bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
2 Kings 14
2 Kings 14
Quechuan QXO (Biblia en Quechua del sur de Conchucos)
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 15 →
1
Joacazpa tsurin Joás ishkay wata Israel nacionchö rey kaykaptinmi Judá nacionchö Joáspa tsurin Amasías rey kayta qallaykurqan.
2
Mandayta qallanqan witsanmi ishkay chunka pitsqa (25) watayuq kaykarqan. Payqa ishkay chunka isqun (29) watam Jerusalénpita mandarqan. Mamanmi Jerusalénpita Joadán karqan.
3
Amasíasqa Tayta Dios munanqannö kawarpis manam unay castan Davidnötsu kawarqan, sinöqa papänin Joásnömi kawarqan.
4
Tsaynö kawarmi markakunachö altarkunata juchutsirqantsu. Tsay altarkunachömi sacrificiukunata imaypis rupatsiyarqan y inciensiuta qoshnitsiyarqan.
5
Amasíasqa rey kaykarnam papänin wanutsiq capitankunata wanutsirqan.
6
Peru manam tsay capitankunapa tsurinkunataqa wanutsirqantsu. Tsaynö mana wanutsinanpämi Moisés qellqanqan leykunachö Tayta Diospa mandamientun qellqashqa kaykan: «Tsurinpa jutsanpita ama mamanta ni papäninta wanutsiyankitsu. Tsaynölla mamanpa o papäninpa jutsanpita tsurinta ama wanutsiyankitsu. Tsaypa rantinqa jutsa ruraq kaqta wanutsiyanki».
7
Kachi Pampachö pelyarmi Amasías wanutsirqan chunka waranqa (10,000) edomita runakunata. Sela markachöpis vincirmi tsay markapa jutinta trocatsirqan Jocteelta. Tsaymi kananyaqpis tsay jutiwan reqiyan.
8
Tsaypitanam Amasíasqa willakuqkunata mandarqan Israel nacionpa mandaqnin rey Joás kaqman. Joásqa Joacazpa tsurin y Jehúpa willkanmi karqan. Willakuqkuna chaykurmi niyarqan: «Allish chölu karqa soldäduykikunata qoriskirshi Amasíaspa soldädunkunawan pelyayänaykipä aywanki».
9
Tsaynö niyaptinmi willakuq aywaqkunata Joás nirqan: «Kutiykur mandayämushuqniki reyta niyanki: «Cardón kashash mandanä Líbanuchö cedru qeruta ninanpä: «Tsurïpa warminpä warmi tsurikita entregaykuy». Tsaynö parlaykaptinshi munti ashma päsar cardón kashata pakikaqpä lanquskinä.
10
Tsay kashanöllam qampis kaykanki. Edomita runakunata ushakätsinqaykillapitaqa ama alläpa runa tukuytsu. Tsaynö runa tukur pelyaq shamunaykipa rantinqa mejor wayikichö kakuy. Tsaynölla wajupämaptikiqa kikikitapis y Judá runakunatapis ushakätsiyäshaykim».
11
Rey Joás tsaynö niptinpis Amasíasqa manam cäsurqantsu. Mana cäsuptinmi Joásqa Israel soldädunkunawan Judáchö Bet-semesman aywayarqan Amasíaspa soldädunkunawan pelyayänanpä.
12
Israel soldädukuna vinciyaptinmi Judá soldädukunaqa qeshpir wayinkunapa kutikuyarqan.
13
Israel nacionpa mandaqnin rey Joásnam Judá nacionpa mandaqnin rey Amasíasta Bet-semeschö prësu tsariskir Jerusalénman aparqan. Tsaychömi marka murällata juchutsiyarqan Efraín punkupita qallaykur hasta Esquïna niyanqan punkuyaq. Tsay juchutsiyanqan murällaqa pachak puwaq chunka (180) metru largum karqan.
14
Tsaynöllam Tayta Diospa wayinchö kaqtapis palaciuchö kaqtapis qellayta y qorita apakuyarqan. Tsaypitam «castaykikuna pägayämaptinrä dëjayäshayki» nir runakunata prësu aparkur Samariapa kutiyarqan.
15
Rey Joás imata ruranqanpis y Judá nacionpa mandaqnin rey Amasíaswan pelyanqanpis llapanmi Israel nacionpa mandaqnin reykunapa acta librunchö qellqashqa kaykan.
16
Joás wanuskiptinnam Israel nacionpa mandaqnin reykuna pamparäyanqan Samaria markaman pampayarqan. Paypa trokinnam tsurin Jeroboamna rey karqan.
17
Judá nacionpa mandaqnin rey Amasíasqa Israel nacionpa mandaqnin rey Joás wanunqanpita chunka pitsqa wata masrämi kawarqan. Rey Amasíasqa Joáspa tsurinmi karqan. Rey Joásnam Joacazpa tsurin karqan.
18
Rey Amasías imata ruranqanpis llapanmi Judá nacionpa mandaqnin reykunapa acta librunchö qellqashqa kaykan.
19
Jerusalén runakuna contran shäriyaptinmi Amasíasqa Laquis markaman qeshpir aywakurqan. Tsaynö qeshpiptinpis qatipaykurmi wanutsiyarqan.
20
Ayantanam caballuman chaqnarkur Jerusalénman apayarqan. Tsaychömi Davidpa Markanman unay castankuna pamparanqan kaqman pampayarqan.
21
Tsaypitam Judá runakuna qorikaykur Amasíaspa tsurin Azaríasta churayarqan rey kananpä. Tsay witsan Azarías chunka joqta watayuqmi kaykarqan.
22
Paymi papänin wanunqanpita qepatana Elat markata qoriskir yapay shäritsirqan. Tsaynöpam Judá nación runakunapäna tsay marka karqan.
23
Judá nacionchö kaq Joáspa tsurin Amasías chunka pitsqa wata rey kaykaptinmi Israel nacionchö kaq Joáspa tsurin Jeroboam rey kayta qallaykurqan. Paymi chusku chunka juk (41) wata Samariapita Israel runakunata mandarqan.
24
Tayta Diosta mana cäsurmi Jeroboampis Nabatpa tsurin Jeroboamnölla Israel runakunata jutsata ruratsirqan.
25
Jeroboammi qorirqan Israel nacionpa lindërunta Hamatpita hasta Arabá Lamaryaq. Tsaynö rurarqan Amitaipa tsurin profëta Jonás Tayta Diospa willakuyninta willakunqannöllam. Jonásqa Gat-hefer markapitam karqan.
26
Tsaynö qorinanpämi Jeroboamta Tayta Dios yanaparqan Israel nacionchö runakuna pasaypa ñakar llakikuyanqanta rikar. Israel runakunata yanapananpä manam esclävupis ni libripis karqantsu.
27
Tsaynö kaykaptinpis Israel runakuna ushakäyänanta mana munarmi Joáspa tsurin Jeroboamta Tayta Dios yanaparqan paykunata salvananpä.
28
Rey Jeroboam imata ruranqanpis, guërrachö pelyar vincinqanpis y Damascuta y Hamatta qorinqanpis llapanmi Israel nacionpa mandaqnin reykunapa acta librunchö qellqashqa kaykan.
29
Jeroboam wanuskiptinnam Israel nacionpa mandaqnin reykuna pamparäyanqanman pampayarqan. Paypa trokinnam tsurin Zacaríasna rey karqan.
← Chapter 13
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 15 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25