada zanany izy nandritra ny fotoana ela.

4Nifona tamin’ny TOMPO anefa i Jôahaza, dia nihaino azy IZY satria hitany ny fampahorian’ny mpanjakan’i Siria an’i Israely;

5ary ny TOMPO kosa nanome mpamonjy izay hanafaka ny Israelita amin’ny fifehezan’ny Sirianina. Dia nandry feizay toy ny teo aloha ny Israelita.

6Saingy tsy nialany fa nizorany hatrany ny fahotana izay nitarihan’i Jerôbohama mianakavy ireo Israelita; ary na dia ilay tsatokazo fanajana an’i Aserà aza dia mbola nijoro tao Samaria ihany.

7Tamin’ny farany ny tafik’i Jôahaza dia tsy nisy afa-tsy mpitaingin-tsoavaly dimampolo sy kalesy folo ary miaramila mpandeha an-tongotra antokony folo; fa maro taminy no efa naringan’ny mpanjakan’i Siria sy nataony ho toy ny vovoka hohitsahin’ny olona.

8Ny sisa amin’ny tantaran’i Jôahaza ary koa ny zavatra hafa rehetra nataony sy ny herimpo nasehony dia voasoratra ao amin’ny boky milohateny hoe Asan’ireo mpanjakan’i Israely.

9Rehefa maty i Jôahaza, dia nalevina tao Samaria; ary i Jôasy zanany lahy no nanjaka nandimby azy.

10Tamin’ny faha-37 taona nanjakan’i Jôahaza mpanjakan’i Joda no tonga mpanjakan’i Israely tao Samaria i Jôasy zanakalahin’i Jôahaza; ary naharitra 16 taona no nanjakany tao.

11Nanao izay ratsy eo imason’ny TOMPO izy, satria tsy nialany fa nizorany hatrany ny fahotana rehetra izay nitarihan’i Jerôbohama zanakalahin’i Nebata ireo Israelita.

12Ny sisa amin’ny tantaran’i Jôasy ary koa ny zavatra hafa rehetra nataony sy ny herimpo nasehony, fony izy niady tamin’i Amatsià mpanjakan’i Joda, dia voasoratra ao amin’ny boky milohateny hoe Asan’ireo mpanjakan’i Israely.

13Rehefa lasa nodimandry any amin’ny razany izy, dia nalevina tao Samaria, tao amin’ny fasan’ny mpanjakan’i Israely; ary i Jerôbohama no nitoetra teo amin’ny sezafiandrianan’i Jôasy.

14Raha voan’ny aretina hahafaty azy i Elisà, dia lasa hamangy azy i Jôasy mpanjakan’i Israely ary nihohoka teo ambony tavan’i Elisà izy ka sady nitomany no nanao hoe: –Ry dada ô! Ry dada ô! Mahery mihoatra noho ny kalesin’i Israely sy ny mpitaingin-tsoavaliny rehetra ianao!

15Ary hoy i Elisà taminy: –Makà tsipîka iray sy zana-tsipîka maro ianao. Dia nampaka ireo ny mpanjaka.

16Fa hoy indray i Elisà hoe: –Vohay ny varavarankely atsinanana. Dia novohan’ny mpanjaka izany. Ary hoy koa ny mpaminany hoe: –Raiso dia henjano ny tsipîkanao. Dia nohenjanin’ny mpanjaka ny tsipîka; napetrak’i Elisà teo amin’ny tanan’ny mpanjaka ny tanany ary nobaikoiny izy mba hitifitra. Rehefa nitifitra ny mpanjaka, dia nilazan’ny mpaminany hoe: –Zana-tsipîka manambara ny fandresena omen’ny TOMPO iny, dia fandresena ny tafika sirianina. Eny, hamely ny Sirianina ao Afèka ianao mandra-paharingany.

18Dia hoy i Elisà tamin’i Jôasy: –Raiso indray ny zana-tsipîka hafa. Dia noraisin’ny mpanjaka ireo. Ary hoy ny mpaminany taminy: –Kapohy ny tany. Ary nokapohin’ny mpanjaka intelo ny tany, dia nijanona izy.

19Tezitra taminy anefa ilay olon’Andriamanitra ka nanao hoe: –Raha mba nikapoka indimy na inenina ianao, dia ho nahavoa ny Sirianina mandra-paharingany; ankehitriny anefa dia intelo ihany no hahafahanao mamely azy.

20Ary maty i Elisà ka nalevina. Isan-taona dia tonga mamakivaky ny tanin’i Israely ny tontakely môabita.

21Indray andro, dia nisy olona nandevina fatin-dehilahy ka sendra nahatazana tampoka andiany iray tamin’ireo tontakely. Ary nanipy faingana ny faty tao am-pasan’i Elisà ny mpandevina, dia lasa nandositra. Saingy vao nahakasika ny taolan’i Elisà io faty io, dia velona indray ary nitsangana.

22Nandritra ny andro rehetra nanjakan’i Jôahaza, dia nampahory ny Israelita i Hazaela mpanjakan’i Siria.

23Nefa niantra azy ihany ny TOMPO sady namindrafo taminy noho ny fanekempihavanana nataony tamin’i Abrahama sy i Itsehàka ary i Jakôba; ka tsy ta handringana azy Izy ary tsy mbola nandroaka azy ho voasesitany lavitra ny fanatrehany.

24Nony maty i Hazaela mpanjakan’i Siria, dia i Bena-Hadada zanany lahy no nanjaka nandimby azy.

25Tamin’izay dia norombahin’i Jôasy zanakalahin’i Jôahaza teo an-tanan’i Bena-Hadada zanakalahin’i Hazaela indray ny tanàna izay efa nalain’i Hazaela teo an-tanan’i Jôahaza rain’i Jôasy. Intelo no nandresen’i Jôasy an’i Bena-Hadada, ka dia azony indray ny tanànan’i Israely.

← Chapter 12 Jump to: Chapter 14 →