Acts 7 — Oromo Bible (WAADAA LAMMATAA) 2013

1Bulchaan gadootaallee, «Dubbiin kun akkanaa?» jedheen.

2Innillee akkana jedhe, «Obboleeyyanii fi abboota tiyya, dhagayaa'a! Waaqa ulfinnaa, Abbaa keenna Abrahaamiin uduu inni biyya Kaaraanii hin dhaqin lafa laga lamaan jiddu'utti itti mudhatee,

3‹Biyya keetii fi Firoota kee keessaa bayiitii gara biyya ani sitti mudhisuu koottu› jedheen.

4Hennaa san biyya Kaladaawootaatii bayee Kaaraaniin taa'e. Achiillee haga abbaan isaa du'een maayii gara biyya adha isin keessa jiraata'aartan kanatti isa baase.

5Achitti lafa haga taakkuu takkattii taatuu hin kennineef. Haata'uu ammoo uduu inni ilma hin arganne isaaf worra isaan maayessaallee fiixaa isaatii akka ristii kennuuf waadaa galeef.

6Rabbillee, ‹Fiixaan isaa biyya biraatitti galtoota akka ta'aniif woggaa dhibba afuriif garboota akka isaan godhaniif akka isaan rakkisan dubbate.

7Akkasuma Rabbillee akka garbootaatitti banii isaan bulchan irratti ani isaaniitti murteessa. Achiin maayii hin bayan. Bakka kanatti na kaddaaman› jedhe.

8Waadaa sirna gadoomaallee hin keenneef. Akkasuma Yisaaqiin uumatee guyyaa saddeetaffa'aatitti gadoomse. Yisaaqi Yaaqoobiin, Yaaqoobillee abboota gosa kudha lamaa uumate.

9«Obboleeyyan Yooseefii isatti hinaaftee garbicha akka ta'uuf biyya Misiriititti gurguratteen. Rabbi ammoo isa woliin ture.

10Rakkinna maraa keessaa isa baaseenii mootii Misirii afoo Fari'ooniititti gaacheenaa fi ogummaa kenneef, Misirii fi mana isaa maraa irrattillee ajaja'aa fi bulchaa jaalatame godhee isa muude.

11Biyya Misiriitii fi Kana'aaniin maratuu beelaa fi rakkoo gudda'atu dhufe abbootiin teennallee waan nyaatan dhaban.

12Yaaqoobi midhaan biyya Misirii jiraachuu haga dhagaye; dura abbootii teenna erge.

13Hennaa isaan deebi'anii gara Misirii dhaqan; Yooseef eennummaa ufii obboleeyyan ufiititti hime. Fiixaan Yooseefillee Fari'ooniin biratti beekkame.

14Yooseefillee abbaa ufii Yaaqoobii fi maatii ufii namoota torbaatamii shanii firoota isaa maraa ergee waamsise.

15Yaaqoobillee gara biyya Misirii bu'e, inniniif ilmaan isaallee achitti du'an.

16Lafeen isaaniillee gara lafa Seekeem jedhamuu geeffamtee hulee lafa awwaala Abrahaam birrii ufiitiin abbaa Seekeemii ijoollee Eemoorii irraa bitetti isaan awwaalan.

17Hennaa barri Rabbi Abrahaamiif waada gale dhiyaate, mootiin Yooseefiin hin beenne ka biraa haga mooyuutti baniin Misiritti yookiin Misiriin keessatti baayi'ate.

19Innillee worra keenna miidha'aati da'imman jireennaan akka hin jiraanne gara diidaa akka gatan godhee abbootii teenna rakkise.

20Hennaa san Muuseen dhalate. Innillee Rabbiin afo'otti bareedaa ture. Mana abba'aa keessallee ji'a sadihii jiraate.

21Inni hennaa alatti gatame san mucattiin Fari'oonii kaafteenii akka ilma isi'ii ta'uuf guddifte.

22Muuseen ogummaa Misirii maraa baratee dubbiia fi huji'iinillee jabaate.

23Haata'uu ammoo woggaa afurtamaa hennaa guutu obboleeyyan ufii ijoollee Isira'elootaa tooyatu'uuf garaa ufii keessatti yaade.

24Uduu namni Misirii tokko nama Isiraa'elii tokko miidhu argee, gargaareenii namicha Misirii dhayee ajjeesse.

25Obboleeyyan isaallee Rabbi karaa isaatiin wolaba akka isaan baasu waan hubatan isatti fakkaate. Isaan ammoo hin hubanne.

26Bariisaa uduu isaan wol lolan argee, Araarsu'uuf barbaadee jarana isin obboleeyyan maaf wol miitan? isaaniin jedhe.

27Ka hiriyyaa ufii miidha'aaru ammoo bulcha'aa fi murteessaa akka taatu nurratti eentu si muude?

28Mo'o akkuma kaleessa namicha Misirii dhooftee ajjeefte nallee ajjeesuu kajeeltee? jedhee darbeen.

29Muuseenillee sababa dubbii kanaatiif dheesee biyya Midiyaamiititti galtuu ta'ee jiraate. Achiti ijoollee lamaa uumate.

30Woggaa afurtamaan maayii Maleekkaan Goofta'aa gaara Siina'aa ka lafa udume'ee biratti saatoo gubatu keessaan arraba ibiddaatiin itti mudhate.

31Muuseenillee argee, waan arge san maalalfatee, laalu'uuf yoo itti dhiyaatu, sagaleen Goofta'aa, ‹Ani Waaqa abboota keetii, Waaqa Abrahaamii, Waaqa Yisaaqiitii fi Waaqa Yaaqoobii ti› jedhee gara isaa dhufe. Muuseenillee hollata'aati laaluu sodaate.

