2 Kings 24

Quechuan QXO (Biblia en Quechua del sur de Conchucos)

← Chapter 23 Jump to: Chapter 25 →

1Judá nacionchö Joacim rey kaykanqan witsanmi Babiloniapa mandaqnin rey Nabucodonosor Judá nacionta atacar vincirqan. Judá nacionta kimsa wata poderninchö tsararaykaptinmi Joacimqa contran shärirqan.

2Tsaypitanam asaltantikunata Tayta Dios mandarqan Judá nacionta ushakätsiyänanpä. Tsay asaltantikunam Babiloniapita, Siriapita, Moabpita y Amónpita shayämurqan. Tayta Diospa sirviqnin profëtakuna willakuyanqannöllam tsaynö päsarqan.

3Asaltantikunata Tayta Dios tsaynö mandarqan Judá nación runakunata puntanpita qarqunanpämi. Tsaynö rurarqan rey Manasés tukuy niraq jutsata ruranqanpitam.

4Manasésqa jutsaynaq runakunatam Jerusalénchö tsaytsikata wanutsirqan. Tsaynö ruranqanpitam Tayta Dios perdonarqantsu.

5Rey Joacim imata ruranqanpis Judá nacionpa mandaqnin reykunapa acta librunchömi qellqashqa kaykan.

6Joacim wanuskiptinnam tsurin Joaquínna rey karqan.

7Babilonia nacionpa mandaqnin reyqa Egipto raqrapita hasta Éufrates mayuyaqmi llapan markakunata poderninchö tsarararqan. Tsaynö tsararaptinmi Egipto nacionpa mandaqnin reyqa soldädunkunawan Judá nacionta atacayarqannatsu.

8Joaquínqa chunka puwaq watayuq kaykarmi rey kayta qallaykurqan. Payqa kimsa killallam Jerusalénpita mandarqan. Mamanmi karqan Jerusalén markapita Elnatánpa tsurin Nehusta.

9Joaquínpis papäninnöllam Tayta Diosta mana cäsur jutsata rurarqan.

10Tsay witsanmi Babilonia nacionpa mandaqnin rey Nabucodonosor Jerusalénta atacayänanpä soldädunkunata mandarqan. Jerusalénman chaykurnam soldädunkuna jiruruypa tsapaskir atacayarqan.

11Tsaychö atacaykäyaptinmi kikin Nabucodonosorpis tsayman charqan.

12Pelyayta mana valurarmi rey Joaquínpis, mamanpis, mandayiqninkunapis, soldädunkunapa capitanninkunapis y yätsiqnin runakunapis rey Nabucodonosorpa poderninchöna kayarqan. Tsaynö päsarqan Nabucodonosor puwaq watana Babilonia nacionpa mandaqnin rey kaykaptinmi.

13Jerusalénman yaykuskirnam rey Nabucodonosor templupitapis y palaciupitapis qoripita rurashqa manëjukunata jipitsirqan. Rey Salomón qoripita ruratsinqankunatapis pakiskirmi templupita apatsirqan. Llapan tsaykuna päsarqan Tayta Diospa profëtankuna willakuyanqannöllam.

14Tsaypitanam rey Nabucodonosorqa Jerusalénpita chunka waranqa (10,000) runakunata Babiloniaman prësu aparqan. Tsaynöllam prësu aparqan capitankunata, allin soldädukunata, artesänukunata y herrërukunatapis. Pobri runakunallatam tsaychö dëjaykurqan.

15Tsaynöllam Babiloniaman prësu aparqan rey Joaquínta, mamanta, warminkunata, capitanninkunata y Judá nacionchö täraq llapan yachaq runakunatapis.

16Tsaynöllam prësu aparqan qanchis waranqa (7,000) soldädukunata y waranqa (1,000) artesänukunata y herrërukunata. Llapan tsay runakunaqa guërraman aywayänanpä edäninkunachönam kayarqan.

17Tsaypitam Babilonia nacionpa mandaqnin rey Nabucodonosorqa Joaquínpa tiyun Mataníastana churarqan rey kananpä. Tsaynö churarmi jutinta trocatsirqan Sedequíasta.

18Sedequías ishkay chunka juk (21) watayuq kaykarmi rey kayta qallaykurqan. Payqa chunka juk watam Jerusalénpita mandarqan. Mamanmi Libna markapita Jeremíaspa tsurin Hamutal karqan.

19Sedequíaspis papänin Joacimnöllam Tayta Diosta mana cäsur jutsata rurarqan.

20Tsaymi Tayta Dios rabyarnin Jerusalénchö täraq runakunata y Judá nacionchö täraq runakunata puntanpita qarqurqan. Tsaypitanam rey Sedequías Babilonia nacionpa mandaqnin reypa contran shärirqan.

← Chapter 23 Jump to: Chapter 25 →