33Gooftaanillee, ‹Bakki dhaabatteertu bakka qulqulloofte waan taateef kophee luka keetii baafadhu.

34Rakkinna banii kiyyaa ka Misiriin keessa jiran maraa argeera; iyyansa isaanii dhagayu'uuf bu'eera; ammallee koottu gara Misirii si ergaa› jedheen.

35Bulcha'aa fi abbaa murte'ee akka taatu eentu si muudee? jedhanii Muusema ganan kana Rabbi karaa maleekka'aatiin saatoo keessatti itti mudhatee, muudama'aa fi furaa taasisee isa erge.

36Namni kun biyya Misiriititti galaana diimaa lafa gammoojji'iititti woggaa afurtamaa maalale'ee fi malkata godha'aa isaan baase.

37Namni kun ijoollee Isiraa'eliitiif, ‹Rabbi obboleeyyan keessaa, raaga akka kiyyaa isinii kenna› isa dhagayaa'a jedhee namni isaanitti dubbate Muusema kana.

38Namni kun ka gaara Siina'aatitti Maleekkaan itti dubbate saniif ka abboota keenna woliin lafa gammoojji'ii keessa ture. Dubbii jireenna qabu kana nuu kennu'uuf Rabbiin irraa fudhate.

39Abbootiin keenna isaa ajajamuu didan. Haata'uu ammoo uf irraa isa dhiiban. Yaada ufiitiin gara biyya Misirii deebi'an.

40Isaan Aarooniin, ‹Muuseen biyya Misirii keessaa nu baase waan ta'e wollaallee, ka'ii waaqota nu afoo deeman nuu huji› jedhaniin.

41Hennaa san keessa waaqa tolfamaa ka waatii irraa tolfame fakkeessanii hojjatanii, waaqa tolfamaa sanii ciincaa dhiyeessanii, hujii harka ufiititti gammadan.

42Rabbi ammoo isaan irraa garagalee urjoota sami'iitiif akka sagadan dabarsee isaan kenne. Kunillee akkuma Kitaaba raattotaa keessatti barreefame, isin banii Isiraa'elii woggaa afurtamaa gammoojjii keessatti horii qalmaatii fi ciincaa naa dhiyeesitanii?

43Fakii itti sagadu'uuf hojjatan, dukaanaa «Molookii» tii fi fakii urjii waaqa keessanii ka «Reemifuum» jedhamu harka keessaniin hojjattanii kaddaamtaniirtan. Kanaaf Anillee gara biyya baabilooniin gamaa isin dabarsa jedhamee barreeffameera.

44«Akkuma fakii argitee san Abbootiin teenna gammoojjii keessatti dukkaana ragaa bayu'uu qaban. Dukkaanaan sunillee akka Rabbi Muuse'eetti mudhisetti ta hojjatamte.

45Abbootiin teennallee akkasuma abbootii ufii irraa fudhatanii, biyya banii Rabbi isaan afoo ari'ee baase sanitti Iyyaasuu woliin galchan. Dukkaanaan sunillee haga bara Daawitii jiraatte.

46Innillee Rabbiin afo'otti gacheena argatee Waaqa Yaaqoobiitii mana ijaaru'uuf Waaqa kadhate.

47Haata'uu ammoo Salamoontu Rabbii mana ijaare.

48Haata'uu ammoo raattichi, ‹Samiin teessoo tiyya; laftillee ejjata luka kiyyaa ti. Mana attamii naa ijaartan? Yookiin bakki itti harabaafadhu kam? Kana maraa harka kiyyatu hojjatee mii? Akkuma jedhe; Rabbiin guddaan mana harki namaa ijaare keessa hin jiraatu.›

51«Isin worra mataa jabeeyyi'iitii fi worra onneen teessan duude fi worra gurri keessan hin dhageenne, isin akkuma abboota keessanii hennaa maraa Ayyaana Woyyuu mormitan.

52Raattota keessaa namni abbootiin keessan itti ka'anii hin ariine eennu? worra dhufa woyyichaa firrisanii dubbatan ajjeesaniiru. Worri karaa Maleekkotaatiin seera fudhatanii fayyadamuu hin eenne. Isinillee amma dabarsitanii isa kennitan hin ajjeeftaniinillee.»

54Hennaa kana dhagayan guddisanii aaranii ilkaan itti ciniinnatan.

55Inni Ayyaana Woyyu'uun guuttamee gara sami'ii xinxallee hennaa ol laalu ulfinna Rabbiitiif Yesuusiinillee mirga Rabbii ka dhaabate argee,

56Samiin banamtee Ilmi Namaa mirga Rabbii ka dhaabateeru arga'aara jedhe.

57Guddisanii Laagaa ol qabatanii iyya'aa gurra isaanii qabatanii yaada tokkoon ta'anii gara isaa fiigan.

58Qachaa keessaa gara diidaa baasanii dhaga'aan tuman. Worri raganillee uffata isaa luka dargaggeessa Saa'ool jedhamu tokko jala kaayan.

59Hennaa isaan Isxifaanosiin dhaga'aan tuman, inni Gooftaa kiyya lubbuu tiyya fudhadhu jedhee kadhate.

60Jilbiinfatee Gooftaa kiyya cubbuu kana isaanitti hin laakkayin jedhee laagaa ol qabatee iyyee du'e. Saa'oolillee ajjeefamuu isaatitti jaraan woliigale.